Aralen so Sekreto na Panamasarag

Diad makapaseseg a sulat to ed saray Kristiano diad Filipos, oniay insulat nen apostol Pablo: “Inaral ko so mamasarag na antokaman a kipapasen ko. . . . Dia ed balang sakey tan dia ed amin a bengatla inaral ko so maamot ya anggan kapesel tan kaerasan, anggan mamarakel tan mankaukolan.”​—Filipos 4:11, 12.

Anto ta so sekreto ed impamasarag nen Pablo? No imanoen so agaylan bili na sasaliwen tan say ag-inkaligen na ekonomya natan, talagan makagunggona ed saray tuan Kristiano no aralen da so pamasarag pian makapantultuloy ya akasentro so imano ra ed panaglingkor ed Dios.

DIAD akadkaunan sulat to, insalaysay nen Pablo so datin matalonan karera to. Inkuan to: “No siopaman a sananey a too a manis-isip a wala so panmatalkan ed laman, siak ni lalo: Ya agalsiman ed komawalon agew, ed kailalakan na Israel, ed poli nen Benjamin, Hebreo ed saray Hebreo; no nipaakar ed ganggan, sakey a Fariseo; no nipaakar ed seseg, nanduduksa na iglesia; no nipaakar ed kaptekan a wala ed ganggan, naromog ya andi pangidalman.” (Filipos 3:4-6) Niarum ni, bilang maseseg a Judio, si Pablo so ingganggan tan sinuportaan na saray atagey a saserdote ed Jerusalem. Amin na saya so mangipapaseguro ed sikato na pakapanyari tan inkabantog​—ed politika, relihyon, tan seguradon diad pinansyal​—diad Judion sistema.​—Gawa 26:10, 12.

Balet, sanen nagmaliw a maseseg a Kristianon ministro si Pablo, anguma-uman iray bengatla. Nisengeg ed maong a balita, sikatoy mabulos ya angitalirak ed matalonan karera to tan ed amin ya ipapasen na arum ya importante. (Filipos 3:7, 8) Panon ton sinuportaan so inkasikato? Kasin sikatoy mangawat na sueldo bilang ministro? Panon a nasuportaan so personal iran pankaukolan to?

Sinumpal nen Pablo so ministeryo to ya ag-angawat na bayar. Pian agmagmaliw a pabelat ed saramay pupulongan to, sikatoy angiba ed si Aquila tan Priscila ed panaggawa na tolda legan a walad Corinto, tan wala niray bengatlan ginawa to pian nasuportaan toy inkasikato. (Gawa 18:1-3; 1 Tesalonica 2:9; 2 Tesalonica 3:8-10) Si Pablo so amitlon nambaroy ed ararawin pasen bilang misionaryo, tan sikato met so linma ed saray kongregasyon a kaukolan a dalawen. Lapud sikatoy okupadon tuloy diad panaglingkor ed Dios, daiset so kaykayarian to. Kaslakan la a sikatoy intaryaan ed saray nakaukolan to. Balet, no maminsan, lapud saray mairap a kipapasen, sikatoy anagmak na kakisiran tan kaerasan. (2 Corinto 11:27; Filipos 4:15-18) Anggaman  ontan, agbalot nanreklamo si Pablo ed kipapasen to, tan agto angimonan so wala ed arum. Sikatoy mabulos tan maliket a nansagpot parad pankaabigan na kaparan Kristianos. Diad tua, si Pablo so angaon ed saray kabkabat a salita nen Jesus: “Lalo a mapalar so mangiter nen say mangawat.” Agaylan matalonggaring ya ehemplo parad sikatayon amin!​—Gawa 20:33-35.

