Gilead School​—60 Taon a Panangipasal ed Saray Misionaryo

“LAPUD impasyan panagaral ed Biblia, lalon apaapit kami ed si Jehova tan dakel ni so naaralan mi nipaakar ed organisasyon to. Saya so angiparaan ed sikamin manbilay diad asainmin ed biek-taew.” Ontan so impaneskribe na sakey a nangraduar ed inmunan klase diad impakapanaral to ed Watchtower Bible School of Gilead. Manlapu nen niletneg itan 60 taon lay apalabas, say Gilead School so mangibabaki na saray misionaryo. Nen Marso 8, 2003, agawa so impangraduar na koma-114 a klase diad Watchtower Educational Center ed Patterson, New York. Marengerengel so 6,404 a nantitipon diad auditoryum tan diad saray pasen ya aka-televise so programa, a tugyopen na saray paliwawa, interbio, tan inggrupon diskusyon.

Si Theodore Jaracz, a membro na Mananguley ya Ulop, so tsirman. Say manangilukas a paliwawa to so angipaimano a saray dumerengel et nanlalapud nanduruman bansa, a tugyopen na saray bisitan taga-Asia, Caribbean, Europa, tan Sentral tan Abalaten ya Amerika. Imbase nen Brother Jaracz iray komento to diad 2 Timoteo 4:5 pian ipabitar a say manunan kimey na sakey a misionaryon nipasal ed Gilead et say ‘panggawa ed kimey na ebanghelisador.’ Saray misionaryo so mantatasi ed katuaan diad pangibabangat da na Biblia ed totoo.

Akaawat na Unor a Panamilin Iray Estudyante

Bilang pangigapo ed serye na antikey iran paliwawa, si John Larson, a membro na Branch Committee diad Estados Unidos, so angipaliwawa ed makapabiskeg na pananisian tema a “No say Dios et Gampi ed Sikatayo, Siopa ni Kasi Onsumpa ed Sikatayo?” (Roma 8:31) Impalinew na espiker ed saray estudyante so Biblikon basiyan pian nawalaan ira na sigpot a kompiyansa ed pakayari nen Jehova ya ontulong ed sikaran talonaan so antokaman a babeng a nayarin kidungetan da diad saray asainmin da. Inaon nen Brother Larson so Roma 8:38, 39 pian simbawaen iray estudyante: “Molimolien pa so pakapanyarin uusaren na Dios nisesengeg ed sikayo, tan tandaan yo ya anggapo so makapakset ed personal a pisisiglaotan nen Jehova ed sikayo.”

Say tinmumbok a nampaliwawa et si Guy Pierce, a membro na Mananguley ya Ulop. Pinili to so teman “Pansiansiaen Yon Maliket so Kamataan Yo!” (Lucas 10:23) Impaliwawa to a nagamoran so tuan liket diad pakapikabat ed si Jehova tan pakatalos ed magnayon a gagala to ontan met ed pakanengneng ed pakasumpal na saray propesiya ed Biblia. Inerman so laen da, napansiansia na saray estudyante so peteg a liket no pansiansiaen dan maliket so panmoria ra. Pinaseseg nen Brother Pierce iray nangraduar a masimoon a mandalepdep ed kamaongan nen Jehova tan isentro ra so nonot tan puso ra ed panggawa na linawa To. (Salmo 77:12) Diad pamasiansia ra ed positibon awawey, natalonaan na saray estudyante so antokaman a problema a nayarin naabet da.

Insan akaawat iray estudyante na saray manamatanir a panamaseseg manlapud duaran instruktor ya inagew-agew a mangibabangat ed sikara. “Kasin Kaliktan Yo so Nigloria?” so intepet nen Lawrence Bowen bilang tema na paliwawa to. Isisiglaot na maslak a totoo so gloria ed dayew, galang, tan panangipabidbir ed inkasikara. Balet, atalosan nen salmistan  Asaf so peteg a gloria​—a satan so mabmablin kayamanan na mapagalang a pisisiglaotan ed si Jehova. (Salmo 73:24, 25) Apaseseg iray nangraduar ya estudyante a pansiansiaen so maapit a pisisiglaotan ed si Jehova panamegley na regular tan makabaliksan a panagaral ed Biblia. “Kaliktan na saray [anghel] a nanengneng” iray detalye nipaakar ed pakasumpal na gagala nen Jehova panamegley nen Kristo. (1 Pedro 1:12) Labay day makaaral ni na dakel nipaakar ed Ama ra ta pian nipatnag da so gloria. Insan pinaseseg na espiker iray estudyante a mangigloria ed si Jehova diad saray asainmin da bilang misionaryo diad panulong ed arum a naromog so sankablian a kayamanan.

