Kasin Itetepet Mon, “Iner so Kawalaan nen Jehova?”
Kasin Itetepet Mon, “Iner so Kawalaan nen Jehova?”
“Inmarawi ra ed siak . . . Et ag-ira met nansalita, Iner so kawalaan nen Jehova?”—JEREMIAS 2:5, 6.
1. Sano itepet na too ya, “Iner so kawalaan na Dios?,” anto so nayarin walad kanonotan da?
“INER so kawalaan na Dios?” Ontan so itetepet na dakel a totoo. Sasalien labat na arum ed sikara a talosan so manunan katuaan nipaakar ed Manamalsa, salanti, iner so kawalaan to? Itetepet itan na arum kayari na malaknab a kalamidad odino sano naiirapan la ran maong tan agda natalosan no akin ya agni onsalet so Dios. Arum balet so agmangitetepet ed satan lapud ipupulisay da so mismon ideya a walay Dios.—Salmo 10:4.
2. Siopara so tinmalona ed panaanap da ed Dios?
2 Siempre, dakel iray mamibidbir ed daakan a prueba a wala so Dios. (Salmo 19:1; 104:24) Arum ed saratan so kontento la diad pakawalaan da na sakey a klase na relihyon. Balet say pirmin panangaro ed katuaan so amakiwas ed saray dakerakel ni, diad interon dalin, a mananap ed tuan Dios. Aliwan maapa so sagpot da lapud sikatoy “ag-arawi ed sinansakey ed sikatayo.”—Gawa 17:26-28.
3. (a) Iner so panaayaman na Dios? (b) Anto so labay ya ibaga na Makasulatan a tepet ya, “Iner so kawalaan nen Jehova?”
3 Sano talagan naromog la na sakey si Jehova, namoria to a say “Dios [et] sakey ya espiritu,” ya agnanengneng na too. (Juan 4:24) Tinukoy nen Jesus so tuan Dios bilang say “Amak a walad tawen.” Anto so kabaliksan na satan? Diad espiritual a pantalos, say kawalaan na mangatatawen ya Ama tayo et sankatageyan, no panon a say literal a katawenan et walad atagtagey a maong na dalin. (Mateo 12:50; Isaias 63:15) Balet, anggaman agtayo nanengneng so Dios ed literal iran mata tayo, pagmamaliwen ton posibli so pakapikabat tayo ed sikato tan pakaaral na dakel ni nipaakar ed saray gagala to. (Exodo 33:20; 34:6, 7) Eebatan to iray tepet na saray masimoon a totoo a malabay a makaamta ed kabaliksan na bilay. Nipaakar ed saray bengatlan mangaapekta ed bilay tayo, sikato so angitarya na napanmatalkan a basiyan pian natebek tayo no anto so punto de bista to, salanti, no panon ton momoriaen iratan a bengatla tan no kasin mitunosan iray pilalek tayo ed saray gagala to. Kaliktan to a manusisa itayo nipaakar ed saratan a bengatla tan masimoon itayon mansagpot pian naromog iray ebat. Panamegley nen propeta Jeremias, binaat nen Jehova so totoo ed kadaanan ya Israel lapud agda ginawa itan. Amta ra so ngaran na Dios, balet agda intetepet, “Iner so kawalaan nen Jehova?” (Jeremias 2:6) Agda inyuna ed inkasikara so gagala nen Jehova. Ag-ira nampaigiya ed sikato. Sano nipaarap ed baleg odino melag man a dedesisyonan, kasin itetepet yon, “Iner so kawalaan nen Jehova?”
Saramay Tinmupleg ed Dios
4. Panon itayon nagunggonaan ed ehemplo nen David nipaakar ed itutupleg ed si Jehova?
4 Sanen kalangweran ni si David, ya ilalak nen Jesse, abayuboan to so mabiskeg a pananisia ed si Jehova. Kabat to si Jehova bilang say ‘mabilay a Dios.’ Naeksperiensya nen David a mismo so pananalimbeng nen Jehova. Lapud apakiwas ed pananisia tan aro ed ‘ngaran nen Jehova,’ tinigway nen David so armadon maong a Filisteon higante a si Goliat. (1 Samuel 17:26, 34-51) Balet, agnagmaliw a mataletalek si David ed inkasikaton dili lapud intalona to. Agto inkatunongan ya antokaman so ginawa to ed saman et sikatoy bendisyonan la nen Jehova. Aminpiga legan na saray taon a tinmumbok, tinmupleg si David ed si Jehova sanen sikatoy nipaarap ed saray dedesisyonan. (1 Samuel 23:2; 30:8; 2 Samuel 2:1; 5:19) Oniay intuloy ton impikasi: “Iparungtal mo ed siak so saray dalan mo, O Jehova; ibangat mo ed siak so saray basbas mo. Itonton moak ed katuaan mo, tan ibangat moak: ta sika so Dios na kilalaban ko; mantalaran ak ed amin ya agew.” (Salmo 25:4, 5) Agaylan abig ya ehemplo ya aligen tayo!
