Ligliwaen Iramay Maneermen

“Si Jehova nilanaan to ak . . . a manligliwa ed amin a managogol.”​—ISAIAS 61:1, 2.

1, 2. Sioparay nepeg tayon ligliwaen, tan akin?

 IBABANGAT itayo nen Jehova, say Dios na amin a peteg a ligliwa, a magmaliw a manangiyansakit sano manasagmak so arum na kalamidad. Babangatan to itayo ya ‘ibalap so apunaw ed puso’ tan ligliwaen iramay maneermen. (1 Tesalonica 5:14) Sano nakaukolan so ontan a tulong, itarya tayo itan ed saray kaparan managdayew. Ipanengneng tayo met so aro ed saramay walad paway na kongregasyon, anggan ed saramay datin agmangipapatnag na antokaman ya aro ed sikatayo.​—Mateo 5:43-48; Galacia 6:10.

² Binasa tan inyaplikan mismo nen Jesus ed inkasikato so mapropetikon inkigangganan to: “Say espiritu nen Katawan a Jehova wala ed siak; ta si Jehova nilanaan to ak a mangipulong na saray maong a balita ed saray mauyamo imbaki to ak a mamedber ed puso a maermen, . . . a manligliwa ed amin a managogol.” (Isaias 61:1, 2; Lucas 4:16-19) Atebek la na kaplesan iran alanaan a Kristiano a satan a kimey so onaplika met ed sikara, tan say “arum a karnero” so maliket a miulop ed sikara ed satan a kimey.​—Juan 10:16.

3. Sano itepet na totoo, “Akin ya iyaabuloy na Dios iray kalamidad?,” panon tayo iran natulongan?

³ Sano onsabi iray kalamidad tan saray totoo  so nadidismayan tuloy, oniay mabetbet dan itepet, “Akin ya iyaabuloy na Dios iray kalamidad?” Malinew so ebat na Biblia ed satan a tepet. Balet, nakaukolan ni so panaon parad sakey ya agni manaaral na Biblia pian sigpot ton natalosan so ebat. Naromog so tulong diad saray publikasyon na saray Tasi nen Jehova. * Balet, diad primero et apaneknekan a makaligliwa la ed pigaran totoo so pakabasa na sakey a teksto diad Biblia a singa say naromog ed Isaias 61:1, 2, lapud ibabalikas na satan so pilalek na Dios ed totoo pian makaawat ira na ligliwa.

4. Panon ya atulongan na sakey a Tasi ed Polandiya so nagogonigon a maneeskuelan bii, tan panon kayon natulongan na satan ya eksperiensya pian tulongan met so arum?

⁴ Saray kalangweran, ontan met ed saray maedad la, so mankaukolan na ligliwa. Sakey a nagogonigon a marikit diad Polandiya so kinmerew na simbawa manlapud sakey a kabat to. Diad panaanap to ni kalamor na simbawa, naamtaan na sakey a kaaro, a Tasi nen Jehova, a nabebelatan iman a bii lapud saray tepet tan panduaruwa: “Akin a pirmi so kaugsan? Akin a maniirap so totoo? Akin a maniirap so paralitiko lan agik a bii? Akin a walay sakit ko ed pusok? Ibabaga na Simbaan a panlabayan itan na Dios. Balet no ontan, agak la manisia ed Dios!” Mareen a nampikasi so Tasi ed si Jehova insan inkuanto: “Maliket ak ta intepet mo itan ed siak. Tulongan ta ka.” Insalaysay to a wala met iray panduaruwa to sanen sikatoy ugaw ni tan sikatoy tinulongan na saray Tasi nen Jehova. Oniay impaliwawa to: “Naaralan ko ya aliwan say Dios so mamapairap ed totoo. Aaroen to ira, a kaliktan to so sankaabigan a parad sikara, tan magano to lan gawaen iray baleg a pananguman diad dalin. Naandi la so sakisakit, saray problema ed itatakken, tan ipapatey, tan saray matulok a totoo so manbilay ya andi-anggaan​—dia ed sayan dalin.” Impabasa to ed marikit so Apocalipsis 21:3, 4; Job 33:25; Isaias 35:5-7 tan 65:21-25. Kayari na andukey ya impaningbat, oniay inkuan na bii tekep na mapatnag ya inkainawaan: “Natan et amtak la so gagalak ed bilay. Nayari ta so minengnengan lamet ed sika?” Niletneg so panangiyaral ed sikato na Biblia a mamidua ed sakey simba.

