Panon Kaimportante so Maaron-Kaabigan?

“SAY makapasagyat a bengatla ed mangaraldalin a too et say maaron-kaabigan to,” so inkuan na Biblia. (Uliran 19:22, NW) On, peteg a makapasagyat iray gawan kaabigan a papakiwasen na aro. Balet, say salitan “maaron-kaabigan” diad Biblia, so ontutukoy ed kaabigan a nayarin ibase ed dati lan relasyon, a niletneg la antis a nanggawa na kaabigan so sananey. Kanian, kabiangan ed satan so ideya ya inkamatoor.

Si Arin Joas na Juda so sinmaew ya amayubo ed sayan makapasagyat a kalidad. Baleg so otang a linawa to ed panginaen to tan ed si Joiada, a pangamaen to. Sanen anggapo ni sakey taon nen Joas, say marelmeng a bai to et ginawa toy inkasikato a reyna tan impapatey to so amin ya agagin lalaki nen Joas, a tomatawir ed trono. Balet, agto apatey so melag nin Joas, lapud sikatoy maal-alwar ya inyamot nen panginaen tan pangamaen to. Imbangat da met ed sikato so Ganggan na Dios. Sanen mantaon la na pitora si Joas, inusar nen pangamaen to so autoridad to bilang atagey a saserdote pian dusaen ed ipapatey so marelmeng a reyna tan pagmaliwen ya ari si Joas.​—2 Awaran 22:10–23:15.

Maabig so impanuley na kalangweran a Joas bilang ari anggad impatey na pangamaen to, balet ta sikatoy ginmapon nandayew ed talintao. Imbaki na Dios si Zacarias, ya ilalak nen Joiada, pian pasakbayan si Joas ed panag-apostasya to. Si Zacarias so impatupak nen Joas. Agaylan makapakebbiew a kiwas na ag-inkamatoor ed pamilyan akaotangan to na baleg a linawa!​—2 Awaran 24:17-21.

Ibabaga na Biblia: “Onia so ag-impannonot nen Joas ya ari ed saray kaabigan a ginawa nen Joiada ya ama [nen Zacarias] ed sikato, noag ingen pinatey to so anak to.” Sanen manpapanabos la si Zacarias, oniay inkuan to: “Si Jehova onnengneng ed sikato, tan sikato so anapen [“singilen,” NW] to.” Peteg ya agawa iray salita nen Zacarias, lapud nansakit na grabe si Joas tan sikatoy pinatey na mismon ariripen to.​—2 Awaran 24:17-25.

Imbes a magmaliw a singa si Arin Joas, amin ya ontulok ed sayan simbawa so nawalaan na alay abig ya arapen: “Say abig na linawa tan katooran agda ka komon ikaindan. . . . Dia ed ontan makaromog ka na pamalangkap . . . dia ed pakanengneng na Dios tan too.”​—Uliran 3:3, 4.