Mansiansian Mapekder, Pian Manalo ed Lumba Parad Bilay

NO kapilitan kan manbiahe ed mabagyon dayat, anton klasen luganan so lablabayen mo? Say lupok a baloto odino say mabiskeg tan malet a barko? Seguradon pilien mo so barko, lapud mas sarag na satan a beltangen so angkakabaleg a daluyon.

Legan a manbabaroy itayo ed sayan mabagyo tan mapeligron sistema na bengabengatla, nasasagmak tayo iray makapaaboridon angat. Singa bilang, no maminsan et saray tobonbalo so nakekewkew tan aliwan maligen so liknaan da lapud agnatalosan iran ideya tan uso ed sayan mundo. Saray indibidual ya aganggano nin nagmaliw a Kristiano so nayarin maletey ni. Anggan saray mapekder lan indibidual a matoor a manlilingkor ed Dios diad dakel lan taon so nayarin nasusubok lapud saray iilaloan da et agni sigpot ya asumpal.

Saratan a liknaan et kaslakan la. Walay panaon a saray matoor a lingkor nen Jehova a singa si Moises, Job, tan David, so agonigon met. (Numeros 11:14, 15; Job 3:1-4; Salmo 55:4) Ingen et apatnagan ed kabibilay da so mapekder a debosyon ed si Jehova. Saray maabig ya ehemplo ra so mamapaseseg ed sikatayon magmaliw met a mapekder, balet labay nen Satanas a Diablo ya isuawi itayo ed lumba parad andi-anggaan a bilay. (Lucas 22:31) Kanian panon itayon makapansiansian mapekder, “mabiskeg ed pananisia”? (1 Pedro 5:9) Tan panon tayon napabiskeg iray kapananisiaan tayo?

Kaliktan nen Jehova a Magmaliw Itayon Mapekder

No matoor itayo ed si Jehova, sikatoy lawas akaparaan ya ontulong ed sikatayon napansiansia so inkaligen tayo. Si salmistan David so akasagmak na dakel a mairap iran situasyon, balet sikatoy nanilalo ed Dios kanian nayarian ton ikanta: “[Si Jehova] inaon to ak met ya impaway ed sakey a makakebbiew a bobon, impaway to ak ed manmogaygay a pitek; tan impasen to so salisalik ed tapew na sakey a batondampay, tan pinaligen to so saray kakukurang ko.”​—Salmo 40:2.

Pabibiskegen itayo nen Jehova a ‘mibakal ed maabig a pibabakal na pananisia’ pian ‘nabembenan tayo so bilay ya andi-angga.’ (1 Timoteo 6:12) Itatarya to met so paraan pian mansiansia itayon maligen tan manalo ed espiritual a pibabakal tayo. Pinaseseg nen apostol Pablo iray kaparan Kristiano ya ‘ombiskeg ed Katawan, tan dia ed biskeg na pakayari to’ tan ‘isulong so sankabukel a kinlong na Dios, pian nayarian da so ontalindeg ya onsumpa ed saray pangalot na Diablo.’ (Efeso 6:10-17) Balet anto ta so sengegan na pankibangkibang tayo? Tan panon tayon nipulisay iratan a mapeligron impluensya?

Man-adia ed Saray Makapakapuy ya Impluensya

Makabat so pannodnonot ed sayan makanan katuaan: Saray desisyon tayo so diad kaunoran et mangapekta ed inkaligen tayo bilang Kristiano balang lan diad positibo odino negatibon paraan. Saray kalangweran so kaukolan a mandesisyon  nipaakar ed saray pamaakaran a singa say karera, kaaruman ya edukasyon, tan piasawa o pangasawa. Saray wala la’d edad so nayarin kaukolan a mandesisyon no kasin onalis ed arum a pasen odino mangawat na kaaruman a trabaho. Mandedesisyon itayo ya inagew-agew nipaakar ed pangusar na panaon tan arum niran pamaakaran. Antoy ontulong ed sikatayo a makapanggawa na makabat iran desisyon pian napabiskeg so inkaligen tayo bilang lingkor na Dios? Oniay inkuan na sakey ya abayag lan Kristiano: “Onkekerew ak na tulong nen Jehova sano mandedesisyon ak. Sisiaen kon importante so pangawat tan pangiyaplika ed saray simbawan manlalapud Biblia, saray Makristianon miting, saray mamatatken, tan saray nibase ed Biblia a publikasyon.”

