Panangiter a Makapaliket ed Dios

SI Jesus tan saray babangatan to so peles a mamangan na mananam a tagano diad Betania kaiba iray pigaran maapit a kakaaro to, a pati si Maria, Marta, tan say agano nin pinaoli’d bilay a si Lazaro. Sanen angala si Maria na sakey a libra na mablin larak tan impuyok to ed saray sali nen Jesus, si Judas Iscariote so sinmanok tan nansalita. “Akin et ag-inlako so sayan unguento ed talonlasus a denarios [mipetekan ed ngalngali sakey taon a sueldo], tan inter ed saray duruka?” so insuppiat to. Saray arum so tampol met a nanreklamo.​—Juan 12:1-6; Marcos 14:3-5.

Balet, oniay ebat nen Jesus: “Paulyan yon bukor. . . . Ta saray duruka wala ra ed sikayo lawas, tan bangno kaliktan yo nayarian yo so manggawa ed sikara na maong: balet siak andi ak ed sikayo lawas.” (Marcos 14:6-9) Imbangat na saray Judio a lider na relihyon a say panag-abuloy et aliwa lambengat a maptek noagta nasakbongan ni ingen na satan iray kasalanan. Diad biek a dapag, impaliwawa nen Jesus a say panangiter a makapaliket ed Dios et aliwan diad pangiter lambengat na saray regalo ed saray duruka.

Say antikey a pangonsidera ed paraan na panangiter na inmunan Kristianon kongregasyon so mangipabitar ed pigaran praktikal a paraan a nipanengneng tayo so panangiyansakit tayo pian diad ontan et napaliket so Dios ed panangiter tayo. Ipabitar met na satan so espesipikon klase na panangiter a makagunggonan maong.

“Mangiter na Saray Langkap na Panangasi”

Diad aminpigan inkagawa, pinaseseg nen Jesus iray babangatan to a “mangiter na saray langkap na panangasi,” unong ed New World Translation, odino “mamayabol,” unong ed arum a patalos ed sayan balikas. (Lucas 12:33) Balet, amasakbay si Jesus sumpad panagparayag a mangidayew ed angiter imbes a say Dios. “Kanian sano mamayabol ka,” kuan to, “agmo papaknolen so trumpeta ed arap mo, a singa gawaen daray mansimpisimpitan dia ed saray sinagogas tan dia ed saray pulpulong, pian sikara so idayew na saray totoo.” (Mateo 6:1-4) Inyaplika na saray inmunan Kristiano iyan simbawa diad agda impangalig ed inkapangta na saray debotadon lider na relihyon nen panaon da, tan tinulongan da iray mankaukolan panamegley na personal iran serbisyo ra odino agmaparayag ya impanregalo ra.

Alimbawa, diad Lucas 8:1-3 et naamtaan tayo a si Maria Magdalena, Juana, Susana, tan saray arum ni so angusar ed “saray kayamanan da”  diad agpankukunwari a panagserbi ed si Jesus tan ed saray apostol to. Anggaman aliwan duruka irayan lalaki, intalirak da iray anapan da pian niyapasakey daray sagpot da diad ministeryo. (Mateo 4:18-22; Lucas 5:27, 28) Diad impanulong da ed sikaran manumpal ed inter na Dios a kimey da, sarayan bibii so nibagan angigloria ed Dios. Tan impatnag na Dios so panangabobon to diad impangirekord ed mapangasin inkamabunlok da diad Biblia pian nabasa na saray amin a kailalakan ed arapen.​—Uliran 19:17; Hebreos 6:10.

Si Dorcas so sakey nin matulong a bii a “napno na saray maong a gawa tan payabol a ginagawa to.” Sikato so nanggagawa na kawekawes parad saray pobrin balo diad baybay a baley na Joppe. Agtayo amta no gastos ton amin so materyales odino indaitan to lambengat ira. Anggaman ontan, lapud maabig a kimey to et sikatoy pinabpabli na saramay atulongan to, ontan met na Dios, a sipapangasin anumang ed kaabigan to.​—Gawa 9:36-41.

