Mansasalita si Kristo Diad Saray Kongregasyon
Mansasalita si Kristo Diad Saray Kongregasyon
“Say nanegna ed kawanan a lima to na pitora a bitewen, . . . kuan to so saraya.”—APOCALIPSIS 2:1.
1, 2. Akin a nepeg ya interesado itayo ed imbaga nen Kristo ed pitoran kongregasyon diad Asia Minor?
SAY bogbogtong ya Anak nen Jehova, si Jesu-Kristo, so Ulo na Kristianon kongregasyon. Pian mansiansian andiay-matik so kongregasyon na saray alanaan a patumbok to, aagamilen nen Kristo so inkaulo to diad pangokomenda tan pangipepetek ed sikara. (Efeso 5:21-27) Walaray alimbawa na satan diad Apocalipsis kapitulo 2 tan 3, a pakaromogan tayo ed mapuersa tan maaro iran mensahe nen Jesus a nidirekta ed pitoran kongregasyon ed Asia Minor.
2 Sakbay ton narengel iray salita nen Jesus ed pitoran kongregasyon, naikdan si apostol Juan na pasingawey nipaakar ed “agew na Katawan.” (Apocalipsis 1:10) Satan ya “agew” so ginmapo sanen niletneg so Mesianikon Panarian nen 1914. Say imbaga nen Kristo ed saray kongregasyon so importantin maong sirin ed sarayan kaunoran ya agew. Say panamaseseg tan simbawa to so ontulong ed sikatayon mangarap ed sarayan mapeligron panaon.—2 Timoteo 3:1-5.
3. Anto iray piguratibon kabaliksan na “bitewen,” “angheles,” tan “kandelero a balitok” ya anengneng nen apostol Juan?
3 Anengneng nen Juan so nitandoron Jesu-Kristo, a ‘mangeegna ed kawanan a lima to na pitora a bitewen,’ tan “manaakar ed pegley na saray pitoran kandelero a balitok,” odino saray kongregasyon. Saray “bitewen” et “angheles na pitora ya iglesia.” (Apocalipsis 1:20; 2:1) Say bibitewen so mangisisimbolo no maminsan na angheliko iran espiritun pinalsa, balet ag-usaren nen Kristo so too a mangikurit ed saray mensahen parad saray espiritun palsa. Kanian, sarayan “bitewen” so makatunongan a manutukoy ed saray alanaan na espiritun manangasikaso, odino saray ulop na mamatatken. Say terminon “angheles” so misiglaotan ed betang da bilang ibabaki. Lapud linmaknab la so organisasyon na Dios, say ‘napanmatalkan a managpaga’ so anuro met na kualipikado iran lalaki ed ‘arum a karnero’ nen Jesus bilang manangasikaso.—Lucas 12:42-44; Juan 10:16.
4. Panon a nagunggonaan iray mamatatken diad panimano ed ibabaga nen Kristo ed saray kongregasyon?
4 Saray “bitewen” so walad kawanan a lima nen Jesus—walad pakayari, panangontrol, panangabobon, tan proteksion to. Kanian, sikara so walaan na eebatan ed sikato. Diad italineng ed saray imbaga to ed kada sakey ed pitoran kongregasyon, natebek na mamatatken natan no panon dan arapen so mipadpara iran situasyon. Siempre, amin a Kristiano so nakaukolan ya ontalineng ed Anak na Dios. (Marcos 9:7) Kanian, anto so naaralan tayo diad panimano ed pansasalita nen Kristo ed saray kongregasyon?
Para ed Anghel Diad Efeso
5. Anton klase na syudad so Efeso?
5 Kinomendaan tan binaat nen Jesus so kongregasyon ed Efeso. (Basaen so Apocalipsis 2:1-7.) Naromog so abalbaleg a templo nen diosan Artemis diad sayan mayaman a sentro na negosyo tan relihyon diad sagur a baybay na Asia Minor. Anggaman say Efeso et napno na imoralidad, palson relihyon, tan panangagamil na mahiko, benendisyonan na Dios so ministeryo nen apostol Pablo tan arum nira diad satan a syudad.—Gawa kapitulo 19.
