Tepetepet Manlapud Saray Managbasa

Akin ya imbaga na Say Panag-Bantayan na Abril 1, 2002, diad pahina 11, ed parapo 7, a say bautismo ed danum na saray balon mananisian Judio nen Pentecostes 33 K.P. et simbolo na “personal a dedikasyon da ed Dios panamegley nen Kristo,” bangta datin papanisiaan a say bautismo na saray Judio manlapud 33 K.P. anggad 36 K.P. et agkinaukolan so ontan a personal a dedikasyon?

Nen 1513 K.K.P., inikdan nen Jehova a Dios na pankanawnawa iray Israelita a magmaliw a masanton nasyon to daput no ‘mapeget dan tuloken so boses to tan em-eman da so sipanan to.’ Oniay inyebat da: “Amin a sinalita nen Jehova gawaen mi.”​—Exodo 19:3-8; 24:1-8.

Diad impipakna ran sumpalen iray kakaukolanen na sipanan ed Mosaikon Ganggan, indedika na saray Israelita so inkasikara ed Dios. Saray tinmumbok a kailalakan na saray Judio so nianak manlapud sayan dedikadon nasyon. Balet, say bautismo na saray Judion nagmaliw a papatumbok nen Jesu-Kristo manlapu nen Pentecostes 33 K.P. a manpatuloy et nagkalalo ni so nalalanor nen say pangipresenta na inkasikara ed Dios bilang kabiangan na dedikadon nasyon. Satan so mangisisimbolo na dedikasyon da ed si Jehova a Dios diad balon pisisiglaotan ed sikato panamegley nen Jesu-Kristo. Panon ya ontan?

Kayari inkikalbo na masanton espiritu ed ngalngali 120 a babangatan a nantitipon ed tagey a silir ed Jerusalem diad Pentecostes 33 K.P., tinmalindeg si apostol Pedro tan nampupulong ed dakel a Judio tan proselita ya akidagup pian amtaen da so agawa. Kayari na sigpot ya impantasi to, oniay inkuan to ed saray akonsiensian Judio: “Magbabawi kayo, tan manbinyag so sinansakey ed sikayo ed ngaran nen Jesu-Kristo, pian pakapaandian na kasalanan yo.” Bilang kiwas ed kaaruman a panamaseseg nen Pedro, “saraman so angawat na salita to, nambinyag ira; et niarum ed saray binangatan ed saman ya agew, so ngalngalin talon libo a kamarerwa.”​—Gawa 2:1-41.

Agta saramay abautismoan a Judio kayari impamaseseg nen Pedro et kabiangan la ra na dedikadon nasyon? Agta wala la ira ed dedikadon pisisiglaotan ed Dios? Andi. Insulat nen apostol Pablo ya ‘inekal na Dios so Ganggan diad impangipasak ed satan diad panamairapan a kiew.’ (Colosas 2:14, NW) Diad panamegley na impatey nen Kristo nen 33 K.P., inekal nen Jehova a Dios so Ganggan a sipanan​—say mismon basiyan pian itarok iray Israelita diad dedikadon pisisiglaotan ed Sikato. Impulisay la na Dios a mismo so nasyon ya angipulisay ed  Anak To. ‘Kanian say Israel unong ed laman’ et aliwa lan dedikadon nasyon na Dios.​—1 Corinto 10:18; Mateo 21:43.

Anampot so Ganggan a sipanan nen 33 K.P., balet ag-anampot ed satan a panaon so peryodo na espisyal a panangabobon tan panangimano na Dios ed saray Judio. * Ninmatnat ni itan a peryodo anggad 36 K.P., sanen pinulongan nen Pedro so debosyonadon Italyano a si Cornelio tan say sankaabungan to ontan met ed arum niran Gentil. (Gawa 10:1-48) Anto so basiyan parad sayan ninatnat a panangabobon?

Ibabaga na Daniel 9:27 a say Mesias et “manggawa naani na sakey a malet a sipan ed saray dakel ed sakey simba.” Say sipan a nepeg a paletan ed loob na pitoran taon, odino “sakey simba,” manlapud bautismo nen Jesus tan say gapoan na mapublikon ministeryo na Mesias ed 29 K.P. et Abrahamikon sipanan. Pian onkualipika ed satan a pisisipanan, nepeg lambengat a say sakey a too et Hebreon kailalakan nen Abraham. Satan a sipanan a saksakey a dapag so nalalanor et ag-angitarya ed indibidual na basiyan parad dedikadon pisisiglaotan ed si Jehova. Kanian, saray Judion mananisia a nampabautismo kayari impanpaliwawa nen Pedro nen Pentecostes 33 K.P., anggaman makakaawat ira na espisyal a panangimano bilang natural a Judio, et anggapo la ira ed dedikadon pisisiglaotan ed Dios sanen anampot la so Ganggan a sipanan. Sikaray kinaukolan a personal a mangidedika na inkasikara ed Dios.

Importante so personal a dedikasyon na saray Judio tan proselitan mangipresenta ed inkasikara parad bautismo diad agew na Pentecostes 33 K.P. lapud sananey nin rason. Pinaseseg nen apostol Pedro iray dumerengel to a sikaray magbabawi tan manpabautismo diad ngaran nen Jesus. Kakaukolanen na satan so pangipulisay ed dalan na mundo tan pamidbir ed si Jesus bilang Katawan tan Mesias, bilang Atagey a Saserdote, tan bilang sakey a manyudyurong ed nikawanan na Dios diad tawen. Nakaukolan day ontawag ed ngaran nen Jehova a Dios parad kilalaban panamegley nen Kristo Jesus, a lalanoren toy pangagamil na pananisia ed si Kristo tan pamidbir ed sikato bilang Lider da. Anguman la so interon basiyan parad pakapisiglaotan da ed Dios tan parad pakaperdona na saray kasalanan da. Bilang indibidual, saray mananisian Judio so kaukolan a mangawat ed sayan balon uksoyan. Panon? Diad panggawa na dedikasyon ed Dios tan diad mapublikon pangiyabawag da a ginawa da la itan panamegley na kipalseb ed danum diad ngaran nen Jesu-Kristo. Say bautismo ed danum et simbolo na dedikasyon da ed Dios, a mangitarok ed sikara diad balon pisisiglaotan ed sikato panamegley nen Jesu-Kristo.​—Gawa 2:21, 33-36; 3:19-23.

[Paimano ed Leksab]