Propesiya nen Isaias​—Liwawa Parad Amin a Katooan II

Kapitulo Desinuebe

Niwalwal so Pansimpisimpitan!

Isaias 58:1-14

1. Panoy panmoria nen Jesus tan si Jehova ed pansimpisimpitan, tan anton nengneng na pansimpisimpitan so nagagawa ed panaon nen Isaias?

 ‘MATUNONG kayo diad pakanengneng na saray totoo,’ so inkuan nen Jesus ed saray lider na relihyon nen panaon to, “balet diad loob [et] napno kayo na pansimpisimpitan tan kaugsan.” (Mateo 23:28) Say impangondena nen Jesus ed pansimpisimpitan so mangipapatnag ed panmoria na mangatatawen ya Ama to. Diad kapitulo 58 na propesiya nen Isaias et nagkalautlan nipapaimano so pansimpisimpitan a kasmak ed Juda. Kaslakan la ed saman so pankokolkol, panagpairap, tan karawalan, tan say panagngilin ed Sabaton so nagmaliw lan andi-kanan ritual. Saray totoo so paspasaray labat a manlilingkor ed si Jehova tan maparayag a mangipanengneng na inkadebosyon diad pankuankuanan a panag-ayunal. Agpankelawan ya inwalwal nen Jehova no siopa iran talaga!

‘Ipaliwawam ed Baley Iray Kasalanan Da’

2. Anton awawey so impatnag nen Isaias legan ton iyaabawag so mensahe nen Jehova, tan siopa natan so kapadpara to?

² Anggaman kagula nen Jehova so kondukta na Juda, kabiangan ed saray salita To so masimoon a kerew a magbabawi so nasyon. Balet, labay nen Jehova a mabitar so panamaat to. Kanian ingganggan to si Isaias: “Oningal ka na maksil, agka mankawanan, itagey mo so boses mo a singa sakey a tambuyog, tan ipaliwawam ed baley ko so impakasumlang da, tan ed abung nen Jacob so saray kasalanan da.” (Isaias 58:1) Nayarin onsanok so totoo ed si Isaias sano makpel ton iyabawag iray salita nen Jehova, balet sikatoy agsinmener. Siansia nin sikatoy walaan na masakripisyon awawey a singa impatnag to sanen inkuan ton: “Wadia ak; ibaki mo ak.” (Isaias 6:8) Alay abig ya ehemplo na panagsungdo si Isaias parad saray modernon-agew a Tasi nen Jehova, ya ingganggan met a mangipulong ed Salitay Dios tan mangiwalwal ed relihyoson pansimpisimpitan!​—Salmo 118:6; 2 Timoteo 4:1-5.

3, 4. (a) Anton pankuankuanan so impatnag na totoo ed panaon nen Isaias? (b) Anto so peteg a situasyon ed Juda?

³ Ompapatnag a saray totoo ed panaon nen Isaias so manaanap ed si Jehova tan magayaga ed matunong iran panangukom to. Oniay nabasa tayo iran salita nen Jehova: “Sikara anapen da ak ed inagew-agew, tan manliket ira a makapikabat na saray dalan ko: singa sakey a nasyon a nanggawa na inkatunong, et agto inkaindan so pananguksoy na Dios da, mankerew ira ed siak na maptek a panangukom; manliket ira ya onasingger ed Dios.” (Isaias 58:2) Masimoon kasi iyan panliket ed saray dalan nen Jehova? Andi. Singa ira “sakey a nasyon a nanggawa na inkatunong,” balet ta mankuankuanan lambengat. Say katuaan to et “inkaindan [na sayan nasyon] so pananguksoy na Dios da.”

