Imanoen so Walan Kamaongan na Amin
Imanoen so Walan Kamaongan na Amin
“Nonoten mo ak, O Dios ko nipaakar ed maong.”—NEHEMIAS 13:31.
1. Panon so ikikiwas nen Jehova tekep na kamaongan ed amin?
KAYARI na mayuyem iran panaon, say sinag na agew so mangitarok na makapasagyat a pananguman. Magmaong so awawey na totoo, tan maliket so liknaan da. Ontan met, kayari na andukey a peryodo na mansasnit a sinag na agew tan amagan klima, say uran—anggan biglan biewbiew ni ingen—so mangitarok na pakarepreskoan tan pakainawaan. Say maaron Manamalsa, si Jehova, so nandesinyo ed atmospera na dalin ta pian nawalaan na alay abig a langkap a tiempo. Impaimano nen Jesus so inkamabunlok na Dios sanen imbangat ton: “Aroen moy kaparam a too, tan gulaen moy kabusol mo: Et ingen kuan ko ed sikayo, Aroen yo ray kabusol yo, tan pikasi [yo so] saray mamasegsegang ed sikayo: Pian nayarian yoy magmaliw ya anak ira nen Ama yon wala ed tawen; ta sikato pabutayen to so banwa to ed saray mauges tan maong, tan papelagen toy uran ed saray matunong tan aliwan matunong.” (Mateo 5:43-45) On, onkikiwas si Jehova tekep na kamaongan ed amin. Sikatoy nepeg ya aligen na saray lingkor to diad panimano ed walan kamaongan na arum.
2. (a) Anto so basiyan na ikikiwas nen Jehova tekep na kamaongan? (b) Anto so iimanoen nen Jehova nipaakar ed ikikiwas tayo ed kamaongan to?
2 Anto so basiyan na ikikiwas nen Jehova tekep na kamaongan? Manlapu la’d impankasalanan nen Adan, si Jehova so lawas maniimano ed walan kamaongan na arum. (Salmo 130:3, 4) Say gagala to et say pangipawil ed matulok a katooan diad bilay ed Paraiso. (Efeso 1:9, 10) Say agkanepegan a panangasi to so mangiiter ed sikatayo na ilalon nibulos manlapud kasalanan tan ag-inkayadyari panamegley na insipan a Bini. (Genesis 3:15; Roma 5:12, 15) No awaten so uksoyan nipaakar ed dondon, magmaliw a posibli diad kaunoran so pakapawil ed inkayadyari. Nilikud ni ed arum a bengatla, iimanoen nen Jehova so reaksion tayo ed inkamabulos to. (1 Juan 3:16) Iimanoen to so antokaman a gagawaen tayon panangipatnag na apresasyon tayo ed kamaongan to. “Say Dios aliwan agmatunong pian nalingwanan to so gawa yo tan say aro ya impanengneng yo ed ngaran to,” so insulat nen apostol Pablo.—Hebreos 6:10.
3. Anton tepet so manepeg a konsideraen tayo?
3 Panon tayo, sirin, ya aligen si Jehova diad panimano ed walan kamaongan na arum? Konsideraen tayo iray ebat ed satan a tepet diad apatiran aspekto na bilay: (1) say Kristianon ministeryo, (2) say pamilya, (3) say kongregasyon, tan (4) say relasyon tayo ed arum.
Diad Panagpulong tan Panaggaway-Babangatan
4. Panon a say pibibiang ed Makristianon ministeryo et pakapatnagan na inenengneng tayo ed walan kamaongan na arum?
4 Impaliwawa nen Jesus a ‘say uma et say mundo,’ bilang ebat ed saray tepet na babangatan to nipaakar ed kabaliksan na parabolo na trigo tan saray sisanyas. Bilang babangatan nen Kristo natan, bibidbiren tayo iyan katuaan sano mibibiang itayo ed ministeryo tayo. (Mateo 13:36-38; 28:19, 20) Say ministeryo tayo ed lawak na kimeyan so mangilalanor ed mapublikon panangiyabawag na pananisia tayo. Say mismon katuaan a kabkabat laray Tasi nen Jehova lapud pampupulong da ed kabkaabungan tan diad saray karsada so mamaneknek ed inkaseet tayo ed panag-anap ed amin na saramay makanepegan ed mensahe na Panarian. On, oniay imbilin nen Jesus: “Anggan dinan a syudad ono baley a looban yo, anapen yod’man no siopa so makana.”—Mateo 10:11; Gawa 17:17; 20:20.