6. Panon a mipara iray matoor a Kristiano natan ed saramay walad kadaanan ya Efeso?
6 Kinomendaan nen Kristo so kongregasyon ed Efeso, a kuanto: “Siak amtak so saray gawam, tan say sagpot mo, tan kasungdoan mo, tan say agmo pakayarin mangitepel ed saray mauges a totoo, tan sinalim so saray tatawagen day inkasikaran apostoles, tan aliwa ra, aromog mo ra a matila.” Natan, saray kongregasyon na tuan papatumbok nen Jesus so walaan na miulibayan a rekord na maong iran gawa, impasyan kimey, tan panagsungdo. Agda aabuloyan iray palson agagi a malabay a paderleng bilang apostoles. (2 Corinto 11:13, 26) Singa saray taga-Efeso, saray matoor a Kristiano natan so ‘agmakapangitepel ed mauges a totoo.’ Pian napansiansia sirin so kalinisan na panagdayew ed si Jehova tan nasalimbengan so kongregasyon, agda pililimogan iray agmagbabawin apostata.—Galacia 2:4, 5; 2 Juan 8-11.
7, 8. Anton seryoson problema so linmesa ed kongregasyon na Efeso, tan panon tayon pidenengan so ontan met a kipapasen?
7 Ingen ta saray Kristiano ed Efeso so walaan na seryoson problema. “Wala so isumpak ed sika,” so kuan nen Jesus, “ta inkaindan mo so akauna ya arom.” Saray membro na kongregasyon so kinaukolan a mamabilay ed akaunan aro ra ed si Jehova. (Marcos 12:28-30; Efeso 2:4; 5:1, 2) Amin tayo so nepeg a manbantay sumpad pakaandi na akaunan aro tayo ed Dios. (3 Juan 3) Balet panon to no magmaliw lan manunaan ed bilay tayo iray materyal a kayamanan odino say pangegemtan ed liket? (1 Timoteo 4:8; 6:9, 10) Sirin kaukolan a masimoon itayon manpikasi parad tulong na Dios pian nasalatan iratan a tendensia na aralem a panangaro ed si Jehova tan pisasalamat ed amin a ginawa to tan say Anak to parad sikatayo.—1 Juan 4:10, 16.
8 Pinaseseg nen Kristo iray taga-Efeso: “Pakanonoten mo sirin no iner so naplagan mo, tan magbabawi ka, tan gawam so saray manunaan a gawa.” Panon to no agda ginawa itan? “No andi,” kuan nen Jesus, “onla ak ed sika tan ekalen ko so kandelerom ed pasen to.” No naandi la ed amin a karnero so akaunan aro ra, say “kandelero,” odino kongregasyon, so naandi met la. Bilang maseseg iran Kristiano, komon ta panseetan tayon pansiansiaen a masnag so kongregasyon diad espiritual a paraan.—Mateo 5:14-16.
9. Panon so nepeg a panmoria tayo ed sektaryanismo?
9 Nakomendaan iray taga-Efeso lapud ginula da iray “gawa na saray Nicolaitas.” Nilikud ed samay nibaga ed Apocalipsis, anggapo lay naromog ya impormasyon nipaakar ed nanlapuan, bangabangat, tan agagamil na sayan sekta. Balet, lapud ta kinondena nen Jesus so panumbok ed totoo, nakaukolan a mantultuloy tayon gulaen so sektaryanismo, a singa ginawa na saray Kristiano ed Efeso.—Mateo 23:10.
