Sakey a Makapainteres a Kuritan

SAY managdiskobre a si Richard E. Byrd so aminliman nambaroy diad Antartika manlapu nen 1928 anggad 1956. Lapud impangirekord tan impakawalaan na susto iran kuritan, adetermina to tan saray kaiba to so arap na dagem, akapangiparaan na saray mapa, tan awalaan na dakel ya impormasyon nipaakar ed kontinente na Antartika.

Saray ekspedisyon nen Byrd so mangiyiilustra ed kakanaan na pakawalaay kuritan. Diad kuritan, odino panagsulatan et natutugyop so rekord ed saray detalye ed impanbaroy panamegley na barko odino eroplano. Sayan impormasyon so nausar ed saginonor pian nausisa so agawa odino naanalisa so impormasyon a nausar parad saray ontumbok a biahe.

Say Kasulatan so mangitatarya na makapainteres a salaysay ed Delubio diad panaon nen Noe. Satan a sankamundoan a Delap et asabi toy masulok a sakey taon. Bilang preparasyon ed Delubio, si Noe, say akulaw to, tan saray anak dan lalaki pati saray kaasawaan da so nanggawa na biong a ngalngali 1,400,000 kubiko piye so kabaleg to​—diad loob na 50 odino 60 taon. Parad anto itan? Pian niliktar so pigaran totoo tan ayayep ed Delap.​—Genesis 7:1-3.

Lugan na libro na Biblia a Genesis so natatawag a kuritan nen Noe ed no anto so agawa manlapud gapo na Delap anggad sanen sikato tan say pamilya to so akapaway ed biong. Kasin makana so lugan na satan parad sikatayo natan?