‘Agkayo Ontatakot, Nisay Napunaw Kayo’

‘Agkayo ontatakot, nisay napunaw kayo ta si Jehova wala ed sikayo.’​—2 AWARAN 20:17.

1. Anto so epekto na terorismo ed totoo, tan akin ya ontan la so katatakot da?

 TERORISMO! Satan a mismon salita et makapataktakot, a mamapawalay liknaan ya anggapo lay kaligenan tan proteksion. Liliingen na satan so nanduruman liknaan a singa say inkatalagnaw, ermen, tan sanok. Tan satan a salita so manedeskribe ed tatakotan na dakel a mansalot ed katooan diad onsabi ni iran taon. Say makasengeg ed ontan a katatakot et say agsigpot ya intalona na pigaran bansa ed dakel lan taon diad pibabakal da ed dakel a klase na terorismo.

2. Panon so ikikiwas na saray Tasi nen Jehova ed probleman terorismo, a mangitonton ed antoran tepet?

² Anggaman kuan, wala so peteg a rason no akin a manilalo. Makatantanda so paniilalon maong na saray Tasi nen Jehova, ya aktibon manpupulong ed 234 a bansa tan teritorya. Imbes ya ontakot ira ed agbalot pakaandi na terorismo, matalek ira a naandi itan​—tan magano la. Realistiko kasi so panilalo met ed satan? Siopa so sigpot a makapangekal ed sayan bakbak diad mundo, tan panon itan a nagawa? Nayarin walay sakey a nengneng na karawalan ya angapekta ed sikatayon amin, kanian matukoy labat so panusisa ed basiyan na satan ya ilalo.

3. Anto so sengegan na inkiwalay takot, tan anto so nipasakbay nipaakar ed panaon tayo?

³ Natan, natatakot tan natatalagnaw so totoo lapud nanduruman rason. Nonoten pa so dakel a totoo ya agla makayarin mangasikaso ed inkasikaran dili lapud itatakken, saray totoon onkakapuy lapud agnatambal iran sakit, tan saray pamilyan tumalikarkar kalamor pian manbilay. Diad tua, isipen pa so ag-inkaseguro na bilay a mismo! Posiblin nagawa so biglan ipapatey lapud aksidente odino kalamidad, a maneral ed amin a bengatlan papablien tayo. Lapud ontan a takot tan kapagaan, nilikud ni ed dakel iran personal a balingaan tan inkadismaya, dugaruga so impaneskribe nen apostol Pablo ed panaon tayo: “Kabaten mo so saya, a dia ed saray kaunoran ya agew onsabi so saray panaon a maatap. Ta saray totoo sikara naani so mangaro ed saray lamalaman da, . . . anggapo so aro ra a nianakan, anggapo so panangasi ra, managpauges, aliwa ra’n maadia, maruksa ra, maingongot ed saray maabig.”​—2 Timoteo 3:1-3.

4. Anto so walan positibon aspekto ed mauddiem a kipapasen a niparungtal diad 2 Timoteo 3:1-3?

⁴ Anggaman ililitrato na sayan teksto so mauddiem a kipapasen, satan balet so mangipapabitar na ilalo. Imanoen pa a say mapeligro iran panaon so niwala ed ‘sarayan kaunoran ya agew’ na kaplesan a sistema na bengabengatla nen Satanas. Kabaliksan na satan ya asingger la so pakainawaan tan magano lan salatan na uley na naspot a Panarian na Dios so marelmeng a mundo, unong ya imbangat nen Jesus ya ipikasi na saray patumbok to. (Mateo 6:9, 10) Satan a Panarian et say mangatatawen a gobierno na Dios, ‘ya agnaderal,’ kuan nen propeta Daniel, noagta ‘satan so mamuyak tan mangupot ed amin na sarayan panarian [na too], tan satan so mansiansia lawas.’​—Daniel 2:44.

