Propesiya nen Isaias​—Liwawa Parad Amin a Katooan II

Kapitulo Beinte Dos

Binmulaslas so Inkatunong Diad Sion

Isaias 61:1-11

1, 2. Anton pananguman so agawa ed Israel, tan siopa so makapanggawa ed satan?

 IYABAWAG so kawayangan! Denesidi nen Jehova ya ibulos so totoo to tan ipawil ira ed dalin na inmuunan atateng da. Singa say bini a tinmubo kayari na makaparepreskon uran, say tuan panagdayew so napatnagan lamet. Sano onsabi itan a panaon, say inkadismaya so nasalatan na magayagan panangidayew, tan saray kauloan a datin napno na saray dapol na panagogol so nabalangetan na panangabobon na Dios.

² Siopa so makapanggawa ed satan ya alay abig a panamasimbalo? Si Jehova lambengat so makagawa ed satan a bengatla. (Salmo 9:19, 20; Isaias 40:25) Oniay mapropetikon ingganggan nen propeta Sofonias: “Mankanta ka, O anak a bii na Sion; oneyag ka, O Israel; manliket ka tan manggayaga ka ed simoon a puso, O anak na bii na Jerusalem. Si Jehova inekal to so saray pangukom mo.” (Sofonias 3:14, 15) Agaylan liket itan a panaon! Sanen tinipon nen Jehova so nipawil a nakdaan manlapud Babilonia nen 537 K.K.P., singa iman kugkugip a tinmua.​—Salmo 126:1.

3. Antoray kasumpalan na mapropetikon salita ed Isaias kapitulo 61?

³ Nipasakbay itan a panangipawil diad Isaias kapitulo 61. Balet, anggaman satan a propesiya so malinew ya asumpal nen 537 K.K.P., asumpal itan ed malaklaknab a detalye diad saginonor a panaon. Say mas detalyadon kasumpalan so mangilalanor ed si Jesus tan ed saray patumbok to nen inmunan siglo tan ed totoo nen Jehova diad modernon panaon. Agaylan makabkabaliksan, sirin, iratan ya apuyanan a salita!

‘Say Taon na Abig-linawa’

4. Siopa so niganggan a mangiyabawag ed maong a balita ed inmunan kasumpalan na Isaias 61:1, tan siopa ed komadua?

⁴ Insulat nen Isaias: “Say espiritu nen Katawan a Jehova wala ed siak; ta si Jehova nilanaan to ak a mangipulong na saray maong a balita ed saray mauyamo imbaki to ak a mamedber ed puso a maermen, a mangiyabawag na kawayangan ed saray dinakep, tan say kilukas na panangipangawan ed saray pinangaw.” (Isaias 61:1) Siopa so niganggan a mangiyabawag ed maong a balita? Nayarin diad primeron pankanawnawa et si Isaias, a pinuyanan na Dios a mangikurit ed maong a balita parad saray akautibo ed Babilonia. Balet, impabitar nen Jesus so sankaimportantian a kasumpalan sanen inyaplika to ed inkasikato iray salita nen Isaias. (Lucas 4:16-21) On, nibaki si Jesus a mangiyabawag na maong a balita ed saray mauyamo, tan diad satan a gagala et sikatoy alanaan na masanton espiritu sanen sikatoy abautismoan.​—Mateo 3:16, 17.

5. Siopa so mangipupulong na maong a balita diad loob la na ngalngali 2,000 a taon?

⁵ Niarum ni, imbangat nen Jesus iray patumbok to a magmaliw ya ebanghelisador, odino manangipulong na maong a balita. Nen Pentecostes 33 K.P., manga 120 ed sikara so alanaan na masanton espiritu tan nagmaliw ya espiritual ya ananak na Dios. (Gawa 2:1-4, 14-42; Roma 8:14-16) Sikara met so niganggan a mangiyabawag na maong a balita ed saray mauyamo tan maneermen. Saratan a 120 so primero ed 144,000 ya alanaan ed ontan a paraan. Saray nakekeraan ed satan a grupo so siansia nin aktibo ed dalin natan. Kanian, diad loob la na ngalngali 2,000 a taon, saray alanaan a patumbok nen Jesus so mangipupulong ed “pampataoli ed Dios, tan say pananisia ed Katawan tayo a Jesu-Kristo.”​—Gawa 20:21.

