Tepetepet Manlapud Saray Managbasa

Kasin mauges so pamatey ed mansasakit la odino matatken lan maong a komponin ayep?

Ipapasen na maslak a totoo iray nanduruman ayayep bilang makapainteres tan makapaliket. Arum a maamon ayayep so maong a kaulop bilang komponin ayayep. Alimbawa, kabkabat iray aso bilang matulotulok tan walaan na liknaan ed saray amo ra. Kanian natalosan a walaan met na liknaan so totoo ed komponin ayep, nagkalalo la no pigay taon da lan kokomponien so ayep.

Balet, aliwan andukey so bilay na maslak a komponin ayayep. Saray aso so nayarin manbilay ed loob na 10 anggad 15 a taon odino onsulok ni, a singa met ed saray pusa, depende ed klase. No matatken la, saray komponin ayayep so nayarin mansakit odino nawalaan na deperensya a makapaaburido ed saray amo ra, a makakanonot ed datin inkakitsing na sarayan ayayep. Kasin mauges so pamatunda la ed paniirap na ontan iran ayayep, tan panampoten la so bilay da?

Labay na sakey a Kristiano so onkiwas a mitunosan ed linawa na Dios sano mideneng ed saray ayayep. Seguradon sumlang ed linawa na Dios so maruksan panagtrato ed saratan, lapud ibabaga na Salita to: “Say maptek a too pablien to so bilay na ayep to.” (Uliran 12:10) Balet, agkabaliksan na saya a parehoy panmoria na Dios ed ayayep tan saray totoo. Sanen pinalsa na Dios so totoo, impanengneng to a wala so malinew a pidumaan da ed ayayep. Alimbawa, inikdan to so totoo na ilalon andi-anggaan a bilay, balet agto innatnat iyan ilalo ed saray ayayep. (Roma 6:23; 2 Pedro 2:12) Bilang Manamalsa, sikatoy walaan na kanepegan a mangidesigna ed dugan siglaotan na totoo tan ayayep.

Ibabaga ed sikatayo na Genesis 1:28 no anto itan a siglaotan. Inkuan na Dios ed inmunan totoo: “Niiter ed sikayo so pakauley ed saray sirasira na dayat, tan pakauley ed saray manok ya atap ed saray tawen, tan amin a bengatla a mabilay ya onggalaw dia ed dalin.” Mipadpara, ibabaga na Salmo 8:6-8: “Sika [Dios] inyan moy amin a bengabengatla ed silong na salisali to [too]: Amin a karkarnero tan bakbaka, on, tan saray ayayep ed lawak, saray kamanokan ed tagey tan saray sira ed dayat.”

Impalinew na Dios a saray ayayep so nayarin usaren tan pateyen na too ed dugan paraan. Singa bilang, saray katat na saratan so nayarin usaren a kawekawes. Inabuloyan met na Dios so too a mangan na karne na ayayep kayari na Delap ed panaon nen Noe, bilang kasandi na taganon pisipising a niiter ed sikara ed inmuna.​—Genesis 3:21; 4:4; 9:3.

Ag-aabuloyan na saya so ginagalan pamatey ed saray ayayep parad isport. Diad Genesis 10:9 unong ed New World Translation, dedeskribien na Biblia si Nimrod bilang “mabiskeg ya umaanop.” Balet ibabaga na parehon bersikulo a saya so sengeg na impagmaliw ton “sumpa ed si Jehova.”

Kanian, anggaman walay pakauley na too ed saray ayayep, agto nepeg ya abusoen itan ya autoridad noagta usaren to itan a mitunosan ed saray prinsipyo na Salitay Dios. Nayarin laktipen na saya so agpangiyabuloy ed komponin ayep a manirap lapud matatken la, graben asugatan, odino mansasakit a sengeg na ipatey to la. Diad ontan a kaso, responsabilidad na Kristiano so pandeside no antoy gawaen. No desidien to a magmaong lan ag-abuloyan so komponin ayep a mantultuloy nin manirap ya anggapo lay ilalon onabig ni, diad ontan et nayarin pilien to a panampoten lay bilay na satan.