10. Anto so naeksperiensya na saramay ontalineng ed ibabaga na espiritu?
10 “Say walaan na pakadngel, denglen to so kuan na espiritu ed saray iglesia [odino kongregasyon],” so kuan nen Kristo. Sanen wadiad dalin si Jesus, sikatoy nansalita ed silong na panangimpluensya na espiritu na Dios. (Isaias 61:1; Lucas 4:16-21) Kanian nepeg itayon manimanon maong ed ibabaga natan na Dios panamegley to bilang inwanwan na masanton espiritu. Diad panangidirehi na espiritu, oniay insipan nen Jesus: “Say manalo, pakanen ko ed kiew na bilay, a sikato so wala ed pegley na paraiso na Dios.” Parad saray alanaan, ya ontatalineng ed ibabaga na espiritu, mankabaliksan itan na pakawalaan na imortalidad ed mangatatawen a “paraiso na Dios,” odino ed mismon kiwawala nen Jehova. Say “baleg ya ulop,” ya ontatalineng met ed ibabaga na espiritu, so manggayaga ed mangaraldalin a paraiso ya oninum ira manlapud “ilog na danum na bilay” tan nagamoran da so panamaabig manlapud “saray bulong” na kakiewan a walad tambib na satan.—Apocalipsis 7:9; 22:1, 2; Lucas 23:43.
11. Panon tayon niyalibansa so aro ed si Jehova?
11 Naandi so akaunan aro na saray taga-Efeso, balet panon to no ontan met so nagagawan kipapasen diad loob na kongregasyon natan? Komon ta amin tayo so mangiyalibansa na aro tayo ed si Jehova diad pangitongtong ed arum nipaakar ed maaro iran dalan to. Nayarian tayon ibalikas so pisasalamat tayo ed aro ya impanengneng na Dios sanen intarya to so dondon panamegley na inad-aro ton Anak. (Juan 3:16; Roma 5:8) Sano matukoy, nayarian tayon salambiten so panangaro na Dios diad saray komento tayo tan diad saray parte na programa ed saray miting. Nipanengneng tayo so mismon aro tayo ed si Jehova diad pangidayew ed ngaran to diad Makristianon ministeryo. (Salmo 145:10-13) On, baleg so nagawaan na saray salita tan kiwas tayo pian napabilay odino napaelet so akaunan aro na kongregasyon.
Para ed Anghel Diad Smyrna
12. Anto so ipaparungtal na awaran nipaakar ed Smyrna tan ed saray agamil na relihyon diman?
12 Kinomendaan nen Kristo so kongregasyon ed Smyrna, ‘say Sengeg tan Anggaan, a sikato so inatey, tan abilay’ panamegley na kikioli. (Basaen so Apocalipsis 2:8-11.) Say Smyrna (natan et Izmira, Turkey) so niletneg ed sagur a baybay na Asia Minor. Saray Griego so nanayam ed satan a syudad, balet dineral itan na saray taga-Lydia nen ngalngali 580 K.K.P. Say Smyrna so inletneg lamet na saray sinmalat ed si Alejandro a Baleg diad balon lugar. Nagmaliw itan a kabiangan na Romanon probinsya na Asia tan maasenson sentro na komersyo a bantog lapud mararakep iran bilding a parad publiko. Lapud wadman so templo nen Tiberius Caesar, satan so nagmaliw a sentro na panagdayew ed emperador. Saray managdayew so kinaukolan a mamool na sankapirit ya insenso tan ibaga ran “si Cesar so Katawan.” Agnayarian na saray Kristiano so ontulok ed satan lapud si “Jesus so Katawan” da. Kanian, sinagmak da so kairapan.—Roma 10:9.
13. Anggaman mairap so panagbilay da, diad anton pantalos a mayaman iray Kristiano diad Smyrna?
13 Nilikud ed kairapan, saray Kristiano ed Smyrna so nansungdo ed inkaduka, a nayarin makasengeg ed panameget ya angapekta ed panagbilay da, lapud ag-ira nandayew ed emperador. Agnipuera iray kaplesan a lingkor nen Jehova ed ontan met iran subok. (Apocalipsis 13:16, 17) Anggaman mairap so panagbilay da, saramay mipadpara ed saray Kristiano ed Smyrna so mayaman ed espiritual, tan satan so importantin tuloy!—Uliran 10:22; 3 Juan 2.