6. Siopa so nainawaan lapud impakadngel da ed maong a balita a nipulong nensaman a panaon, tan komusta met natan?

⁶ Say apuyanan a mensahe nen Isaias so angitarok na pakainawaan ed saray magbabawin Judio diad Babilonia. Diad panaon nen Jesus tan saray babangatan to, angitarok itan na pakainawaan ed saray Judio a naeermenan lapud karelmengan ed Israel tan pakaskasi la lapud inkakautibo ra ed saray palson relihyoson tradisyon na inmunan-siglon Judaismo. (Mateo 15:3-6) Minilyon natan ya atekmelan na saray paganon kustombre na Kakristianoan tan saray tradisyon a mamapabanday ed Dios so “mansibek tan manakis” lapud makapagulgula iran bengatla a gagawaen ed satan a relihyoson sistema. (Ezequiel 9:4) Saramay onkiwas  ed maong a balita so nibubulos manlapud satan a pakaskasin kipapasen. (Mateo 9:35-38) Alukasan so mata na pakatalos da sanen naaralan dan dayewen si Jehova “ed espiritu tan katuaan.”​—Juan 4:24.

7, 8. (a) Anto so duaran ‘taon na abig-linawa’? (b) Anto iray ‘agew na panangibales’ nen Jehova?

⁷ Wala so panag-orasan parad panangipulong na maong a balita. Niganggan si Jesus tan saray patumbok to: “Mangibawag na taon na pamalangkap [“abig-linawa,” NW] nen Jehova, tan say agew na kababales na Dios tayo; a manligliwa ed amin a managogol.” (Isaias 61:2) Say sakey a taon et andukey a panaon, balet satan so walaan na gapoan tan anggaan. Say ‘taon na abig-linawa’ nen Jehova so peryodo na pangiiter toy pankanawnawa ed saray mauyamo ya onkiwas ed iyaabawag ton kawayangan.

⁸ Nen inmunan siglo, say taon na abig-linawa parad Judion nasyon so ginmapo nen 29 K.P. sanen inggapo nen Jesus so mangaraldalin a ministeryo to. Inkuan to ed saray Judio: “Mansibkel kayo; ta asingger la so panariay tawen.” (Mateo 4:17) Satan a taon na abig-linawa so binmayag anggad ‘agew na panangibales’ nen Jehova, ya amantok nen 70 K.P. sanen inabuloyan nen Jehova a deralen na saray armada na Roma so Jerusalem tan say templo na satan. (Mateo 24:3-22) Sikatayo natan so manbibilay ed sananey nin taon na abig-linawa, a ginmapo sanen niletneg so Panarian na Dios ed katawenan nen 1914. Sayan taon na abig-linawa so mansampot ed sakey ni tan mas malaklaknab ya agew na panangibales sano deralen la nen Jehova iyan interon sistema na bengabengatla na mundo diad ‘baleg a kairapan.’​—Mateo 24:21.

9. Siopara natan so nagunggonaan ed taon na abig-linawa nen Jehova?

⁹ Siopara natan so nagunggonaan ed taon na abig-linawa na Dios? Saramay mangawat ed mensahe, mangipatnag na kauyamoan, tan maseseg a manuporta ed panangiyabawag ed Panarian na Dios diad ‘amin a nasyones.’ (Marcos 13:10) Namoria na saratan a say maong a balita et mangitarok na tuan ligliwa. Balet, saramay mangipulisay ed mensahe, agmanganamot ed taon na abig-linawa nen Jehova, so magano lan managmak ed aktual a nagawa diad agew na panangibales to.​—2 Tesalonica 1:6-9.

Say Espiritual a Bunga a Mangigloria ed Dios

10. Panon a naapektaan iray Judion pinmawil manlapud Babilonia ed matalonggaring a ginawa nen Jehova nisesengeg ed sikara?

