Propesiya nen Isaias​—Liwawa Parad Amin a Katooan II

Kapitulo Dise Sais

Sakey a Mensahe na Ilalo Parad Saray Maermen ya Akautibo

Isaias 55:1-13

1. Deskribien so kipapasen na saray Judion adestiero ed Babilonia.

 MAUDDIEM iman a panaon diad awaran na Juda. Dinakep so akisipanan a totoo na Dios manlapud binalegan dan dalin tan sikara so nanirap ed inkakautibo ra diad Babilonia. Tua, sikara so naabuloyan a nawalaay kawayangan pian gawaen so inagew-agew iran kimey da. (Jeremias 29:4-7) Arum so awalaan na propesyonal a trabaho odino negosyo. * (Nehemias 3:8, 31, 32) Anggaman kuan, mairap so bilay parad saray Judion akautibo. Sikara so akautibo ed pisikal tan espiritual a paraan. Nengnengen tayo no panon.

2, 3. Panon a naapektaan so panagdayew na saray Judio ed si Jehova lapud inkadestiero ra?

² Sanen dineral na saray armada na Babilonia so Jerusalem nen 607 K.K.P., agda labat pinankibalatar so nasyon; inapektaan da met a maong so tuan panagdayew. Nilimas da so templo nen Jehova tan dineral da itan, ya agla kinmurang so uksoyan na inkasaserdote lapud akautibo so arum ed tribu nen Levi tan pinatey da so arum. Lapud naandi la so abung a pandayewan da, pati say altar, tan say organisadon inkasaserdote, saray Judio so aglan balot nayarin mangiyapay na saray bagat ed tuan Dios unong ya indatak na Ganggan.

³ Nayarian nin pansiansiaen na saray matoor a Judio so relihyoson pakabidbiran ed sikara diad pangagamil day panaggalsim tan panumbok ed Ganggan anggad posibli. Alimbawa, nayarian dan paliisan iray isesebel a tagano tan ngilinan so Sabaton. Balet diad panggawa ra ed satan, nasesesga ira ed panagludlurey na saray anakep ed sikara, lapud moriaen na saray taga-Babilonia a makulangkulang iray relihyoson ritual na saray Judio. Say makapaermen a kipapasen na saray adestiero so napatnagan ed saray salita na salmista: “Diad abay na saray il-ilog na Babilonia, inyurong kami, lanti, a nannangis kami, nen anodnonotan mi Sion. Ed saray kiew a sauce [alamo] diman ed pegley to insabit mi so saray harpa mi. Ta saray angyarawi ed sikami ya adakep kinaukolan da ed sikami sakey a kanta; tan saray nandarak ed sikami kinaukolan da ed sikami kasayaksakan, a kuan da, kantaan yo kami na sakey ed saray kankanta na Sion.”​—Salmo 137:1-3.

4. Akin a kaapaan parad saray Judio so panilalo a niliktar ira na arum iran nasyon, balet siopa so nakerewan da na tulong?

⁴ Siopa sirin so nayarin asinggeran na saray akautibon Judio parad ligliwa? Panlapuan na kilalaban da? Maseguron agmanlapu ed dinanman ed saray nasyon ya akapaliber ed sikara! Amin na saratan so andiay-pakayari sumpad saray armada na Babilonia, tan dakel so sumpa ed saray Judio. Balet wala ni so ilalo ed kipapasen da. Si Jehova, a nanrebeldian da sanen sikara ni so bulos, so matamoy ya anginatnat na makapaligsay-puson imbitasyon ed sikara, anggaman sikara so adestiero la.

“Dago Kayo ed Saray Danum”

