No Panon a Makakaawat so Arum na Saray Ebat

DAKERAKEL a totoo so manpipikasi. Kombinsido so arum a naeebatan iray pikakasi ra. Say arum so manduaruwa no kasin narerengel iray pikakasi ra. Arum so siansian manaanap ed saray ebat balet agda iisipen so pankerew ed Dios panamegley na pikakasi.

Ipapabidbir na Biblia so tuan Dios bilang “Dumerengel na pikakasi.” (Salmo 65:2, NW) No manpikasi ka, kasin segurado kan nipapaarap ed tuan Dios iray pikakasim? Kasin saray pikakasim et saramay pikakasin ebatan to?

Positibo so ebat na maslak a totoo ed amin a parte na dalin! Panon iran naebatan? Anto so naaralan da?

Siopa so Dios?

Sakey a maestra ed Portugal a binangatan na saray madre tan pari so masimoon ed relihyon to. Sanen inuman tan intalirak na iglesia iray agamil a nibangat ed sikaton importante, sikato so awetwet. Diad inyakar to ed sananey a bansa et naamtaan to so nanduruman paraan na panagdayew na taga-Bukig, kanian panduaruwaan to no kasin wala so saksakey a tuan Dios. Panon so nepeg a pandayew to? Sanen nantepet ed pari ra na nipaakar ed Biblia, saray tepet to so imbaliwala kanian sikatoy adismaya.

Angipalapag na pulyeto so iglesia Katolika diad syudad a panaayaman na sayan maestra a mamapasakbay ed saray mimimisa ya ag-ira mitotongtong ed saray Tasi nen Jehova. Balet sikatoy siansian nanupapet. Sakey ya agew sanen dinmalaw iray Tasi ed abung to, sikatoy dinmengel tan angipatnag na interes ed nadngel to. Satan so primeron impakapitongtong to ed sikara.

Pian naebatan iray dakel a tepet to, sayan bii so impaiyaralan na Biblia ed saray Tasi. Kada simba et akaparaan so andukey a listaan na saray itepet to ed sikara. Labay ton amtaen no anto so ngaran na Dios, no kasin wala so saksakey a tuan Dios, no kasin aabobonan to so pangusar na saray imahen ed panagdayew, tan dakel nira. Naimano to ya amin ya inyebat da ed sikato et nanlapud Biblia,  aliwan personal iran opinyon, kanian sikatoy asurprisa tan aliketan ed naaaralan to. Kalkalnan naebatan iray dakel a tepet to. Natan et sikato lay mandadayew ed si Jehova ed espiritu tan katuaan, unong ya imbaga nen Jesu-Kristo a gawaen na saray “tuan managdayew.”​—Juan 4:23, NW.

Diad Sri Lanka, wala so pamilyan regular a manbabasa ed Biblia a saniiba, balet agnaeebatan so dakel a tepet da ya importante ed sikara. Anggaman kakkaukolan da so tulong, say pari ra so ag-akatulong. Balet, say pamilya so dinalaw na saray Tasi nen Jehova tan intilakan da ra na makatulong a literatura ed Biblia. Diad saginonor, sanen niiter na saray Tasi nen Jehova so makapenek iran ebat ed saray tepet na pamilya nipaakar ed Biblia, inmabobon iran paiyaralan na Biblia. Sikaray nainteresan a maong ed naaaralan da.

Balet, siansia nin say asawan bii so pupugeran na doktrinan nipurek ed sikato nen kaugawan to diad simbaan pian namorian say Ama nen Jesu-Kristo so “saksakey a tuan Dios,” unong ya imbagan mismo nen Jesus. (Juan 17:1, 3) Nibangat ed sikato a si Jesus et mipara ed say Ama tan sayan “misteryo” so agnepeg a suppiaten. Sikatoy masimoon tan desperadon nampikasi ed si Jehova, a binitla toy ngaran To, tan impikasi to ya ipaamta ed sikato no siopa si Jesus. Insan inusisa ton maong lamet iray matukoy a teksto. (Juan 14:28; 17:21; 1 Corinto 8:5, 6) Alikna to a singa sikatoy aliwa lan bulag ed katuaan tan amoria to la a si Jehova​—say Manamalsa na tawen tan dalin tan say Ama nen Jesu-Kristo​—so tuan Dios.​—Isaias 42:8; Jeremias 10:10-12.

Akin a Wala so Paniirap?