Ligliwaen so Arum Panamegley na Ligliwan Iiter na Dios

5. Sano mangibalikas itayo na simpatya, anto so peteg a makapaligliwa?

⁵ Sano labay tayon ligliwaen so arum, seguradon matukoy iray masimpatiyan salita. Panggunaetan tayon ibalikas ed maneermen a too diad salita tan tono na boses a mapaga tayon maong ed kipapasen to. Ag-itan nagawaan panamegley na saray andiay-kabaliksan a komento. Ibabaga ed sikatayo na Biblia a “lapu ed anos tan lapu ed panamaligliwa na saray Sulsulat, wala so ilalo tayo.” (Roma 15:4) Diad pangonsidera ed saya, nipaliwawa tayo diad matukoy a panaon no anto so Panarian na Dios, tan nipanengneng tayo manlapud Biblia no panon so panolbar na satan ed kaplesan iran problema. Insan makapankatunongan tayo no akin a napanmatalkan itan ya ilalo. Diad onian paraan, makapangiter itayo na ligliwa.

6. Anto so nepeg ya isalaysay tayo ed totoo pian sigpot iran nagunggonaan ed ligliwa manlapud Kasulatan?

⁶ Pian sigpot a makagunggona so ligliwan iyoopresi tayo, nakaukolan a nakabat na sakey a too so tuan Dios, say inka-Persona to, tan say inkanapanmatalkan  na saray sipan to. No tutulongan tayo so toon aliwa nin managdayew ed si Jehova, matukoy ya ipaliwawa so onggendan iran punto. (1) Say ligliwan naromog ed Biblia et nanlapud si Jehova, say tuan Dios. (2) Si Jehova so Makapanyarin-amin, say Amalsa ed tawen tan dalin. Sikato so Dios na aro tan daakan ed abig na linawa tan katuaan. (3) Napabiskeg itayo a mansungdo ed saray situasyon no onapit itayo ed Dios diad igamor na suston pikakabat ed Salita to. (4) Lugan na Biblia iray teksto a misiglaotan ed espesipiko iran subok a kipapaarapan na saray indibidual.

7. (a) Anto so nagawaan diad pangidanet a say ligliwan itatarya na Dios et ‘daakan lapu ed Kristo’? (b) Panon yon naligliwa so sakey a too a moriaen ton mauge-uges lay kondukta to?

⁷ Arum so anginabang na espiritual a bendisyon ed saray maneermen a mikabat ed Biblia diad panamegley na impamasa ra ed 2 Corinto 1:3-7. Sano gagawaen da itan, idadanet da so balikas ya ‘ondaak so pakaligliwa tayo lapu ed Kristo.’ Makatulong iyan teksto ed sakey a too pian namoria to a say Biblia et lapuan na ligliwa a nepeg ton ikdan na nagkalalon panangimano. Magmaliw met itan a basiyan parad kaaruman nin diskusyon, a nayarin diad arum a pankanawnawa. No liknaen na sakey a too a saray problema to et resulta na mauges iran agawaan to, agtayo huhusgaan tan nayarin ibaga tayo ed sikato a makaligliwan naamtaan so nikurit ed 1 Juan 2:1, 2; Salmo 103:11-14. Diad ontan iran paraan et peteg a naligliwa tayo so arum panamegley na ligliwan iiter na Dios.

Sano Pirmin Naapektaan so Bilay Lapud Karawalan Odino Kairapan na Panagbilay

8, 9. Panon a matukoy a niiter so ligliwa ed totoo a manasagmak na karawalan?

⁸ Pirmin naaapektaan so bilay na minilyon lapud karawalan​—karamsakan na krimen diad sakey a komunidad odino karawalan na bakal. Panon tayo iran ligliwaen?

⁹ Maalwar iray tuan Kristiano diad panagsalita odino gawa ra ya ag-ira ondadapag ed sakey a grupo odino arum diad saray kolkolan ed mundo. (Juan 17:16) Balet sikara so matukoy a manguusar ed Biblia pian ipanengneng da a manampot la so kaplesan iran kipapasen. Nayarin ibasa ra so Salmo 11:5 pian ipanengneng da so liknaan nen Jehova ed saramay mangaaro ed karawalan odino say Salmo 37:1-4 pian ipabitar so panamaseseg na Dios ya agtayo ombabales noagta manmatalek itayo ed Dios. Saray salita ed Salmo 72:12-14 so mangipabitar no anto so nalilikna na Babaleg a Solomon, si Jesu-Kristo, a manuuley la bilang mangatatawen ya Ari, nipaakar ed inosentin totoo a manasagmak na karawalan.

