Dengelen so Ibabaga na Espiritu!

“Say walaan na pakadngel, dengelen to so kuan na espiritu ed saray iglesia.”​—APOCALIPSIS 3:22.

1, 2. Anton simbawa so inulit diad saray mensahe nen Jesus ed pitoran kongregasyon a sinalambit ed Apocalipsis?

 NEPEG ya imanoen na saray lingkor nen Jehova so impuyan na espiritu iran salita nen Jesu-Kristo diad pitoran kongregasyon a sinalambit ed libro na Biblia ya Apocalipsis. On, kada sakey ed sarayan mensahe so walaan na simbawan: “Say walaan na pakadngel, dengelen to so kuan na espiritu ed saray iglesia.”​—Apocalipsis 2:7, 11, 17, 29; 3:6, 13, 22.

² Kinonsidera tayo la iray mensahe nen Jesus ed saray anghel, odino manangasikaso, ed Efeso, Smyrna, tan Pergamo. Panon tayon nagunggonaan ed imbaga to panamegley na masanton espiritu diad apatira nin kongregasyon?

Para ed Anghel Diad Tiatira

3. Iner so kawalaan na Tiatira, tan anton produkto so bantog a tuloy ditan?

³ Komendasyon tan panamaat so inter na “Anak na Dios” ed kongregasyon na Tiatira. (Basaen so Apocalipsis 2:18-29.) Say Tiatira (natan et Akhisar) so niletneg ed gilig na Ilog na Gediz (kadaanan a Hermus) diad mamasagur ya Asia Minor. Bantog so syudad lapud dakerakel a napan-anapan. Saray managgaway panagkolor so manguusar na lamot na tanaman a madder bilang say lapuan na bantog ya eskarlata, odino purpura. Si Lydia, a nagmaliw a Kristiano  legan na imbisita nen Pablo ed Filipos ed Gresya, so “managlako na kawes a purpura, a taga-syudad na Tiatira.”​—Gawa 16:12-15.

4. Anto so akomendaan ed kongregasyon na Tiatira?

⁴ Kinomendaan nen Jesus so kongregasyon ed Tiatira lapud maabig iran gawa, aro, pananisia, tan panagsungdo, tan kimey da ed ministeryo. Diad tua, ‘saray gawa ra a kaunoran so nagkalalo nen saray akauna.’ Anggaman walaan itayo na maabig a rekord, agtayon balot ibabaliwala so nipaakar ed moralidad tayo.

5-7. (a) Siopa so ‘biin Jezabel,’ tan anto so kinaukolan a gawaen nipaakar ed impluensya to? (b) Say mensahe nen Kristo ed kongregasyon na Tiatira so ontulong ed maridios a bibii a manggawa na anto?

⁵ Kokonsintien na kongregasyon na Tiatira so idolatriya, palson bangat, tan seksual ya imoralidad. Diad leet da et walay “bii a Jezabel”​—a nayarin grupo na bibii a walaan na saray walna a singa saray walna na marelmeng a Reyna Jezabel na samploran-tribu na Panarian na Israel. Isusuheri na arum ya iskolar a sinali na saray ‘propetesa’ na Tiatira a tangguyoren iray Kristiano a mandayew ed saray dirios tan diosa na muyongan na saray managtagilako tan mibiang ed saray piesta a mangilalanor ed tagano ya inyatang ed saray talintao. Anggapo komon so mankuan a propetesa a manggunaet a mangimaneobra ed arum diad kaplesan a Kristianon kongregasyon!