Say Inka-Neutral na Kristiano Kontra ed Terorismo

5. Panon so agano nin inkiwas na saray nasyon ed sesga na terorismo?

⁵ Diad loob na pigaran dekada, tinigway na terorismo so dakel a totoo. Lalon nagmaliw a sinononot so mundo ed sayan kapeligroan kayari na impangataki ed New York City tan Washington, D.C., nen Setyembre 11, 2001. Lapud kabetbet tan kalaknab na terorismo diad mundo, nanmumuyong so nasyones ed interon dalin pian paeren itan. Alimbawa, nen Disyembre 4, 2001, unong ed saray report na media, “saray foreign minister a nanlapud 55 a bansa na Europa, Amianen ya Amerika tan Sentral ya Asia so nankakasakey ya angawat ed sakey a plano” a denisinyo pian pankakasakeyen iray sagpot da. Satan a kiwas so nandinayewan na sakey ya atagey ya opisyal na E.U. bilang pangiyaarum na “balon laknab na pakayari” kontra ed terorismo. Bigbigla, nilasus minilyon a totoo so nigalet ed tatawagen na The New York Times Magazine a “gapo na maawaran a bakal.” Tatalaranan ni no panon so italona na saratan a sagpot. Balet, saray epekto na satan a pibabakal sumpad terorismo so amawala na takot tan kapagaan diad dakel, balet aliwan ontan ed saramay manmamatalek ed si Jehova.

6. (a) Akin a no maminsan et nairapan so arum a mangawat ed talindeg na saray Tasi nen Jehova nipaakar ed inka-neutral da bilang Kristiano? (b) Anton alimbawa nipaakar ed mapolitikan kimey so inletneg nen Jesus ed saray patumbok to?

⁶ Kabkabat iray Tasi nen Jehova ed inka-neutral da ed politika. Anggaman mabulos so maslak a totoo a mangawat ed sayan talindeg diad panaon na kareenan, agtanton lukas so kanonotan da sano onlesa iray nikadkaduman  sirkumstansya. Mabetbet, say takot tan agpakaseguro ya epekto na bakal so amalesa na mabiskeg iran sentimento ed nasyonalismo. Lapud satan, agnatalosan na arum no akin a walay masuyat a manuporta ed bantog iran ulopan na nasyon. Anggaman kuan, amta na saray Kristiano a nepeg dan unoren so ganggan nen Jesus ya ‘agmagmaliw a kabiangan na mundo.’ (Juan 15:19; 17:14-16; 18:36; Santiago 4:4) Say kakaukolanen na satan et pansiansiaen da so inka-neutral da ed saray pamaakaran nipaakar ed politika odino sosyedad. Inletneg a mismo nen Jesus so suston alimbawa. Lapud naspot a kakabatan tan matalonggaring iran kalidad to, apaaligwas to komon iray pakurang na too ed panaon to. Ingen, agto akibabali ed politika. Diad kagapo na ministeryo to, sikato so mapekder ya angipulisay ed iyoopresi nen Satanas a pananguley ed amin a panarian na mundo. Diad saginonor, sikato so determinadon pinmaliis ed pangipuepuesto ed sikato diad politika.​—Mateo 4:8-10; Juan 6:14, 15.

7, 8. (a) Anto so agkabaliksan na inka-neutral na saray Tasi nen Jehova, tan akin? (b) Panon a say Roma 13:1, 2 so mangipuera ed pibibiang ed marawal ya aktibidades sumpad gobierno?

⁷ Agnepeg ya ipasen a susuportaan odino kokonsintien na saray Tasi nen Jehova iray gawa na karawalan lapud neutral so talindeg da. No ontan so gawaen da, sikara so misumlangan ed ibabaga ran sikaray lingkor na “say Dios na aro tan kareenan.” (2 Corinto 13:11) Naaralan da no anto so liknaan nen Jehova nipaakar ed karawalan. Oniay insulat na salmista: “Si Jehova suboken to so matunong; balet say bagel tan saman so labalabay to so karamsakan gulaen na kamarerwa To.” (Salmo 11:5) Kabat da met no anto so imbaga nen Jesus ed si apostol Pedro: “Ipawil mo so kampilan mo ed pasen to; ta saray amin a mangala na kampilan ompatey ira naani ed kampilan.”​—Mateo 26:52.

