Agnagmaliw ya Antikey so Lima nen Jehova
Propesiya nen Isaias—Liwawa Parad Amin a Katooan II
Kapitulo Biente
Agnagmaliw ya Antikey so Lima nen Jehova
1. Anto so kipapasen ed Juda, tan anto so panuumamengan na dakel?
IMBAGA na nasyon na Juda a walay pisisipanan da ed si Jehova. Ingen ta walay problema ed nanduruman pasen. Mataltalag so hustisya, kasmak so krimen tan panaglames, tan agnagagawa iray iilaloan ya iyaaligwas. Walay agmanepeg a nagagawa. Dakel so manuumameng no kasin ipetek ni nen Jehova iray pamaakaran. Ontan so kipapasen ed panaon nen Isaias. Balet say salaysay nen Isaias nipaakar ed satan a panaon et aliwa lambengat a kadaanan ya awaran. Lugan na saray salita to so mapropetiko iran pasakbay ed siopaman a mankuan a mandadayew ed Dios balet ta ibabaliwala to iray ganggan To. Tan say impuyan a propesiyan nikurit ed Isaias kapitulo 59 so mangitatarya na ampetang a panamaseseg ed amin a manggugunaet a manlingkor ed si Jehova anggaman manbibilay ira ed mairap tan mapeligro iran panaon.
Niyarawi ed Tuan Dios
2, 3. Akin ya agsinalimbengan nen Jehova so Juda?
2 Isipen pa—say akisipanan a totoo nen Jehova so nagmaliw ya apostata! Imbeneg da so Nanggawa ed sikara, ya inyarawi ra so inkasikara ed pananalimbeng to. Lapud saya et sinagmak da so pirmin gonigon. Kasin natetel da si Jehova lapud irap a sasagmaken da? Oniay inkuan nen Isaias ed sikara: “Nia, say lima nen Jehova ag-apatikey, pian agto nayarian so mangilaban komon; say layag to agmet apuletan, pian agto nayarian so ondengel komon: Balet saray inkauges yo so amasian ed sikayo tan ed Dios, tan saray kasalanan yo inyamot da so lupa to ed sikayo, dia ed ontan ya agnaani ondengel.”—Isaias 59:1, 2.
3 Saratan a salita so prangka balet ta matua. Si Jehova so siansia nin Dios na kilalaban. Bilang “Dumerengel na pikakasi,” sikato so ondedengel ed saray pikakasi na matoor iran lingkor to. (Salmo 65:2, NW) Balet, agto bebendisyonan iray managgaway-mauges. Saray totoon mismo so walaan na eebatan ed inyarawi ra ed si Jehova. Lapud inkarelmeng da, inyamot to so lupa to manlapud sikara.
4. Antoran kasalanan so intetel ed Juda?
4 Say katuaan to et say Juda so walaan na mauge-uges a rekord. Indalatdat na propesiya nen Isaias so pigara ed saray kasalanan da: “Saray lima yo adutakan ira ed dala, tan saray gamegamet yo ed inkauges; saray bibil yo nansalita ra na tila, say dila yo nantalabutob na mauges.” (Isaias 59:3) Matitila iray totoo tan nansalita ira na mauges iran bengatla. Say impanukoy ed ‘saray lima ya adutakan ed dala’ so mangipapabitar a wala ni ingen iray akapatey. Agaylan panamabanday ed Dios, a say Ganggan to et aglambengat mangisesebel ed panagpatey noagta isesebel met na satan so ‘pamusol ed agi yo diad puso yo’! (Levitico 19:17) Say agnabanlongan ya impankasalanan na saray manaayam ed Juda tan say agnapaliisan a resulta na satan so nepeg a mangipanonot ed balang sakey ed sikatayo natan a nakaukolan tayon kontrolen iray makasalanan a kanonotan tan liknaan. Ta no andi, makagawa itayo na marelmeng iran gawa a mangisian ed sikatayo ed Dios.—Roma 12:9; Galacia 5:15; Santiago 1:14, 15.