5, 6. Panon so intupleg nen Josafat ed si Jehova diad nanduruman panaon na bilay to?
5 Diad panaon nen Arin Josafat, a komaliman ari ed maarin linya nen David, say nanmumuyong ya armada na taloran nasyon so nanggetman mibakal ed Juda. Sanen sikatoy nipaarap ed sayan pankaganatan a pamaakaran na interon nasyon, si Josafat et “impasen to so inkasikato a mananap ed Jehova.” (2 Awaran 20:1-3) Aliwa iyan sankaprimeroan ya intupleg nen Josafat ed si Jehova. Impulisay na ari so panagdayew ed Baal a pirmin aagamilen na apostatan mamaamianen a panarian na Israel tan pinili to so pankurang ed saray dalan nen Jehova. (2 Awaran 17:3, 4) Kanian sanen sikatoy nipaarap ed baleg a problema, panon so ‘impananap [nen Josafat] ed si Jehova’?
6 Diad mapublikon pikakasi ya inyapay to ed Jerusalem legan na saman a mapeligron panaon, impabitar nen Josafat ya anonotan to so sankabiskegan a pakapanyari nen Jehova. Minorekdek to so gagala nen Jehova unong a niparungtal ed impamatakyas To ed arum iran nasyon tan diad impangiter to ed Israel na sakey a dalin bilang tawir. Binidbir na ari a nakaukolan toy tulong nen Jehova. (2 Awaran 20:6-12) Kasin inyabuloy nen Jehova a sikatoy naromog ed saman ya inkagawa? On. Panamegley na Levitan si Jahaziel, angitarya si Jehova na espesipikon direksion, tan diad tinmumbok ya agew et pinambiktorya To so totoo To. (2 Awaran 20:14-28) Panon yon naseguro ya abuloyan met nen Jehova a sikatoy naromog yo sano paidirehi kayo ed sikato?
7. Saray pikakasi na siopa so dedengelen na Dios?
7 Aliwan manangidumaduma si Jehova. Iimbitaan to so totoo manlapud amin a nasyones a mananap ed sikato panamegley na pikakasi. (Salmo 65:2; Gawa 10:34, 35) Amta to so walad puso na saramay onkekerew na tulong ed sikato. Papaseguroan to itayo a dengelen to iray pikakasi na saray matunong. (Uliran 15:29) Aabuloyan to a sikatoy naromog na saramay datin ag-interesado ed sikato balet ta mapaabeba natan a manaanap ed panangidirehi to. (Isaias 65:1) Dedengelen to ni ingen iray pikakasi na saramay sinmaew a manumpal ed ganggan to balet ta mapaabeba la natan a magbabawi. (Salmo 32:5, 6; Gawa 3:19) Ingen, sano say puso na sakey a too et agmanpapasakop ed Dios, anggapoy kakanaan na saray pikakasi na satan a too. (Marcos 7:6, 7) Konsideraen so pigaran alimbawa.
Kinmerew Ira Balet Ag-ira Naebatan
8. Anto so sengegan ya ag-inabobonan nen Jehova iray pikakasi nen Arin Saul?
8 Kayari na impangibaga nen propeta Samuel ed si Arin Saul a sikatoy impulisay la na Dios lapud inkatunganga to, nandakmomo si Saul ed si Jehova. (1 Samuel 15:30, 31) Balet ta pankuankuanan labat iman. Say pilalek nen Saul et aliwan say pagmaliw a matulok ed Dios noagta pian sikatoy pagalangan na totoo. Saginonor, sanen babakalen na saray Filisteo so Israel, si Saul so tinmupleg ed si Jehova diad pormalidad labat a paraan. Balet, sanen anggapoy naawat ton ebat, sikatoy tinmupleg ed sakey ya espiritista, anggaman amta ton kokondenaen itan nen Jehova. (Deuteronomio 18:10-12; 1 Samuel 28:6, 7) Bilang segek, oniay kuan na 1 Awaran 10:14, ed New World Translation, nipaakar ed si Saul: “Sikatoy agtinmupleg ed si Jehova.” Akin? Lapud saray pikakasi nen Saul et agnibase ed pananisia. Kanian, singano sikatoy agmet lanlamang nampikasi.