¹⁰ Amoria na saray Judio a pinmawil manlapud Babilonia a walay matalonggaring a ginawa nen Jehova nisesengeg ed sikara. Say paneermen da bilang akautibo so nagmaliw a liket tan panangidayew lapud nibulos ira a siansia. Kanian, sinumpal nen Isaias so mapropetikon niganggan ed sikato, salanti, “mangigeter ed Sion ed saray managogol, pian ikdan to ra na balanget ed pasen na dapol, say larak na liket ed pasen na agogol, say kawes na galang ed pasen na espiritu na ermen; pian natawag ira komon a kiekiew [“angkakabaleg a kakiewan,” NW] na inkatunong, say tanamanan nen Jehova, pian sikato so napagayaga.”​—Isaias 61:3.

11. Siopa nen inmunan siglo so walaan na maabig a rason pian idayew si Jehova lapud matalonggaring a ginawa to?

¹¹ Nen inmunan siglo, saray Judio a nibulos ed panangaripen na palson relihyon so angidayew met ed Dios lapud matalonggaring a ginawa to parad sikara. Say naeermenan ya espiritu ra so asalatan na “kawes na galang” sanen niliktar ira manlapud impagmaliw dan nasyon ya inatey ed espiritual. Satan a pananguman so naeksperiensya ya inmuna na saray babangatan nen Jesus sanen say paneermen da ed impatey to so nagmaliw a panliket lapud inkalanaan da na masanton espiritu panamegley na apaolin Katawan da. Agnambayag kayari na satan, mipadparan pananguman so naeksperiensya na 3,000 a mauyamon totoo a kinmiwas ed panagpulong na saramay balon alanaan a Kristiano tan abautismoan ira nen Pentecostes 33 K.P. (Gawa 2:41) Agaylan abig so pagmaliw a matalek ed pakagamor na bendisyon nen Jehova! Imbes a ‘panagogolan da so Sion,’ naawat da so masanton espiritu tan arepreskoan ira ed “larak na liket,” a mangisisimbolo ed liket na saramay mapalabon benendisyonan nen Jehova.​—Hebreos 1:9.

12, 13. (a) Siopa iray ‘angkakabaleg a kakiewan na inkatunong’ ed limog na saray pinmawil a Judio nen 537 K.K.P.? (b) Siopa iray nagmaliw ya ‘angkakabaleg a kakiewan na inkatunong’ manlapu la’d Pentecostes 33 K.P.?

¹² Benendisyonan nen Jehova so totoo to tekep na ‘angkakabaleg a kakiewan na inkatunong.’ Siopa irayan angkakabaleg a kakiewan? Diad saray taon kayari na 537 K.K.P., saramay indibidual a nanaral tan nandalepdep ed Salitay Dios tan amayubo ed matunong iran estandarte nen Jehova. (Salmo 1:1-3; Isaias 44:2-4; Jeremias 17:7, 8) Saray lalaki a singa si Esdras, Aggeo, Zacarias, tan say Atagey a Saserdote a si Josue so apaneknekan a matalonggaring ya “angkakabaleg a kakiewan”​—saray mangitatalindeg ed katuaan tan sumpad espiritual a polusyon ed nasyon da.

¹³ Manlapud Pentecostes 33 K.P. a manpatuloy, intanem na Dios so mipadparan ‘angkakabaleg a kakiewan na inkatunong’​—saray makpel ya alanaan a Kristiano​—diad espiritual a kipapasen na balon nasyon to, ‘say Israel na Dios.’ (Galacia 6:16) Diad loob na saray siglo, sarayan “kakiewan” so manbilang na 144,000, a  mamapawala na matunong a bunga pian mamarakep odino mangitarok na gloria ed si Jehova a Dios. (Apocalipsis 14:3) Say nakekeraan ed sarayan angkakabaleg a “kakiewan” so sinmalompapak ed inlabas na saray taon manlapu la’d 1919, sanen binilay lamet nen Jehova iray nakekeraan na Israel na Dios manlapud temporaryon kipapasen na impagmaliw dan inaktibo. Diad impangitarya to ed sikara na daakan a suplay na espiritual a danum, amawala si Jehova na singa katakelan na matunong tan manbubungan kakiewan.​—Isaias 27:6.