5. Panon kalaknab so inyuges na Juda?
5 Say inkamakasalanan so kinmayat la ed interon nasyon. Oniay ibabaga na propesiya: “Anggapo so manpirawat na inkatunong, tan anggapo so mangyagel na katuaan, manmatalek ira ed inkaapa, tan mansalita ra na saray tila; manlukon ira na mauges, tan mangiyanak ira na inkauges.” (Isaias 59:4) Anggapo so mansasalita na inkatunong. Anggan diad saray korte na ganggan, mataltalag so naromog a napanmatalkan odino matoor. Say Juda so angibeneg ed si Jehova tan sikatoy nanmatalek ed impialyansa to ed saray nasyon, anggan ed saray andiay-bilay a talintao. Amin na saraya so “inkaapa,” andian a balot na kakanaan. (Isaias 40:17, 23; 41:29) Bilang resulta, dakel so ginawan diskusyon, balet ta anggapoy kakanaan na satan ya amin. Walaray implano, balet ta nanresulta iratan ed gonigon tan panamasakit.
6. Panon a miulibay so rekord na Kakristianoan ed Juda?
6 Say ag-inkatunong tan karawalan na Juda so walaan na baleg a piulibayan ed Kakristianoan. (Nengnengen so “Apostate Jerusalem—A Parallel of Christendom,” diad pahina 294 na libro.) Duaran maramsak a guerra mundial so agawa a mangilalanor ed mankuan a Kristianon nasyones. Anggad natan et apaneknekan ya anggapoy pakayari na relihyon na Kakristianoan a mangamper ed panagpalanit ed etnikon grupo tan pampapateyan na saray tribu ed limog na saray mismon membro to. (2 Timoteo 3:5) Anggaman imbangat nen Jesus iray patumbok to a manmatalek ira ed Panarian na Dios, saray nasyon na Kakristianoan so nantultuloy a nanmatalek ed seguridad ya itatarya na saray ayura na militar tan piaalyansa ed politika. (Mateo 6:10) On, maslak ed saray manunan mamapawala na saray armas diad mundo et naromog ed saray nasyon na Kakristianoan! On, sano manmatalek so Kakristianoan ed saray sagpot tan organisasyon na too parad maligen ya arapen, sikato so manmamatalek ed “inkaapa.”
Panani na Ampait Iran Pansumpalan
7. Akin a pankaugsan labat so resulta na saray getma na Juda?
7 Say idolatriya tan ag-inkamatua so agmakapawala na maligen a sosyedad. Lapud aagamilen da iratan, saray agmatoor a Judio so nanani na gonigon ya intanem dan mismo. Oniay nabasa tayo: “Manposnak ira na saray iknol na uleg, tan manabel ira ed saray ilol na genggeng: Say mangan ed saray iknol da ompatey; et say natapilan ombetag et ompaway so sakey ya uleg.” (Isaias 59:5) Manlapud inggapo anggad inkagawa na saratan, saray getma na Juda so amawala na bengatlan andiay-kakanaan. Say lingon impanisip da so nanresulta labat ed pankaugsan, no panon a saray iknol na maditan uleg so mamawala labat na madita iran uleg. Kanian nanirap so nasyon.
8. Anto so mangiparungtal ed depektibon panag-isip na Juda?
8 Arum a manaayam ed Juda so nayarin binmaling ed karawalan pian naprotektaan day inkasikara, balet ta ag-ira tinmalona. Agnasalatan na pisikal a puersa so panagmatalek ed si Jehova tan saray gawa na inkatunong bilang salimbeng no panon ya agnasalatan na saray tapa [o linat] so tudtuan abel bilang salimbeng ed mauges a panaon. Oniay inyabawag nen Isaias: “Saray abel [“tapa,” NW] da ag-ira naani magmaliw a kawes, agda naani nasakbongan so saray laman da lanlamang ed saray gawa ra; saray gawa ra, gawa na inkauges, et say gawa na panamasoot wala ed saray lima ra. Saray sali ra ombatik ira ed mauges, tan mangganat ira a mangibung na dala ya andi kasalanan to: saray kanonotan da sikara so kanonotan na inkauges, kabagbag tan kaderal so wala ed saray dalan da.” (Isaias 59:6, 7) Walaan na depekto so panag-isip na Juda. Diad impangagamil toy karawalan pian naresolbi iray problema to, impatnag to so agmaridios ya awawey. Ag-importante ed sikato no inosente so dakel ed saray biktima to, ya arum ed saratan et tuan lingkor na Dios.