Say Kabaliksan na Panamasarag

Say manunan sengegan na liket tan inkapnek nen Pablo et say impamasarag to. Balet, anto ta so kabaliksan na panamasarag? Diad simplin panangibaga, satan so mankabaliksan na pagmaliw a kontento ed manuna iran pankaukolan. Nipaakar ed saya et oniay inkuan nen Pablo ed si Timoteo a kaiba to ed ministeryo: “Balet say kasimpitan [“maridios a debosyon,” NW] sikato so baleg a gunggona no tooran na pamasarag. Ta anggapo so intarok tayo dia ed mundo, et agtayo met nayariay mangala na antokaman a bengatla. No wala siri pantagano tayo tan kawesen tayo pasaragen tayo komon ya.”​—1 Timoteo 6:6-8.

Imanoen ya insiglaot nen Pablo so panamasarag ed maridios a debosyon. Binidbir to a say tuan liket so manlalapu ed maridios a debosyon, salanti, say pangiyuna ed serbisyo tayo ed Dios, tan aliwan say materyal a kaykayarian odino kayamanan. Say ‘tagano tan kawesen’ et paraan lambengat pian makapantultuloy itayon manggegemtan ed maridios a debosyon. Kanian para ed si Pablo say sekreto ed panamasarag et say panmatalek ed si Jehova, antokaman iray sirkumstansya.

Dakel a totoo natan so makakasagmak na dakel a gonigon tan ermen lapud agda amta itan a sekreto odino ibabaliwala ra itan. Imbes a bayuboan da so panamasarag, mas lablabayen da so panmatalek ed kuarta tan say nasaliw na kuarta. Saray industriya na panagpatalastas tan say media so mangipapalikna’d totoo ya ag-ira magmaliw a maliket no anggapoy sankabaloan tan  sankamablian iran produkto tan kagawaan da​—tan labay dan nawalaan iran tampol na saratan. Bilang resulta, dakel so napapatitan ed panggegemtan na kuarta tan materyal iran bengatla. Imbes a nawalaan na liket tan inkapnek, sikaray ‘naplag ed sakey a katuksoan tan kalot tan dia ed saray dakel ya agum a maksay tan makaderal a kaalakan, a mangipalereg ed saray totoo ed kagegeba tan kababalang.’​—1 Timoteo 6:9, 10.

Naaralan Da so Sekreto

Diad sayan panaon, kasin peteg a posibli so pambilay tekep na maridios a debosyon tan panamasarag diad ontan et nawalaan na liket tan inkapnek? On. Diad tua et minilyon a totoo so manggagawa na ontan. Naamtaan da so sekreto na pagmaliw a maliket ed saray materyal a bengatla a walad sikara. Saraya et saray Tasi nen Jehova, ya angidedika na inkasikara ed Dios, a manggagawa ed linawa to tan mangibabangat ed totoo ed amin a pasen nipaakar ed gagala to.

 Bilang alimbawa et konsideraen pa iramay namboluntaryo ya ipasal tan ibaki bilang misionaryo diad saray agkabisado a bansa pian manpulong na maong a balita na Panarian na Dios. (Mateo 24:14) Mabetbet, saray kipapasen ed saray bansan pangibakian ed sikara et aliwan maaligwas a singa aka-iluaman da la. Singa bilang, sanen sinmabi iray misionaryo diad sakey a bansa ed Asia nen kagapo labat ni na 1947, saray epekto na guerra so nalilikna ni a siansia, tan daiset so kaabungan a walaay koryenti. Diad dakel a bansa, nalmoan na saray misionaryo a sano manpesak et sansakey manayan gusgusen iray kawes ed tablan-pesakan odino diad saray angkabaleg a bato diad ilog imbes a diad washing machine. Balet ta linma ira ditan pian ibangat iray totoo ed katuaan ed Biblia, kanian sikaray inmadapta ed lokal iran kipapasen tan nagmaliw ya okupado ed ministeryo.