Sano mandesisyon, kaukolan tayon itepet ed inkasikatayo: ‘Kayari limara odino samploy taon manlapud natan, kontento ak kasi ed saray desisyon ko natan, odino pagbabawian ko iratan? Kasin panggugunaetan kon seguroen a saray desisyon ko so agmamaletey ed espiritualidad ko noagta ontulong ed espiritual ya iyaaligwas ko?’​—Filipos 3:16.

Lapud inabuloyan na arum a bautismadon indibidual a sikaray natukso odino dawitdawit ya anumlang ed saray ganggan na Dios, say bilay so nagmaliw a magonigon. Pigara ed saray inekal ed kongregasyon lapud agnagbabawin nanggegemtan ed makasalanan a kurang so nansagpot pian makapawil, balet ta adispelosip lamet ag-abayag kayari na satan, makasengeg ed parehon kasalanan. Kasin say rason et agda impikasi a tulongan ira na Dios a ‘busolen so mauges tan ompeket ed maong’? (Roma 12:9; Salmo 97:10) Amin tayo so kaukolan a ‘manggawa na kakukurang a maptek ed saray sali tayo.’ (Hebreos 12:13) Konsideraen tayo pa sirin so pigaran punto a makatulong ed sikatayon napansiansia so espiritual a kaligenan.

Mansiansian Mapekder Diad Panamegley na Kristianon Kimey

Say sakey a paraan pian sikatayoy makapansiansia diad pilulumba tayo parad bilay et say okupadon pankimey ed panagpulong na Panarian. On, makanan tulong so Makristianon ministeryo tayo pian napansiansian akasentro so kapusoan tan kanonotan tayo ed panggawa na linawa na Dios tan akasentro so imano ed premyo a bilay ya andi-anggaan. Diad sayan pamaakaran et oniay impaseseg nen Pablo ed saray taga Corinto: “Inararok ira ya agagi, mansiansia kayo a malet [“mapekder,” NW], agkayo nagiing, lawas padaak yo so kime’yo ed Katawan, bangta amta yo a say kimey yo aliwa ya anggapo so kabaliksan to ed Katawan.” (1 Corinto 15:58) Say kabaliksan na “mapekder” et ‘akapirmi.’ Say ‘agnagiing’ so mankabaliksan na ‘ag-abuloyan na sakey a naikbanan to so pataga to.’ Kanian, say pagmaliw ya okupado ed ministeryo so walaan na makapaligen ya epekto ed kurang tayo bilang Kristiano. Say itulong ed arum a totoo a nakabat si Jehova so mangiter na kabaliksan ed bilay tayo tan mamaliket ed sikatayo.​—Gawa 20:35.

Si Pauline, a masulok a 30 taon la ed misionaryo tan diad arum a nengneng na sigpot-panaon a panagpulong, so angikuan: “Say ministeryo et salimbeng lapud say panagpulong ed arum so mamapaseguro ed siak a walad siak so katuaan.” Napawala met so ontan a kombiksion diad maparanay a pibiang ed arum a nengneng na saray Makristianon aktibidad, a singa say iyatendi ed saray miting parad panagdayew tan maseet a personal a panagaral ed Biblia.

Paliligenen na Maaron Impanaagi

Say pagmaliw a kabiangan na sankamundoan ya organisasyon na saray tuan managdayew so walaan na mabiskeg tan makapaligen ya epekto ed sikatayo. Agaylan bendisyon so pakapilimog ed ontan a maaro tan interon globon impanaagi! (1 Pedro 2:17) Tan napaligen tayo met iray kapananisiaan tayo.

Imanoen pa so inkamatulong na maptek a toon si Job. Anggan say mankuankuanan a managligliwa a si Elifaz et apaskar a mamidbir: “Saray salitam sinayakop da so napepelag nensaman, tan pinasekder mo so saray makapuy a pueg.” (Job 4:4) Komusta itayo ed sayan pamaakaran? Responsabilidad na balang sakey ed sikatayo a tulongan so agagi tayon lalaki tan bibii ed espiritual pian mansungdo ed panaglingkor ed Dios. Diad pidedeneng tayo ed sikara, nayarian tayoy onkiwas unong ed saray salitan: “Pabiskegen yo so saray makapuy a lima, tan pakasilen yo so saray makapuy a pueg.” (Isaias 35:3) Kanian akin ya aggawaen a kalat a pabiskegen tan pasesegen so pigaran kaparan Kristiano kada milimog ka ed sikara? (Hebreos 10:24, 25) Say makapaseseg a komendasyon tan panangapresya ed tuloytuloy a pansasagpot dan napaliket si Jehova so  peteg a makatulong ed sikaran mansiansian mapekder tekep na ilalon manalo ed lumba parad bilay.