5. Anto so kabaliksan na saray salitan “dago kayo ed saray danum”?

⁵ Panamegley nen Isaias, mapropetikon nansalita si Jehova ed saray Judion akautibo diad Babilonia: “O, amin a napgaan, dago kayo ed saray danum, tan say andian na pilak; dago kayo, manaliw kayo, tan mangan kayo; on, dago kayo, tan manaliw kayo na alak tan gatas ya anggapo so pilak tan anggapo so bayar to.” (Isaias 55:1) Sarayan salita so napno na simbolo. Alimbawa, konsideraen so imbitasyon a: “Dago kayo ed saray danum.” No anggapo so danum et imposible so manbilay. No anggapo itan a mablin likido, sikatayon totoo so manbilay labat na manga sakey simba. Kanian, matukoy so impangusar nen Jehova ed danum bilang metaphor (sakey a piguratibon salita) ed walan epekto na saray salita to ed saray akautibon Judio. Say mensahe to so makarepresko ed sikara, a singa ambetel ya inumen leleg na ampetang ya agew. Panampoten la na satan so maermen a kipapasen da, a narepreskoan so inkapgaan da ed katuaan tan inkatunong. Tan satan so mangiter ed sikara na ilalo na kawayangan manlapud inkakautibo. Siansia, pian nagunggonaan ira et kinaukolan ya oninum iray adestieron  Judio manlapud mensahe na Dios, manimano ed satan, tan onkiwas unong ed satan.

6. Panon a nagunggonaan iray Judio no manaliw ira na “alak tan gatas”?

⁶ Mangiyoopresi met si Jehova na “alak tan gatas.” Say gatas so mamakasil ed saray malangwer nin laman tan mamabaleg ed ugugaw. Ontan met, saray salita nen Jehova so mamabiskeg ed totoo to diad espiritual a paraan tan ontulong ed sikara a mamaelet ed relasyon da ed sikato. Komusta balet so alak? Say alak so mabetbet ya uusaren ed saray ponsia. Diad Biblia, nisiglaot itan ed inkaaligwas tan panagliket. (Salmo 104:15) Diad pangibabaga to ed totoo a “manaliw kayo na alak,” papaseguroan ira nen Jehova a sikaray magmaliw a “masayaksak” no sigpot-puso ira ya ompawil ed tuan panagdayew.​—Deuteronomio 16:15; Salmo 19:8; Uliran 10:22.

7. Akin a nikadkaduma so panangabagey nen Jehova ed saray adestiero, tan anto so ibabangat na satan nipaakar ed sikato?

⁷ Agaylay inkamapangasi nen Jehova a mangiyopresi ed satan ya espiritual a pakarepreskoan ed saray adestieron Judio! Lalon makatantanda so panangabagey to sano nodnonoten tayo so awaran na saray Judio diad inkabenger tan impanrebeldi ra. Agla ra makanepegan ed panangabobon nen Jehova. Balet, oniay insulat nen salmistan David pigaran siglo ed asasakbay: “Si Jehova mapangasi tan magrasya, mabanayar a manpasnok tan daakan ed panangasi. Sikato agmialaan na salita lawas; nisay pukoken to so petang na ulo to lawas.” (Salmo 103:8, 9) Imbes a pakseten so relasyon to ed totoo to, si Jehova so inmuna lan kinmiwas pian mipulangan. On, sikato so Dios a “manliket ed maaro ya abig na linawa.”​—Miqueas 7:18.

Lingon Panagmatalek

8. Iner so nanmatalekan na dakel a Judio, anggaman ed anton pasakbay?

⁸ Dakel a Judio so agnin siansia nanmatalek ed si Jehova parad kilalaban. Alimbawa, sakbay na inkagba na Jerusalem, saray manuley to so nanilalo ed tulong na saray makapanyarin nasyon, a singa ira akibalangkantis ed Ehipto tan Babilonia. (Ezequiel 16:26-29; 23:14) Tekep na maabig a rason, oniay impasakbay ed sikara nen Jeremias: “Naayew so too a manmatalek ed too, tan gawaen to a laman so taklay to, tan say puso to onsian ed Jehova.” (Jeremias 17:5) Ingen, ontan a mismo so ginawa na totoo na Dios!

9. Panon a nayarin ‘manggastos na pilak [so dakel a Judio] ed aliwan tagano’?

⁹ Natan et sikara so inaripen na sakey ed saray nasyon a nanmatalekan da. Nanmadmaran da kasi itan? Nayarin agni aderya so dakel, lapud oniay intepet nen Jehova: “Akin ta et gastosen yo so pilak ed aliwa a tagano? Tan say sagpot yo ed agmakapesel?” (Isaias 55:2a) No saray akautibon Judio so manmamatalek ed arum nilikud ed si Jehova, sikara so ‘manggagastos na pilak ed aliwan tagano.’ Sikara so ag-ibulos na Babilonia lapud ganggan to ya aglan balot naabuloyan ya onsempet iray akautibo. Diad katuaan to, anggapoy niyopresi na Babilonia pati say imperyalismo, komersyalismo, tan palson panagdayew to ed saray adestieron Judio.