9. Akin ya agnarapat na saray pangulo na Kakristianoan so tuan kareenan?
9 Sarayan apuyanan a salita so mangipanonot ed sikatayo ed maralan rekord na Kakristianoan. Seguradon mikuentaan si Jehova ed sikato lapud makapasinagem tan lingon impangirepresenta to ed Inkakristiano! Singa saray Judio ed panaon nen Isaias, inagamil na Kakristianoan so pikewet a kurang ed moral lapud manisia iray lider to a sankapraktikalan itan a kurang. Legan a pantotongtongan da so kareenan, onkikiwas ira tekep na ag-inkahustisya. Agaylan pampadpara! Lapud intultuloy na saray pangulo na Kakristianoan so pangusar ed sayan taktika, agda arapat so tuan kareenan. Ontan so intuloy ya inkuan na propesiya: “Say dalan na deen agda amta; et anggapo so inkatunong ed saray laen da: ginawa ra a pikewet a daladalan; anggan siopa ya onla’d man agto amta so deen.”—Isaias 59:8.
Karapkarap ed Espiritual a Kabilungetan
10. Anto so impatua nen Isaias nisesengeg ed Juda?
10 Agnayarin bendisyonan nen Jehova so mapalikdo tan makaderal iran paraan na Juda. (Salmo 11:5) Kanian sanen nansalita si Isaias ed biang na interon nasyon, impatua to so kasalanan na Juda: “Say inkatunong arawi ed sikami, say kaptekan agto kami met naabot: anapen mi so liwawa, balet, nia so kabilungetan: say kasnagan, balet manakar kami ed kakuyepan. Mankarkarapas kami ed dingding a singa say bulag; on, sikami mankarkarapas kami a singa saray andian na mata: sikami nigapol kami ed pegley agew a singa ed mansirunget; ed pegley na saman so masekder singa kami inatey a totoo. Manungol kami a singa saray oso, tan mantagleey kami a singa saray malapati.” (Isaias 59:9-11a) Agginawa na saray Judio so Salitay Dios a pinagkasilewan ed salisali ra tan pinagkaliwawa ed basbas da. (Salmo 119:105) Bilang nansumpalan, ompatnag a mauddiem iray bengatla. Anggan diad pegley-agew et karapkarap ira a singa labi. Singano ira inaatey. Diad pampipilalek da a nainawaan, managlem ira a singa narnarasan odino asugatan ya oso. Arum so pakaskasin unuuni, a singa saray begtebegtew a malapati.
11. Akin a maapa iray iilaloan na Juda ya inkahustisya tan kilalaban?
11 Kabisado a maong nen Isaias a say rason na mauges ya asagmak na Juda et say impanrebeldi ra ed Dios. Inkuanto: “Anapen mi so inkatunong, balet anggapo; say kilalaban, balet sikato so arawi ed sikami. Ta saray impakasumlang mi ondakel ira ed arap mo, tan saray kasalanan mi mantasi ra a sumpa ed sikami; ta saray impakasumlang mi wala ed sikami, et no nipaakar ed saray inkauges mi, amta mi ra. Kasusumlang tan panangiburi ed kinen Jehova, tan isipa ed katutumbok ed Dios mi, pansalita na panamairap tan yaalagey, panlinawa tan pansalita ed puso na saray salita na inkatila.” (Isaias 59:11b-13) Lapud agnagbabawi iray manaayam ed Juda, saray kasalanan da so siansia nin ag-aperdona. Anggapo lay inkahustisya ed bansa lapud tinaynan na totoo si Jehova. Pinaneknekan da a matila ira ed amin a paraan, a pinairap da ni ingen iray agagi ra. Mipadpara iran tuloy ed Kakristianoan natan! Aglambengat imbaliwala na dakel a totoo so inkahustisya noagta aktibo met ira ya amasegsegang ed saray matoor a Tasi nen Jehova, a manggagawa na linawa na Dios.
Ipaakseb nen Jehova so Panangukom
12. Anto so awawey na saramay responsable ed panangipaakseb na inkahustisya diad Juda?
12 Ompatnag ya anggapo la so inkahustisya, inkatunong, odino katuaan ed Juda. “Say inkatunong nipuliktar, et say kaptekan manalagey ed arawi; ta say katuaan nayagyag ed dalan, et say kaptekan agto nayarian so onloob.” (Isaias 59:14) Diad loob na saray wangalan na syudad ed Juda, walaray plasa a pantitiponan na mamasiken pian singbaten so legal iran kaso. (Rut 4:1, 2, 11) Saratan a lalaki so nepeg a mangukom unong ed inkatunong tan mangipakurang ira ed inkahustisya, ya ag-ira mangawat na pasuksok. (Deuteronomio 16:18-20) Imbes, sikara so angukom unong ed sinisiblet iran ideya ra. Alodloor ni, ipapasen da a mainomay a nabiktima so siopaman a masimoon a manggagaway maong. Oniay nabasa tayo: “Say katuaan manandi; et say ompaliis ed inkauges nagawa lanlamang a sakey a dinakep.”—Isaias 59:15a.
