Pilien so Magnayon a Bilay

DAKEL a totoo so agnin balot awalaan nensaman na ontan lan karakel a pampilian. Alimbawa, mabetbet a pipilien tayoy isulong tayo, kanen tayo, tan pantrabahoan tan panayaman tayo. Diad dakel a parte na mundo et kaslakan la so pampili na asawaen o piasawaan. Balet, say Biblia so mangipaparungtal na pampilian a palumbasan to so amin a pipilien​—satan et lukas parad amin a sankatooan.

Oniay ibabaga na Biblia: “Say mareereen ed inkatunong makarandan na bilay; et say mantumbok ed mauges sikato so gawaen to a dili a patey to.” (Uliran 11:19) Tan inyabawag nen Jesu-Kristo: “Saya sikato so andi-anggaan a bilay, a naamtaan da ka a saksakey a tuan Dios, tan saman so imbakim, salanti Jesu-Kristo.”​—Juan 17:3.

On, inyopresi na Manamalsa ed sikatayo so pankanawnawa a pilien so kurang a mangitonton ed bilay ya andi-anggaan! Antoy kaukolan tayon gawaen pian nagamoran so magnayon a bilay?

Unong ed Biblia, “dia ed dalan na inkatunong wala so bilay.” (Uliran 12:28) Nayarian tayo so magmaliw a kabiangan na saray matunong a mamapaarap ed andi-anggaan a bilay. Panon? Diad paneguro a say kabibilay tayo so mitunosan ed linawa tan ed saray ganggan na Dios. (Mateo 7:13, 14) Komon ta susto so pilien tayo pian mangawat ed langkap na Dios ya andi-anggaan a bilay.​—Roma 6:23.