14, 15. Antoran proyekto so ginawa na saray nibulos a managdayew ed si Jehova nen (a) 537 K.K.P.? (b) 33 K.P.? (c) 1919?

¹⁴ Diad impangipabitar to ed kimey na sarayan “kakiewan,” oniay intuloy nen Isaias: “Sikara ipaalagey da naani so saray daan ya abagbag, paalageyen da naani so saray inmuna a nagnagba, tan sikara apigden da naani so saray agaygay a syudad, say inkabagbag na saray dakel a kailalakan.” (Isaias 61:4) Diad ganggan nen Arin Ciro na Persia, saray matoor a Judio a pinmawil manlapud Babilonia so angipaalagey lamet ed Jerusalem tan say templo to, ya ataynan a nankibalatar diad abayag a panaon. Saray proyekto ed panangipawil lamet so mananda met ed saray taon kayari na 33 K.P. tan 1919.

¹⁵ Nen 33 K.P., saray babangatan nen Jesus so nanermen a maong ed inkaaresto, inkausay, tan impatey to. (Mateo 26:31) Balet, anguman so panmoria ra sanen sikatoy inmapireng ed sikara kayari na inkioli to. Tan sanen niyibung ed sikara so masanton espiritu, nagmaliw iran okupado ed kimey a panangipulong ed maong a balita, dia “ed Jerusalem, tan ed amin a Judea tan Samaria, tan angga ed kasampotan na dalin.” (Gawa 1:8) Kanian sikara so ginmapon angipawil ed tuan panagdayew. Diad ontan met a paraan, manlapud 1919 a manpatuloy, pinakiwas nen Jesu-Kristo iray nakdaan na saray alanaan ya agagi to a mangipaalagey lamet ed ‘saray pasen ya abagbag ed loob na dakel lan kailalakan.’ Diad loob na saray siglo et agninabang na klero na Kakristianoan so pikakabat nen Jehova, a sinalatan da itan na saray ginaway-toon tradisyon tan agmakasulatan iran doktrina. Nilinisan na saray alanaan a Kristiano iray kongregasyon da manlapud saray agamil ya amatikan na palson relihyon ta pian ombulaslas so kipawil na tuan panagdayew. Tan ginapoan da so apaneknekan lan sankabalegan a kampanya na panagpulong a naimatonan na mundo ed kapiganman.​—Marcos 13:10.

16. Siopa so ontutulong ed saray alanaan a Kristiano diad panangipawil a kimey da, tan antoran kimey so nimatalek ed sikara?

¹⁶ Saya so abalbaleg a kimey. Panon a nagawaan na dagdaiset laran nakekeraan na Israel na Dios so ontan a kimey? Pinuyanan nen Jehova si Isaias a mangiyabawag: “Saray sankaili manalalagey ira naani tan pakanen da naani so saray ayayep yo, et saray sankaili magmaliw ira naani a pambakaen yo tan mangimaton ed kaubasan yo.” (Isaias 61:5) Saray piguratibon estranghero tan sankaili so apaneknekan a say “baleg ya ulop” na ‘arum a karnero’ nen Jesus. * (Apocalipsis 7:9; Juan 10:11, 16) Ag-ira alanaan na masanton espiritu a mangawat na mangatatawen a tawir. Imbes, sikara so walaan na ilalo ya andi-anggaan a bilay diad paraison dalin. (Apocalipsis 21:3, 4) Anggaman ontan, lawas dan inaro si Jehova tan nimatalek ed sikara so espiritual a panagpastol, panagdalos, tan panag-asikaso ed kaubasan. Saratan a kimey so importantin tuloy. Diad panangidirehi na nakekeraan nin kabiangan na Israel na Dios, sarayan komikimey so ontutulong ed panagpastol, panagbayubo, tan panag-ani ed totoo.​—Lucas 10:2; Gawa 20:28; 1 Pedro 5:2; Apocalipsis 14:15, 16.