9. Anto so makapuy ed ikekerew nen Zedekias na panangidirehi nen Jehova?
9 Mipadpara, diad panasingger lay anggaan na panarian na Juda, dakel niran pikakasi so inyapay tan saray propeta nen Jehova so tinuplegan. Balet, ilalaok na saray totoo so idolatriya ed ibabaga ran panangigalang ed si Jehova. (Sofonias 1:4-6) Anggaman sikaray tuple-tupleg met ed Dios, ag-ira masimoon a nampasakop ed linawa to. Akikasi si Arin Zedekias ed si Jeremias pian ontupleg ed si Jehova parad sikato. Imbaga la nen Jehova so nepeg a gawaen na ari. Balet lapud kakulangan na pananisia tan takot ed totoo, agtinulok na ari so boses nen Jehova, tan anggapo lay arum ya ebat nen Jehova a makapaliket ed ari.—Jeremias 21:1-12; 38:14-19.
10. Anto so makapuy ed paraan na impananap nen Johanan na panangidirehi nen Jehova, tan anto so naaralan tayo ed impakalingoan to?
10 Kayari na inkaderal na Jerusalem tan sanen inmalis la so armada na Babilonia ya awit iray adestieron Judio, imparaan nen Johanan ya awiten ed Ehipto so melag a grupo na saray Judio ya atilak ed Juda. Ginawa da iray implano ra, balet sakbay iran inmalis et kinerew da ed si Jeremias ya ipikasi to ira tan kerewen so panangidirehi nen Jehova. Balet sanen agda naawat so ebat a kakaliktanen da, tinmuloy ira tan ginawa ra so implano ra. (Jeremias 41:16–43:7) Kasin natetebek yo iray leksion ed sarayan agawa a makagunggona ed sikayo, ta pian no ontupleg kayo ed si Jehova et abuloyan ton sikatoy naromog yo?
“Mantultuloy Yon Seguroen”
11. Akin a nakaukolan tayon iyaplika so Efeso 5:10?
11 Say lalanoren na tuan panagdayew et aliwa labat lan say pangisimbolo tayo ed dedikasyon tayo panamegley na kipalseb ed danum, iyatendi ed saray miting ed kongregasyon, tan pibiang ed mapublikon ministeryo. Nalalanor so interon dalan na kabibilay tayo. Inagew-agew itayon nidudunget ed saray pakadesdesan—arum so masilib, arum so parungtalan—a makapangisuawi ed sikatayo manlapud dalan a mitunosan ed maridios a debosyon. Panon itayon onkiwas ed sarayan pananesdes? Sanen sinulat to iray matoor a Kristianos diad Efeso, oniay impaseseg nen Pablo ed sikara: “Mantultuloy a seguroen no anto so makapaliket ed Katawan.” (Efeso 5:10, NW) Say bentaha ed panggawa ed satan so niyilustra ed dakel iran situasyon a nisalaysay ed Kasulatan.
12. Akin ya agnanliketan nen Jehova so impangiyalis nen David ed kaban na sipan dia ed Jerusalem?
12 Kayarin nipawil so kaban na sipan dia ed Israel tan inkiyatol to diman ed Kiriath-jearim diad loob na dakel a taon, pinilalek nen Arin David ya iyalis itan diad Jerusalem. Sikato so tinmupleg ed saray pangulo na totoo tan inkuanto a say Kaban so iyalis ‘no isipen dan maong itan tan satan so manlapu ed si Jehova.’ Balet agto nan-usisan maong pian naseguro to so linawa nen Jehova ed satan a pamaakaran. No ginawa to itan, say Kaban so agbalot komon ilugan ed kariton. Sakbaten itan komon na saray Kohatitan Levita, unong a malinew ya ingganggan ed sikara na Dios. Anggaman mabetbet ya ontupleg si David ed si Jehova, diad sayan pankanawnawa et agto agawaan itan ed suston paraan. Makapadesyang so resulta. Oniay binidbir nen David ed saginonor: “Si Jehova a Dios tayo nanggawa na impamuyak ed sikatayo, ta sikato so agtayo inanap unong ed panguksoyan.”—1 Awaran 13:1-3; 15:11-13; Numeros 4:4-6, 15; 7:1-9.
13. Diad sakey a kansion a kinanta sanen matalonan niyalis so Kaban, anton panonot so nilaktip?
13 Sanen niyalis a siansia na saray Levita so Kaban manlapud abung nen Obed-edom pian awiten ed Jerusalem, kinansion so kantan ginawa nen David. Nilaktip ed satan so impapuson panonot: “Anapen yo so Jehova tan say biskeg to; manliket komon so puso na saray mananap ed Jehova. Nonoten yo so makapakelaw a kimkimey to a ginawa to, saray tongol to, tan saray panangukom na sangi to.”—1 Awaran 16:11, 12.