10. No manbibilay kayo ed dakel lan taon a pambabakal, panon kayon naligliwa ed saray nisitas a teksto?

¹⁰ Arum a totoo so nansungdo ed dakel a gulo legan a mansasamsaman iray grupo ed pakauley. Ipapasen da lambengat a say bakal tan say epekto na satan et kabiangan na bilay. Say alenleneg ya iilaloan da et magmaliw a maabig iray bengatla no ombatik ira ed arum a bansa. Balet maslak ed sikara so agbalot tinmalona sanen ginawa ra itan, tan abalang na pigara so bilay da sanen sinali ra so ontaynan. Naynay a namoria na saramay onaalis ed arum a bansa a nasasalatan labat iray probleman sasagmaken da. Nayarin nausar so Salmo 146:3-6 pian natulongan so ontan iran totoo a mangipapeg na ilalo ra ed bengatlan mas napanmatalkan nen say iyalis ed arum a bansa. Say propesiya ed Mateo 24:3, 7, 14 odino 2 Timoteo 3:1-5 so nayarin makatulong ed sikara pian malaknab dan natalosan so kipapasen tan say kabaliksan na saray kipapasen a susungdoan da, salanti, manbibilay ira ed kasampotan na daan a sistema na bengabengatla. Saray teksto a singa say Salmo 46:1-3, 8, 9 tan Isaias 2:2-4 so nayarin ontulong ed sikara pian namoria ra a walan talaga so ilalo parad mareen ya arapen.

11. Antoran teksto so nanligliwa ed sakey a bii diad Sagur ya Aprika, tan akin?

¹¹ Legan na panaon na nagagawan bakal ed Sagur ya Aprika, binmatik so sakey a bii manlapud abung to anggaman ed mansikyaw iran bala. Say bilay to so napnoy takot, kaermenan, tan makapasinagem ya inkadismaya. Diad saginonor, legan a manaayam so pamilya ed sananey a bansa, deneside na asawan laki a poolan so sertipiko na impankasal da tan pinataynan to  so malukon ya asawa to tan say samploy taon ya anak dan laki, pian sikatoy magmaliw a pari. Sanen nibasa ed saman a bii so Filipos 4:6, 7 tan Salmo 55:22, kalaktip iray Makasulatan ya artikulo ed Say Panag-bantayan tan Awake!, aromog ton siansia so ligliwa tan gagala ed bilay.

12. (a) Anton inawa so iyoopresi na Kasulatan ed saramay maniirap a maong ed panagbilay? (b) Panon ya akatulong so sakey a Tasi diad Asia ed sakey a kustomer?

¹² Say iyiirap na ekonomya so manederal ed bilay na minilyon a totoo. No maminsan et resulta met itan na bakal. No arum et saray agmakabat a totontonen na gobierno tan say inkaagum tan ag-inkamatua na saramay walad pakayari so angupot ed atipon na totoo tan amaskar ed sikara a nakompiska iray kaykayarian da. Arum so agbalot awalaan na ontan iran kaykayarian. Amin da so naligliwa no naamtaan da ya ipapaseguro na Dios a nainawaan iramay manmamatalek ed sikato tan igagarantiya to so matunong a mundo a panggayagaan na totoo so kimey na saray lima ra. (Salmo 146:6, 7; Isaias 65:17, 21-23; 2 Pedro 3:13) Sanen nadngelan na sakey a Tasi diad sakey a bansa ed Asia so kapapagaan na sakey a kustomer nipaakar ed kipapasen na ekonomya diman, impaliwawa to a say nagagawa et kabiangan ed saray ebenton nagagawa ed interon mundo. Say impaningbat ed Mateo 24:3-14 tan Salmo 37:9-11 so angitonton ed regular a panangiyaral ed Biblia.

13. (a) Sano nadidismaya iray totoo ed maapa iran sipasipan, panon tayon nausar so Biblia pian natulongan ira? (b) No liknaen na totoo a saray mauges a kipapasen et mamapaneknek ya anggapo so Dios, panon so nayarin pikatunongan yo ed sikara?