⁸ Anggaman mabitar ya ipapatnag na awaran a saray palson Kristiano so mabetbet a manguusar na “kampilan,” aliwan ontan iray Tasi nen Jehova. Papaliisan da so amin na saratan ya agamil. Matoor a tutuloken na saray Tasi nen Jehova so bilin ed Roma 13:1, 2: “Ontulok komon so balang kamarerwa ed saray atagtagey a pakauley [saray gobierno na totoo]: ta anggapo so pakauley ya agkien na Dios; et saray pakauley a wala ingganggan ira na Dios. Kanian say onsumpa ed pakauley, sumpaen to so bilin na Dios; et saray onsumpa, nagunggona ra ed sikaran dili so kasalaysay da.”

9. Diad anton duaran dalan a susumpaen na saray Tasi nen Jehova so terorismo?

⁹ Balet, lapud mauge-uges so terorismo, agta nepeg ya aktibon sumpaen itan na saray Tasi nen Jehova? On, nepeg a gawaen da itan. Unona, ag-ira mibiang a mismo ed satan a kimey. Komadua, ibabangat da so totoo nipaakar ed saray Makristianon prinsipyo a mamaandi ed amin a klase na karawalan sano tumboken da iratan. * Nen imbeneg a taon, angusar iray Tasi na 1,202,381,302 ya oras diad impanulong da ed totoo a makaaral ed Makristianon panagbilay. Ag-iya adarak a panaon, lapud ta say resulta na sayan kimey et 265,469 a totoo so abautismoan bilang Tasi nen Jehova, a mangipaparungtal sirin ed sigpot a pangipupulisay da ed karawalan.

10. Anto iray ilaloan diad pakaandi na karawalan ed mundo natan?

¹⁰ Niarum ni, bibidbiren na saray Tasi nen Jehova ya agda naekal a mismo so kaugsan ed mundo. Satan so rason no akin a nanmatalek iran maong ed samay makayari​—si Jehova a Dios. (Salmo 83:18) Anggaman ed masimoon iran sagpot da, agnayarian na totoo a panampoten so karawalan. Impasakbay la’d sikatayo na apuyanan a managsulat na Biblia so nipaakar ed panaon tayo, “saray kaunoran ya agew,” a kuan na satan: “Saray totoo a mauges tan saray managsaol onuges lara’n onuges, a managsaol ira, tan nasaol ira met a dili.” (2 Timoteo 3:1, 13) No moriaen unong ed satan, agsegurado iray iilaloan na totoo ya ontalona ira ed pibabakal da sumpad kaugsan. Diad biek a dapag, makapanmatalek itayo ed si Jehova a sigpot  tan permanentin makapangekal ed karawalan.​—Salmo 37:1, 2, 9-11; Uliran 24:19, 20; Isaias 60:18.

Andiay-takot Anggaman ed Manasingger lan Iyaataki

11. Antoran kundang so ginawa la nen Jehova pian paandien so karawalan?

¹¹ Lapud say karawalan et kagula na Dios na kareenan, natalosan tayo no akin ya inggapo to laray kundang pian deralen so pansesengegan na satan, si Satanas a Diablo. Diad tua et Sikato lay kinmiwas pian nasagmak nen Satanas so makapabanday ya inkatalo diad lima nen arkanghel Miguel​—say balo nin nitronon Ari na Dios, si Kristo Jesus. Oniay impaneskribe ed satan na Biblia: “Agawa so sakey a baleg a bakal ed tawen: si Miguel tan saray anghel to pinmaway iran akibakal ed dragon: et samay dragon tan saray anghel to akibakal ira. Et ag-ira analo, tan agmet la aromog so dinan man a pasen da ed tawen. Tan nibantak dia ed dalin so baleg a dragon, say daan ya uleg, a manngaran na Diablo tan si Satanas, a sikato so mantila ed lapag na sankamundoan; nibantak dia ed dalin, tan saray anghel to nibantak ira ya alanor ed sikato.”​—Apocalipsis 12:7-9.

12, 13. (a) Anto so makatantanda nipaakar ed taon 1914? (b) Anto so ipapasakbay na propesiya nen Ezequiel parad saramay manusuporta ed Panarian na Dios?