Sinampotan nen Wallace Liverance, say registrar na eskuelaan, so primeron serye na saray paliwawa diad teman “Salitaen so Kakabatan na Dios Diad Sakey a Sagradon Sekreto.” (1 Corinto 2:7) Anto iyan maridios a kakabatan a sinalita nen apostol Pablo legan na impanlingkor to bilang misionaryo? Satan et say makabat tan mabiskeg a paraan nen Jehova pian pawalaen so kareenan tan pankakasakey ed interon talba. Sayan kakabatan et nisentro ed si Jesus. Imbes ya ipulong to so ebanghelyo a parad sosyedad, tinulongan nen Pablo so totoo a natalosan no panon ya umanen na Dios iray epekto na kasalanan nen Adan. (Efeso 3:8, 9) Sinimbawa na espiker iray dumerengel  to: “Anamot yoy pribilehyo yo ed panaglingkor a singa ed ginawa nen Pablo, a minoria to so panmimisionaryo to bilang pankanawnawa pian tulongan so totoo a natalosan no panon so panumpal nen Jehova ed gagala to.”

Kayari na satan et indaulo nen Mark Noumair, sananey nin instruktor ed Gilead, so maligsan diskusyon a kaibay pigaran estudyante ed klase. Say teman “Say Panagaral ed Salitay Dios so Mamapawala na Maseseg Iran Ministro” so angipabitar ed saray salita nen Pablo diad Roma 10:10. Insalaysay na klase iray dakel ya eksperiensya ed lawak na kimeyan a nanggayagaan da legan na panaaral da. Impatnag na saray eksperiensya ra a sano manaral tan mandalepdep itayo ed Salita na Dios, saray maabig a bengatla nipaakar ed si Jehova a Dios tan ed Panarian to so mamano ed kapusoan tayo tan nitongtong tayo iratan ed arum. Legan na limay bulan ya impansiansia ra diad Watchtower Educational Center, saray estudyante so akapangigapo na masulok a 30 a panangiyaral na Biblia ed saray interesado diad saray mabetbet lan nakikimeyan a teritorya na saray walad asingger a kongregasyon.

Animbawa Iray Matatatken la

Legay panaaral da, agunggonaan iray estudyante ed impilimog da ed saray membro na pamilyan Bethel diad Estados Unidos. Saray membro na sanga a Robert Ciranko tan Robert P. Johnson so anginterbio ed pigaran abayag lan matoor a manlilingkor ed si Jehova, pati saray managbiahen manangasikaso a peles a makakaawat na espisyal a panangipasal diad Watchtower Educational Center. Amin iramay ininterbio et nangraduar ed Gilead a manlilingkor nensaman bilang misionaryo. Apabiskeg iray estudyante tan saray pamilya tan kakaaro ra diad impakadngel da ed pananimbawa na sarayan eksperiensyado lan espiritual a lalaki.

Onia so insimbawa ra: “Mantultuloy ya okupado no nayadyari diad ministeryo tan diad kongregasyon.” “Agyo pinonot so inkasikayon dili. Iteen so nonot yo ed gagala yo bilang misionaryo, tan gawa yon ayaman so pasen a nibakian yo.” Inyilustra na arum nin makatulong a komento no panon a say kipapasal ed Gilead so mangikinlong ed sakey a ministro parad maabig a kimey, inerman so pangibakian ed sikato. Niraya so pigara ed saratan: “Naaralan mi so mikoopera tan mankimey a saniiba.” “Tinmulong ed sikami so eskuelaan pian makaadapta kami ed balo iran kultura.” “Nibangat kami a mangusar ed Kasulatan ed mas epektibon paraan.”