⁶ Si Kristo so ‘mangiyan la ed biin Jezabel ed dukolan, tan saray mikakalugoran ed sikato dia ed baleg ya irap, no ag-ira magbabawi ed saray gawa ra.’ Nepeg ya agbalot paimpluensyaan iray manangasikaso ed ontan a marelmeng a bangat tan impluensya, tan anggapo so Kristiano a kaukolan a manggawa na espiritual tan pisikal a pilalawanan odino mangagamil na idolatriya ta pian namoria ra a mauge-uges ‘iray aralem a bengatla nen Satanas.’ No talinengen tayo so pasakbay nen Jesus, ‘bembenan tayon malet so walad sikatayo,’ ta pian ag-itayo natalonaan na kasalanan. Lapud impulisay da iray agmaridios ya agamil, pilpilalek, tan kalat, saray apaolin alanaan so makaawat na “pakayari ed saray nasyon” tan miulop ira ed si Kristo diad panderal to ed saratan a nasyon. Saray kaplesan a kongregasyon so walaan na simbolikon bibitewen, tan saray alanaan so naikdan na ‘kabontatala a masnag dia ed kabuasan,’ say Nobyo, si Jesu-Kristo, sano sikara so onoli diad tawen.​—Apocalipsis 22:16.

⁷ Apasakbayan so kongregasyon na Tiatira ya agda aabuloyan so mauges ya impluensya na saray manaapostatan bibii. Say apuyanan na espiritu a mensahe nen Kristo diad kongregasyon so makatulong ed maridios a bibii a mansiansia ed no anto so impabtang na Dios ed sikara natan. Agda sasalien ya agamilen so autoridad na lalaki tan agda sasagyaten so siopaman ed agagin lalaki a manggawa na espiritual odino pisikal a pilalawanan. (1 Timoteo 2:12) Imbes, ipanengneng na saratan a bibii so alimbawa diad maabig iran gawa tan serbisyo a kirayewan na Dios. (Salmo 68:11; 1 Pedro 3:1-6) No bantayan na kongregasyon so walad sikato​—tuan doktrina tan kondukta tan pinablin serbisyo ed Panarian​—si Kristo so onsabi a walaan na alay abig iran tumang, aliwan pananigway.

Para ed Anghel Diad Sardis

8. (a) Iner so Sardis, tan antoray arum a detalye nipaakar ed satan? (b) Akin a say kongregasyon ed Sardis et mankaukolan na tulong?

⁸ Kakkaukolan so tulong ed kongregasyon na Sardis lapud satan so inatey ed espiritual a paraan. (Basaen so Apocalipsis 3:1-6.) Nipasen ed ngalngali 50 a kilometro diad abalaten na Tiatira, say Sardis so maasenso a syudad. Say komersyo, say inkamabunga na lugar da, tan say produkto ra a seda tan alpombra so akatulong pian magmaliw itan a mayaman a syudad a datin walaay manga 50,000 a residente. Unong ed manag-awaran a si Josephus, say Sardis so walaan na baleg a komunidad na Judio nen inmunan siglo K.K.P. Kabiangan ed saray geray na syudad et say sinagoga tan templo na diosa na Efeso a si Artemis.

9. Anto so nepeg tayon gawaen no saray kimey ed panaglingkor tayo et ‘mankalkalinatey la’?

 ⁹ Inkuan nen Kristo ed anghel na kongregasyon ed Sardis: “Siak amtak so saray gawam, a wala so ngaran mo a mabilay ka, et anta inatey ka.” Panon to no kabkabat itayon aliing ed espiritual balet ta aliwa itayon interesado ed saray pribilehyo bilang Kristiano, tan saray kimey tayo ed serbisyo et apasakey labat, tan diad espiritual a paraan et sikatayo so ‘mankalkalinatey la’? Diad ontan et nakaukolan ‘a nodnonoten tayo no panoy impangawat tayo tan impakadngel tayo’ ed mensahe na Panarian, tan nepeg tayon pabilayen iray sagpot tayo ed sagradon serbisyo. Maseguron nakaukolan tayon igapo so sigpot-puson pibibiang ed saray miting na Kristiano. (Hebreos 10:24, 25) Pinasakbayan nen Kristo so kongregasyon na Sardis: “No agka manbantay, singa matakew laen taka, tan agmo naamtaan no anton oras so idagok ed sika.” Komusta met natan? Agmanbayag et mikuentaan itayo.