⁴ Say kipapasen so mipadparan maong ed samay imparungtal ed si propetan Ezequiel diad saginonor. Inkuan nen Jehova ed si Ezequiel a saray Judio so mangibabaga ed sakey tan sakey: “Gala, kerewen mi ed sika, tan denglen mo no anto so salita ya ompaway a manlapu ed Jehova.” Balet pinasakbayan na Dios si Ezequiel ed pankuankuanan da: “Onla ra ed sika, . . . tan denglen da so saray salitam, balet agda ra sumpalen; ta dia ed saray sangi ra ipatnag da so dakel ya aro, balet say puso ra onla ra ed pananap na tubo ra. Et, nia, sika ed sikara so singa sakey a marakep a kansion na sakey a wala so makapaliket a boses to, tan manogtog a maong ed sakey a kagawaan; ta narengel da so saray salitam, balet agda ra sumpalen.” (Ezequiel 33:30-32) Saray kapanaonan met nen Isaias so mangibabagan maparanay dan aanapen si Jehova, balet agda tutuloken iray salita to.

Mansimpisimpitan a Panag-ayunal

5. Panon a sinalin gamoran na saray Judio so panangabobon na Dios, tan antoy inkiwas nen Jehova?

⁵ Diad pansasagpot na saray Judio a nagamoran so panangabobon na Dios, sikaray nan-ayunal parad pormalidad, balet say pantunongtunongan da so angiyarawi laingen ed sikara ed si Jehova. Singa mankelaw ni’ra a manetepet: “Akin et nan-ayunal kami, . . . et agka onnengneng? Akin et pinairap mi so kamarerwa mi, et agmo naamtaan?” Prangkan inmebat si Jehova, a kuanto: “Nia, dia ed agew na pan-ayunal yo naromog yo so panliketan yo, tan anapen yo so amin a kimkimey yo. Nia, sikayo man-ayunal kayo a nipaakar ed pansasangsang tan pankokolkol, tan pian pangabil so poniti ed sankaugsan: agkayo man-ayunal ed sayan agew pian dia ed ontan narengel so boses yo ed tagey. Ontan ta so pan-ayunal a pinilik? Say agew ta nipaakar ed too a pamairap to ed kamarerwa to? Ituek to ta so ulo to a  singa sakey a talaib, tan ibuskag to ta so abel a magaspang tan dapodapol ed lepsag to? Tawagen mo naani so saya a nan-ayunal tan sakey ya agew a naawat ed kinen Jehova?”​—Isaias 58:3-5.

6. Antoray kiwas na saray Judio a mangipaparungtal ed mansimpisimpitan a panag-ayunal da?

⁶ Legan iran manaayunal, mantutunongtunongan, tan onkekerew ni ingen na matunong iran panangukom nen Jehova, ginegemtan na totoo so sinisiblet a likeliket tan panagnegosyo. Nigalet ira ed pankokolkol, panamairap, tan karawalan. Pian niyamot iray kagagawa ra, sikaray maparayag a nanagogol​—ituetuek day kauloan da a singa saray talaib tan onyuyurong ed magaspang ya abel tan dapodapol​—a singa magbabawi ed saray kasalanan da. Antoy kakanaan na sayan amin no mantultuloy iran manrebeldi? Sikaray agmangipapatnag na maridios a panermen tan pagbabawi a nepeg a kabiangan na saray masimoon a panag-ayunal. Say tagleey da​—anggaman maingal​—so agdedengelen ed tawen.

7. Panon a mansimpisimpitan a kinmiwas iray Judio nen panaon nen Jesus, tan panon ya ontan met so gagawaen na dakel natan?

⁷ Saray Judio ed panaon nen Jesus so maparayag met ed seremonyal a panag-ayunal, saray arum so manggagawa ed satan a mamidua ed sakey simba! (Mateo 6:16-18; Lucas 18:11, 12) Dakel ed saray relihyoson lider so angalig met ed kailalakan nen Isaias diad impagmaliw dan maruksa tan dominante. Kanian, makpel ya inwalwal nen Jesus iraman a relihyoson mansimpisimpitan, ya inkuan ton say klase na panagdayew da et andi-kana. (Mateo 15:7-9) Ontan met natan, minilyon so ‘mangipapaliwawa ya amta ra so Dios; ingen dia ed saray gawa [ra] sikato so benegan da, a sikara so karimdimla tan masugnar, tan agda nayarian so manggawa na antokaman a gawan maabig.’ (Tito 1:16) Nayarin iilaloan da a kasian ira na Dios, balet ipaparungtal na kondukta ra so pankuankuanan da. Diad kasunian, saray Tasi nen Jehova so mangipapanengneng na peteg a maridios a debosyon tan matuan panangaro ed agagi.​—Juan 13:35.