17. (a) Anto la so panawag ed saray membro na Israel na Dios? (b) Anto so alenleneg a bagat a nakaukolan parad kaperdona na saray kasalanan?

¹⁷ Komusta met so Israel na Dios? Oniay inkuan  nen Jehova ed sikara panamegley nen Isaias: “Sikayo ningaran kayo naani a saserdote nen Jehova; saray totoo tawagen da kayo naani na katangbayan na Dios tayo; kanen yo naani so saray kayamanan na saray nasyon, tan ed gayaga ra nitandoro kayo naani.” (Isaias 61:6) Diad kadaanan ya Israel, intarya nen Jehova so Levitikon inkasaserdote ta pian mangiyapay na saray bagat nisesengeg ed saray saserdoten mismo tan ed kapara ran Israelita. Balet, nen 33 K.P. et agla inusar nen Jehova so Levitikon inkasaserdote tan inletneg to so magmaong ya uksoyan. Inawat to so ayadyarin bilay nen Jesus bilang bagat parad saray kasalanan na katooan. Manlapu la’d saman, agla nakaukolan so antokaman a bagat. Say bagat nen Jesus so oneepekto ed amin a panaon.​—Juan 14:6; Colosas 2:13, 14; Hebreos 9:11-14, 24.

18. Anton nengneng na inkasaserdote so tugyopen na Israel na Dios, tan anto so niganggan ed sikara?

¹⁸ Panon sirin a saray membro na Israel na Dios et “saserdote nen Jehova”? Diad impansulat to ed saray kaparan alanaan a Kristiano, oniay inkuan nen apostol Pedro: “Sikayo so apili a kapolian, peteg ya inkasaserdote, masantos a nasyon, sakey a baley na Dios a dilin kayarian to, a mangibelyaw na karlangan na saman so angekal ed sikayo ed kabilungetan, ta tinawag to kayo ed makapakelaw a silew to.” (1 Pedro 2:9) Kanian bilang sakey a grupo, tugyopen na saray alanaan a Kristiano so inkasaserdote tekep na espesipikon ganggan: pian iyabawag ed saray nasyon so nipaakar ed gloria nen Jehova. Sikara so magmaliw a tasi to. (Isaias 43:10-12) Legan na sarayan kaunoran ya agew, saray alanaan a Kristiano so matoor a manusumpal ed sayan makanan ganggan. Bilang resulta, minilyon natan so miuulop ed sikara diad kimey a panagtasi nipaakar ed Panarian nen Jehova.

19. Anton serbisyo so apribilihyoan a gawaen na saray alanaan a Kristiano?

¹⁹ Niarum ni, saray membro na Israel na Dios so walaan na ilalon manserbi bilang saserdote ed sakey nin paraan. Kayari na ipatey da, sikara so napaoli ed imortal ya espiritun bilay diad tawen. Manserbi ira diman bilang saserdote na Dios, ya aliwa lambengat a kaiban manuley nen Jesus ed Panarian to. (Apocalipsis 5:10; 20:6) Kanian, sikara so napribilihyoan a mangusar ed saray gunggona na dondon bagat nen Jesus parad saray matoor a katooan diad dalin. Diad pasingawey nen apostol Juan a nikurit ed Apocalipsis kapitulo 22, sikara lamet so adeskribe bilang “kakiewan.” Amin a 144,000 a “kakiewan” so anengneng ed tawen, a manbubunga na “labindua, a binulan so pangiter to na bunga to: tan saray bulong to [et] onkana’ra a pakatambal ed saray nasyones.” (Apocalipsis 22:1, 2) Agaylan abig itan a serbisyo bilang saserdote!