10. (a) Panon a tumangan nen Jehova iray adestieron Judio no sikatoy talinengen da? (b) Anton sipanan so ginawa nen Jehova ed si David?

¹⁰ Akikasi si Jehova ed saray totoo to: “Talinengen yo ak a maseeseet, tan kanen yo so maong, tan panliketen yo komon so kamarerwa yo lanlamang ed inkataba. Ikiling yo so layag yo, tan dago kayo ed siak; dengel kayo, et say kamarerwa yo manbilay naani: et manggawa ak naani na ando lan ando a sipan ed sikayo, a sikato so saray ag-onsaew a panangasi nen David.” (Isaias 55:2b, 3) Say napanilaloan na sarayan naerasan la’d espiritual a totoo et si Jehova lambengat, a mapropetiko lan nansalita ed sikara panamegley nen Isaias. Akadependi so mismon bilay da diad italineng ed mensahe na Dios, lapud indalatdat to a diad panggawa ra ed satan et ‘manbilay so kamarerwa ra.’ Anto balet imay “ando lan ando a sipan” a ginawa nen Jehova parad saramay tinmalineng ed sikato? Satan a sipanan so nipaakar ed “saray ag-onsaew a panangasi nen David.” Pigaran siglo ed akadkauna, insipan nen Jehova ed si David a say trono to so “niletneg lawas.” (2 Samuel 7:16) Kanian, say “ando lan ando a sipan” ya asalambit dia so ontukoy ed pananguley.

Sakey a Permanentin Tomatawir ed Andi-anggaan a Panarian

11. Akin a singano agnapanisiaan na saray adestiero ed Babilonia so kasumpalan na insipan na Dios ed si David?

¹¹ Tua, say ideya nipaakar ed pananguley ed linya nen David so ompatnag ya agnapanisiaan na saray adestieron Judio. Abalang da la so dalin da tan pati say kipapasen da bilang nasyon! Balet ta temporaryo labat itan. Agnilingwanan nen Jehova so impisipanan to ed si David. Anggano ompatnag ya ag-itan nagawa unong ed punto de bista na too, ontalona so gagala na Dios nipaakar ed andi-anggaan a Panarian diad linya nen David. Balet panon tan kapigan? Nen 537 K.K.P., imbulos nen Jehova so totoo to manlapud impangautibo na Babilonia tan impawil to ira ed binalegan dan dalin. Kasin nanresulta iya ed inkiletneg na magnayon a panarian? Andi, nantultuloy ira a nampasakop ed sananey a paganon empiryo, say Medo-Persia. Agni anampot ‘iray aturon panaon’ na pananguley na saray nasyon. (Lucas 21:24, NW) Lapud anggapo so ari ed  Israel, say insipan nen Jehova ed si David so nansiansia nin ag-asumpal diad tinmumbok iran siglo.

12. Anton kundang so ginawa nen Jehova diad impanumpal to ed impisipanan to ed si David nipaakar ed Panarian?

¹² Masulok a 500 a taon kayari na inkibulos na Israel manlapud impangautibo na Babilonia, si Jehova so nanggawa na manunan kundang pian sumpalen so sipanan nipaakar ed Panarian sanen inyalis to so bilay na panguloan ya Anak to, say gapo na panamalsa to, manlapud mangatatawen a gloria ya inyalis to ed panag-anakan na Judion birhen a si Maria. (Colosas 1:15-17) Sanen inyanunsio itan ya ebento, oniay inkuan na anghel nen Jehova ed si Maria: “Sikato naani baleg, et ningaran ya Anak na Sankatageyan; et iter na Dios a Katawan ed sikato so trono nen David ya ama to; et manari lawas ed abung nen Jacob; et say panarian to andi angga to.” (Lucas 1:32, 33) Kanian si Jesus so nianak ed maarin linya nen David tan tinawir to so kanepegan na inkaari. Sano nitrono la, si Jesus so manuley ed “ando lan ando.” (Isaias 9:7; Daniel 7:14) Kanian nilukas la so pankanawnawa parad kasumpalan na pigara lan siglon sipan a si Arin David so ikdan nen Jehova na permanentin tomatawir.