No Anto so Sasaglawien na Tuan Panagbabawi

8, 9. Antoran positibon kiwas so nepeg a katekep na masimoon a panagbabawi?

⁸ Kaliktan nen Jehova ya aglambengat man-ayunal so totoo to lapud saray kasalanan da; kaliktan to iran magbabawi. Diad ontan et nagamoran da so panangabobon to. (Ezequiel 18:23, 32) Impaliwawa to a pian makabaliksan so panag-ayunal, kaukolan a tekepan itan na panametek ed apalabas iran kasalanan. Imanoen pa so manangusisan tepetepet nen Jehova: “Aliwa ta a saya so pan-ayunal a pinilik: say pamultot ed saray taker na inkarelmeng, pian pangukbar ed saray taker [“gulongulong,” NW] na pako, et napaulyan komon a nibulos so saray inaposan, tan pian puteren tayo komon so balang pako?”​—Isaias 58:6.

⁹ Saray gulonggulong tan pako so matukoy iran simbolo na maruksan panangaripen. Kanian imbes a man-ayunal tan kabansag na satan et manlames na saray kapananisiaan, kaukolan a tuloken na totoo so ganggan a: “Nepeg mo ya aroen so kaparam a too a singa unong ed sikan dili.” (Levitico 19:18) Nepeg dan ibulos so amin a pinairap tan agmakatunongan ya inaripen da. * Saray maparayag a relihyoson gawagawa a singa say panag-ayunal, so agbalot onsandi ed matuan maridios a debosyon tan ed gawagawan panangipatnag na panangaro ed agagi. Oniay insulat na kapanaonan nen Isaias a si propeta Miqueas: “Anto ta so kaukolan nen Jehova ed sika, noag say manggawa lambengat na inkatunong, tan mangaro na kaabigay linawa, tan manakar a mauy-uyamo ed Dios mo?”​—Miqueas 6:8.

10, 11. (a) Parad saray Judio, anto so mas maabig ni nen say pan-ayunal? (b) Panon a niyaplika na saray Kristiano natan so simbawa ed saray Judio?

¹⁰ Say inkahustisya, kaabigan, tan kauyamoan so mankaukolan na panggawa na kaabigan ed arum, a segek na Ganggan nen Jehova. (Mateo 7:12) Say mas maabig nen say pan-ayunal et say panginabang ed kayamanan da ed saray mankaukolan. Oniay intepet nen Jehova: “Aliwa ta a [say pinilik a pan-ayunal et] say pangiyutob mo na tinapay mo ed narasan, tan say pangalam ed abung mo na duka a pinataynan? No nanengneng mo so lakseb, et sikato so kawesan mo; ya agmo komon yamot so inkasika a manlapu ed laman mo a dili?” (Isaias 58:7) On, imbes a maparayag a man-ayunal, saramay makayari so nepeg a mangiter na tagano, kawesen, tan ayaman ed saray mankaukolan a kaparan manaayam ed Juda​—a mismon kanayon da.

¹¹ Sarayan alay dakep a prinsipyo na panangaro ed agagi tan panangabagey ya imbalikas nen Jehova so aglambengat onaplika ed saray Judio ed panaon nen Isaias. Saratan met so mangiwanwan ed saray Kristiano. Kanian, insulat nen apostol Pablo: “Ontan sirin, unong a wala so kiambegya manggawa itayo na maabig ed saray amin, nagkalalo ed saray kaamong na pananisia.” (Galacia 6:10) Nepeg a say Kristianon kongregasyon so pasen na inaagin aro, nagkalalo la ta manbibilay itayo ed ompapalalon kritikal a panaon.​—2 Timoteo 3:1; Santiago 1:27.

