Ontanyareg tan Nengnengen so Panangilaban nen Jehova!

“Ompasen kayo, tan ontanyareg kayo, tan nengnengen yo so panangilaban nen Jehova ed sikayo.”​—2 AWARAN 20:17.

1, 2. Akin a say asingger lan pangataki nen ‘Gog ed dalin na Magog’ so walaan na mas seryoson pansumpalan nen say internasyonal a terorismo?

 SAY terorismo so deneskribe na arum bilang panangataki ed sankamundoan a komunidad, anggan diad sibilisasyon a mismo. On, nepeg a seryosoen so ontan a sesga. Diad biek a dapag, wala so sananey ya iyaataki a walaan na mas seryoson pansumpalan, tan agtanton iimanoen itan na mundo. Anto itan?

² Satan et say pangataki nen ‘Gog ed dalin na Magog,’ a tinukoy na Biblia diad Ezequiel kapitulo 38. Alablabas kasi so pangibaga a sayan pangataki so walaan na mas seryoson pansumpalan nen say sesga na internasyonal a terorismo? Andin balot, lapud say pangataki nen Gog et aliwa lambengat a pangataki ed saray gobierno na totoo. Atakien met na satan so mangatatawen a gobierno na Dios! Anggaman ontan, say Manamalsa so sigpot a makayarin mangarap ed mas mauges a pangataki nen Gog, aliwan singa saray totoo, a walaan lambengat na limitadon itatalona dia ed saray panangataki ed sistema ra.

Iyaataki ed Gobierno na Dios

3. Anto so walan ipapagawa ed saray manuley ed mundo nanlapula’d 1914, tan panon ira a kinmiwas?

³ Tuloytuloy ni so balingaan na manuuley lan Ari a tinuro na Dios tan say marelmeng a sistema nen Satanas manlapu la’d niletneg ed katawenan so Panarian na Dios nen 1914. Diad saman a panaon et pinakabatan iray totoon manuuley a manpasakop ira ed pinili na Dios a Manuley. Balet agda ginawa itan, unong a nipasakbay: “Saray arari dalin impasen da so inkasikara, tan saray manuley mandaragup ira a mansisingbat, na sumpa ed Jehova, tan sumpa ed pinuyokan to, a kuan da, Pultoten tayo so impanaker da, tan ipulisay tayo so saray lubilubir da ed sikatayo.” (Salmo 2:1-3) Say isusumpa ed uley na Panarian so mabitar a mamantok legan na iyataki nen Gog na Magog.

4, 5. Panon a nalabanan na totoo so agnanengneng tan mangatatawen a gobierno na Dios?

⁴ Nayarin panuumamengan tayo no panon a nalabanan na totoo so agnanengneng tan mangatatawen a gobierno. Unong ya ipaparungtal na Biblia, sayan gobierno so tugyopen na “sanlasus apataplo tan apat a libo, a sikara so asaliw dia ed saray taga dalin,” kaiba so ‘Kordero,’ si Kristo Jesus. (Apocalipsis 14:1, 3; Juan 1:29) Lapud mangatatawen itan, say balon gobierno so asaglawi bilang say ‘balon katawenan,’ bangta saray mangaraldalin a sakop na satan et makatunongan a natawag a ‘balon dalin.’ (Isaias 65:17; 2 Pedro 3:13) Maslak ed 144,000 a kaiban manuley nen Kristo so matoor ya akasumpal la ed mangaraldalin a kurso ra. Diad ontan et pinaneknekan da a makanepegan ira a manakbat ed saray balon asainmin na serbisyo ra ed tawen.

⁵ Balet, wala ni so daiset a nakdaan na 144,000 a wadiad dalin. Diad masulok a 15,000,000 ya inmatendi ed selebrasyon na Pangdem na Katawan nen 2002, walay 8,760 labat ya angipatnag  na ilalo ra ed pagmaliw ya apili ed sayan mangatatawen ya asainmin. Siopaman a matangas a mangataki ed nakekeraan iran prospektibon membro na Panarian so diad tua et onsusumpa ed Panarian na Dios.​—Apocalipsis 12:17.

Sumpalen na Ari so Pananalo To

6. Panon so panmoria nen Jehova tan si Kristo ed walan isusumpa ed totoo na Dios?

⁶ Nipasakbay la so ikiwas nen Jehova ed walan isusumpa ed niletneg lan Panarian to: “Saman so manyurong ed katawenan onelek naani: say Katawan balawen to ra naani. Dia ed satan sikato pisalitaan to ra naani ed kaplesan na sanok to, tan punawen to ra ed masakit ya ingongo’to: Anggaman impasen ko la so arik ed tapew na masantos a paludpor ko a Sion.” (Salmo 2:4-6) Diad panangidirehi nen Jehova, sinmabi la so panaon parad si Kristo pian ‘sumpalen to so pananalo to.’ (Apocalipsis 6:2) Panon so panmoria nen Jehova ed walan isusumpa ed totoo to legan na panaon na unor a pangonkesta? Diad tua et nidirekta itan sumpad sikato tan ed manuuley lan Ari to. “Say maniwit ed sikayo diwiten to so bukel na mata to.” (Zacarias 2:8) Tan madanet ya inkuan nen Jesus a say gawaen odino aggawaen na totoo ed saray alanaan ya agagi to et gagawaen da odino agda met gagawaen ed sikato.​—Mateo 25:40, 45.