13. Lapud mapaulyan iray uko-ukom na Juda ed obligasyon da, anto so gawaen nen Jehova?
13 Alingwanan na saramay onaabobon ed pikewet a moralidad a say Dios et aliwan bulag, mangamanga, odino andiay-pakayari. Oniay insulat nen Isaias: “Sikato so anengneng nen Jehova, et amasanok ed sikato, ta anggapo nensaman so inkatunong. Et anengneng to nensaman ya anggapo so too, et nikelawan nensaman ta anggapo so mangyesel: kanian say taklay to lanlamang so angyakar na kilalaban ed sikato; et say inkatunong to, sikato so amemben ed sikato.” (Isaias 59:15b, 16) Lapud mapaulyan iray aturon uko-ukom ed obligasyon da, onsalet si Jehova ed satan a pamaakaran. Sano sikatoy onsalet, sikato so onkiwas ed inkatunong tan tekep na pakayari.
14. (a) Anto so awawey na dakel natan? (b) Panon so pampaparaan nen Jehova diad ikiwas to?
14 Wala met so mipadparan situasyon natan. Manbibilay itayo ed mundo a dakel so “andian lan balot na liknaan ed moral.” (Efeso 4:19, NW) Daiset so manisia ya onsalet si Jehova pian paandien to so kaugsan ed dalin. Balet ipapabitar na propesiya nen Isaias a si Jehova et maniimanon maong ed saray gagawaen na too. Gawaen to iray panangukom, tan diad dilin panaon to et sikato so onkiwas unong ed saratan a panangukom. Kasin makatunongan iray panangukom to? Ipapabitar nen Isaias a makatunongan iratan. Diad biang na nasyon na Juda, oniay insulat to: “Et inkawes [nen Jehova] so inkatunong a singa sakey a kabal, tan sakey a kapacete na kilalaban ed tapew na ulo to; et nankawes ed saray kawes na kababales a nipaakar ed kawes, et asakbongan ed seseg a singa sakey a kolibemben.” (Isaias 59:17) Si Jehova so ililitrato na sarayan mapropetikon salita bilang mibabakal a manpaparaan a mibakal. Sikatoy determinadon mangilaban nisesengeg ed getma to. Sikato so maseguro ed mismon nagnap tan agnasuppiat ya inkatunong to. Tan sikato so makpel tan maseseg ed saray gawa na panangukom to. Anggapoy duaruwa ya ontalona so kaptekan.
15. (a) Diad anton paraan so ikiwas na saray tuan Kristiano sano ipaakseb la nen Jehova so panangukom to? (b) Anto so nibaga nipaakar ed saray panangukom nen Jehova?
15 Diad arum a daldalin natan, sasalien na saray ombubusol ed katuaan ya amperen so kimey na saray lingkor nen Jehova diad pangikakayat day palso tan manamabanday a propaganda. Saray tuan Kristiano so agmasuyat ya ontalindeg ed katuaan, balet agdan balot panggunaetan so ombales. (Roma 12:19) Anggan sano mikuentaan la si Jehova ed apostatan Kakristianoan, agmibiang iray mandadayew ed Sikato diad paneral ed satan. Amta ra ya akatalaga labat ed si Jehova so panangibales tan sikatoy manepeg ya onkiwas sano onsabi so panaon. Oniay ipapaseguro ed sikatayo na propesiya: “Unong na saray gawa ra, ontan naani panumang to, say sanok ed saray kabusol to, tumangan to naani so saray kabusol to; dia ed saray pulo iter to naani so tumang.” (Isaias 59:18) Diad panaon nen Isaias, aliwa lambengat a makatunongan iray panangukom na Dios noagta nagnap met iratan. Makasabi ni ingen iratan “dia ed saray pulo,” dia ed arawi iran parte na dalin. Anggapo so walad nisulinek odino niyarawi a makapaliis ed saray panangukom nen Jehova.