Say Katutulok so Mangitarok na Mayaman Iran Bendisyon

12. Antoy gawaen nen Jehova no sikatoy tuloken na totoo to?

¹² No komon ta walaan na aralem a pakatalos iray totoo nen Jehova pian ontalineng ed maaron panamaat to! Oniay inkuan nen Jehova: “Saman la ombetag so liwawam a singa kabuasan, et say katambal mo ombutay naani a masigsiglat; et say inkatunong mo onla naani  ed arap mo; say gloria nen Jehova sikato naani talabay ed beneg mo. Saman la ontawag ka, et si Jehova onebat naani; oningal ka naani, et sikato kuan to naani, Wadia ak.” (Isaias 58:8, 9a) Agaylan maligsa tan makapasagyat iran salita! Bebendisyonan tan sasalimbengan nen Jehova iramay magayaga ed maaron-kaabigan tan inkatunong. No magbabawi iray totoo nen Jehova ed inkaruksa tan pansimpisimpitan da tan sikatoy tuloken da, onaligwas so kipapasen da. Ipagamor nen Jehova so “katambal” da, say espiritual tan pisikal ya iyabig na nasyon. Sikaray bantayan to met, a singa ginawa to ed inmuunan atateng da sanen ontataynan ira ed Ehipto. Tan tampol a sikatoy onkiwas ed ikerew day tulong.​—Exodo 14:19, 20, 31.

13. Antoran bendisyon so manatalaran ed saray Judio no onkiwas ira ed kerew nen Jehova?

¹³ Oniay inyarum natan nen Jehova ed akadkaunan kerew to: “No sika ekalen mo naani ed pegley mo so pako [na maruksa tan agmakatunongan a panangaripen], say pangyunat ed tamuro [a posiblin panagbalaw odino palson panangakusa], tan pansalita a mareldelmeng; et no yibong mo so kamarerwam ed narasan, tan peselen mo so kamarerwa a pinairap: saman la onalagey so liwawam ed kabilungetan, et say inkakuyep mo singa naani dia ed pegley-agew.” (Isaias 58:9b, 10) Say inkasiblet tan inkaruksa et makaderal ed sikaran dili tan mamasanok ed si Jehova. Balet, say kaabigan tan inkamabunlok so mangitarok na mayaman a bendisyon na Dios, lalo la no satan so ginawa ed saray narasan tan naiirapan. No ipapuso lambengat komon na saray Judio irayan katuaan! Diad ontan et say espiritual a liwawa tan kayamanan da so manpasinag ed sikara a singa diad kapegleyay-agew, a mangekal ed antokaman a kabilungetan. Nagkalalo ed amin, sikaray mangitarok na galang tan dayew ed si Jehova, say Lapuan na karlangan tan saray bendisyon da.​—1 Arari 8:41-43.

Apasimbalo a Nasyon

14. (a) Panoy inkiwas na saray kapanaonan nen Isaias ed saray salita to? (b) Antoy nantultuloy ya inyopresi nen Jehova?

¹⁴ Makapaermen ta imbaliwala na nasyon so kerew nen Jehova tan sikaray nigalet ed inkarelmeng. Diad kaunoran, naobliga si Jehova ya abuloyan iran nakautibo, unong ya impasakbay to. (Deuteronomio 28:15, 36, 37, 64, 65) Anggaman ontan, saray onggendan a salita nen Jehova panamegley nen Isaias so nantultuloy ya angiyopresi na ilalo. Impasakbay na Dios a say adisiplina tan magbabawin nakdaan so magayagan ompawil ed dalin na Juda, anggaman satan so kibalatar.