14, 15. Anton ligliwa so nagamoran na saray alanaan manlapud Apocalipsis 2:10?
14 Maslak ed saray Judio ed Smyrna et ‘sinagoga nen Satanas’ lapud inagamil da iray agmakasulatan a tradisyon, impulisay da so Anak na Dios, tan inayew da iray papatumbok ton nailalak ed espiritu. (Roma 2:28, 29) Balet agaylan makaligliwa ed saray alanaan so onggendan iran salita nen Kristo! Inkuanto: “Agka ontakot na mogmo ed saray bengatla ya asingger la ya akoen mo: nia, say diablo asingger lay pangiyan to ed arum ed sikayo ed panangipangawan, pian nasali kayo; tan wala so irap yo ed samploy agew. Mansiansia ka angga ed patey, tan siak iter ko ed sika so balanget na bilay.”—Apocalipsis 2:10.
15 Ag-antakot si Jesus ya ompatey pian nitandoro so inkasoberano nen Jehova. (Filipos 2:5-8) Anggaman babakalen la nen Satanas iray alanaan a nakdaan, agda tatakotan iray bengatlan sagmaken da bilang grupo—kairapan, kipangaw, odino maramsak ya ipapatey. (Apocalipsis 12:17) Daegen da so mundo. Tan imbes a say nalenes iran rosas ya ikokorona ed saray analo ed pagano iran pagalaw, insipan nen Kristo ed saray apaolin alanaan so “balanget na bilay” bilang imortal iran palsa ed tawen. Agaylan mabmablin langkap!
16. No mililimog itayo ed sakey a kongregasyon a mipadpara ed kadaanan ya Smyrna, anton isyu so nepeg a pangiyapasakeyan tayo na imano tayo?
16 Mangatatawen man odino mangaraldalin so ilalo tayo, panon to no sikatayo et membro na sakey a kongregasyon a mipadpara ed kadaanan ya Smyrna? Tulongan tayo sirin iray kapananisiaan pian sinononot ira ed manunaan a rason no akin ya iyaabuloy na Dios so panamasegsegang—say isyu na sankatalbaan ya inkasoberano. Papaneknekan na kada matoor a Tasi nen Jehova a matila si Satanas tan ipapatnag da ya anggan say toon napapasegsegang et nayarin magmaliw ya agnagiing a manangiyalibansa ed kanepegan na Dios a manuley bilang Sankatalbaan a Soberano. (Uliran 27:11) Pasesegen tayo so arum iran Kristiano a mansungdo ed panamasegsegang tan bilang resulta et mantultuloy ira ed ‘panaglingkor [ed si Jehova] ya andi takot, dia ed kasantosan tan kaalasan ed arap to ed saray amin ya agew tayo’—diad ando lan ando.—Lucas 1:68, 69, 74, 75.
Para ed Anghel Diad Pergamo
17, 18. Say Pergamo so sentro na anton nengneng na panagdayew, tan anto so nayarin resulta na agpibiang ed ontan ya idolatriya?
17 Komendasyon tan panametek so niiter ed kongregasyon na Pergamo. (Basaen so Apocalipsis 2:12-17.) Lapud naromog itan ed manga 80 a kilometro diad amianen na Smyrna, say Pergamo so sakey a syudad a nigalet ed paganon relihyon. Ompatnag a saray Caldeon astrologo so binmatik diman manlapud Babilonia. Ondaragsa ed Pergamo iray mansasakit a totoo diad bantog a templo nen Asclepius, say palson dios na panagpaabig tan medisina. Say Pergamo, a walaan na taloran templo a nideboto ed panagdayew ed si Caesar Augustus, so tinawag a “manunan sentro na kulto a mandadayew ed emperador diad silong na inmunan empiryo.”—Encyclopædia Britannica, 1959, Tomo 17, pahina 507.