16. Siopa so makaliktar ed saray panangukom nen Jehova, tan anto so naaralan da manlapud pakaliktar da?
16 Saramay manbabanikel a manggawa na maptek so makatunongan ya ukomen nen Jehova. Impasakbay nen Isaias a manlapud sampot na dalin ya anggad sampot na dalin—diad interon dalin—saratan so makaliktar. Tan say pakaeksperiensya ra ed proteksion nen Jehova so mamabiskeg ed panangidayew tan panangigalang da ed sikato. (Malaquias 1:11) Oniay nabasa tayo: “Dia ed ontan antakot ira naani ed ngaran nen Jehova a manlapu ed sagur, et say gloria to manlapu ed letakan na banwa; ta sikato so onsabi naani a singa maples ya agus, ya ingeswa na panlinawa [“espiritu,” NW] nen Jehova.” (Isaias 59:19) Singa say mabiskeg a bagyo a mangitutulak ed makaderal a daluyon tan itakos ton amin so dalanan to, ekalen na espiritu nen Jehova so amin a babeng pian nasumpal so linawa to. Say espiritu to so mas mabiskeg nen say antokaman a puersa na too. Sano usaren to itan pian ipaakseb so panangukom to ed totoo tan ed saray nasyon, segurado tan nagnap a sikato so ontalona.
Ilalo tan Bendisyon Parad Saray Magbabawi
17. Siopa so Mananondon na Sion, tan kapigan so impanondon to ed Sion?
17 Diad silong na Ganggan nen Moises, say sakey ya Israelita ya angilako ed inkasikato ed inkaaripen so nayarin dondonen manlapud inkaaripen panamegley na sakey a mananondon. Diad akadkaunan parte na mapropetikon libro nen Isaias, si Jehova so abidbir bilang say Mananondon ed saray magbabawin totoo. (Isaias 48:17) Natan et sikato lamet so adeskribe bilang say Mananondon ed saray magbabawi. Inkurit nen Isaias so sipan nen Jehova: “Sakey a Mananondon so onsabi naani ed Sion, tan ed saray ompuliktar ed susumlang ed Jacob, kuan nen Jehova.” (Isaias 59:20) Sayan makapaseguron sipan so asumpal nen 537 K.K.P. Balet satan so walaan na kaaruman nin kasumpalan. Inaon nen apostol Pablo irayan salita manlapud bersion na Septuagint tan inyaplika to iratan ed saray Kristiano. Insulat to: “Ontan a lapag na Israel nilaban. Unong na nisulat, Manlapu ed Sion so Manangibulos; ya ekalen to ed Jacob so karumsisan. Tan saya so sipan ko ed sikara, sano ekalen ko so saray kasalanan da.” (Roma 11:26, 27) On, say propesiya nen Isaias so walaan na ninatnat a maong ya aplikasyon—ya onabot angga ed panaon tayo tan onnatnat ni. Panon ya ontan?
18. Kapigan tan panon a pinawala nen Jehova so “Israel na Dios”?
18 Nen inmunan siglo, si Jesus so inawat na melag a nakdaan na nasyon na Israel bilang say Mesias. (Roma 9:27; 11:5) Diad agew na Pentecostes 33 K.P., inyibung nen Jehova so masanton espiritu to ed 120 ed saraman a mananisia tan intarok to ira ed balon sipanan to a si Jesu-Kristo so manamegley. (Jeremias 31:31-33; Hebreos 9:15) Diad saman ya agew et aporma so “Israel na Dios,” say balon nasyon a saray membro to et nabidbiran, aliwan unong ed silalaman a kapolian nen Abraham, noagta diad impanilalak ed sikara na espiritu na Dios. (Galacia 6:16) Manlapu la’d si Cornelio, say balon nasyon so angilaktip ed saray ag-agalsiman a Gentil. (Gawa 10:24-48; Apocalipsis 5:9, 10) Kanian sikara so tinagibi nen Jehova a Dios tan nagmaliw iran espiritual ya ananak to, saray kaiba nen Jesus a mananawir.—Roma 8:16, 17.