15. Anton makapalikliket a kipawil so ipapasakbay nen Jehova?

¹⁵ Diad impanukoy ed arapen a kipawil na totoo to ed 537 K.K.P., oniay inkuan nen Jehova panamegley nen Isaias: “Si Jehova itonton to ka naani ya andi ebas, tan peselen to naani so kamarerwam ed saray amaga a pasen, tan pakasilen to naani so saray pukel mo; et mipara ka naani ed nambabangil a tanamanan, tan singa say subol, a saray danum to ag-ira onkulang.” (Isaias 58:11) Pagmaliwen lamet nen Jehova a mabuna so naklangan a bansa na Israel. Say lalon makapalikliket et bendisyonan to iray magbabawin totoo to, a pakasilen to so “saray pukel” da a datin inatey ed espiritual balet ta pinabiskeg to. (Ezequiel 37:1-14) Saray totoo a mismo so magmaliw a singa aparanuman a “tanamanan” a napno na espiritual a bunga.

16. Panon a naapiger so nasyon?

¹⁶ Kabiangan ed kipawil so pangipaalagey lamet ed saray syudad ya inggeba na saray linmubak a taga-Babilonia nen 607 K.K.P. “Saray wala ed sika paalageyen da naani so saray daan a paspasen a nagba; paalageyen mo naani so semento na saray dakel a kailalakan; et natawag ka naani a manangapiger na butaw, manamasimbalo ed saray basbas pian panayaman.” (Isaias 58:12) Saray miparan balikas a “saray daan a paspasen a nagba” tan “semento na saray dakel a kailalakan” (odino, saray pundasyon a nagba diad loob na dakel lan kailalakan) so mangipapatnag a say nipawil a nakdaan so mangipaalagey lamet ed saray nagban syudad na Juda, nagkalalo la say Jerusalem. (Nehemias 2:5; 12:27; Isaias 44:28) Apigeren da so “butaw”​—termino ya ontutukoy ed amin a luang ed saray bakor na Jerusalem tan seguradon pati saray bakor na arum nin syudad.​—Jeremias 31:38-40; Amos 9:14.

Saray Bendisyon a Manlalapud Matoor a Panagngilin ed Sabaton

17. Panoy inyapelo nen Jehova ed totoo to pian tuloken da iray ganggan na Sabaton?

¹⁷ Say Sabaton et balikas ed pirmin panangiyansakit na Dios ed pisikal tan espiritual a pankaabigan na totoo to. Inkuan nen Jesus: “Say sabaton agawan onkana’d too.” (Marcos 2:27) Sayan agew a pinasanto nen Jehova so angiter ed saray Israelita na nikaduman pankanawnawa pian mangipatnag na panangaro ra ed Dios. Makapaermen ta diad panaon nen Isaias et nagmaliw itan ya agew na panagngilin ed saray andi-kanan ritual tan panamenek ed sinisiblet a kalkaliktan. Kanian, binaat lamet nen Jehova so totoo to. Tan sinali to lamet a sinabi so kapusoan da. Oniay inkuan to: “No isipam so salim ed agew a sabaton, manlapu ed panggawa na kaliktan mo ed masanto ya agew ko; et tawagen mo so sabaton a sakey a liket, tan santo nen Jehova a galgalangen; et sikato naani igalang mo, agmo gawaen so saray dili a dalan mo, agmo anapen so saray liket mo, agmo salitaen so saray salitam a dili; saman la manliket ka ed kinen Jehova; et pasakayen ta ka naani ed saray atagey a pasen na dalin; tan taganoen ta ka naani ed tawir nen Jacob ya ateng mo: ta sikato so sinalita na sangi nen Jehova.”​—Isaias 58:13, 14.

18. Anto so resulta na ag-impangigalang na Juda ed Sabaton?

¹⁸ Say Sabaton et agew na espiritual a panagdalepdep, panagpikasi, tan panagdayew na pamilya. Nepeg a satan so ontulong ed saray Judio a molimolien iray makapakelkelaw a gawa nen Jehova parad sikara tan say inkahustisya  tan aro a napatnagan ed Ganggan to. Kanian, say matoor a panngilin ed satan a masanton agew so ontulong komon ed totoo ya onapit a nagkalalo ed Dios. Imbes et pinikewet da so Sabaton tan sirin et napepeligron agmangawat na panamendisyon nen Jehova.​—Levitico 26:34; 2 Awaran 36:21.