18 Diad Pergamo et wala so altar ya indedika ed si Zeus. Say syudad so sentro met na pinuyanan na Diablo a panagdayew ed totoo. Agpankelawan no akin a say kongregasyon ditan so atawag a walad kawalaan na “trono nen Satanas”! Say agpandayew ed emperador so nayarin manresulta ed ipatey na sakey a mangitatandoro ed inkasoberano nen Jehova. Say mundo so mandukdukol nin siansia ed pakayari na Diablo, tan saray simbolo na nasyon so iidoloen natan. (1 Juan 5:19) Manlapud inmunan siglo anggad natan, dakel a matoor a Kristiano so pinatey a martir, a singa samay tinawag nen Kristo ya “Antipas a tasik, a matoor ko, ya inatey ed nanleleetan yo.” Maseguron nodnonoten nen Jehova a Dios tan si Jesu-Kristo iratan a matoor a lingkor.—1 Juan 5:21.
19. Anto so ginawa nen Balaam, tan sumpad anto so nepeg a panalwaran na amin a Kristiano?
19 Sinaglawi met nen Kristo so “bangat nen Balaam.” Lapud inkaagum to ed materyal, sinali na palson propeta a Balaam ya ayewen so Israel. Sanen pinagmaliw na Dios a bendisyon so impangayew to, si Balaam so akinonong ed Moabitan Arin Balak tan atangguyor da so dakel iran Israelita a mantalintao tan manggaway seksual ya imoralidad. Saray Kristianon mamatatken so nakaukolan a magmaliw a mapekder ed inkatunong a singa si Phinehas, a kinmiwas sumpad saray gagawaen nen Balaam. (Numeros 22:1–25:15; 2 Pedro 2:15, 16; Judas 11) Diad tua, amin a Kristiano so nepeg a manalwar sumpad idolatriya tan say iloob na seksual ya imoralidad diad kongregasyon.—Judas 3, 4.
20. No walay Kristiano a pinonot to iray apostatan panmoria, anto so nepeg ton gawaen?
20 Say kongregasyon ed Pergamo so walad pirmin kapeligroan lapud inabuloyan da ed leet da iramay “manaagamil na bangat na saray Nicolaitas.” Inkuan nen Kristo diad kongregasyon: “Magbabawi ka sirin; ta no andi onla ak ed sika a magano, tan manggawa ak na bakal a sumpad sikara naani ed kampilan na sangik.” Kaliktan na saray mangaagamil na sektaryanismo a deralen iray Kristiano diad espiritual a paraan, tan saramay determinadon mangiyalibansa na inkaapag-apag tan saray sekta so agmakatawir ed Panarian na Dios. (Roma 16:17, 18; 1 Corinto 1:10; Galacia 5:19-21) No pinonot na siopaman a Kristiano iray apostatan panmoria tan labay ton ikayat iratan, nepeg a dengelen to so pasakbay nen Kristo! Pian sikaton mismo so naliktar ed desyang, nepeg a sikatoy magbabawi tan onkerew na espiritual a tulong ed saray mamatatken diad kongregasyon. (Santiago 5:13-18) Makana so ikiwas a tampol, lapud si Jesus so maganggano lan mangipaakseb na panangukom.
21, 22. Siopa so mangan ed ‘niyamot a mana,’ tan anto so isisimbolo na satan?
21 Saray matoor ya alanaan a Kristiano tan say matoor a kakaiba ra so agbalot ontakot ed onsabin panangukom. Dakel a bendisyon so manatalaran ed amin ya ontalineng ed simbawa nen Jesus ya inwanwan na masanton espiritu na Dios. Singa bilang, saray alanaan ya anaeg ed mundo so naimbitaan a mangan ed ‘niyamot a mana’ tan naikdan ira na “bato ya amputi” a walaan na “ngaran” to.