19. Anton pisisipanan so ginawa nen Jehova ed Israel na Dios?
19 Si Jehova natan so akisipanan ed Israel na Dios. Oniay nabasa tayo: “Say nipaakar ed siak, saya sikato so sipan ko ed sikara, kuan nen Jehova, say espirituk a tinmapew ed sika, tan saray salitak ya inyan ko ed sangim, ag-ira naani ontaynan ed sangim, anggan ed sangi na ilalak mo, anggan ed sangi na ilalak na ilalak mo, kuan nen Jehova manlapud natan tan ando lan ando.” (Isaias 59:21) Balanglan onaplikan mismo ed si Isaias irayan salita odino andi, saratan so peteg ya asumpal ed si Jesus, ya apaseguroan a ‘nanengneng to so bini to.’ (Isaias 53:10) Sinalambit nen Jesus iray salitan naaralan to ed si Jehova, tan niwala ed sikato so espiritu nen Jehova. (Juan 1:18; 7:16) Matukotukoy ta saray agagi tan kaiba ton mananawir, saray membro na Israel na Dios, so akaawat met na masanton espiritu nen Jehova tan impulong da so mensahe a naaralan da manlapud mangatatawen ya Ama ra. Sikaran amin et ‘imbangat nen Jehova.’ (Isaias 54:13; Lucas 12:12; Gawa 2:38) Balanglan panamegley nen Isaias odino panamegley nen Jesus, a mapropetikon ililitrato nen Isaias, si Jehova natan so akisipanan ya agto iran balot salatan noagta usaren to ira diad ando lan ando bilang saray tasi to. (Isaias 43:10) Balet, siopa natan iray “ilalak” da a nagunggonaan met ed sayan sipanan?
20. Panon ya asumpal so sipan nen Jehova ed si Abraham nen inmunan siglo?
20 Nensaman a panaon et oniay insipan nen Jehova ed si Abraham: “Dia ed ilalak mo so pakapikapalaranan na saray amin a nasyon dia.” (Genesis 22:18) Mitunosan ed satan, say daiset a nakdaan na silalaman ya Israelitas ya angawat ed Mesias so linma ed dakel a nasyones, ya angipulong ed maong a balita nipaakar ed Kristo. Manlapu la’d si Cornelio et dakel ya ag-agalsiman a Gentiles so ‘pinapalar [day inkasikara]’ panamegley nen Jesus, say Bini nen Abraham. Sikara so nagmaliw a kabiangan na Israel na Dios tan say komaduan kabiangan na bini nen Abraham. Kabiangan ira na ‘masanton nasyon’ nen Jehova, a say niganggan ed sikara et “mangibelyaw na karlangan na saman so angekal ed [sikara] ed kabilungetan, ta tinawag to [ira] ed makapakelaw a silew to.”—1 Pedro 2:9; Galacia 3:7-9, 14, 26-29.
21. (a) Anton “ilalak” so pinawala na Israel na Dios diad moderno iran panaon? (b) Panon ya aligliwa so “bini” ed pisisipanan, odino pipapaknaan, nen Jehova ed Israel na Dios?
21 Natan say kompleton bilang na Israel na Dios so mapatnag ya atugyop la. Balet, saray nasyon so nantultuloy ya abendisyonan—tan diad mas malaknab a paraan. Panon? Diad paraan a say Israel na Dios so awalaan na “ilalak,” saray babangatan nen Jesus a walaan na ilalon andi-anggaan a bilay diad paraison dalin. (Salmo 37:11, 29) Sarayan “ilalak” so imbangat met nen Jehova tan abilin unong ed saray dalan to. (Isaias 2:2-4) Anggaman ag-ira abautismoan ed masanton espiritu odino inkonsidera bilang kabiangan ed balon sipanan, sikara so pinabiskeg na masanton espiritu nen Jehova a manalona ed amin a babeng nen Satanas diad panagpulong a kimey da. (Isaias 40:28-31) Say bilang da natan so inmabot la ed minilyon tan mantutultuloy nin ondarakel legan a mamapawala ira na ilalak dan mismo. Say pisisipanan, odino pipapaknaan nen Jehova, ed saray alanaan so angiter na kompiyansa ed sarayan “ilalak” a sikaray itultuloy met ya usaren nen Jehova bilang pinagkasangiyan to ed ando lan ando.—Apocalipsis 21:3, 4, 7.
22. Anto so panmamatalekan tayo ed si Jehova, tan panon itayon naapektaan ed satan?
22 Komon ta amin tayo, sirin, so mamasiansia ed pananisia tayo ed si Jehova. Sikato so mabulos tan akaparaan a mangilaban! Agbalot magmaliw ya antikey so lima to; sikato so lawas mangiliktar ed matoor a totoo to. Amin a manmatalek ed sikato so mantultuloy a manalambit ed saray maabig a salita nen Jehova “manlapud natan tan ando lan ando.”
[Tepetepet Parad Panagaral]