7. Diad antoran rason a saramay kabiangan na “baleg ya ulop,” ya adeskribe ed Apocalipsis 7:9, so makasagmak na sanok nen Gog?

⁷ Siempre, saramay aktibon onsusuporta ed alanaan a nakdaan so makaeksperiensya ed sanok nen Gog. Sarayan prospektibon membro na ‘balon dalin’ na Dios et say “baleg ya ulop” a tinawag manlapu “ed balang nasyon tan amin na saray kailalakan, tan binaleybaley, tan salita.” (Apocalipsis 7:9) Sikara so tinukoy bilang ‘manal-alagey ed arap na trono, tan ed arap na Kordero, a nankawes ira na kawekawes ya amputi.’ Sikara sirin so walaan na naabobonan a talindeg ed arap na Dios tan si Kristo Jesus. Diad pamebemben da na “palmas ed saray kalimaan da,” dadayewen da si Jehova bilang say matunong a Soberano ed uniberso, a say pakauley to so nibalikas panamegley na panuley na nitronon Ari to, si Jesu-Kristo, ‘say Kordero na Dios.’​—Juan 1:29, 36.

8. Anto so gawaen nen Kristo lapud iyaataki nen Gog, tekep na anton resulta?

⁸ Say panangataki nen Gog so sengegan lay ikiwas na nitronon Ari na Dios a mibakal diad Armagedon. (Apocalipsis 16:14, 16) Saramay agmamidbir ed inkasoberano nen Jehova so managmak na kadederal. Diad biek a dapag, saramay nansungdo ed kairapan lapud katooran da ed Panarian na Dios so makaeksperiensya ed permanentin pakainawaan. Oniay insulat nen apostol Pablo nipaakar ed satan: “[Saya so] sakey a mapatnag a tanda ed kaptekan na panangukom na Dios; pian nayarian yo komon so ibilang a makana ed panariay Dios, a lapu ed sikato manlilikna kayo met: No nayari ya ontan a sikato so sakey a matunong ed Dios so pamales na kaermenan ed saray mameermen ed sikayo. Tan dia ed sikayo ya apaermen mipainawa kayo  ed sikami, sano ompayawar so Katawan tayo a Jesus a manlapu ed tawen ya iba to so saray angheles na pakayari to, a dia ed mandarlang ya apoy. Iter to so panamales ed saray agmikabat ed Dios, tan dia ed saray ag-ontulok ed ebanghelyo na Katawan tayon Jesus.”​—2 Tesalonica 1:5-8.

9, 10. (a) Panon so impangiter nen Jehova ed Juda na pananalo sumpad mabiskeg a kabusol da? (b) Anto so nepeg a mantultuloy a gawaen na saray Kristiano natan?

⁹ Legan na onsabin baleg a kairapan, a mamantok ed Armagedon, si Kristo so mibakal ed amin a mauges. Balet agla nakaukolan a mibakal iray papatumbok to, a singa ed saray manaayam ed duaran-tribun panarian na Juda pigan libon taon lay apalabas. Say bakal so kien nen Jehova, tan sikato so mangiter na pananalo. Oniay nabasa ed kuritan: “Sanen ginmapo ra a mankanta tan mangigalang, si Jehova angipasen na saray sanib sumpa ed saray anak nen Ammon, Moab, tan palandey Seir, a sumpa ed Juda; et sikara so akabil. Ta saray anak nen Ammon tan Moab inmalagey ira sumpa ed saray manaayam ed palandey Seir, pian pateyen tan bagbagen da ra a sigpot: et sanen asumpal da ya inupot so saray manaayam ed Seir, balang sakey, tinmulong a mamagbag ed sananey. Et sanen say Juda sinmabi ed panagtalayapan ya ilang na kalawakan, ninengneng da so karaklan et, nia, sikara so inatey a laman a nipasag ed dalin, tan anggapo so akalimot.”​—2 Awaran 20:22-24.

