Anto lay Nagagawa ed Panag-abuloy?

KAYARI na saray impangataki nen Setyembre 11, 2001, ed New York City tan Washington, D.C., pirmi so impanuporta na publiko ed saray biktima na trahedya. Saray organisasyon a mangaawat na abuloy (o charity) so akaawat na baleg a kantidad a $2.7 bilyon a donasyon pian itulong ed saray pamilya na saray biktima. Diad impakabigla ed inkalaknab na desyang, saray totoo ed inerman a pasen so malabay ya ontulong.

Balet, adismaya a tampol so arum a totoo sanen abalitaan a sananey so panguusaran na saray prominentin charity ed saray pundo. Dakerakel so sinmanok a maong ed report a sakey a baleg a charity so namplanon mangibiig ed ngalngali kapaldua na $546 milyon a naawat na satan pian usaren parad arum iran gagala. Anggaman inuman lanlamang na organisasyon so desisyon to tan kinmerew na dispensa, oniay inkuan na sakey a reporter: “Minoria na saray kritiko iyan inkagawa ya atrasado la pian napapawil ni so [datin] talek” antis na saray impangataki. Komusta kayo balet? Kasin nadidismaya kayo met la ed saray organisasyon a mangaawat na abuloy?

Makatulong Odino Panagdarak?

Say pangiter ed saratan ya organisasyon et ipapasen ed inkalapagan bilang kaabigan. Balet, aliwan ontan so panmoria na amin. Masulok a 200 a taon ed apalabas, oniay insulat nen Samuel Johnson, say Ingles a managsulat na essay: “Mas segurado kayo a gagawaen yo so maabig no manbayar kayo ed saramay mantratrabaho, bilang sueldo ed sagpot da, nen say no mangiter kayo na kuarta bilang abuloy.” Ontan met so pangipapasen na arum natan, tan saray report ya aliwan duga so pangipapakurang na saray charity ed saray donasyon so mangeekal na kompiyansa na publiko. Konsideraen pa so duaran agano nin alimbawa.

Sakey a direktor na relihyoson charity diad San Francisco so inekal sanen nibabagan impabayaran to ed ahensia so kosmetikon operasyon to tan say $500-kada-simba a babayaran to ed restawran diad loob na duay taon. Diad Britanya, saray angorganisa ed baleg a charity ed telebisyon so abaingan sanen adiskobre a diad 6.5 milyon pounds (ngalngali $10 milyon, U.S.), ya impawit pian makatulong ed pangipaalagey na balon bilding parad saray ulila diad Romania, 12 lambengat a makapuy a klasen kaabungan so nipaalagey, tan agnipaliwawa so angigastosan ed nilasus nilibon dolyar. Saray negatibon report a singa saraya so sengegan no akin  ya arum a mandodonasyon so lalon maalwar no kaunongan so idonasyon da tan no siopa so pangiteran da.

Mangiter Odino Andi

Anggaman ontan, makapaermen labat no abuloyan so kiwas na pigaran totoo odino organisasyon a mangamper ed masimoon a panagpaga tan panangasi tayo ed arum. Inkuan na Biblia: “Say relihyon a malinew tan andi tilol ed arap na Dios tayo tan Ama sikato ya: Dalawen so saray ulila tan babalo a bibii ed kaermenan da.” (Santiago 1:27) On, say panggawa na bengatla parad saray mairap-bilay tan saray mankakaukolan et makanan kabiangan na Inkakristiano.

Balet, nayarin umamengen yo, ‘Kasin nepeg kon itultuloy so mangiter ed charity, odino ontulong ak lambengat diad personal lan pangiter na saray regalo ed saray sinansakey?’ Anton klase na panangiter so iilaloan na Dios? Say onsublay ya artikulo so maningbat ed saratan a tepet.