Baleg so nagawaan na saray Kristianon mamatatken diad pamaseseg ed saray balo ni. Posibli iya diad pangiyopresi ra na saray makatulong a suhestion tan matukoy a Makasulatan a simbawa tan diad pikimey da ed sikara ed lawak na ministeryo. Si apostol Pablo so lawas anganamot ed pankanawnawan napabiskeg so arum. Pilalek ton nanengneng iray Kristiano ed Roma pian natulongan to iran ombiskeg diad espiritual a paraan. (Roma 1:11) Impasen to iray inadaron agagin lalaki tan bibii diad Filipos a ‘gayaga tan balanget’ to tan binilin to iran ‘mansiansian malet ed Katawan.’ (Filipos 4:1) Sanen nadngel to so paniirap na saray agagi to ed Tesalonica, imbaki nen Pablo si Timoteo pian ‘mamaletneg tan manligliwa ed sikara, pian anggapo komon so too ya onukbar lapud sarayan kaermenan.’​—1 Tesalonica 3:1-3.

Si apostol Pablo tan Pedro so amidbir tan angapresya ed matoor ya impansagpot na saray kapananisiaan da. (Colosas 2:5; 1 Tesalonica 3:7, 8; 2 Pedro 1:12) Komon ta say imanoen tayo et aliwan saray kakapuyan na agagi tayo, noagta saray maabig a kalidad tan matalonan pipupuligesgesan da pian mansiansian mapekder tan mangigloria ed si Jehova.

No negatibo odino makritiko itayo, ompan agsigagagalan napapairap tayo a nagkalalo iray arum pian mansiansian agnagiing ed pananisia. Agaylan matukoy a nodnonoten a saray agagi tayo et “maermen tan abuybuyak” diad sayan sistema na bengabengatla! (Mateo 9:36) Diad Kristianon kongregasyon, manepeg labat ya ilaloan dan nalikna so ligliwa tan pakarepreskoan. Komon ta amin tayo sirin so manggawa ed amin a nayarian tayo pian pabiskegen so kapananisiaan tayo tan tulongan iran mansiansian mapekder.

Sagpaminsan et nayarin onkapuy itayo lapud panagtrato na arum ed sikatayo. Kasin abuloyan tayo so ansakit a pananalita odino mapasang a kiwas a mamatayer ed serbisyo tayo ed si Jehova? Agtayon balot komon abuloyan so siopaman a mamakapuy ed inkapekder tayo!​—2 Pedro 3:17.

Saray Sipan na Dios​—Makapaligen ya Impluensya

Saray sipan nen Jehova ya alay abig ya arapen diad uley na Panarian so mangiiter ed sikatayo na ilalo pian napansiansia tayoy inkapekder tayo. (Hebreos 6:19) Tan say kombiksion a lawas totooren na Dios iray sipan to so mamakiwas ed sikatayon ‘manpuyat tan mansiansia ed pananisia.’ (1 Corinto 16:13; Hebreos 3:6) Say singano inkaatrasado ed pakasumpal na pigaran sipan na Dios so nayarin manubok ed pananisia tayo. Kanian importantin tuloy sirin a manbantay itayo sumpad panamalikdo na palson bangabangat tan ed kisuawi ed ilalo tayo.​—Colosas 1:23; Hebreos 13:9.

Say makapuy ya alimbawa na saray Israelita ya atigway lapud andian ira na pananisia ed saray sipan nen Jehova so nepeg a panmadmaran tayo. (Salmo 78:37) Imbes ya aligen tayo ira, komon ta mapekder itayo a manlingkor ed Dios tekep na inkaganatan diad sarayan kaunoran ya agew. “Manbibilay ak ya inagew-agew a singano say baleg ya agew nen Jehova so onsabi la nabuas,” so inkuan na eksperiensyadon matatken.​—Joel 1:15.

On, asingsingger la so baleg ya agew nen Jehova. Balet, anggapoy takotan tayo daput no mansiansia itayon maapit ed Dios. No maapit tayon tumboken iray matunong ya estandarte to tan mansiansian mapekder, matalonan nabatik tayo so lumba parad magnayon a bilay!​—Uliran 11:19; 1 Timoteo 6:12, 17-19.

[Litrato ed pahina 23]

Kasin gagawaen mo so amin a nayarian mo pian tulongan iray kaparan Kristiano a mansiansian mapekder?

[Picture Credit Line ed pahina 21]

The Complete Encyclopedia of Illustration/J. G. Heck