Makana so Dugan Motibo

Anto so amakiwas ed sarayan indibidual a mangiter? Aliwan say basta pabiglabiglan panangasi ya apakiwas lapud panangabagey ed onkekerew na tulong. Amoria ra a responsabilidad da so panggawa na nayarian da ed inagew-agew pian tulongan iramay manasagmak na inkaduka, irap, sakit, odino arum nin kairapan. (Uliran 3:27, 28; Santiago 2:15, 16) Saya so klase na panangiter a makapaliket ed Dios. Satan so manunan papakiwasen na aralem a panangaro ed Dios tan say pilalek ya aligen so mapangasi tan mabunlok a personalidad to.​—Mateo 5:44, 45; Santiago 1:17.

Impabitar nen apostol Juan iyan makanan aspekto na panangiter sanen intepet to: “Say walaan na kayamanan to ed sayan mundo, tan nanengneng to so agi to a naukolan, et kapotan to so panangasi to, panon so pansiansia na aroy Dios ed sikato?” (1 Juan 3:17) Mabitar so ebat. Say panangaro ed Dios so mamapakiwas ed totoo a magmaliw a matulong. Papablien tan tutumangan na Dios iramay mabunlok, a singa sikato. (Uliran 22:9; 2 Corinto 9:6-11) Kasin nanenengneng tayo iyan klase na inkamabunlok natan? Imanoen pa so agano nin agawa diad sakey a kongregasyon na saray Tasi nen Jehova.

Say abung na sakey ya akulaw a Kristiano so kaukolan lan apigeren. Sikatoy manbubukbukor tan anggapoy pamilya to a makatulong ed sikato. Diad loob na dakel a taon, say abung to so lawas lukas parad saray Kristianon panmimiting, tan mabetbet ton ilaeman na panangan iramay mangawat ed imbitasyon to. (Gawa 16:14, 15, 40) Diad impakaimano ra ed situasyon to, kinmiwas iray membro na kongregasyon pian ontulong. Arum so nandonasyon na kuarta, bangta saray arum so nankimey. Diad loob na pigaran sampot-simba, sinalatan na saray boluntaryo so atep, pinasimbalo ra so banyo, pinalitadaan tan pinintaan da so interon leksab, tan angikabit ira na balon estante diad kusina. Say impangiter day tulong so aglambengat amenek ed pankaukolan na bii  noagta inmapit ed sakey tan sakey so kongregasyon tan pandinayewan na kakaabay so ehemplo na tuan Kristianon panangiter.

Dakerakel iray paraan a natulongan tayon mismo iray arum. Kasin makapangigana itayo na panaon parad ulilan ugaw a laki o bii? Kasin nayarian tayon itindaanan odino idaitan so kabat tayo a matatken lan balo? Kasin nayarian tayon ilutoan odino tulongan ed pinansyal so sakey a mairap-bilay? Agkaukolan a magmaliw itayon mayaman pian makatulong. Oniay insulat nen apostol Pablo: “No wadtan so kasiglatay linawa, naawat so unong na wala ed sakey a too, aliwa ya unong na anggapo ed sikato.” (2 Corinto 8:12) Balet, kasin say onian personal tan direktan panangiter so mogmon paraan na panangiter a bendisyonan na Dios? Andi.

Komusta so Naorganisa a Pananulong?

No maminsan et agmagenap iray personal a sagpot. Diad tua, si Jesus tan saray babangatan to so angibiig na pundo parad saray mairap-bilay, tan inawat da iray kontribusyon manlapud saray mangiyaansakit a totoo ya akatongtong da diad kimey da. (Juan 12:6; 13:29) Ontan met, saray inmunan siglon kongregasyon so nannanagnag sanen linmesa so pankaukolan tan angorganisa ira na malaknab a pananulong.​—Gawa 2:44, 45; 6:1-3; 1 Timoteo 5:9, 10.

Agawa so ontan nen ngalngali 55 K.P. Saray kongregasyon ed Judea so nanirap a maong, nayarin lapud kasumsumpal ni labat na gawat ed kawalaan da. (Gawa 11:27-30) Lapud lawas interesado si apostol Pablo ed saray mairap bilay, sikatoy kinmerew na tulong ed saray kongregasyon anggan diad arawin Macedonia. Sikaton mismo so anguksoy ed koleksion tan angibaki ed saray naaprobaan a lalaki a mangitulor ed satan. (1 Corinto 16:1-4; Galacia 2:10) Sikato tan saray arum a nalalanor so ag-impaupaan ed serbisyo ra.​—2 Corinto 8:20, 21.