19. Antoran mayaman a bendisyon so akatarya parad totoo na Dios no ngilinan da so Sabaton?

¹⁹ Balet, no makaaral iray Judio ed disiplina tan igalang da so uksoyan ed Sabaton, akatarya iray mayaman a bendisyon parad sikara. Onleppua iray maabig ya epekto na tuan panagdayew tan panangigalang ed Sabaton ed amin ya aspekto na bilay da. (Deuteronomio 28:1-13; Salmo 19:7-11) Alimbawa, “pasakayen” nen Jehova so totoo to “ed saray atagey a pasen na dalin.” Sayan balikas so mangipapatnag ed kaligenan tan pananalo ed kakabusol na sakey. Siopaman a mangokontrol ed saray atagey a pasen​—saray pukdol tan kapalandeyan​—so mangokontrol ed bansa. (Deuteronomio 32:13; 33:29) Diad apalabas et tinulok na Israel si Jehova, tan nanggayagaan na nasyon so salimbeng to tan sikaray inggalgalang, tinakotan ni ingen na arum a nasyones. (Josue 2:9-11; 1 Arari 4:20, 21) No ontulok ira lamet ed si Jehova, arum ed satan a datin karlangan so napapawil. Ipagamor nen Jehova ed totoo to so interon nabebetangan ed “tawir nen Jacob”​—saray insipan a bendisyon panamegley na sipan To ed inmuunan atateng da, nagkalalo la say bendisyon a sigpot a pangayarian ed Insipan a Dalin.​—Salmo 105:8-11.

20. Anton “sabaton a panagpainawa” so para ed saray Kristiano?

²⁰ Wala kasi leksion ed saya parad saray Kristiano? Sanen inatey si Jesu-Kristo, say Mosaikon Ganggan so naandi la, a pati saray kakaukolanen ed Sabaton. (Colosas 2:16, 17) Balet, say prinsipyo a nepeg komon a naaral na Juda diad panagngilin ed Sabaton​—say pangiyuna ed saray espiritual ya interes tan say iyapit ed si Jehova​—so siansia nin makana parad saray managdayew ed si Jehova. (Mateo 6:33; Santiago 4:8) Niarum ni, diad sulat nen Pablo ed saray Hebreo et inkuan to: “Mansiansia ni so sabaton a panagpainawa parad totoo na Dios.” Onloob iray Kristiano ed sayan “sabaton a panagpainawa” diad pagmaliw a matulok ed si Jehova tan pangegemtan ed inkatunong a nibase ed pananisia ed nipatedter a dala nen Jesu-Kristo. (Hebreos 3:12, 18, 19; 4:6, 9-11, 14-16, NW) Parad saray Kristiano, sayan klase na panagngilin ed sabaton so gagawaen, aliwa labat a maminsan ed sakey simba, noagta inagew-agew.​—Colosas 3:23, 24.

Say Espiritual ya Israel so ‘Nansakay ed Saray Atagey a Pasen na Dalin’

21, 22. Diad anton dalan a ginawa nen Jehova a ‘mansakay ed saray atagey a pasen na dalin’ so Israel na Dios?

²¹ Manlapu nen imbulos ira ed inkakautibo ed Babilonia nen 1919, saray alanaan a Kristiano so matoor a nanngilin ed iyaanino na Sabaton. Bilang resulta, sikaray ‘insakay [nen Jehova] ed saray atagey a pasen na dalin.’ Diad anton pantalos? Nen 1513 K.K.P., si Jehova so akisipanan ed saray kailalakan nen Abraham a no ontulok ira, sikaray magmaliw a panarian na saray saserdote tan sakey a masanton nasyon. (Exodo 19:5, 6) Diad loob na 40 a taon ed kalawakan, sikaray maligen ya inawit nen Jehova, a singa agila a mangaawit ed saray sibong to, tan benendisyonan to ira na daakan a probisyon. (Deuteronomio 32:10-12) Balet, andiay pananisia so nasyon, kanian diad kaunoran et abalang da so amin a pribilehyo a nagegemtan da komon. Anggaman ontan, si Jehova so walaan na panarian na saray saserdote natan. Satan so espiritual ya Israel na Dios.​—Galacia 6:16; 1 Pedro 2:9.