¹⁰ Eksakto itan unong ya impasakbay nen Jehova: “Agyo nakaukolan so mibakal.” (2 Awaran 20:17) Satan so padron a tumboken na saray Kristiano sano onkiwas lay Jesu-Kristo a ‘manumpal ed pananalo to.’ Kaleganan ni, mantultuloy ira a mibakal ed kaugsan, aliwan diad panamegley na literal iran ayura, noagta diad espiritual. Sikara sirin so mantultuloy a ‘manaeg ed mauges panamegley na maong.’​—Roma 6:13; 12:17-21; 13:12; 2 Corinto 10:3-5.

Siopa so Mangidaulo ed Panangataki nen Gog?

11. (a) Antoran muyongan na totoo so usaren nen Gog pian gawaen to so iyaataki to? (b) Anto so nalalanor ed pagmaliw ya alerto ed espiritual?

¹¹ Si Gog na Magog so abidbir bilang si Satanas a Diablo ed nipaabeban kipapasen to nanlapula’d 1914. Bilang espiritun pinalsa, agto direktan nagawaan so panangataki to, balet ta usaren to iray muyongan na totoo pian nagawa iray getma to. Siopa irayan muyongan na totoo? Anggaporay detalyin iiter ed sikatayo na Biblia, ingen ta mangiiter itan ed sikatayo na pigaran pakabidbiran a makatulong pian nibiig tayo no siopa ira. Legan a nagagawa iray ebento ed mundo bilang kasumpalan na saray propesiya na Biblia, kalkalna tayon nibiig so mas malinew  a litrato. Paliisan na totoo nen Jehova so panagpalbeng balet mansiansia ira ya aliing ed espiritual, a sigpot a mikabat ed mapolitika tan relihyoso iran ebento a mitunosan ed kasumpalan na propesiya na Biblia.

12, 13. Panon ya impasakbay nen propeta Daniel so unor a pangataki ed totoo na Dios?

¹² Si propeta Daniel so angiparungtal na kaaruman ya impormasyon nipaakar ed unor a pangataki ed totoo na Dios, ya oniay insulat to: “[Say ari na amianen] ompaway naani a sisasanok a maong a mamagbag tan mamalis a sigpot ed dakerakel. Et ipaalagey to naani so saray tolda na palasyo to ed nanleetan na dayat tan say maliga a masanto a palandey.”​—Daniel 11:44, 45.

¹³ Diad panaon a nisulat so Biblia, ‘say dayat’ et say Great Sea, odino say Mediterranean, tan say “masanto a palandey” et say Sion, ya oniay imbaga nen Jehova nipaakar ed satan: “Impasen ko la so arik ed tapew na masantos a paludpor ko a Sion.” (Salmo 2:6; Josue 1:4) Kanian, diad espiritual a pantalos, say dalin ed “nanleetan na dayat tan say maliga a masanto a palandey” so mangirerepresenta ed maaligwas ya espiritual a kipapasen na saray alanaan a Kristiano. Agla ra nabidbiran a kabiangan na dayat na katooan a sinmian ed Dios, tan sikara so maniilalo ed piuley ed si Kristo Jesus diad mangatatawen a Panarian. Malinew, saray alanaan a lingkor na Dios, kaiba iray matoor a kakaiba ra a baleg ya ulop, so magmaliw a puntirya na ari na amianen sano igapo to la so mauges a pangataki to bilang kasumpalan na propesiya nen Daniel.​—Isaias 57:20; Hebreos 12:22; Apocalipsis 14:1.

Panon so Ikiwas na Saray Lingkor na Dios?

14. Anton taloran bengatla so gawaen na totoo na Dios sano naataki ira?

¹⁴ Anto so nailaloan a gawaen na saray lingkor na Dios bektaman a naaataki la ra? Padron lamet ed sikara so inkiwas na nasyon na Dios ed panaon nen Josafat. Imanoen a saray ombaley na satan so niganggan a manggawa na taloran bengatla: (1) ompasen ira, (2) ontanyareg ira, tan (3) nengnengen da so panangilaban nen Jehova. Panon so ikiwas na totoo na Dios natan mitunosan ed sarayan salita?​—2 Awaran 20:17.

15. Anto so labay ya ibaga na ompasen so totoo nen Jehova?

¹⁵ Ompasen ira: Ag-ira natenyeg, mantultuloy so totoo na Dios a mansiansia ed talindeg da bilang aktibon mananuporta ed Panarian na Dios. Mantultuloy ira a mansiansia ed talindeg da bilang neutral a Kristiano. Sikara so ‘mansiansia a malet, agnagiing’ ed matoor a panlilingkor da ed si Jehova tan ed mapublikon panangidayew da ed sikato lapud maaron-kaabigan to. (1 Corinto 15:58; Salmo 118:28, 29) Agnatenyeg na antokaman a pakadesdesan natan odino ed arapen so pansiasiansia ra ed sayan aabobonan na Dios a talindeg da.