¹² Mantunosan so kronolohiya na Biblia tan saray ebento ed mundo diad impanukoy ed taon 1914 bilang say panaon ya inkagawa na bakal ed tawen. Manlapu la’d saman et tuloytuloy a linmoor iray kipapasen ed mundo. Oniay impaliwawa na Apocalipsis 12:12: “Manliket kayo, O katawenan, tan sikayon manaayam ed sikara. Kasi la ra so dalin tan dayat: ta say diablo inmakseb ed sikayo, a wala ed baleg a sanok to, ya amta to a daiset la so panaon to.”

¹³ On, say sanok na Diablo so manunan nipaarap ed alanaan iran managdayew ed Dios tan ed kakaiba ran ‘arum a karnero.’ (Juan 10:16; Apocalipsis 12:17) Sayan isusumpa so magano lan mamantok sano ipaarap la na Diablo so pirmin panangataki to ed amin na saramay onsusuporta tan manmamatalek ed niletneg lan Panarian na Dios. Sayan desididon iyaataki so atukoy ed Ezequiel kapitulo 38 bilang say panangataki nen ‘Gog ed dalin na Magog.’

14. Antoran makasalimbeng a sagpot so nanggayagaan na saray Tasi nen Jehova ed apalabas, tan kasin lawas ya ontan so kipapasen?

¹⁴ Manlapu nen nibasileng si Satanas manlapud tawen, saray totoo na Dios so nasasalimbengan no maminsan ed saray panangataki nen Satanas lapud saray sagpot na pigaran mapolitikan grupo, a simbolikon adeskribe ed Apocalipsis 12:15, 16. Diad pidumaan, ipapabitar na Biblia a legan na unor ya iyataki nen Satanas, anggapo iray ahensia na totoo a makasalimbeng ed saramay manmamatalek ed si Jehova. Nepeg kasin takotan odino pakatalagnawan iya na saray Kristiano? Andin balot!

15, 16. (a) Saray panamaseguro nen Jehova ed totoo to diad panaon nen Josafat so mangiparungtal ed anton sengegan pian manilalo iray Kristiano natan? (b) Anton padron so impatnag nen Josafat tan say totoo parad saray lingkor na Dios natan?

¹⁵ Seguradon salimbengan na Dios so totoo to a singa met ed impanuporta to ed nasyon to diad panaon nen Arin Josafat. Oniay nabasa tayo: “Dengelen yo, amin a Juda, tan sikayo a manaayam ed Jerusalem, tan sika ari Josafat:  Onia so kuan nen Jehova ed sikayo, Agkayo antakot nisay napunaw kayo nisengeg ed saya a baleg a karaklan; ta say bakal agyo kayarian, noag ingen kien na Dios. . . . Agyo nakaukolan so mibakal dia ed saya a bakal: ompasen kayo, tan ontanyareg kayo, tan nengnengen yo so panangilaban nen Jehova ed sikayo, O Juda tan Jerusalem; agkayo antakot, nisay napunaw kayo: nabuas ompaway kayo a sumpa ed sikara; ta si Jehova wala ed sikayo.”​—2 Awaran 20:15-17.

¹⁶ Apaseguroan so totoo na Juda ya aglara nakaukolan a mibakal. Ontan met, agmangusar na armas so totoo na Dios bilang depensa sano atakien ira nen Gog na Magog. Imbes, ‘ontanyareg ira tan nengnengen da so panangilaban nen Jehova’ ed sikara. Siempre, say itanyareg et agmankabaliksan na sigpot ya ag-ikiwas, no panon a say totoo na Dios ed panaon nen Josafat et kinmiwas. Oniay nabasa tayo: “Et si Josafat indakmomo to so ulo to a pati say lupa to ed dalin; et amin a Juda tan saray manaayam ed Jerusalem tinmikleb ira ed arap nen Jehova, ya inggalgalang da si Jehova. . . . Et sanen akipanon [si Josafat] ed baley, tinuro to so saray mankanta ed Jehova, tan mangigalang ed masanto ya uksoy, leleg ya ompapaway ira ed arap na inayuraan, tan kuan da, Misalamat kayo ed Jehova; ta say panangasi to magnayon lawas.” (2 Awaran 20:18-21) On, anggaman nipapaarap ira ed panangataki na kabusol, nantultuloy so totoo ed aktibon panangidayew ed si Jehova. Saya so mangiletneg na padron a tumboken na saray Tasi nen Jehova sano onataki si Gog ed sikara.

