‘Nawalaan na Maong a Konsiensia’

SAY simbawan “paiwanwan ka ed konsiensiam” so mabetbet a narengel. Balet pian napanmatalkan a giya so konsiensia tayo, kaukolan a satan so nibangat a maong ed no anto so duga tan aliwa, tan kaukolan a malikas itayo ed panangiwanwan na satan.

Konsideraen pa so eksperiensya na sakey a lakin manngaran na Zaqueo, unong a nikurit ed Biblia. Si Zaqueo, a manaayam ed Jerico, so sakey a managsingil na buis tan sikatoy mayaman. Unong ya inaksobi to, sikatoy yinmaman lapud panangikil​—agamil a seguradon makapairap ed arum. Kasin akonsiensia si Zaqueo lapud marelmeng iran gawa to? No bilang ta akonsiensia, mapatnag ya imbaliwala to itan.​—Lucas 19:1-7.

Balet, walay inkagawa a sengeg na impan-umameng nen Zaqueo ed paraan na kabibilay to. Si Jesus so linma ed Jerico. Labay nen Zaqueo a sikatoy nanengneng, balet lapud sikatoy melmelag agto nanengneng si Jesus ta minukot na totoo. Kanian sikatoy binmatik ed unaan tan kinmalab ed kiew pian nabantag ton maong. Lapud pandinayewan nen Jesus so inka-interesadon tuloy nen Zaqueo, inkuan nen Jesus ed sikato a sikatoy ondalaw ed abung to. Si Zaqueo so maliket ya amarawes ed dederlengen a bisita.

Say anengneng tan nadngel nen Zaqueo sanen akidipongdipong ed si Jesus so anenyeg ed puso to tan amakiwas ed sikaton umanen so walna to. Oniay imbalikas to: “Nia, Katawan say kapaldua na saray kayarian ko iter ko ed saray duruka; et no wala so daiset ya anaolan ko ed siopaman a too, ipawil ko so mamipat a tubo.”​—Lucas 19:8.

Say konsiensia nen Zaqueo so abangatan, tan sikatoy tinmalineng tan kinmiwas ed satan. Saray maabig a resulta so walaan na malaknab ya epekto. Isipen so alikna nen Zaqueo sanen inkuan nen Jesus ed sikato: “Natan ya agew sinmabi kilalaban ed sayan abung”!​—Lucas 19:9.

Agaylan makapaseseg ya alimbawa! Ipapanengneng na satan ya antokaman so abenegan tayo, sarag tayoy manguman. Singa si Zaqueo, nayarian tayon talinengen iray salita nen Jesus a nikurit ed Biblia, tan bayuboan so pakatebek ed duga tan aliwa. Diad ontan et ‘nawalaan itayo na maong a konsiensia,’ unong ya ipapaseseg nen apostol Pedro. Talinengen tayo so nipasal a konsiensia tayo tan gawaen so duga.​—1 Pedro 3:16.