“Managganggan ed Saray Baley”

13. Panon a nagmaliw si Jesus a “tasi ed saray baley,” diad ministeryo to tan sanen sikatoy tinmokotok ed tawen?

¹³ Anto so gawaen na sayan manari ed arapen? Oniay kuan nen Jehova: “Nia, sikato so inter ko a nipaakar ed tasi ed saray baley a pangulo tan managganggan ed saray baley.” (Isaias 55:4) Sanen binmaleg si Jesus, sikato so manangilaman nen Jehova diad dalin, say tasi na Dios diad saray nasyon. Legan na impanbilay to bilang too, say ministeryo to so akasentro ed “saray abalang a karnero na abung na Israel.” Anggaman kuan, sakbay a tuloy na intokotok to ed tawen, oniay imbaga nen Jesus ed saray patumbok to: “Manggawa kayo na saray babangatan ed amin a nasyones, . . . Nia, wala ak a naynay ed sikayo, ya angga ed kasampotan na mundo.” (Mateo 10:5, 6; 15:24; 28:19, 20) Kanian, asabi panaon, say mensahe na Panarian so nitarok ed saray aliwan Judio, tan arum ed sikara so akibiang ed kasumpalan na impisipanan ed si David. (Gawa 13:46) Diad satan a paraan, anggan kayari la na impatey, inkioli, tan intokotok to ed tawen, intuloy nen Jesus so nagmaliw a “tasi [nen Jehova] ed saray baley.”

14, 15. (a) Panon a pinaneknekan a mismo nen Jesus so pagmaliw a “pangulo tan managganggan”? (b) Anton ilalo so inawat na saray inmunan-siglon patumbok nen Jesus?

¹⁴ Si Jesus so magmaliw met a “pangulo tan managganggan.” Mitunosan ed sayan mapropetikon deskripsion, sanen wadiad dalin si Jesus et sigpot ya inawat to iray responsabilidad bilang ulo tan sikatoy angidaulo ed amin ya aspekto, a sinagyat to so dakel ya ulop na totoo, imbangat to ed sikara iray salita na katuaan, tan imparungtal to iray gunggona ya onsabi ed saramay ontumbok ed panangidaulo to. (Mateo 4:24; 7:28, 29; 11:5) Sikatoy epektibon angipasal ed saray babangatan to, ya imparaan to ira a manumpal ed kampanya na panagpulong ed arapen. (Lucas 10:1-12; Gawa 1:8; Colosas 1:23) Diad loob labat na talora tan kapalduan taon, niletneg la nen Jesus so pundasyon parad nankakasakey tan internasyonal a kongregasyon a manugyop ed nilibon membro a manlalapu ed dakel a rasa! Say tuan “pangulo tan managganggan” labat so makasumpal ed satan ya abalbaleg a kimey. *

¹⁵ Saramay atipon ed inmunan-siglon Kristianon kongregasyon so alanaan na masanton espiritu na Dios, tan sikara so awalaan na ilalo a magmaliw a kaiba nen Jesus a manuley diad mangatatawen a Panarian to. (Apocalipsis 14:1) Balet, aliwa lambengat a panaon na inmunan Inkakristiano so tutukoyen na propesiya nen Isaias. Ipapabitar na ebidensya a si Jesu-Kristo so agni nanuley bilang Ari ed Panarian na Dios anggad insabi na 1914. Kayarin tuloy na satan, agawa so sakey a kipapasen ed limog na alanaan iran Kristiano diad dalin a walaan na dakel a piparaan ed samay agawa ed saray adestieron Judio nen komanem a siglo K.K.P. Diad tua, say agawa ed saraman a Kristiano so mamawala na malalaknab a kasumpalan na propesiya nen Isaias.