10. Anggan say kipapasen et singa ed Sardis, anto met so nayarin kipapasen ed pigaran Kristiano?

¹⁰ Anggan say kipapasen et singa ed Sardis, walaray daiset ya ‘agda dinutakan so kawekawes da tan kaulop ira nen Kristo a manakar ya akawesan na amputi ta makana ra.’ Pinansiansia ra so pakabidbiran ed sikara bilang Kristiano, nansiansia ira ya ag-atilolan, ya anggapo so moral tan relihyoson matik da manlapud sayan mundo. (Santiago 1:27) Kanian, si Jesus et ‘agto punasen naani so ngaran da ed libro na bilay, noag ingen ipatnag to so ngaran da ed arap nen Ama to, tan ed arap na saray anghel to.’ Lapud niyabawag a makanan mankurang kaiba si Kristo, say nobyan klase to a tugyopen na saray alanaan so naarkosan na masnag, malinis, pino a lienzo a mangisisimbolo ed matunong iran gawa na saray masanto na Dios. (Apocalipsis 19:8) Saray alay abig a pribilehyo a manatalaran ed sikara diad tawen so mamapaseseg ed sikara a manaeg ed sayan mundo. Saray bendisyon so nigana met ed saramay nidasig ed magnayon a bilay diad dalin. Saray kangaranan da met so nisulat ed libro na bilay.

11. Anto so nepeg a gawaen tayo no manteglep itayo la ed espiritual?

¹¹ Anggapo ed sikatayo so malabay a nidunget ed makapasinagem a kipapasen ed espiritual a singa ed kongregasyon ed Sardis. Balet panon to no atebek tayo a manteglep itayo la ed espiritual? Nepeg ya onkiwas itayon tampol parad dilin pankaabigan tayo. Ipasen pa a nasasagyat itayo ed saray agmaridios a dalan odino magmamaliw itayo lan mapaulyan ed pipiaral odino diad ministeryo tayo. Komon ta masimoon itayon onkerew na tulong nen Jehova panamegley na pikakasi. (Filipos 4:6, 7, 13) Say inagew-agew a panagbasa ed Biblia tan panagaral ed Kasulatan tan saray publikasyon a nanlapud ‘matoor a managpaga’ so makatulong ed pagmaliw tayon aliing ed espiritual. (Lucas 12:42-44) Insan magmaliw itayon singa saramay walad Sardis ya awalaan na panangabobon nen Kristo, tan magmaliw itayon bendisyon ed saray kapananisiaan.

Para ed Anghel Diad Filadelfia

12. Panon yon deskribien so relihyoson kipapasen ed Filadelfia nensaman?

¹² Kinomendaan nen Jesus so kongregasyon na Filadelfia. (Basaen so Apocalipsis 3:7-13.) Say Filadelfia (natan et Alasehir) so maasenson sentro na panaggawaay-alak diad mamasagur ya Asia Minor. Diad tua, say manunan dios da et si Dionysis, say dios na alak. Mapatnag a saray Judio ed Filadelfia et agtinmalona ed panatangguyor da ed saray Judion Kristiano diman a mansiansia ed pigaran agamil na Mosaikon Ganggan odino ompawil ira ed saratan.

13. Panon ya inusar nen Kristo so “tombok nen David”?

¹³ Si Kristo so walaan na “tombok nen David,” tan diad ontan et sikato so angimatalkan na amin ya intereses na Panarian tan say panangasikaso ed sankaabungan na pananisia. (Isaias 22:22; Lucas 1:32) Inusar nen Jesus itan a tombok pian ilukas iray pankanawnawa tan pribilehyo ed Panarian parad saray Kristiano diad Filadelfia nensaman tan inerman a pasen. Manlapu la’d 1919 et inyuksoy na ‘matoor a managpaga’ so “baleg a kapot” a mangitonton ed panangipulong ed Panarian ya anggapoy sumusumpa a makapangikapot ed satan. (1 Corinto 16:9; Colosas 4:2-4) Siempre, say puerta ya ompugta ed saray pribilehyo ed Panarian so nikapot ed saramay walad “sinagoga nen Satanas,” lapud aliwa iran espiritual ya Israelita.