5, 6. Akin a mantutultuloy itayo ed maminpigan ibisita lamet ed totoo diad ayaman da?
5 Sano ag-ilaloan na totoo so ibisita tayo ed sikara, naimano tayo so reaksion da ed mensahe tayo. No maminsan et walay ondengel ed sikatayon membro na sankaabungan, bangta say sananey ed satan ya ayaman so mangibelyaw na, “Agkami interesado,” insan mangangga la’d satan so ibibisita tayo. Paneermenan tayo ta say isusumpa odino kaandian na interes na sakey a too so mangapekta ed ikiwas na arum! Anto sirin so nagawaan tayo pian makapansiansia itayon onnengneng ed walan kamaongan na amin?
6 Say ontumbok ya ibisita tayo ed saman ya ayaman sano manpulong itayo ed satan a pasen so nayarin mangiter na pankanawnawa pian direktan nakatongtong so too ya amaer ed akadkaunan indalaw tayo. No nodnonoten tayo no anto so agawa ed inmunan indalaw tayo, ontulong itan pian makapanparaan. Nayarin kinmiwas so onsusumpa tekep na maong iran motibo, a manisian nepeg ton paeren so interesado ed italineng ed mensahe na Panarian. Saray panmoria to so nayarin naimpluensyaan na palson impormasyon nipaakar ed saray gagala tayo. Balet satan so agmangamper ed sikatayo diad pantultuloy a pangipulong ed maong a balita na Panarian diad satan ya ayaman, a mataktikan ipetek iray lingon pakatalos. Interesado itayo ya ontulong ed amin a nawalaan na suston pikakabat ed Dios. Insan nayarin diad satan ya iyasingger la nen Jehova itan a too ed inkasikato.—Juan 6:44; 1 Timoteo 2:4.
7. Anto so ontulong ed sikatayo pian magmaliw a positibo sano asinggeran tayo so totoo?
7 Kabiangan ed saray bilin nen Jesus ed saray babangatan to so nipaakar ed isusumpa na pamilya. Agta inkuan ton: “Linma ak dia a manggawa na pisuppiatan na laki ed ama to, tan say anak a bii ed ina to, tan say manugang a bii ed katulangan ton bii”? Inyarum ni nen Jesus: “Saray kakabusol na too sikaray kaamong to lanlamang.” (Mateo 10:35, 36) Ingen, manguman iray sirkumstansya tan awawey. Say biglan pansakit, ipatey na sakey a kanayon, saray kalamidad, gonigon, tan dakel niran sengegan so mangimpluensya ed reaksion na totoo ed panagpulong tayo. No walaan itayo na negatibon panmoria—a say totoon pupulongan tayo so mansiansian ag-ondengel—peteg kasin nenengnengen tayo so walan kamaongan ed sikara? Akin ta no maliket yon bisitaen lamet ira diad ayaman da ed sananey a panaon? Nayarin naromog tayo a duma lay reaksion da. No maminsan et aliwa lambengat a say ibaga tayo noagta say paraan na pangibaga tayo so pansengegan na panguman na awawey. Say masimoon a pikakasi ed si Jehova sakbay itayon onggapon manpulong so maseguron ontulong ed sikatayo pian magmaliw a positibo tan makapasagyat so pangipresenta tayo ed mensahe na Panarian ed amin.—Colosas 4:6; 1 Tesalonica 5:17.
8. Anto so resulta sano nengnengen na saray Kristiano so kamaongan ed agmananisia iran kakanayon da?
8 Walaray kongregasyon a dakel a membro na sakey a pamilya so manlilingkor ed si Jehova. Say mabetbet a pandidinayewan tan panrerespetoan na saray kalangweran et say inkaseet na sakey a matakken lan kanayon a walaan na maabig a relasyon ed loob na pamilya tan ed loob na panamaley ya akapanguman ed puso na saray kalangweran. Say pangunor ed simbawa nen apostol Pedro so akatulong ed dakel a Kristianon kaasawaan a bibii a natangguyor so kaasawaan da “ya andi salita.”—1 Pedro 3:1, 2.