Say Modernon-agew ya Inkakautibo tan Inkibulos

16. Anton gonigon so tinmumbok ya agawa kayari na inkitrono nen Jesus nen 1914?

¹⁶ Say inkitrono nen Jesus bilang Ari nen 1914 so nabidbiran ed agnaparaan a gonigon ed mundo. Akin? Lapud ta sanen sikatoy nagmaliw ya Ari, si Jesus so amagit ed si Satanas tan ed arum niran marelmeng ya espiritun pinalsa manlapud tawen. Manlapu la’d inkaplag to ed dalin, si Satanas so akibakal ed saray nakekeraan nin masantos, say nakdaan na alanaan iran Kristiano. (Apocalipsis 12:7-12, 17) Amantok itan nen 1918 sanen apatunda lawari so mapublikon panagpulong a kimey tan nipriso iray responsablin opisyales na Watch Tower Society makasengeg ed saray palson akusasyon ya isusumpa ed gobierno. Diad satan a paraan,  saray modernon-agew a lingkor nen Jehova so nidunget ed espiritual ya inkakautibo, a mangipanonot ed literal ya inkakautibo na saray Judio nensaman. Baleg a kabandayan so niwala ed sikara.

17. Panon ya anguman so kipapasen na saray alanaan nen 1919, tan panon ira ya apabiskeg?

¹⁷ Anggaman ontan, say akautibon kipapasen na saray alanaan a lingkor na Dios so agnambayag. Nen Marso 26, 1919, nibulos iray niprison opisyales, tan diad saginonor et naabsuelto so amin ya inkaso ed sikara. Inkalbo nen Jehova so masanton espiritu ed nibulos a totoo to, a pinabiskeg to ira parad kimey a manatalaran ed sikara. Makapaliket ta kinmiwas ira ed imbitasyon a “mangala ed danum na bilay ya andi bayar.” (Apocalipsis 22:17) Analiw ira na “alak tan gatas ya anggapo so pilak tan anggapo so bayar” tan sikara so apabiskeg ed espiritual parad makapakelaw ya ilalaknab a magano lan nagawa, sakey a bengatlan ag-atebek na saray alanaan a nakdaan.

Sakey a Baleg ya Ulop so Mamaparakep ed Saray Nilanaan na Dios

18. Anton duaran grupo so naromog ed limog na saray babangatan nen Jesu-Kristo, tan anto so tutugyopen na saratan natan?

¹⁸ Duaran klase na ilalo so pitamitam na saray babangatan nen Jesus. Unona, say “melag a pulok” a manbilang na 144,000 so natitipon​—alanaan iran Kristiano a Judio tan Gentil a manugyop ed “Israel na Dios” tan walaan na ilalon miuley ed si Jesus diad mangatatawen a Panarian to. (Lucas 12:32; Galacia 6:16; Apocalipsis 14:1) Komadua, diad kaunoran iran agew, say “baleg ya ulop” na ‘arum a karnero’ so ompapatnag a mismo. Saraya so walaan na ilalon manbilay ya andi-anggaan diad paraison dalin. Sakbay na ibetag na baleg a kairapan, sayan karaklan​—ya ag-ageteran so karakel da​—so manlingkor a kaiba so melag a pulok, tan sayan duaran grupo so manugyop ed “sakey a pulok” diad silong na “sakey a pastol.”​—Apocalipsis 7:9, 10; Juan 10:16.

19. Panon a say “nasyon” a datin ag-amta na Israel na Dios so kinmiwas ed tawag na satan ya espiritual a nasyon?

¹⁹ Say panitipon ed sayan baleg ya ulop so natebek ed onggendan iran salita na propesiya nen Isaias: “Nia, tawagen mo naani so sakey a nasyon ya agmo kabkabat; et say sakey a nasyon ya agto ka ni kabkabat ombatik naani ya onla ed sika, lapu ed kinen Jehova a Dios mo, tan lapu ed Santo na Israel; ta sikato pinagayaga to ka.” (Isaias 55:5) Diad saray taon kayari na inkibulos da manlapud espiritual ya impakakautibo, ag-atalosan a tampol na saray alanaan a nakdaan a sikara so usaren sakbay na Armagedon pian tugyopen so baleg a “nasyon” parad panagdayew ed si Jehova. Balet, diad inlabas na panaon, dakel a matuan-impanpuso ya andian na mangatatawen ya ilalo so akiulop ed saray alanaan tan sikara so maseseg a nanlingkor ed si Jehova a singa saray alanaan. Naimano na sarayan dinmagup so aparakep a kipapasen na totoo na Dios, a bibidbiren dan si Jehova so walad limog da. (Zacarias 8:23) Nen dekada na 1930 et atalosan na saray alanaan so peteg a pakabidbiran ed sayan grupo, ya ondarakel ed limog da. Atebek da a mantultuloy ni so baleg a panagtipon a kimey diad arapen. Say baleg ya ulop so manaapuran milimog ed akisipanan a totoo na Dios, tan tekep na maabig a rason.