14. (a) Anto so insipan nen Jesus ed kongregasyon na Filadelfia? (b) Panon tayon napaliisan so pakapelag legan na “oras na katukso”?

¹⁴ Oniay insipan nen Jesus ed saray Kristiano diad Filadelfia nensaman: “Lapu ed inunor mo so salita na kasungdoan ko, sika met ilaban taka ed oras na katukso, dia ed oras ya onla ed lapag na sansinakoban, pian salien da so saray manaayam ed dalin.” Kakaukolanen ed panagpulong so nengneng na panagsungdo ya impatnag nen Jesus. Sikato so agbalot sinmuko ed kabusol balet ta nantultuloy a nanggawa na linawa nen Ama to. Kanian, si Kristo so apaoli ed imortal a bilay diad tawen. No mansiansia itayon malet ed desisyon tayo a mandayew ed si Jehova tan suportaan tayo so Panarian diad pangipulong ed maong a balita, agtayo napelag ed kaplesan a panaon na subok, diad “oras na katukso.” ‘Pokpokan tayo so walad sikatayo’ a nanlapud si Kristo diad pamadaak ed intereses na Panarian. Say panggawa ed satan so manresulta ed sakey a mabmablin balanget ed tawen parad saray alanaan tan andi-anggaan a bilay diad dalin parad saray matoor a kakaiba ra.

15. Anto so kinaukolan ed saramay magmaliw a ‘sekseklang ed templo na Dios’?

¹⁵ Oniay inyarum nen Kristo: “Say manalo, sikato so gawaen ko a lusek na templo na Dios ko, . . . tan isulat ko ed sikato so ngaran na Dios ko, tan say ngaran na syudad na Dios ko, say balo a Jerusalem, ya onlasor a manlapu ed tawen dia ed Dios ko, tan say ngaran ko a dili a balo.” Saray alanaan a manangasikaso so nepeg a mangitandoro ed tuan  panagdayew. Nepeg a mansiansia ira a kualipikadon membro na “balo a Jerusalem” diad pangipulong ed Panarian na Dios tan pansiansian malinis ed espiritual. Nakaukolan itan no labay day magmaliw a sekseklang na nitandoron mangatatawen a templo tan no akbibiten da so ngaran na syudad na Dios bilang mangatatawen a mibabaley na satan tan mangawit ed ngaran nen Kristo bilang nobya to. Tan siempre, nepeg a walaan ira na layag ya ‘ondengel ed ibabaga na espiritu ed saray kongregasyon.’

Para ed Anghel Diad Laodicea

16. Anto so arum ed saray katuaan nipaakar ed Laodicea?

¹⁶ Binaat nen Kristo so matalek a kongregasyon na Laodicea. (Basaen so Apocalipsis 3:14-22.) Manga 150 a kilometro ed bukig na Efeso tan nipasen ed nansangaan na saray manunan rota na negosyo diad mabunan patar na Ilog Lycus kanian say Laodicea et maasenson tuloy a syudad a walaray pabrikaan tan sentro na pinansyal. Bantog iray kawes a gawa ed andeket a lienzo ed satan a lugar. Bilang sentro na bantog ya eskuelaan na medisina, nayarin say Laodicea so amawala na tambal ed mata a kabkabat bilang say pulbos na Phrygia. Si Asclepius, say dios na medisina, so sakey ed saray manunan dirios ed syudad. Ompatnag a say Laodicea et walaan na dakerakel a populasyon na Judio, ya arum ed saratan et mapatnag a mayamyaman.