Saray arum so linmoob ed sigpot-panaon a ministeryo odino inmalis ed saray pasen ya agni apulongan na maong a balita. Si Adulfo so nanlingkor bilang sigpot-panaon a ministro diad masulok lan 50 a taon diad nanduruman parte na Mexico. Oniay inkuan to: “Singa si apostol Pablo, naaralan mi nen akulaw ko ya iyadapta so inkasikami ed saray sirkumstansya. Singa bilang, sakey ed saray kongregasyon a dinalaw mi so arawdawi ed syudad odino tindaan. Kada panangan, pasasaragen na saray agagi so pangan na sakey lambengat a tortilya a walay daiset a puriko tan asin tan sakey lusor a kape. Satan labat so nakan da​—taloran tortilya ed sakey agew. Kanian naaralan mi so manbilay a singa saray agagi. Nanggayagaan ko so dakel ya eksperiensya a singa onia legan na 54 a taon a panlilingkor ko ed si Jehova a sigpot-panaon.”

Nanonotan ni nen Florentino no panon a say sankapamilyaan to so kaukolan ya onadapta ed mairap iran sirkumstansya. Legan ton nononoten so inkaugaw to, inkuan to: “Say tatay ko so matalonan negosyante. Dakel so kayarian ton dalin. Nanonotan ko ni so despatso diad grocery mi. Walay drower a 20 pulgada so kalapar to tan 8 pulgada so kaaralem to, tan walaan na apatiran dibisyon. Diman mi iiyan iray nanlakoan mi ed sanagew. Kayari na sanagew, naynay a napapano itan na sinsilyo tan kuartan papel.

“Insan bigla ya alugi kami tan say datin maaligwas a panagbilay mi so nagmaliw a mair-irap. Naandi ed sikami so amin likud labat ed abung mi. Likud ni’d satan et sakey ed saray kuyak so naaksidente tan sikato so alupoy. Dinmuma la iray kipapasen. Walay panaon a nanlako ak na saray prutas tan karne. Nanborbor ak met na kapes, ubas, tan alfalfa, tan akila ak a namparanum ed saray daralusan. Ibabaga na arum a totoo a dakel so amtak a trabaho. Mabetbet kamin niligliwa nen nanay ko diad pangibabaga ton walad sikami so katuaan, say espiritual a kayamanan a wala labat ed pigpigara. Kanian naaralan ko so awalaan na daakan tan daiset odino anggapon balot. Natan ta akapanlingkor ak la ed si Jehova a sigpot-panaon diad loob na manga 25 a taon, nibagak ya inagew-agew a naliliknak so gayaga ed pakaamta a pinilik so sankaabigan a dalan na bilay​—say panlingkor ed si Jehova a sigpot-panaon.”

Ipupurek ed sikatayo na Biblia a “say ugali na sayan mundo [et] nanaebas.” Lapud saya, ipapaseseg met na satan ed sikatayo: “Saray manggayaga singa ra agmanggayaga; tan saray manaliw, singa anggapo ed sikara; tan saray managamil ed mundo, agda komon aagamilen ya alabas.”​—1 Corinto 7:29-31.

Natan la sirin so panaon a pangusisa ed paraan na kabibilay yo. No limitado so kaykayarian yo, manalwar sumpad pagmaliw a maimbel, a pirmin manbusol tan mangimon ni ingen. Diad biek a dapag, antokaman so materyal a kaykayarian yo, makabat so pambalanse ed saratan pian ag-iratan mangaripen ed sikayo. Unong ya impaseseg nen apostol Pablo, nepeg a manilalo kayo, ‘aliwan diad saray kayamanan a panduaruwaan, noag dia ed Dios, a sikato so mangiter ed sikatayo ed daakan na saray amin a bengatla a pinabangan tayo.’ No gawaen yo itan, sirin et nibaga yo met a naaral yo so sekreto na panamasarag.​—1 Timoteo 6:17-19.

[Litrato ed pahina 9]

Si Pablo so nankimey a mismo pian sikatoy agmagmaliw a pabelat ed arum

[Saray litrato ed pahina 10]

Nagagamoran na nilibo so liket diad bilay a walaan na ‘maridios a debosyon tekep na panamasarag’