Diad Loob na Pamilya
9, 10. Panon a ninengneng nen Jacob tan Jose so walan kamaongan na pamilya ra?
9 Say maapit a relasyon na saray membro na sakey a pamilya so mangitarya na sananey nin aspekto a nayarian tayon nengnengen so walan kamaongan ed arum. Konsideraen so leksion manlapud impideneng nen Jacob ed saray ilalak to. Diad Genesis kapitulo 37, bersikulo 3 tan 4, impabitar na Biblia ya inad-aro nen Jacob si Jose. Saray agagi nen Jose so manimon, angga ed punton nankokomplot ira pian pateyen so agi ra. Balet, imanoen so awawey nen Jacob tan si Jose diad saginonor a parte na bilay da. Ninengneng dan pareho so walan kamaongan na pamilya ra.
10 Sanen manseserbi si Jose bilang manunaan a manangasikaso na tagano diad sinalot na eras ya Ehipto, inabrasa to iray agagi to. Anggaman agton tampol impakabat so inkasikato, inmaneobra to iray agawa ta pian naasikaso ira a maong tan nisempetan da na tagano so masiken lan ama ra. On, anggaman sikatoy biktima na impanggula ra, kinmiwas si Jose parad pankaabigan da. (Genesis 41:53–42:8; 45:23) Ontan met, antis ya ompatey si Jacob et inyabawag to iray mapropetikon bendisyon diad amin ya ilalak to. Anggaman ed saray makapuy a ginawa ra a nanresulta ed inkaandi na arum ed saray pribilehyo ra, amin da so kabiangan a mangawat na sakey a tawir ed dalin. (Genesis 49:3-28) Agaylan abig a pakapatnagan na magnayon ya aro nen Jacob!
11, 12. (a) Anton mapropetikon alimbawa so angidanet ed kaimportantian na pananap na kamaongan diad loob na pamilya? (b) Anton leksion so naaralan tayo manlapud alimbawa na ama ed ilustrasyon nen Jesus nipaakar ed managdarak ya anak?
11 Say andukey a panagtepel nen Jehova diad impideneng to ed saray andiay-pananisian nasyon na Israel et mangitarya na kaaruman ya aralem a pakatalos ed no panon ton ninengneng so walan kamaongan na totoo to. Diad impangusar To ed wala iran sirkumstansya na pamilya nen propeta Oseas, inyilustra nen Jehova so magnayon ya aro to. Si Gomer, ya asawa nen Oseas, so aminpigapigan akapikalugoran. Anggaman ontan, binilin nen Jehova si Oseas: “Onla ka lamet, mangaro ka na sakey a bii ya inararo na kaaro to, tan sakey a mikakalugoran, singa lanlamang so pangaro nen Jehova ed saray anak na Israel, anggan tinmumbok ira ed saray dirios a sananey tan inaro ra so saray bibingka na saray ubas ya impamaga.” (Oseas 3:1) Akin ya ontan iray ingganggan to? Amta nen Jehova a diad nasyon a kinmasipa ed saray dalan to, walaray indibidual ya onkiwas lapud anos to. Oniay inyabawag nen Oseas: “Kayari to saray anak na Israel ompawil ira naani, tan anapen da si Jehova a Dios da, tan si David ya ari ra, tan onla ra naani a sitatakot ed Jehova tan ed kaabigan to ed saray kaunoran ya agew.” (Oseas 3:5) Maseguron saya so maabig ya alimbawa a nipatnag tayo sano nipaarap ed saray kairapan ed loob na pamilya. Say pantultuloy ya inengneng ed walan kamaongan ed arum a membro na pamilya so anggan panon et mangipatnag na maabig ya alimbawa na panag-anos.
