Kasin Iimanoen nen Jehova so Gagawaen Mo?

PANON mon ebatan itan a tepet? Dakel so mangibagan: ‘Manisia ak ya inimano na Dios iray agawaan na saray lalakin singa si Moises, Gideon, tan David, balet agak segurado a sikatoy interesado ed antokaman a nagawaan ko. Aliwa ak a singa si Moises, Gideon, odino si David.’

Tua a walaray matoor a lalaki diad panaon na Biblia a nanggawa na nikadkaduma iran gawa na pananisia. Sikara so ‘analtalo na saray panarian, amepet na saray sangi leon, angerep ed biskeg na apoy, tan akapaliis ed tarem na kampilan.’ (Hebreos 11:33, 34) Balet, arum so angipatnag na pananisia ra diad ordinaryo iran paraan, tan say Biblia so mangipapaseguro ed sikatayo ya inimano met na Dios iray gawa na pananisia ra. Pian niyilustra, konsideraen iray Makasulatan ya alimbawa nipaakar ed sakey a managpastol, sakey a propeta, tan sakey a biin balo.

Angiyapay na Bagat so Sakey a Managpastol

Antoy nanonotan mo ed si Abel, say komaduan ilalak nen Adan tan si Eva? Nayarin nanonotan mo a sikatoy inatey a martir, a maseguron pigpigara ed sikatayo so makaeksperiensya na ontan. Balet manunan inimano na Dios si Abel lapud sananey a rason.

Sakey ya agew, si Abel so angala na pigara ed sankaabigan ya ayayep ed pulok to tan angiyapay na bagat ed Dios. Say apay to so nayarin ipapasen natan a melmelag, balet satan so inimano nen Jehova tan impatnag toy panangabobon to. Balet, aliwan satan labat. Kayari na ngalngalin apat a libon taon, pinuyanan nen Jehova si apostol Pablo ya isulat so nipaakar ed satan diad libro na saray Hebreo. Dakerakel a taon so linmabas, ag-alingwanan na Dios itan a simplin bagat!​—Hebreos 6:10; 11:4.

Panon a nampili si Abel no anton klase na bagat so iyapay to? Ag-ibabaga na Biblia, balet maseguron ninonot ton maong so pamaakaran. Sikatoy sakey a managpastol, kanian iilaloan a sikatoy mangiyapay na pigara ed pulok to. Balet, imanoen ya inter to so sankaabigan​—say ‘matabataba.’ (Genesis 4:4) Posibli met a dinalepdep to iray imbalikas nen Jehova ed serpiente diad hardin na Eden: “Mangyan ak na gulaan ed sika tan say bii, tan gulaan ed saray ilalak mo tan ilalak [“bini,” NW] to; sikato sugaten to so ulom, et sika sugaten mo so mukor to.” (Genesis 3:15; Apocalipsis 12:9) Anggaman agto natebek so pakabidbiran na “say bii” tan say “bini” to, nayarin amoria nen Abel a say ‘panugat ed mukor’ na bini na bii et managlawi ed pamaagus na dala. Maseguron binidbir to ya anggapo lay mamabli nen say mabilay, onlilinawa a pinalsa. Say sankaimportantian et matukotukoy so imbagat to.

Singa si Abel, saray Kristiano natan so mangiyaapay met na saray bagat ed Dios. Aliwan saray panguloan ed pulok so iyaapay da noagta say “bagat a panangidayew, salanti, say bunga na saray bibil a mangiwakawak na ngaran na [Dios].” (Hebreos 13:15) Saray bibil tayo so mangiwawakawak sano inanabang tayo ed arum so pananisia tayo.

Labay mo ta ya onaligwas so kalidad na bagat a panangidayew mo? Sirin nonoten a maong iray pankaukolan na totoo ed teritorya yo. Antoray pampapagaan da?  Antoray paniinteresan da? Antoran aspekto na mensahe ed Biblia so makasagyat ed sikara? Diad kada pampupulong mo, analisaen so pitotongtong mo pian lalon magmaliw ka ya epektibo. Tan sano itotongtong mo so nipaakar ed si Jehova, nawalaan ka na kombiksion, tekep na inkasimoon. Gawaen so bagat mo a tuan “bagat a panangidayew.”