¹³ Sano maniirap lay totoo ed loob na dakel a taon odino nadidismaya ed dakel iran pabes a sipasipan, sikara so nayarin singa saray Israelita ed Ehipto ya agdinmengel “lapud inkadismaya.” (Exodo 6:9, NW) Diad ontan iran kipapasen, nayarin makagunggona no ipabitar iray paraan a pakatulong na Biblia ed sikara pian natalonaan da so kaplesan iran problema tan napaliisan da iray patit ya anggapoy kakanaan a mameperdi ed bilay na dakel. (1 Timoteo 4:8b) Nayarin moriaen na arum a saray mauges a kipapasen a pambibilayan da so paneknek ya anggapo so Dios odino agto ira iyaansakit. Nayarin mankatunongan kayo unong ed matukoy iran teksto pian natulongan ira a makamoria ya angitarya so Dios na tulong balet ta dakel so agmangaawat ed satan.​—Isaias 48:17, 18.

Sano Nipaarap ed Saray Bagyo tan Yegyeg

14, 15. Sanen dakel so atalagnaw lapud agawan desyang, panon ya impatnag na saray Tasi nen Jehova so panagpaga ra?

¹⁴ Say desyang so nayarin onsabi panamegley na bagyo, yegyeg, pool, odino insabog. Nayarin kaslakan so panag-ermen. Anto so nagawaan pian naligliwa iramay akaliktar?

¹⁵ Nakaukolan a naamtaan na totoo a wala so mangiyaansakit. Kayari inyataki na saray terorista ed sakey a bansa, dakel so atalagnaw. Dakel ed sikara so abalangan na kapamilyaan, saray manlelegpet ed sikara, kakaaro, trabaho, odino antokaman ya inisip dan pakaligenan da. Tinmulong iray Tasi nen Jehova ed saramay walad komunidad da, ya imbalikas da so simpatya ed pirmi iran inkabalangan da tan angiyopresi iray makapaligliwan salita manlapud Biblia. Dakel so misalsalamat a tuloy ed panagpaga ra.

16. Sanen agawa so kalamidad ed El Salvador, akin ya epektibon tuloy so kimey na saray Tasi diman diad lawak na serbisyo?

¹⁶ Diad El Salvador, tinmumbok ed maksil a yegyeg nen 2001 so sakey a biglan indelap na pitek ya anigway na dakel a totoo. Inatey so 25 años a balolakin anak na sakey a Tasi pati say duaran bii a yugtan na nobya na saman a balolaki. Say ina na balolaki tan say nobya to so nagmaliw ya okupado ed lawak na serbisyo. Dakel so angikuan ed sikara a say Dios so angala ed saramay inatey odino linawa na Dios iman. Inaon na saray Tasi so Uliran 10:22 pian ipabitar ya aglabay na Dios a sikatayoy manermen. Binasa ra so Roma 5:12 pian ipanengneng a say ipapatey so nagagawa lapud kasalanan na too, aliwan lapud linawa itan na Dios. Impabitar da met so makaligliwan mensahe a naromog ed Salmo 34:18; Salmo 37:29; Isaias 25:8, tan Apocalipsis 21:3, 4. Saray totoo so madengedengel, nagkalalo la ta sayan duaran bibii a mismo so inateyan  na saray kapamilyaan diad desyang, tan dakel so nigapon panangiyaral na Biblia.

17. Diad panaon na kalamidad, antoran klase na tulong so niiter tayo?

¹⁷ Sano onsabi so kalamidad, nayarin walay naabet yon mankaukolan na tulong ed pisikal. Saglawien na satan so panawag na doktor, pangawit ed too diad ospital, odino panggawa na antokaman a posibli pian mangitarya na tagano tan panayaman. Legan na sakey a kalamidad diad Italya nen 1998, naobserbaan na sakey a dyurnalista a saray Tasi nen Jehova so “onkukurang ed praktikal a paraan, ya ontutulong ed saramay maniirap, ya agda la iisipen no antokaman so relihyon da.” Diad arum a lugar, saray ebenton nipropesiya nipaakar ed saray kaunoran ya agew so sengegan na pirmin kairapan. Diad saraman a pasen, impabitar na saray Tasi nen Jehova iray propesiya na Biblia, tan liligliwaen da so totoo tekep na panamaseguro na Biblia a say Panarian na Dios so mangitarok na tuan kaligenan ed katooan.​—Uliran 1:33; Miqueas 4:4.

Sano Inatey so Sakey a Membro na Pamilya

18-20. Sano walay inatey ed sakey a pamilya, anto so nayarin ibaga odino gawaen yo pian sikaray naligliwa yo?

¹⁸ Diad agew-agew et minilyon a totoo so maneermen lapud impatey na sakey ya inad-aro ra. Nayarin nakatongtong yo iramay maneermen sano mibibiang kayo ed Kristianon ministeryo odino sano gagawaen yo iray inagew-agew a kimey. Anto so nibaga yo odino nagawaan yo pian sikaray naligliwa yo?