Say toon si Job so pirmin nanirap. Amin ya ilalak to so inatey ed maksil a dagem, tan sikatoy nagmaliw a duka. Asagmak to met so makapaot-ot a sakit tan sinungdoan to so pananesdes na palson kakaaro. Lapud amin na saraya, si Job so bengatbengat ya akapansalita. (Job 6:3) Balet inkonsidera na Dios iray sirkumstansya. (Job 35:15) Amta to so walad puso nen Job tan angitarya na simbawa a nakakaukolan nen Job. Ontan met so gagawaen to natan ed saray totoo to.

Diad Mozambique, si Castro so mantaon lambengat na samplora sanen inatey so ina to. Sikatoy agonigon. “Akin a sikatoy kaukolan ya ompatey tan taynanan kami?” so intepet to. Anggaman pinabaleg na matakot ed Dios ya atateng, siansia nin agto natalosan. Anto so manambayo ed kanonotan tan liknaan to? Sikatoy aligliwa ed impanbasa to ed melag a Biblian Chichewa tan insingbat to itan ed saray kuya to.

Kalkalnan atalosan nen Castro a say impatey na ina to et, aliwan lapud ag-inkahustisya ed biang na Dios, noagta lapud atawir ya ag-inkayadyari. (Roma 5:12; 6:23) Say sipan na Biblia nipaakar ed kikioli et akaligliwan maong ed sikato lapud amoria ton satan so basiyan na panmatalek to a napinengnengan lamet so ina to. (Juan 5:28, 29; Gawa 24:15) Makapaermen, kalabas na apat taon et inatey so ama to. Balet sarag la natan nen Castro a talonaan so impakaulila. Natan et sikatoy mangaaro ed si Jehova tan matoor a manguusar ed bilay to diad panlilingkor ed Dios. Say gayagan aromog to so wala met ed amin a mikabat ed sikato.

Dakel a totoon inateyan na saray inad-aro so naliligliwa met ed saray katuaan ed Biblia a nanligliwa ed si Castro. Saramay makakaeksperiensya na pirmin irap makasengeg ed saray mauges a totoo so mangitetepet na singa ed intepet nen Job: “Akin et manbilay so saray marelmeng?” (Job 21:7) Sano peteg ya ontalineng so totoo ed pangeebat na Dios panamegley na Salita to, naaralan dan say paraan na Dios ed pangaasikaso na saray pamaakaran so talagan para ed pankaabigan dan dili.​—2 Pedro 3:9.

Si Barbara, a binmaleg diad Estados Unidos, so agnin balot akaeksperiensya na makapasinagem ya epekto na bakal. Balet sanleleg na imbaleg to et dakel a bansa diad mundo so akibiang ed pambabakal. Inagew-agew a nibabalita so nipaakar ed saray inaatey lapud bakal. Legan na paneeskuela to, sikatoy awetwet diad impakaaral to ed saray ebento ed awaran ya impasakbay la diad saray paraan ya ompatnag ya agnapadesiran. Anto so makapangipaliwawa ed satan? Kasin iimanoen na Dios iray nagagawa? Panisiaan ton wala so Dios, balet manduruma so nalilikna to nipaakar ed sikato.

Balet, kalkalnan anguman so panmoria nen  Barbara nipaakar ed bilay bilang resulta na impilimog to ed saray Tasi nen Jehova. Dinengel to ira tan impaiyaralan na Biblia ed sikara. Sikatoy inmatendi ed saray miting diad Kingdom Hall. Inmatendi ni ingen ed sakey ed saray angkabaleg a kombension da. Niarum ni, sanen nantetepet, naimano to ya aliwan nandudumaan so opinyon na nanduruman Tasi a tinetepetan to. Imbes, apasakey so inyebat na saray Tasi lapud say kanonotan da so nibase ed Biblia.

Impabitar na saray Tasi so ebidensya ed Biblia a say mundo so iimpluensyaan nen Satanas a Diablo, say manuley ed satan, tan ipapatnag na satan so espiritu to. (Juan 14:30; 2 Corinto 4:4; Efeso 2:1-3; 1 Juan 5:19) Impaliwawa ra a nipasakbay la ed Biblia iray ebenton manwewetwet ed si Barbara. (Daniel, kapitulo 2, 7, tan 8) Impasakbay na Dios iratan lapud sikatoy walaan na abilidad a makaamta ed arapen sano labayen ton gawaen itan. Arum ed saraman ya ebento so linawa na Dios a nagawa. Arum so aabuloyan to lambengat a nagawa. Impanengneng na saray Tasi ed si Barbara ya impasakbay met na Biblia iray maong tan mauges a nagagawa ed panaon tayo tan impaliwawa da so kabaliksan na saratan. (Mateo 24:3-14) Impanengneng da ed sikato iray sipan na Biblia nipaakar ed balon mundo ya ontalona so inkatunong tan aglan balot niwala so panirap.​—2 Pedro 3:13; Apocalipsis 21:3, 4.