20. (a) Diad panaon tayo, akin a pankaganatan so ‘pananap ed si Jehova,’ tan panon itan a nagawaan? (b) Panon so ikiwas nen Jehova ed saramay manaanap ed sikato?

²⁰ Diad panaon nen Isaias, nikelyaw so tawag ya: “Anapen yo si Jehova natan ta naromog yo ni; ontawag kayo ed sikato natan ta asingger ni.” (Isaias 55:6) Diad panaon tayo et matukoy irayan salita, parad saramay manugyop ed Israel na Dios tan parad say ondarakel a baleg ya ulop. Walaan na kondisyon so panamendisyon nen Jehova tan agto magnayon ya inatnat so imbitasyon to. Natan la so panaon pian anapen so pabor na Dios. Sano onsabi la so aturon panaon parad panangukom nen Jehova, atrasado lan tuloy itan. Kanian oniay kuan nen Isaias: “Say marelmeng paulyan to komon so dalan to, tan say too ya aliwa a maptek so saray kanonotan to; et ompawil komon ed Jehova, et sikato naani kasian to; tan ed Dios tayo, ta sikato perdonaen to naani ed daakan.”​—Isaias 55:7.

21. Panon ya apaneknekan ya agnanmatoor so nasyon na Israel ed inyabawag na saray inmuunan atateng da?

²¹ Saray salitan “ompawil komon ed Jehova” so mankabaliksan a saramay nepeg a magbabawi so walaan la na datin siglaotan ed si Jehova. Satan a balikas so mangipanonot ed sikatayo a dakel ya aspekto na sayan kabiangan na propesiya nen Isaias so primeron asumpal ed saray akautibon Judio ed Babilonia. Pigaran siglo ni ed asasakbay et inyabawag la na inmuunan atateng na sarayan akautibo so determinasyon da a tuloken si Jehova sanen inkuan dan: “Arawi pa komon [a nagawa] a manlapu ed sikami ya ikaindan mi si Jehova, pian manlingkor kami ed saray arum a dirios.” (Josue 24:16) Impatnag na awaran ya aminpigan agawa so ‘agkomon nagawa’! Say kakulangan na pananisia ed biang na totoo na Dios so rason no akin a sikara so adestiero ed Babilonia.

22. Akin ya imbaga nen Jehova a saray kanonotan tan daladalan to et mas atagey nen say totoo?

²² Anto so nagawa sano magbabawi ira? Panamegley nen Isaias et insipan nen Jehova a sikato so ‘mamerdona a daakan.’ Tan inyarum to: “Ta saray kanonotan ko agyo kanonotan, et saray dalan yo aliwa  ra met a daladalan ko, kuan nen Jehova. Ta unong ya atagtagey so saray tawen nen say dalin, ontan ira so saray dalan ko atagtagey ira nen saray dalan yo, tan saray kanonotan ko nen saray kanonotan yo.” (Isaias 55:8, 9) Si Jehova et ayadyari, tan agnaabot so katagey na kanonotan tan daladalan to. Anggan say panangasi to so ontan lan kalaknab ya agtayon balot nailaloan a nagegemtan. Ikonsidera pa iya: Sano perdonaen tayo so kaparan too, satan so kipapasen a peperdonaen na sakey a managkasalanan so sakey a managkasalanan. Amta tayo ya agmanbayag et nakaukolan tayo so panamerdona na arum a kapara tayon too. (Mateo 6:12) Balet si Jehova, anggaman agton balot nakaukolan so panamerdona et mameperdona ed sikatayo diad “daakan” a paraan! On, sikato so Dios a walaan na matalonggaring a maaron-kaabigan. Tan diad panangasi to et lulukasan nen Jehova iray durongawan na tawen, ya ikakalbo to iray bendisyon ed saramay ompawil ed sikato diad interon puso ra.​—Malaquias 3:10.

