Antoray Labay Mon Itepet ed Dios?

SARAY totoo ed interon dalin so walaan na seryoson tepetepet nipaakar ed bilay. Kasin ontan ka met? Dakel so ontetepet ed saray relihyoson instruktor balet agda nagagamoran iray makapenek ya ebat. Arum so manumameng lan bukor ed sarayan tepet. Say arum so manpipikasi pian niwanwan. Kasin posibli ya ebatan na Dios iray pamaakaran a pakawewetwetan mo? Niraya so pigaran tepet ya ibabaga na dakel a labay dan itepet ed Dios.

Siopa kan talaga, O Dios?

Momoriaen na totoo so Dios unong ed impluensya na kultura ra, relihyon ya abangonan da, tan nayarin unong ed dilin panlabay da. Manguusar so arum a totoo na ngaran parad didiosen da; arum so basta manatawag ed sikato a Dios. Kasin importante itan? Kasin wala labat so saksakey a tuan Dios a mangipaparungtal na inkasikato tan say ngaran to ed sikatayo?

Akin a wala so pirmin paniirap?

No nansakit so sakey a too odino nanirap makasengeg ed agmaalwar odino imoral a paraan na panagbilay to, nayarin sikatoy manreklamo. Balet nayarin kabkabat to so sengegay paniirap to.

Anggaman ontan, dakel ni so pirmin maniirap anggaman aliwan sikaray responsable. Arum so manasagmak na grabe iran sakit. Mipupuligesgesan so arum ed singa agnatalonaan a kairapan ed pakawalaan na ayaman tan magenap a tagano parad pamilya ra. Dakerakel so nabibiktima ed krimen, bakal, turobos a karawalan, natural iran desyang, odino ag-inkahustisya manlapud saray totoon walad pakauley.

Natalosan ya oniay itetepet na dakel: ‘Akin a kasmak lan tuloy so oniaran kipapasen? Akin ya aabuloyan na Dios iyan amin a kairapan?’

 Akin a wadia ak? Anto so gagala na bilay?

Mabetbet irayan nitetepet lapud pakakadismaya na too a say inagew-agew ya aktibidad to so agmakapangiiter na peteg ya inkapnek​—tan nalilikna itan na dakel a totoo. Dakerakel so manisia a nayarin inggetar la na Dios ed gapo so kurang na bilay na kada too. Kasin tua itan? No talagan walaan na espisyal a gagala so Dios ed sika, seguradon labay mo ya amtaen itan.

Diad amin a libro a walad mundo, wala so sakey a malinew a mangibabagan satan et impuyan na Dios. Unong ya iilaloan mo ed mensahen peteg a nanlapud Dios a para ed amin a katooan, sayan libro so wala la ed dakerakel a lenguahe nen say dinanman nin libro a nisulat. Satan et say Masanton Biblia. Ipaparungtal ditan na Dios, say Amalsa na tawen tan dalin, so inkasikaton mismo tan say ngaran to. Kasin amtam so ngaran to? Kasin amtam so ibabagay Biblia nipaakar ed no anton klasen Persona so Dios? Kasin amtam so ibabaga na satan ed no anto so kakaukolanen na Dios ed sika?

 [Picture Credit Line ed pahina 2]

COVER: Chad Ehlers/Index Stock Photography

[Picture Credit Line ed pahina 3]

Palandey: Chad Ehlers/Index Stock Photography