22 Intarya na Dios so mana pian taganoen iray Israelita legan na 40-taon ya impanteyengteyeng da ed kalawakan. Arum ed saratan a “tinapay” so inyatol ed balitok a garapon diad dalem na kaban na sipan tan diad ontan et niyamot ed loob na tabernakulo na Sankasantosan, a say mamilagron liwawa ditan et angisimbolo ed kiwawala nen Jehova. (Exodo 16:14, 15, 23, 26, 33; 26:34; Hebreos 9:3, 4) Anggapo so naabuloyan a mangan ed niyamot a mana. Balet, diad kioli ra et magmaliw lan imortal iray alanaan a patumbok nen Kristo, a mangisimbolo ed pangan da na ‘niyamot a mana.’—1 Corinto 15:53-57.
23. Anto so kabaliksan na ‘amputin bato’ tan say “balon ngaran”?
23 Say andeket a bato so mangitarok na panangondena dia ed saray korte na Romano, bangta say amputi et mankabaliksan na pakaabsuelto. Say impangiter nen Jesus na ‘amputin bato’ ed saray mananalon alanaan a Kristiano so mangipabitar ya ipapasen to ira ya andiay kasalanan, puro, tan malinis. Lapud inusar met na saray taga-Roma iray bato pian makaloob ed saray importantin ebento, say “amputin bato” so mankabaliksan na pakaawat na sakey ya alanaan ed pasen to diad tawen dia ed bansal na Kordero. (Apocalipsis 19:7-9) Say “balon ngaran” so mapatnag a mankabaliksan na pribilehyon pakapikasakey ed si Jesus bilang kaiban-manuley diad mangatatawen a Panarian. Amin na saya so makapaseseg ed saray alanaan ontan met ed saray kaiba ra diad panaglingkor ed si Jehova, a maniilalon manbilay ed paraison dalin!
24. Anto so nepeg a talindeg tayo nipaakar ed apostasya?
24 Makabat so pannodnonot a say kongregasyon na Pergamo so napepeligro lapud saray apostata. No ontan met a kipapasen so mamepeligro ed espiritual a pankaabigan na kongregasyon a pililimogan tayo, sigpot tayon ipulisay so apostasya tan mantultuloy a mankurang ed katuaan. (Juan 8:32, 44; 3 Juan 4) Lapud saray palson managbangat odino saray indibidual a walaan na tendensian manapostata et makaderal ed interon kongregasyon, nepeg a pansiansiaen tayo so mapekder a talindeg tayo sumpad apostasya, ya agbalot aabuloyan so marelmeng iran pananangguyor da a mangamper ed itutulok tayo ed katuaan.—Galacia 5:7-12; 2 Juan 8-11.
25. Saray mensahe nen Kristo ed antoran kongregasyon so singbaten ed ontumbok ya artikulo?
25 Agaylan makapatenyeg-kanonotan iran komendasyon tan simbawa na niglorian Jesu-Kristo parad say talora ed pitoran kongregasyon diad Asia Minor so kinonsidera tayo! Balet, unong ed panangiwanwan na masanton espiritu et dakel ni so ibaga to ed nakekeraan ya apatiran kongregasyon. Saratan a mensahe, a nidirekta ed Tiatira, Sardis, Filadelfia, tan Laodicea, so singbaten ed onggendan ya artikulo.
Panon Yon Ebatan?
• Akin a nepeg itayon manimano ed ibabaga nen Kristo ed saray kongregasyon?
• Panon itayon makatulong pian napabilay so akaunan aro na sakey a kongregasyon?
• Akin a peteg a nibagan mayaman iray mairap-bilay a Kristiano diad kadaanan ya Smyrna?
• No molimolien so situasyon ed kongregasyon na Pergamo, panon tayon moriaen so apostatan panag-isip?
[Tepetepet Parad Panagaral]
[Mapa ed pahina 10]
(Parad aktual a format, nengnengen so publikasyon)
GRESYA
ASIA MINOR
Efeso
Smyrna
Pergamo
Tiatira
Sardis
Filadelfia
Laodicea
[Litrato ed pahina 12]
Panggayagaan na “baleg ya ulop” so mangaraldalin a paraiso
[Saray litrato ed pahina 13]
Dinaeg na saray apasegsegang a Kristiano so mundo