Saray Bendisyon ed Saramay Ompawil ed si Jehova

23. Panon ya inyilustra nen Jehova so inkasegurado na kasumpalan na salita to?

²³ Oniay insipan nen Jehova ed totoo to: “Unong a say uran tan say musiak a lurem onlasor ira a manlapu ed tawen, et ag-ira ompawil diman noag ingen salogen da so dalin, tan pambungaen da tan pambukelen da, tan pangitdan to na bini ed saray managtanaman tan tinapay ed manangan. Ontan met naani so salitak ya ompaway ed sangik; sikato naani ag-ompawil ed siak a paoypaoy, noag ingen sumpalen to naani so kaliktan ko, tan onaligwas naani ed bengatla a pangyakaran ko ed sikato.” (Isaias 55:10, 11) Seguradon nasumpal so amin ya imbaga nen Jehova. No panon a susumpalen na uran tan uran a yelo ya ompelag manlapud tawen so gagala ra a manalog ed dalin tan mamawala na bunga, ontan met so inkanapanmatalkan a tuloy na salita nen Jehova ya ompaway ed sangi to. Nasumpal so insipan to, a segsegurado.​—Numeros 23:19.

24, 25. Antoran bendisyon so manatalaran ed saray adestieron Judio ya onkiwas ed mensahe nen Jehova panamegley nen Isaias?

²⁴ Kanian, no talinengen na saray Judio iray mapropetikon nibalikas ed sikara panamegley nen Isaias, sikara so seguradon makagamor ed kilalaban ya insipan nen Jehova. Bilang resulta, naeksperiensya ra so baleg a gayaga. Inkuan nen Jehova: “Ompaway kayo naani a walaan na liket, tan nitonton a mareereen: saray palandey tan saray pukdol onarak-ak ira naani ed arapan yo a mankankanta ra; tan amin a kakiewan ed saray uma pantipaken da naani so saray lima ra. Dia ed pasen na sabitan ontubo naani so abeto; et dia ed pasen na tala ontubo naani so arrayan: et sikato naani nipaakar ed Jehova a sakey a ngaran [“bengatlan bantog,” NW], sakey a tanda ya ando lan ando ya agnapegpeg.”​—Isaias 55:12, 13.

²⁵ Diad saray taon kayari na 537 K.K.P., saray adestieron Judio so peteg a malikeliket a pinmaway ed Babilonia. (Salmo 126:1, 2) Sanen sinmabi ira ed Jerusalem, asabian da so dalin a napnoy sabsabitan tan masabit a kulkulitis​—lapud say dalin so nankibalatar ed loob na pigaran dekada. Balet makatulong la so akapawil a totoo na Dios diad alay dakep a panamasimbalo! Saray sabsabitan tan kulkulitis so nasalatan la na angkakabaleg a kakiewan, a singa say abeto tan arrayan. Lalon napatnagan so panamendisyon nen Jehova no manlingkor ed sikato so totoo to tekep na ‘pankankanta.’ Singano manliliket met a mismo so dalin.

26. Anton abenditon kipapasen so panggagayagaan na totoo na Dios natan?

²⁶ Nen 1919 et nibulos so nakdaan ed alanaan iran Kristiano manlapud espiritual ya inkakautibo. (Isaias 66:8) Kaiba so baleg ya ulop na arum a karnero, sikara natan so malikeliket a manlilingkor ed Dios diad espiritual a paraiso. Lapud andian ira na antokaman a matik na impluensya na Babilonia, panggagayagaan da so apaboran a kipapasen, a nagmaliw a “bengatlan bantog” parad si Jehova. Say inkaaligwas da ed espiritual so mangiglogloria ed ngaran to tan mangitatandoro ed sikato bilang Dios na tuan propesiya. Say agawaan la nen Jehova parad sikara so mangidemostra ed inka-Dios to tan ebidensya na inkamatoor to ed salita to tan ed inkamapangasi to ed saray magbabawi. Komon ta say amin a mantutultuloy a ‘manaliw na alak tan gatas ya anggapo so pilak tan anggapo so bayar’ so manliket ed panaglingkor ed sikato diad ando lan ando!

[Saray paimano ed leksab]

[Tepetepet Parad Panagaral]