Impresenta nen John E. Barr, abayag lan membro na Mananguley ya Ulop, so manunan paliwawa ed programa. Say Makasulatan a tema to et “Dia ed Amin a Dalin Pinmaway so Tanol Da.” (Roma 10:18) Oniay intepet to, Kasin nasusumpal na totoo na Dios iyan mairap a kimey natan? Petepeteg! Nen 1881, saray manbabasa na magasin a Watchtower so tinepetan: “Kasin manpupulong kayo?” Insan impanonot na espiker ed amin a dumerengel so nipaakar ed maawaran a tawag diad kombension ed Cedar Point, Ohio, E.U.A. nen 1922: “Iyabawag so Ari tan say Panarian!” Diad ilalabas na saray taon, say seseg na saray matoor a lingkor na Dios so amakiwas ed sikaran iyabawag so alay abig a katuaan na Panarian diad amin a nasyones. Diad panamegley na saray inimprintan publikasyon tan pitotongtong, say kiyaabawag na maong a balita so onnanatnat ed kasamsampotan a dalin​—parad kigalangan tan kidayewan nen Jehova. Diad makapasagyat a konklusyon to, sinimbawa nen Brother Barr iray nangraduar a nodnonoten da iray bendisyon a naaawat da, a kuanto: “Diad kada agew, sano manpikasi kayo ed si Jehova nipaakar ed asainmin yo, sikatoy masimoon a pisalamatan yo ed betang yo ed pakasusumpal na saray salitan, ‘Diad amin a dalin et ompapaway so tanol da.’”

Kayari na sayan paliwawa, binasa iray pabano, tan inyawat na tsirman so diploma ed balang estudyante. Insan, diad nantekep a liket tan ermen lapud itaynan da la ed pinabli ran eskuelaan, binasa na manangilaman ed klase so impapuson resolusyon a para ed Mananguley ya Ulop tan ed pamilyan Bethel, ya imbalikas na saray estudyante so determinasyon dan mangidayew ed si Jehova “manlapu ed natan tan lawas lan lawas.”​—Salmo 115:18.

Maniilalo kami a sarayan nangraduar so makaadapta ed balo iran ayaman da tan makatulong ira ed iyaaligwas na sankamundoan a kimey a panagpulong, a singa ed nagagawaan la na saramay akauna lan nibaki nen say sikara diad loob la na 60 a taon.

[Kahon ed pahina 23]

SARAY ESTADISTIKA NA KLASE

Bilang na saray nirepresentan bansa: 12

Bilang na saray bansan angiyasainan: 16

Bilang na saray estudyante: 48

Promedyon edad: 34.4

Promedyon taon ed katuaan: 17.6

Promedyon taon ed sigpot-panaon a ministeryo: 13.5

[Litrato ed pahina 24]

Koma-114 a Klase a Nangraduar ed Watchtower Bible School of Gilead

Diad listaan ed leksab, saray dasig so anumeroan manlapud arap a pabeneg, tan saray ngaran so akalista manlapud kawigi a manpakawanan ed kada dasig.

(1) Rosa, D.; Garrigolas, J.; Lindström, R.; Pavanello, P.; Tait, N. (2) Van Hout, M.; Donabauer, C.; Martínez, L.; Millar, D.; Festré, Y.; Nutter, S. (3) Martínez, P.; Clarke, L.; Maughan, B.; Fischer, L.; Romo, G. (4) Romo, R.; Eadie, S.; Tuynman, C.; Campbell, P.; Millar, D.; Rosa, W. (5) Lindström, C.; Garrigolas, J.; Markevich, N.; Lindala, K.; van den Heuvel, J.; Tait, S.; Nutter, P. (6) Maughan, P.; Pavanello, V.; Eadie, N.; West, A.; Clarke, D.; Markevich, J. (7) Fischer, D.; Donabauer, R.; Curry, P.; Curry, Y.; Carfagno, W.; West, M.; Tuynman, A. (8) Van Hout, M.; Campbell, C.; Festré, Y.; Carfagno, C.; van den Heuvel, K.; Lindala, D.