¹⁹ Kasin say too et nagogonigon ed emosyon? Kasin napno so abung na maneermen iran kakanayon? Nayarin dakel so labay yon ibaga, balet importante so pagmaliw a makatebek. (Eclesiastes 3:1, 7) Nayarin say matukoy a gawaen ni et say pangibalikas na piaambegya, mangitilak na matukoy a publikasyon na Biblia (brosyur, magasin, odino tract), insan dalawen ira kayari na pigaran agew pian nanengneng no kasin wala ni so nitulong. Diad matukoy a  panaon, manginabang na pigaran makapaseseg iran punto manlapud Biblia. Saya so walaan na makapakalma tan makapaabig ya epekto. (Uliran 16:24; 25:11) Agyo nayarian a pabilayen so inaatey, a singa ginawa nen Jesus. Balet nayarian yon inabang so ibabaga na Biblia nipaakar ed kipapasen na inaatey, anggaman aliwa nin panaon pian suppiaten iray lingon panmoria ra. (Salmo 146:4; Eclesiastes 9:5, 10; Ezequiel 18:4) Ibasa yo iray sipan ed Biblia nipaakar ed kikioli. (Juan 5:28, 29; Gawa 24:15) Nayarian yon singbaten no antoy kabaliksan na saratan, a nayarin mangusar na salaysay na Biblia nipaakar ed kikioli. (Lucas 8:49-56; Juan 11:39-44) Ipaimano met iray kalidad na maaron Dios a mangiiter ed satan ya ilalo. (Job 14:14, 15; Juan 3:16) Ipaliwawa no panon kan agunggonaan ed sarayan bangat tan no akin a walaan ka na kompiyansa ed saratan.

²⁰ Say pangimbita ed Kingdom Hall so makatulong ed maneermen pian nakabat to so totoon walaan na peteg a panangaro ed saray kakaabay da tan makaamta no panon a makapampapabiskegan. Naeksperiensya itan na sakey a bii ed Sweden a satan so abayag to lan aanapen.​—Juan 13:35; 1 Tesalonica 5:11.

21, 22. (a) Anto so kakaukolan ed sikatayo pian makaligliwa itayo? (b) Panon yon naligliwa so sakey a mikabisado la ed ibabaga na Kasulatan?

²¹ Sano walay kabat yon maneermen, balanglan diad loob na Kristianon kongregasyon odino diad paway, kasin agkayo segurado no maminsan no anto so ibaga odino gawaen yo? Say Griegon salita a mabetbet a nipatalos a “ligliwa” diad Biblia so literal a mankabaliksan na “sakey ya imbitasyon ed abay na sakey.” Say pagmaliw a tuan managligliwa et mankabaliksan a mainomay kayon asinggeran na saramay maneermen.​—Uliran 17:17.

²² Panon to no say toon labay yon ligliwaen et mikabisado la ed ibabaga na Biblia nipaakar ed ipapatey, dondon, tan say kikioli? Makaligliwa so mismon kiwala na sakey a kaaro a manginabang na mipara iran sisiaen. No labay to so mansalita, ondengel kayon maong. Agyo iisipen a nakaukolan yo so mansalita. No walaray tekston babasaen, ipasen iratan bilang balikas na Dios a mamapabiskeg ed kapusoan yon dua. Ibalikas so mabiskeg a kombiksion yo diad inkaseguro na isisipan na saratan a teksto. No ipatnag so maridios a panangabagey tan inabang so ankabli iran katuaan a lugan na Salitay Dios, makatulong kayo ed saramay maneermen pian nagamoran da so tambayo tan biskeg a manlalapud “Dios na amin a ligliwa,” si Jehova.​—2 Corinto 1:3.

[Paimano ed Leksab]

Anto so Komento Yo?

• Siopa so tetetelen na dakel a totoo no walaray kalamidad, tan panon tayo iran natulongan?

• Anto so nagawaan tayo pian natulongan so arum a nagunggonaan a maong manlapud ligliwa ya iyoopresi na Biblia?

• Antoran kipapasen so sengegay ermen na dakel a totoo diad lugar yo, tan panon yo iran ligliwaen?

[Tepetepet Parad Panagaral]

[Saray litrato ed pahina 23]

Inabang so mensahe na peteg a ligliwa diad panaon na gonigon

[Credit Line]

Refugee camp: UN PHOTO 186811/J. Isaac

[Litrato ed pahina 24]

Makaligliwa so mismon kiwala na sakey a kaaro