Kababaingan tan Kabandayan, Insan Panliliket

20. Anggaman ed isusumpa, anton bendisyon so tatalaranan na maarin saserdote?

²⁰ Manlapu la’d 1914 sanen ginmapo so taon na abig-linawa nen Jehova, say maarin saserdote so nidunget ed naynay ya isusumpa na klero na Kakristianoan. (Apocalipsis 12:17) Anggaman kuan, sinmaew lanlamang ed kaunoran so amin a sagpot a patundaen so panangipulong ed maong a balita. Oniay impasakbay na propesiya nen Isaias nipaakar ed satan: “Dia ed pasen na kabaingan yo mamiddua so walad sikayo naani; ed pasen na kaekal na galang yo pagalangan da kayo ed saray betang da: kanian dia ed dalin da kayarian da so mamiddua; naynay a liket so wala naani ed sikara.”​—Isaias 61:7.

21. Panon ya apanggayagaan na alanaan iran Kristiano so mamidduan karakel na impamendisyon ed sikara?

²¹ Legan na Guerra Mundial I, sinagmak na alanaan a nakdaan so kababaingan tan kabandayan manlapud say nasyonalistikon Kakristianoan. Saray membro na ulop na saray klero so kaiba ed saramay palson angakusa a sumpad gobierno so waloran matoor ya agagi a walad hedkuarter ed Brooklyn. Sarayan agagin lalaki so agmakatunongan ya impriso ed loob na siam bulan. Nen primabera na 1919 et sikara met lanlamang so imbulos, tan diad saginonor et binawi la so amin ya akusasyon ed sikara. Kanian misunian so nansumpalan ed getman patundaen so panagpulong a kimey. Imbes ya abuloyan nen Jehova iray mandadayew ed sikato a managmak na magnayon a kababaingan, sikara so imbulos to tan impawil to ira ed espiritual a kipapasen da, “dia ed dalin da.” Naawat da diman so mamidduan karakel na panamendisyon. Pinalumbasan na daakan a bendisyon nen Jehova so amin a sinagmak da. Petepeteg a walaan iray rason a magayagan onkelyaw!

22, 23. Panon so pangaalig na saray alanaan a Kristiano ed si Jehova, tan panon so impanumang to ed sikara?

²² Say ontumbok ya ibaga nen Jehova so mangiter na sakey nin rason pian manliket iray Kristiano natan: “Siak, si Jehova, aroen ko so inkatunong, gulaen ko so pantakew pati inkauges; et iter ko naani ed sikara so tumang da ed katuaan, et manggawa ak naani na maando a sipan ed sikara.” (Isaias 61:8) Diad panaaral day Biblia, saray alanaan a nakdaan so akaaral a mangaro ed inkahustisya tan manggula ed inkarelmeng. (Uliran 6:12-19; 11:20) Naaralan dan ‘pitpiten iray kampilan da a pagmaliwen da a dingding na lukoy,’ a mansiasiansia iran neutral ed saray bakal  tan gulo ed politika na katooan. (Isaias 2:4) Inwaklit da met iray agamil a mamapabanday ed Dios, a singa say panagpauges, pikakalugoran, panagtakew, tan panagbuanges.​—Galacia 5:19-21.

²³ Lapud aaligen na saray alanaan a Kristiano so pangaaro na Manamalsa ra ed inkahustisya, inikdan ira nen Jehova na “tumang da ed katuaan.” Sakey lan “tumang” et say magnayon a pisisipanan​—say balon pisisipanan​—ya imparungtal nen Jesus ed saray patumbok to diad samay labi sakbay na ipatey to. Base ed sayan pisisipanan a sikaray nagmaliw ya espiritual a nasyon, say nikadkaduman totoo na Dios. (Jeremias 31:31-34; Lucas 22:20) Diad silong na satan et usaren nen Jehova so amin a gunggona na dondon bagat nen Jesus, pati say panamerdona ed saray kasalanan na alanaan tan amin na saray matoor a katooan.