²² Legan na “panaon na anggaan,” agawaan na sayan espiritual a nasyon so ag-agawaan na Israel nensaman. Mansiasiansia so pananisia ra ed si Jehova. (Daniel 8:17, NW) Lapud saray membro ra so mapekder a manguunor ed saray atagey ya estandarte tan paraan nen Jehova, diad espiritual a pantalos et sikaray iyaatagey nen Jehova. (Uliran 4:4, 5, 8; Apocalipsis 11:12) Panggagayagaan da so nipaatagey ya estilo na kabibilay lapud sikaray sasalimbengan ed karutakan ya akapaliber ed sikara, tan imbes ya ipilit dan gawaen so labay da, sikaray ‘manliga ed si Jehova’ tan ed Salita to. (Salmo 37:4) Sineguro nen Jehova a sikaray maligen ed espiritual anggaman ed determinadon panamasegsegang diad sankamundoan. Manlapu nen 1919 say espiritual a “dalin” da so agni aderal. (Isaias 66:8) Nantultuloy iran nagmaliw a totoo a parad atagey a ngaran to, a magayaga ran iyaabawag ed sankamundoan. (Deuteronomio 32:3; Gawa 15:14) Niarum ni, say ondarakel a mauyamon totoo a manlapud amin a nasyon so kaiba ran mibibiang la natan diad engranden pribilehyo a paibangat ed saray dalan nen Jehova tan patulongan a mankurang ed saray basbas to.

23. Panon a ‘tinagano’ nen Jehova iray alanaan a lingkor to “ed tawir nen Jacob”?

²³ ‘Tinagano’ nen Jehova iray alanaan a lingkor to “ed tawir nen Jacob.” Sanen benendisyonan nen Isaac si Jacob imbes a si Esau, impasakbay na saray salita na patriarka iray bendisyon parad amin a mangagamil na pananisia  ed insipan a Bini nen Abraham. (Genesis 27:27-29; Galacia 3:16, 17) Singa si Jacob​—tan aliwan singa si Esau​—saray alanaan a Kristiano tan saray kaiba ra so ‘mangaapresya ed saray sagradon bengatla,’ nagkalalo la say espiritual a tagano a daakan ya itatarya na Dios. (Hebreos 12:16, 17, NW; Mateo 4:4) Sayan espiritual a tagano​—a kabiangan so pikakabat ed no anto so susumpalen nen Jehova panamegley na insipan a Bini tan saray kaiba na satan a Bini​—so makapabiskeg, makapakasil, tan makana ed espiritual a bilay da. Kanian, makana so maparanay a pangan da na espiritual a tagano diad panamegley na pambasa tan pandalepdep ed Salita na Dios. (Salmo 1:1-3) Kaukolan a sikaray milimog ed saray kapananisiaan diad saray Makristianon miting. Tan makana ya itandoro da iray atagey ya estandarte na puron panagdayew legan a magayagan inanabang da itan a tagano ed arum.

24. Panon so ikikiwas na saray tuan Kristiano natan?

²⁴ Legan a mapetepet dan aalagden so pakasumpal na saray sipan nen Jehova, komon ta mantultuloy iray tuan Kristiano a mangipulisay ed amin a klase na pansimpisimpitan. Diad pakatatagano ed “tawir nen Jacob” komon ta mantultuloy a panggayagaan da so espiritual a kaligenan ed “saray atagey a pasen ed dalin.”

[Paimano ed Leksab]

[Tepetepet Parad Panagaral]