Nampulong so Propeta ed Saray Agmaawat a Totoo

Konsideraen natan si propetan Enoc. Nayarin bukbukor to ed saman so tasi nen Jehova a Dios. Kasin singa ka si Enoc, a bukbukor mo ed pamilyam so matoor a manlilingkor ed si Jehova? Kasin bukbukor mo ed klase yo odino diad pantratrabahoan mo so manutumbok ed saray prinsipyo ed Biblia? No ontan, nayarin nipapaarap ka ed saray angat. Nayarin susugsogan ka na kakaarom, kakanayon, kaklasem, odino katrabahoan mo a sumlangen iray ganggan na Dios. Nayarin ikuan da: “Anggapo so makaamta ed gagawaen mo. Agmi ‘tan ibaga.” Nayarin ipilit dan kakulangkulangan so pampaga ed saray estandarte na Biblia ed moral lapud agpibabalian na Dios so gagawaen mo. Lapud liknaen dan sumlang so panag-isip tan kakikiwas mo ed sikara, nayarin gawaen day amin a posibli pian pakapuyen ka.

Tua, aliwan mainomay so pangarap ed ontan iran desdes, balet aliwa itan ya imposible. Nonoten pay Enoc, say komapiton too ed linya nen Adan. (Judas 14) Sanen nianak si Enoc, maslak a totoo so andian la na pakalikna nipaakar ed moral. Mabanday so panagsalita ra; “makapatalagnaw” so kondukta ra. (Judas 15, NW) Sikaray kinmiwas a kaparparay ikikiwas na maslak a totoo natan.

Panon ya akapansungdo si Enoc? Say ebat ed satan a tepet so makapainteres ed sikatayo natan. Anggaman nayarin si Enoc labat ed saman so too diad dalin a nandayew ed si Jehova, sikatoy talagan agnanbukbukor. Nankurang si Enoc a kaibay Dios.​—Genesis 5:22.

Akasentro so bilay nen Enoc diad pamaliket ed Dios. Amta ton say pankurang a kaibay Dios et aglabat mankabaliksay pambilay a malinis tan walaan na moral. Sikatoy iilaloan nen Jehova a manpulong. (Judas 14, 15) Kaukolan a napasakbayan iray totoo a saray agmaridios a gawa ra et sankaimano. Intultuloy nen Enoc so nankurang a kaibay Dios diad masulok a 300 a taon​—andukerukey nen say pansusungdo tayo. Sikatoy nansiansian nankurang a kaibay Dios anggad impatey to.​—Genesis 5:23, 24.

Singa si Enoc, sikatayoy niganggan met a manpulong. (Mateo 24:14) Nilikud ed pampulong ed kabkaabungan, panggunaetan tayon ipasabi so maong a balita ed saray kakanayon, katrabahoan, tan kaklase tayo. Balet, no maminsan et nayarin masuyat itayo a manpulong. Kasin ontan ka? Agka nadidismaya. Aligen iray inmunan Kristiano, tan ipikasim ed Dios a makapanpakpel ka. (Gawa 4:29) Agbalot lilingwanan a legan kan mankukurang a kaibay Dios, agkan balot manbukbukor.

Angiparaan na Nakan so Biin Balo

Isipen pa so sakey ya ag-angaranan a biin balo ya amiduan atumangan lapud impangiparaan to na simplin nakan! Sikatoy aliwan Israelita noagta sankaili a nambilay nen komasamplon siglo K.K.P. diad baley na Zarepta. Nen magano lan manampot so andukey a panaon na kelang tan eras, ngalngali lan naupot so abaston tagano na sayan balo. Sankaakop a tapong tan dugarugan larak labat so akeraan ed sikato parad unor lan pangan to tan say anak to.

Diad satan a kipapasen et sinmabi so sakey a bisita, say propeta na Dios a si Elias, a miaapag ed daiset a tagano na balo. Dugduga labat itan parad sikato tan say anak to, tan talagan anggapo lay nilaem to a parad bisita. Balet sikatoy pinaseguroan nen Elias, panamegley na salita nen Jehova, a no pakanen to si Elias, sikato tan say anak to so agnaerasan. Kinaukolan so pananisia pian nakombinsin say Dios na Israel so mangimano ed sikato bilang sankaili a balo. Ingen, sinisia to si Elias kanian tinumangan nen Jehova. “Say kamaw na tapong ag-abawasan, anggan say salongkit na larak agkinmulang, unong a sinalita nen Jehova, a nansalita panamegley nen Elias.” Say bii tan say anak to so agkinmulang na abasto ya anggad anampot so eras.​—1 Arari 17:8-16.