Panliket ed Saray Bendisyon nen Jehova

24. Siopa ed limog na saray nasyon so “bini” a benendisyonan, tan panon iran nagmaliw a “bini”?

²⁴ Arum ed limog na saray nasyon so amidbir ed panamendisyon nen Jehova ed totoo to. Satan so nipasakbay ed sipan nen Jehova: “Say bini ra naamtaan naani ed pegley na saray nasyon, tan say simit da ed pegley na saray balbaley: amin a makanengneng ed sikara nabidbir da ra naani, a sikara so bini a benendisyonan nen Jehova.” (Isaias 61:9) Saray membro na Israel na Dios, saray alanaan a Kristiano, so aktibo ed limog na saray nasyon legan na taon na abig-linawa nen Jehova. Natan et minilyon la so bilang na saramay onkikiwas ed ministeryo ra. Diad maapit a pikikimey da ed Israel na Dios, saramay nanlapud saray nasyon so walaan na pribilehyon magmaliw a “bini a benendisyonan nen Jehova.” Nanenengneng na amin a katooan so maliket a kipapasen da.

25, 26. Panon met a nibabalikas na amin a Kristiano so wala ran balikas diad Isaias 61:10?

²⁵ Amin a Kristiano, alanaan man odino arum a karnero, so maniilalo ed andi-anggaan a panangidayew ed si Jehova. Sikara so sigpot-puson mipakna ed si propetan Isaias, sanen sikatoy pinuyanan a mangibaga: “Siak manliket ak naani balbaleg ed Jehova, say kamarerwak manggayaga naani ed Dios ko; ta sikato kinawesan to ak ed saray kawes na kilalaban, sikato sinakbongan to ak ed sukbong na inkatunong, a singa sakey a nobyo a mansulong na balanget, tan singa sakey a nobya a mansulong ed saray kagawaan to.”​—Isaias 61:10.

²⁶ Lapud akawesan na “sukbong na inkatunong,” saray alanaan a Kristiano so determinadon mansiansian maralus tan malinis ed imaton nen Jehova. (2 Corinto 11:1, 2) Lapud inyabawag ira nen Jehova bilang matunong a walaay ilalon manawir na mangatatawen a bilay, agla ran balot ompawil ed nankibalatar a kipapasen na Babilonia a Baleg, a pinawayan da la. (Roma 5:9; 8:30) Mabmabli ed sikara so kawekawes na kilalaban. Determinado met iray kaiba ran arum a karnero a mangunor ed saray atagey ya estandarte nen Jehova nipaakar ed puron panagdayew. Lapud ‘inurasan da la so kawekawes da, tan pinaputi da iratan ed dala na Kordero,’ sikara so niyabawag a matunong tan makaliktar ira ed ‘baleg a kairapan.’ (Apocalipsis 7:14; Santiago 2:23, 25) Anggad isabi na satan, aaligen da iray alanaan a kaiba ra diad ipapaliis ed antokaman a matik na Babilonia a Baleg.

27. (a) Legan na Milenyon Uley, anto so niwalan makatantandan ‘itutubo’? (b) Panon lan ontutubo so inkatunong ed limog na katooan?

²⁷ Natan et manliliket iray mandadayew ed si Jehova diad inkiwala ra ed espiritual a paraiso. Agmanbayag et sikara la so manggayaga ed Paraiso diad literal a pantalos. Impapuso tayon talaranan itan a panaon, a malinew ya adeskribe ed kaunoran iran salita na Isaias kapitulo 61: “Singa say dalin ipaway to so saray bosilak to tan singa say tanamanan patuboen to so saray bengatla a nitanem ed sikato, ontan so pamatubo na Katawan a Jehova ed inkatunong tan panangigalang ed arapan na saray amin a nasyon.” (Isaias 61:11) Legan na Milenyon Uley nen Kristo, naeksperiensya na dalin so ‘itutubo na inkatunong.’ Oneyag ed liket iray totoo, tan say inkatunong so onnatnat ed interon dalin. (Isaias 26:9) Balet, agtayo la nakaukolan ya alagaren so maglorian agew ta pian makapangidayew itayo ed imaton na amin a nasyones. Ombubulaslas la so inkatunong diad limog na minilyon a mangiglogloria ed Dios na katawenan tan mangipapalapag ed maong a balita na Panarian to. Anggan natan et say pananisia tan ilalo tayo so mangiiter ed sikatayo na amin a rason pian manliket ed saray bendisyon na Dios tayo.

[Paimano ed Leksab]

[Tepetepet Parad Panagaral]