14. Panon itayon nagunggonaan ed maabig ya ehemplo nen Solomon tan ed saray impakalingoan to ed saginonor a parte na bilay to?
14 Sakbay na impatey to, oniay insimbawa nen David ed anak ton si Solomon: “No [si Jehova] so anapen mo, sikato so naromog mo.” (1 Awaran 28:9) Sanen nitrono la si Solomon, sikato so linma ed Gabaon, a kawalaan na tolda na duypo, tan sikatoy angiyapay na bagat ed si Jehova. Diman et oniay inkuan nen Jehova ed si Solomon: “Kerewen mo so iter ko ed sika.” Bilang ebat ed kerew nen Solomon, si Jehova so mabunlok ya angiter ed sikato na kakabatan tan pikakabat a mangukom ed Israel, tan inyarum To ni ed satan so kayamanan tan kagalangan. (2 Awaran 1:3-12) Diad impangusar to ed arkitektural a plano ya inter nen Jehova ed si David, impaalagey nen Solomon so alay dakep a templo. Balet no nipaakar ed panamaley to, sinmaew si Solomon a mananap ed si Jehova. Angasawa si Solomon na bibii ya agmandadayew ed si Jehova. Diad saginonor iran taon to, atangguyor da so puso to ya onarawi ed si Jehova. (1 Arari 11:1-10) Anggan panon lay inkabantog, inkadunong, odino inkakabat tayo, importante a ‘mantultuloy a seguroen no anto so makapaliket ed Katawan’!
15. Sanen sinmumpa si Zerah ya Etiope ed Juda, akin a makapanpikasi si Asa tekep na kompiyansa ya iliktar nen Jehova so Juda?
15 Say pankaukolan ed satan so lalon nidanet diad rekord na impan-ari nen Asa, say apo-ed-pueg nen Solomon. Labinsakey a taon kayari na impagmaliw nen Asa ya ari, inggaulo nen Zerah ya Etiope so sakey milyon ya armada sumpad Juda. Kasin iliktar nen Jehova so Juda? Masulok a 500 a taon ed akadkauna, malinew lan imbinsabinsa nen Jehova no anto so nailaloan na totoo to no sikatoy talinengen da tan sumpalen da iray ganggan to tan no anto so nagawa ed sikara no agda talinengen. (Deuteronomio 28:1, 7, 15, 25) Diad gapo na uley to, inekal nen Asa manlapud saray nasasakopan to iray altar tan sekseklang ya uusaren ed palson panagdayew. Pinaseseg to iray totoo ya ‘anapen da si Jehova.’ Ginawa la itan nen Asa sakbay nin nipaarap ed desyang. Kanian tekep na pananisia ed si Jehova, makapanpikasi si Asa ya onkiwas si Jehova ed biang da. Say resulta? Say Juda so naikdan na makapadinayew ya impanbiktorya.—2 Awaran 14:2-12.
16, 17. (a) Anggaman nambiktorya si Asa, anto so impanonot nen Jehova ed sikato? (b) Sanen agmakabat so inkiwas nen Asa, anton tulong so niiter ed sikato, balet panon so inkiwas to? (c) Panon itayon nagunggonaan diad panaral ed kondukta nen Asa?
16 Anggaman kuan, sanen sinmempet si Asa a nambiktorya, imbaki nen Jehova si Azarias pian abeten so ari tan ikuan to: “Denglen yo ak, Asa, tan amin a Juda tan Benjamin: Si Jehova wala ed sikayo, leleg a wala kayo ed sikato; et no sikato so anapen yo, sikato so naromog yo; balet no sikato so ikaindan yo, sikayo so ikaindan to.” (2 Awaran 15:2) Tekep na apasimbalon seseg, inyalibansa nen Asa so tuan panagdayew. Balet kayari na 24 taon, ag-inanap nen Asa si Jehova sanen sikatoy nipaarap lamet ed bakal. Agto tinmupleg ed Salitay Dios, tan agto ninodnonot no anto so ginawa nen Jehova sanen nilubak na Etiopen armada so Juda. Sikato so makulangkulang ya akialyansa ed Sirya.—2 Awaran 16:1-6.