Siansia ni, akaawat lamet na bendisyon so balo. Agawa a kayari na saman a milagro, nansakit so inadaron anak to tan inatey. Lapud akasian nen Elias, kinerew to ed si Jehova a paolien so ugaw a laki. (1 Arari 17:17-24) Mankabaliksan itan na panggaway nikaduman milagro. Anggapo nin balot ed saman so toon apaoli! Kasin kasian lamet nen Jehova iyan sankaili a balo? On, kinasian to. Inikdan nen Jehova na pakapanyari si Elias a mamaoli ed ugaw a laki. Diad saginonor et oniay inkuan nen Jesus nipaakar ed sayan apribilihyoan a bii: “Dakel nensaman so bibii a balo dia ed Israel . . . Ingen anggapo ed sikara so nibakian nen Elias, noag dia ed Zarepta, dia ed dalin na Sidon, ed sakey a biin balo.”​—Lucas 4:25, 26.

Natan et aliwan maligen so kipapasen na ekonomya, anggan diad saray maasenso lan bansa. Walaray angkakabaleg a korporasyon ya angekal ed saray empleyado ra a matoor a mantratrabaho ed loob la na saray dekada. Lapud maniilalo ya ompan naandian na trabaho, nayarin arum a Kristiano so natukso a mantrabaho ed andukerukey ya oras, ta pian sikatoy pansiansiaen ed kompanya. Lapud satan et daiset lay panaon to ya onatendi ed saray Makristianon miting, mibiang ed lawak na ministeryo, odino mangasikaso ed emosyonal tan espiritual iran pankaukolan na pamilya to. Balet, moriaen ton sikatoy nepeg a mansiansia ed satan a trabaho antokaman so nagawa.

 Say sakey a Kristiano a walad ontan a mairap a kipapasen ed ekonomya et makanepegan a manpaga. Mairap so mananap na trabaho ed sarayan panaon. Maslak ed sikatayo so agmanggugunaet ya onyaman, balet singa samay bii a balo ed Zarepta, labay tayon nalegpet so bilay tayo. Balet, papanonotan itayo nen apostol Pablo ya inkuan na Dios: “Agtaka naani taynan, tan agtaka naani ikaindan.” Kanian mataletalek itayon mangibagan: “[Si Jehova] sikato so mananulong ko; agak naani ontakot: Anto so nayarin gawaen ed siak na too?” (Hebreos 13:5, 6) Inrisga nen Pablo so bilay to ed satan a sipan, et si Jehova so lawas angasikaso ed sikato. Ontan met so gawaen na Dios ed sikatayo no sikatoy agtayo ikaindan.

Nayarin liknaen tayo ya agtayon balot naparaan iray makatantandan ginawa na saray maespiritual a lalaki a singa si Moises, Gideon, tan David, balet sarag tayon aligen so pananisia ra. Tan sarag tayon nonoten iray simplin gawa na pananisia a ginawa di Abel, Enoc, tan say biin balo ed Zarepta. Interesado si Jehova ed amin a gawa na pananisia tayo​—anggan angkelag iratan. Sano ipupulisay na sakey ya estudyanten matakot ed Dios iray drugan iyoopresi na kalimog to, sano papaliisan na Kristianon trabahador so imoral iran pananagyat diad pantratrabahoan to, odino sano matoor ya onaatendi ed saray miting ed kongregasyon so sakey a maedad lan Tasi anggaman mikekesaw la tan maletey so bunigas to, iimanoen nen Jehova itan. Tan sikatoy manliket!​—Uliran 27:11.

Kasin Iimanoen Mo so Gagawaen na Arum?

On, iimanoen nen Jehova so gagawaen tayo. Kanian, bilang umaalig ed Dios, kaukolan ya alerto itayon mangimano ed pansasagpot na arum. (Efeso 5:1) Akin ya ag-imanoen a maong iray angat ya aarapen na saray kaparam a Kristiano pian makaatendi ed saray miting ed kongregasyon, makapibiang diad lawak na ministeryo, tan pian nagawaan iray inagew-agew a kimey da?

Sirin, ipaamta ed saray kapara yon mandadayew ed si Jehova a papablien yon tuloy iray sagpot da. Naliketan ira lapud iimanoen yo ra, tan nayarin say pampapaga yo so mamaseguro ed sikara a si Jehova so mangiimano met ed sikara.