17. Akin ya abaat iray taga-Laodicea?

¹⁷ Diad impansalita nen Jesus ed kongregasyon na Laodicea panamegley na ‘anghel,’ sikato so walaan na autoridad a nansalita bilang say “say tasi a matoor tan matua, say sengeg na pinalsa na Dios.” (Colosas 1:13-16) Abaat iray taga-Laodicea lapud ‘aliwa ira ya ambetel tan aliwa ira ya ampetang’ ed espiritual. Lapud malainem-em ira, iyula ira nen Kristo. Mainomay da itan a natalosan. Diad asingger na Hierapolis et wala iray ampetang a subol na danum, tan say Colosas so walaan na ambetel a danum. Balet, lapud kaukolan ya iparalan so danum diad tubo anggad Laodicea diad arawin distansia, nayarin malainem-em la itan sano makasabi ed syudad. Walay nadalan na satan a sakey a pangipapaagusan. Diad panasingger la ed Laodicea, ondalan itan ed binotbotan iran bloke na bato a sementado.

18, 19. Panon a natulongan iramay Kristiano natan a mipadpara ed saramay taga-Laodicea?

¹⁸ Saray indibidual natan a singa saray taga-Laodicea so aliwan ampetapetang nisay ambetebetel. Singa say malainem-em a danum, ipaway iratan manlapu ed sangi! Aglabay nen Jesus ya usaren ira bilang pinagkasangiyan to, bilang alanaan iran ‘ibabaki nen Kristo.’ (2 Corinto 5:20) No ag-ira magbabawi, nabalang da so pribilehyo ra bilang manangiyabawag na Panarian. Saray taga-Laodicea so nananap na kaykayamanan ed dalin tan ‘agda kabat a sikara et pakaskasi tan makibot tan duka tan bulag tan lakseb.’ Pian naandi so inkaduka, inkabulag, tan inkalakseb da ed espiritual a paraan, siopaman a mipadpara ed sikara natan so nakaukolan a manaliw ed si Kristo na “balitok a ginogolan” na asubok a pananisia, “kawekawes ya amputi” na inkatunong, tan say “pamuyok” a mamaaligwas ed espiritual a pakanengneng da. Maliket iray Kristianon manangasikaso ya ontulong ed sikara a magmaliw a sinononot ed espiritual a pankaukolan da ta pian ‘mayaman ira ed pananisia.’ (Santiago 2:5; Mateo 5:3) Niarum ni, nakaukolan a tulongan ira na saray manangasikaso a mangiyaplika ed espiritual a ‘puyok’​—pian naawat tan makapitunosan ira ed bangat, simbawa, ehemplo, tan awawey na kanonotan nen Jesus. Satan labat so makatambal sumpad “kilalawan na laman tan kilalawan na mata tan maapan gloria na bilay, aliwa a kien na Ama noag kien na mundo.”​—1 Juan 2:15-17.

¹⁹ Babaaten tan didisiplinaen nen Jesus so amin na saramay aaroen to. Ontan met so gawaen na saray manangasikaso a walad silong to tekep na inkamatamoy. (Gawa 20:28, 29) Saray taga-Laodicea so kinaukolan a ‘manseet tan magbabawi,’ a manggawa ira na pananguman ed panag-isip tan dalan na kabibilay da. Bueno, kasin nigalet la so arum ed sikatayo diad estiloy-kabibilay a nagmaliw lan agtanton importante ed bilay tayo so sagradon serbisyo ed Dios? No ontan, ‘manaliw itayo sirin na puyok ed si Jesus’ ta pian nanengneng tayo so kaimportantian na maseseg a pangiyuna ed Panarian.​—Mateo 6:33.

20, 21. Siopa so matukoy ya onkikiwas ed ‘itotoktok’ nen Jesus natan, tan anto iray iilaloan da?