Kalkalnan atalosan nen Barbara a bangta aliwan si Jehova a Dios so responsable ed paniirap na too, agto itan aamperen diad pamapaskar ed totoo a mangunor ed saray ganggan to sano pilien dan agtuloken iratan. (Deuteronomio 30:19, 20) Nanggawa so Dios na saray probisyon pian maliket itayon makapambilay ya andi-anggaan, balet iikdan to itayoy pankanawnawa natan a nipatnag no kasin manbilay itayo a mitunosan ed saray matunong a dalan to. (Apocalipsis 14:6, 7) Determinado si Barbara a naaralan iray kakaukolanen na Dios tan manbilay unong ed saratan. Aromog to met ed limog na saray Tasi nen Jehova so nengneng na aro ya inkuan nen Jesus a pakabidbiran ed saray tuan patumbok to.​—Juan 13:34, 35.

Sikayo met so nagunggonaan ed saray probisyon ya akatulong ed sikato.

Bilay a Walaan na Kabaliksan

Nayarin anggan saramay singano matalona lay bilay da so manaanap na saray ebat ed tepetepet a manwewetwet ed sikara. Singa bilang, si Matthew, sakey a kalangweran ed Britanya, so naynay a manpipirawat a naromog so tuan Dios tan say gagala na bilay. Si Matthew so 17 años sanen inatey so ama to. Diad saginonor, si Matthew so angala na kurson musika diad sakey ya unibersidad. Balet naiimano ton tuloy so kaapaan na materyalistikon panagbilay to. Sikatoy inmalis ed London, tan diman et sikatoy alanor ed druga, night clubs, astrolohiya, espiritismo, tan Zen Buddhism tan arum niran pilosopiya​—a ginawa ton amin iya lapud panaanap to ed makapenek a panagbilay. Sikatoy desperadon inmey-ey ed Dios pian patulongan a naromog so katuaan.

Kalabas na duaran agew et apinengnengan nen Matthew so datin kaaro to tan insalaysay to so problema to. Sayan laki so inyaralan la na saray Tasi nen Jehova. Sanen impabasa to ed si Matthew so 2 Timoteo 3:1-5, sikatoy nikelawan ed agaylan inkasusto na impaneskribe na Biblia ed mundon pambibilayan tayo. Sanen binasa to so Sermon ed Palandey, atenyeg so liknaan to. (Mateo, kapitulo 5-7) Sikatoy talawan diad primero lapud walaray abasa ton materyal a mamapauges ed saray Tasi nen Jehova, balet diad kaunoran et denesidi toy onatendi ed saray miting diad asingger a Kingdom Hall.

Nanggayagaan nen Matthew so nadngel to tan impaiyaralan na Biblia ed sakey ed saray matatken ed kongregasyon. Ag-abayag et amoria to a say naaaralan to et saman imay aanapen to, say ebat ed samay inmunan impikasi to ed Dios. Naeksperiensya to iray gunggona sanen intalirak to so agagamil ya agmakapaliket ed si Jehova. Leleg a nababayuboan to so maabig a takot ed Dios, sikatoy napapakiwas a mangitunos ed bilay to ed saray ganggan na Dios. Naaralan nen Matthew a say ontan a bilay so walaan na peteg a kabaliksan.​—Eclesiastes 12:13.

Ag-inggetar ed gapo a si Matthew tan arum niran asalambit ed artikulo et makaromog na makapenek a panagbilay. Bangbalet, naaralan da a walaan si Jehova a Dios na maaron gagala a sasayakupen  na amin a maliket a mangunor ed saray ganggan to. (Gawa 10:34, 35) Kabiangan ed satan so magnayon a bilay diad sakey a mundon anggapo lay pambabakal, sakit tan eras, tan anggan say ipapatey et naandi met la. (Isaias 2:4; 25:6-8; 33:24; Juan 3:16) Kasin ontan so kaliktan mo? No ontan, makaaral ka ni a nagkalalo ed pakaromog na tombok ed makapenek a bilay diad iyatendi ed saray nibase ed Biblia a pantitipon diad Kingdom Hall na saray Tasi nen Jehova. Maliket mi kan iimbitaan a manggawa ed satan.

[Litrato ed pahina 7]

Masimoon a manpikasi ed Dios, a salambiten so personal a ngaran to

[Litrato ed pahina 7]

Paiyaralan na Biblia ed saraman so tuan mangibabangat ed lugan na satan

[Saray litrato ed pahina 7]

Onatendi ed saray miting diad Kingdom Hall

[Picture Credit Line ed pahina 4]

Hiker: Chad Ehlers/Index Stock Photography