Saray Tasi nen Jehova met natan so maples ya ontutulong sano walay nagawan kalamidad. Singa bilang, nen tiagew na 2001, pirmin adelap so Houston, Texas, U.S.A. makasengeg ed maksil iran bagyo. Ami-amin et walay 723 ya ageray a kaabungan na saray Tasi, a kaslakan et pirmin aderal. Tampol ya inletneg so komite a tugyopen na saray kualipikadon Kristianon mamatatken pian nadetermina iray pankaukolan na indibidual tan nibunog iray pundo ya ontulong ed saray Tasi ed satan a lugar diad ontan et naasikaso so situasyon tan naapiger so kaabungan da. Saray mabulos a boluntaryo a nanlapud asingger iran kongregasyon so nanggawa ed amin a kimey. Sakey a Tasi so misalsalamat a tuloy ed tulong kanian sanen naawat to so insurance to ya onsalipotpot ed pangapiger na abung to, tampol ton indonasyon so kuarta ed pundo pian saray arum a mankaukolan et natulongan.

Balet, no nipaakar ed saray charity, kaukolan tayoy manalwar legan ya uusisaen tayo so dakel a kerew ed sikatayo. Walaray charity a dagdaiset  lambengat so nakekeraan ed akolektan kuarta parad satan a gagala lapud nisuesueldo ed saray empleyado odino nagagastos ed patalastas so kaslakan a kuarta. Oniay inkuan na Uliran 14:15: “Say karaklan manisia ed balang salita; balet say masimpit a too nengnengen to a maong so laen to.” Kanian makabat so pangusisa a maong ed saray detalye.

Panangiter a Makagunggonan Maong

Walay klase na panangiter a nagkalalon importante nen say panag-abuloy. Tinukoy iya nen Jesus sanen tinepetan na sakey a mayaman a malangwer nin manuley no anto so kaukolan ton gawaen pian nagamoran to so andi-anggaan a bilay. Oniay inkuan nen Jesus ed sikato: “Laka, ilakom so walad sika, tan iter mo’d saray duruka, et wala naani kayamanan mo ed tawen; et gala, tumbok mo ak.” (Mateo 9:16-22) Imanoen ya aglambengat inkuan nen Jesus, ‘Mangiter ka ed saray duruka et nawalaan ka na bilay.’ Imbes, inyarum to, “Gala, tumbok mo ak.” Diad arum a panangibaga, anggaman nakomendaan tan makagunggona iray gawa a pananulong, nagkalalo ni so nalalanor ed pagmaliw a Kristianon babangatan.

Si Jesus et manunan interesado diad panulong ed arum ed espiritual a paraan. Ag-abayag antis na ipapatey to, oniay inkuan to ed si Pilato: “Nisengeg ed saya nianak ak tan nisengeg ed saya linma ak dia ed mundo, pian tasian ko so katuaan.” (Juan 18:37) Anggaman indaulo to so panulong ed saray mairap-bilay, pamaabig ed mansasakit, tan pamakan ed narasan, manunan impasal nen Jesus iray babangatan to a manpulong. (Mateo 10:7, 8) Diad tua, sakey ed saray unor a bilin to ed sikara so ganggan ya: “Onla kayo sirin, tan manggawa kayo na saray babangatan ed amin a nasyones.”​—Mateo 28:19, 20.

Siempre, agnasolbar na panagpulong so amin a problema ed mundo. Balet, say pananginabang na maong a balita na Panarian na Dios ed amin a klase na totoo so mangiglogloria ed Dios lapud susumpalen na panagpulong so linawa na Dios tan ilulukas na satan so dalan parad magnayon a pakagunggonaan na saraman so mangawat ed mensahe na Dios. (Juan 17:3; 1 Timoteo 2:3, 4) Akin ya ag-ontalineng ed ibaga na saray Tasi nen Jehova diad ontumbok ya idalaw da ed sikayo? Tarok da so espiritual a langkap. Tan kabat da a saya so sankaabigan a paraan a makapangiter ira ed sikayo.

[Saray litrato ed pahina 6]

Dakel so paraan pian nipanengneng a mangiyaansakit itayo

[Litrato ed pahina 7]

Say panginanabang tayo ed maong a balita so mamapaliket ed Dios tan mangilulukas ed dalan parad magnayon a pakagunggonaan