²⁰ “Nia” so kuan nen Kristo, “Wala ak ed pinto tan manpatok ak: no wala so siopaman a too ya  ondengel na boses ko tan mangilukas na pinto, onloob ak ed sikato, tan mipangdem ak ed sikato, tan sikato ed siak.” Mabetbet a manginabang si Jesus na espiritual a bilin legan a sikatoy midudungo ed panangan. (Lucas 5:29-39; 7:36-50; 14:1-24) Sikato natan so ontotoktok ed puerta na singa-Laodicea a kongregasyon. Kasin onebat iray membro na satan diad itoktok to, a pabilayen da so panangaro ra ed sikato, abrasaen da ed limog da, tan paibangat ira ed sikato? No ontan, midungo ed sikara si Kristo diad pakagunggonaan dan maong ed espiritual.

²¹ Say ‘arum a karnero’ natan so piguratibon mamapaloob ed si Jesus, tan say ontan a kiwas so mangitonton ed andi-anggaan a bilay. (Juan 10:16; Mateo 25:34-40, 46) Parad kada alanaan ya ontalona, iter nen Kristo so pribilehyon ‘miyurong ed sikato dia ed abay na trono to, unong a singa impanalo to met, tan sikatoy akiyurong ed Ama to dia ed abay na trono To.’ On, parad saray mananalon alanaan, insipan nen Jesus so engranden tumang na sakey a trono a kaiba to diad nikawanan nen Ama to diad tawen. Tan say mananalon arum a karnero so mantalaran ed alay abig a pasen ed dalin diad silong na uley na Panarian.

Saray Leksion Parad Sikatayon Amin

22, 23. (a) Panon a nagunggonaan so amin a Kristiano ed saray salita nen Jesus ed pitoran kongregasyon? (b) Anto so nepeg a determinasyon tayo?

²² Anggapoy duaruwa a nagunggonaan a maong so amin a Kristiano ed saray salita nen Jesus diad pitoran kongregasyon ed Asia Minor. Singa bilang, diad pangimano da ed matukoy a komendasyon nen Kristo, napakiwas iray maaron Kristianon mamatatken a mangomenda ed saray indibidual tan kongregasyon a maabig so nagagawaan da ed espiritual. No ompatnag iray kaleteyan, tulongan na saray mamatatken iray kapananisiaan a mangiyaplika ed Makasulatan iran remedyo. Amin tayo so makapantultuloy a nagunggonaan ed nanduruman aspekto na simbawa nen Kristo ed pitoran kongregasyon, daput no masimoon tan tampol tayon iyaplika itan. *

²³ Diad sarayan kaunoran ya agew et aliwa la iyan panaon pian mantayamtayam, magmaliw a materyalistiko, odino antokaman a bengatlan sengegan na pasaray lan panaglingkor ed Dios. Komon ta amin na saray kongregasyon sirin so masnag bilang kandeleros ta pian mansiansia si Jesus ed pasen da. Bilang matoor a Kristianos, determinado tayo lawas a manimano sano mansalita si Kristo tan ondengel ed ibabaga na espiritu. Insan nawalaan itayo na magnayon a gayaga bilang manangakbibit na liwawa diad kigloriaan nen Jehova.

[Paimano ed Leksab]

Panon Yon Ebatan?

• Siopa imay ‘biin Jezabel,’ tan akin a sikatoy agnepeg ya aligen na maridios a bibii?

• Anton kipapasen so linmesa ed kongregasyon na Sardis, tan anto so nagawaan tayo pian napaliisan so pagmaliw a singa ed dakel a Kristianon nanayam diman?

• Antoran sipan so inter nen Jesus ed kongregasyon na Filadelfia, tan panon iratan ya onaplika natan?

• Akin ya abaat iray taga-Laodicea, balet antoran iilaloan so nitarya parad saray maseseg a Kristiano?

[Tepetepet Parad Panagaral]

[Litrato ed pahina 16]

Nepeg a paliisan iray mauges a dalan na ‘satan a biin Jezabel’

 [Saray litrato ed pahina 18]

Intarya nen Jesus ed saray patumbok to so ‘baleg a kapot’ a mangitonton ed saray pribilehyo na Panarian

[Litrato ed pahina 20]

Kasin aabrasaen yo si Jesus tan tatalinengen yo?