17, 18. (a) Anto so positibon awawey na saray Tasi nen Jehova natan no nipaakar ed iyaataki nen Gog? (b) Anton panonot so agano nin niiter ed saray Kristianon kalangweran?

¹⁷ Anggad isabi na satan​—tan anggad iyataki la nen Gog​—mantultuloy iray Tasi nen Jehova ya onsuporta ed Panarian na Dios. Mantultuloy ira ya onggamor na biskeg tan salimbeng diad pililimog da ed masulok a 94,600 a kongregasyon ed interon mundo. (Isaias 26:20) Natan la so panaon pian makpel ya idayew si Jehova! On, say pantultuloy a pantalaran ed manasingger lan panangataki nen Gog so agmamatalaw ed sikara. Imbes, satan so mamabiskeg ed sikara a mamadaak ed bagat na panangidayew da angga ed anggaay nayarian da.​—Salmo 146:2.

¹⁸ Satan a positibon awawey so matukoy ya ipaparungtal na nilibon kalangweran diad interon mundo a linmoob ed sigpot-panaon a ministeryo. Pian nipabitar so inkatalonggaring ed pamili ed satan a kurso na panagbilay, say tract a Sikayoran Kalangweran​—Anto so Gawaen Yo ed  Bilay Yo? so impaway ed 2002 iran distriton kombension. Saray Kristiano, malangwer man odino matakken la, so misalsalamat ed ontan iran nipanpanaon a panonot.​—Salmo 119:14, 24, 99, 119, 129, 146.

19, 20. (a) Akin ya anggapoy rason na saray Kristiano ya ontakot odino natalagnaw? (b) Anto so nitulong ed sikatayo na ontumbok ya aaralen ya artikulo?

¹⁹ Anggaman ed saray kipapasen ed mundo, saray Kristiano so nakaukolan ya ag-ontakot odino natalagnaw. Amta ra a magano lan punasen na Panarian nen Jehova so amin a nengneng na karawalan. Naliligliwa met ira diad pakaamta a say kioli so mamabilay ed dakel ya inaatey lapud karawalan. Anggaman saya so mangiter na primeron pankanawnawa ed arum pian naaralan da so nipaakar ed si Jehova, ontulong met itan ed arum pian mantultuloy ed kurang na dedikadon panaglingkor da ed sikato.​—Gawa 24:15.

²⁰ Bilang tuan Kristiano, natalosan tayo a nakaukolan so pansiansia tayon neutral bilang Kristiano tan determinadon gawaen itan. Kaliktanen tayo so mansiansia ed alay abig ya iilaloan ed pagmaliw ya ‘akatanyareg tan makanengneng ed panangilaban nen Jehova.’ Say ontumbok ya artikulo so mamabiskeg ed pananisia tayo diad pagmaliw tayon sikakabat ed kaplesan iran ebento a tuloytuloy a mangiiter na kaaruman ya aralem a pakatalos ed kasumpalan na propesiya na Biblia.

[Paimano ed Leksab]

Kasin Nipaliwawa Yo?

• Akin a negatibo so dakel a totoo natan?

• Akin a mailalo iray Tasi nen Jehova nipaakar ed arapen?

• Anto so ginawa la nen Jehova nipaakar ed pansesengegan na amin a karawalan?

• Akin ya anggapoy rason tayo pian ontakot ed panangataki nen Gog?

[Tepetepet Parad Panagaral]

 [Litrato ed pahina 13]

Impatnag nen Jesus so suston alimbawa ed pagmaliw a neutral bilang Kristiano

[Saray litrato ed pahina 16]

Nilibo ed saray kalangweran a Tasi so magayagan linmoob ed sigpot-panaon a ministeryo

Sikayoran Kalangweran​—Anto so Gawaen Yo ed Bilay Yo?

[Picture Credit Line ed pahina 12]

UN PHOTO 186226/M. Grafman