16. Diad antoran pamaakaran ya ontanyareg iray lingkor nen Jehova?

¹⁶ Ontanyareg: Agsalien na saray lingkor nen Jehova ya iliktar so inkasikara balet ta sigpot ira a manmatalek ed sikato. Sikato labat so makapangiliktar ed saray lingkor to manlapud saray gulo ed mundo, tan insipan to a gawaen to itan. (Isaias 43:10, 11; 54:15; Tagleey 3:26) Say panmatalek ed si Jehova so mangilaktip ed panmatalek ed kaplesan a nanengneng a paralanan a mabitar ton uusaren diad loob na dakel lan dekada pian sumpalen iray gagala to. Nagkalalo ni nen say nensaman, saray tuan Kristiano so nakaukolan a manmatalek ed saray mangidadaulon kapara ran managdayew a tinuro nen Jehova tan say manuuley lan Ari to. Sarayan matoor a lalaki so mangiwanwan ed totoo na Dios. Say pangibaliwala ed panangidirehi ra  so mansumpal ed desyang.​—Mateo 24:45-47; Hebreos 13:7, 17.

17. Akin a nanengneng na saray matoor a lingkor na Dios so panangilaban nen Jehova?

¹⁷ Nengnengen so panangilaban nen Jehova: Say panangilaban so tumang ed amin na saramay mamebemben ed matoor a talindeg da bilang Kristiano tan manmamatalek ed panangiliktar nen Jehova. Anggad unor lan pankanawnawa​—tan diad anggaay nayarian da​—iyabawag da so isabi na agew na panangukom nen Jehova. Nepeg a naamtaan na amin a pinalsa a si Jehova so tuan Dios tan sikatoy walaan na saray matoor a lingkor diad dalin. Aglan balot nakaukolan so pamarukey ni ed isyu a nipaakar ed inkakanepegan na inkasoberano nen Jehova.​—Ezequiel 33:33; 36:23.

18, 19. (a) Panon a say kanta na impanbiktorya ed Exodo kapitulo 15 so mangipatnag ed saray liknaan na saramay makaliktar ed panangataki nen Gog? (b) Anto so matukoy a gawaen na totoo na Dios natan?

¹⁸ Tekep na apasimbalon biskeg, say totoo na Dios so onloob ed balon mundo, a magunaet a manganta ed kansion na panbiktorya, a singa ed ginawa na saray Israelita nensaman kayari na inkiliktar da diad Ambalangan Dayat. Lapud magnayon a pisasalamat da ed si Jehova diad impanalimbeng to ed sikara, bilang indibidual tan grupo, iyaniweng da iray salita nensaman: “Kantaan ko si Jehova, ta analo a magloria. . . . Say Dios sikato so mibabakal: Jehova so ngaran to. . . . Say limam a kawanan, O Dios, binuyak to so kabusol. Tan say kinabalgan na katagyan mo, bagbagen mo so saray oningal ya onsumpa ed sika; ipawit mo so sanok mo a mangupot ed sikara a singa nansipsipan na dayami. . . . Sika dia ed panangabagey mo imbasbas mo so saray katooan a dinondon mo: dia ed biskeg mo indalan mo ra ya angga ed ayaman mo a masantos. . . . Iloob mo ra naani, et itane’mo ra naani ed palandey ya ipatawir mo, dia ed pasen, O Jehova ginawam ya onkana ed sika a panayaman, dia ed santuaryo, O Katawan, ya impaalagey na saray limam. Si Jehova man-ari ed ando lan ando.”​—Exodo 15:1-19.

¹⁹ Natan ta lalon mapatnag la so iilaloan ya andi-anggaan a bilay, agaylan abig sirin a pankanawnawa pian ipatnag na saray lingkor na Dios so debosyon da ed si Jehova tan pasimbaloen da so determinasyon dan manlingkor ed sikato bilang say andi-anggaan ya Ari ra!​—1 Awaran 29:11-13.

Kasin Nipaliwawa Yo?

• Akin a say pangataki nen Gog so nipaarap sumpad saray alanaan tan ed arum a karnero?

• Panon ya ompasen iray totoo na Dios?

• Anto so kabaliksan na itanyareg?

• Panon a nanengneng na totoo na Dios so panangilaban nen Jehova?

[Tepetepet Parad Panagaral]

 [Litrato ed pahina 18]

Inter nen Jehova ed si Josafat tan saray totoo to so impanbiktorya, ya agla nakaukolan balet a milaban ni ira

[Litrato ed pahina 20]

Saniba iray alanaan tan say arum a karnero diad panangitandoro ed inkasoberano nen Jehova

[Litrato ed pahina 22]

Singa saray Israelita nensaman, say totoo na Dios so magano lan mangansion ed kanta na panbiktorya