17 Lapud saya, pinakiwas nen Jehova si Hanani a managnengneng pian mamaat ed si Asa. Anggan diad saman a bekta, sanen nisalaysay so panmoria nen Jehova ed pamaakaran, nagunggonaan ni komon si Asa. Imbes, sikato so naopendi tan impaipangaw to si Hanani! (2 Awaran 16:7-10) Agaylan makapaermen! Komusta itayo balet? Kasin aanapen tayo so Dios balet ta ipupulisay tayo so simbawa to? Sano usaren na sakey a mangiyaansakit a matatken so Biblia pian simbawaen to itayo lapud nigagalet itayo la ed mundo, kasin aapresyaen tayo so maaron panutulong to ed sikatayo pian naamtaan tayo “no anto so makapaliket ed Katawan”?
Aglilingwanan so Ontepet
18. Panon itayon nagunggonaan ed saray salita nen Elihu ed si Job?
18 Sano nadedesdes, nayarin nalingo ni ingen so sakey a maabig so rekord to diad serbisyo ed si Jehova. Sanen adapoan si Job na makapadimlan sakit, inatey iray ananak to tan abalang iray kaykayarian to, tan sikatoy palson inakusaan na saray kakaaro to, say kanonotan to so nisentro la ed sikaton dili. Oniay impanonot ed sikato nen Elihu: “Anggapo so mankuan, Iner so kawalaan na Dios ya Akanggawa ed siak?” (Job 35:10) Kinaukolan ya isentro nen Job so imano to ed si Jehova tan nodnonoten to no anto so panmoria nen Jehova ed situasyon. Si Job so mapaabeban angawat ed satan a panonot, tan say ehemplo to so makatulong ed sikatayon manggawa met na ontan.
19. Anto so mabetbet ya ag-agawaan na totoo na Israel?
19 Amta na totoo na Israel so rekord na saray impideneng na Dios ed nasyon da. Balet ta satan so mabetbet dan nalingwanan sano aarapen da iray espesipikon situasyon diad bilay da. (Jeremias 2:5, 6, 8) Sanen nipaarap ira ed saray dedesisyonan ed bilay, ginegemtan da so panliketan dan dili imbes ya itepet dan, “Iner so kawalaan nen Jehova?”—Isaias 5:11, 12.
Mantultuloy ya Itepet, “Iner so Kawalaan nen Jehova?”
20, 21. (a) Siopa natan so mangipapatnag ed espiritu nen Eliseo diad panaanap na panangidirehi nen Jehova? (b) Panon tayon naalig tan nagunggonaan ed ehemplo na pananisia ra?
20 Sanen anampot lay mapublikon ministeryo nen Elias, inala nen katambayan ton si Eliseo so opisyal a kawes a naplag a nanlapud si Elias, linma ed Jordan, imbasig to ed danum tan oniay intepet to: “Iner so kawalaan nen Jehova, a Dios nen Elias?” (2 Arari 2:14) Inmebat si Jehova diad impangipatnag ton say espiritu to so wala la’d si Eliseo. Antoy naaralan tayo ed saya?
21 Wala met iray midpadparan agawa ed moderno iran panaon. Walaray alanaan a Kristiano ya angidaulo ed panagpulong a kimey so akasumpal la ed mangaraldalin a kurso ra. Saramay nimatalekan na panangasikaso so angusisa ed Kasulatan tan nampikasi ed si Jehova parad panangidirehi. Lawas iran ontetepet, “Iner so kawalaan nen Jehova?” Bilang resulta, nantultuloy si Jehova ya angiwanwan ed totoo to tan pinaaligwas to so kimey da. Kasin aaligen tayo so pananisia ra? (Hebreos 13:7) No ontan so gawaen tayo, mansiansia itayon maapit ed organisasyon nen Jehova, onkiwas tayo unong ed panangidirehi to, tan sigpot itayon mibiang ed gagawaen a kimey diad silong na panangidirehi nen Jesu-Kristo.—Zacarias 8:23.
Panon Yon Ebatan?
• Anto so nepeg a gagala tayo diad pangitepet tayo na, “Iner so kawalaan nen Jehova?”
• Panon tayon naromog natan so ebat ed tepet ya, “Iner so kawalaan nen Jehova?”
• Akin ya agnaeebatan so pikakasi na arum parad panangidirehi na Dios?
• Antoran alimbawa ed Biblia so mangiyilustra ed pankaukolan a “mantultuloy a seguroen no anto so makapaliket ed Katawan”?
[Tepetepet Parad Panagaral]
[Litrato ed pahina 9]
Panon so impananap nen Arin Josafat ed si Jehova?
[Litrato ed pahina 10]
Akin a tinmupleg si Saul ed sakey ya espiritista?
[Saray litrato ed pahina 12]
Manaral, manpikasi, tan mandalepdep pian naseguro ‘no iner so kawalaan nen Jehova’