12 Say parabolo nen Jesus nipaakar ed managdarak ya anak so mangitatarya ni na lalon aralem a pakatalos ed no panon tayon nengnengen so maong ed mismon kapamilyaan tayo. Sinmempet so yugtan ya anak kayari ton intunda so dalaporak a panagbilay to. Sikato so mapangasin akidenengan nen ama to. Panon so inkiwas na ama ed impanreklamo na panguloan ya anak to ya agbalot tinmaynan ed pamilya to? Oniay inkuan na ama ed panguloan ya anak to: “Ana’ko, sika naynay ka ed siak, et amin a kien ko, kien mo.” Aliwa itan ya ampait a panamaat noagta panamaseguro lambengat na panangaro na ama to. ‘Nakaukolan tayo so manliket tan manambegya,’ so intuloy to, ‘ta saya so agim ya inatey, abilay lamet; tan abalang et aromog.’ Nayarian tayo met a nengnengen so walan kamaongan ed arum.—Lucas 15:11-32.
Diad Loob na Kristianon Kongregasyon
13, 14. Anto so sakey a paraan na pangagamil na maarin ganggan nipaakar ed aro diad loob na Kristianon kongregasyon?
13 Bilang Kristiano, getma tayo ya agamilen so maarin ganggan nipaakar ed aro. (Santiago 2:1-9) Tua, nayarin awaten tayo iray membro na kongregasyon tayo a miduma ed sikatayo so kipapasen da diad materyal a paraan. Balet kasin walaan itayo na ‘inkaapag-apag’ lapud rasa, kultura, odino anggan saray relihyoson abenegan? No ontan, panon tayon tumboken so simbawa nen Santiago?
14 Say pangabrasa tayo ed amin ya onaatendi ed saray Makristianon miting so mangiter na ebidensya ed maparawes ya awawey tayo. Sano asinggeran tayon katongtongen iray balobalo ni ya inmatendi ed Kingdom Hall, nayarin naandi so kababaingan da. On, onia so inkuan na arum a primeron inmatendi ed Makristianon miting: “Amin et makakkaaro. Singa kabkabat da ak lan maong. Agak nasisikig.”
15. Panon a natulongan iray kalangweran ed kongregasyon pian ipanengneng da so interes da ed saray wala la’d edad?
15 Diad arum a kongregasyon, nayarin mantitipon so pigaran tobonbalo ed loob odino diad paway na Kingdom Hall kayari na aral, a nasisikig iran milimog ed saray wala la’d edad. Anto so bengatlan positibo a nagawaan pian natalonaan iyan nagagawa? Siempre, say primeron kundang a nagawaan na atateng et say pangipasal da ed ananak da diad abung, ya iparaan da ira parad aral. (Uliran 22:6) Sikara so naikdan na kimey a mangiparaan na nanduruman publikasyon ta pian kompleto so awiten da diad saray miting. Saray atateng met so manunan mamaseseg ed saray ananak da a manginabang na saray walad kanonotan da ed saray wala la’d edad tan saray mabeblay a walad Kingdom Hall. Say pangibaga ed saratan ya agagi na makabaliksan a bengatla so mangiter ed ugugaw na liknaan na inkapnek.
16, 17. Panon ya imanoen na saray wala la’d edad so walan kamaongan ed saray kalangweran diad loob na kongregasyon?
16 Nepeg met ya ipatnag na saray wala la’d edad ya agagi so interes da ed saray kalangweran ed kongregasyon. (Filipos 2:4) Nayarian dan asinggeran a katongtongen iray kalangweran diad makapaseseg a paraan. Kaslakan et niwawala iray alay abig a punto legan na aral. Nayarin natepetan iray kalangweran no anto so nanggayagaan da ed aral tan no kasin walaray punton aapresyaen dan maong tan nayarian dan iyaplika. Bilang importantin kabiangan na kongregasyon, saray tobonbalo so nepeg a komendaan ed inka-atentibo ra tan ed antokaman ya inkomento ra legan na aral odino ed antokaman ya akibiangan da ed saray parte na programa. Say pidedeneng na saray tobonbalo ed saray wala la’d edad ed kongregasyon tan say pananumpal da ed saray simplin kimey ed abung so mangipabitar a nagawaan dan maong iray babaleg nin responsabilidad diad saginonor a parte na bilay da.—Lucas 16:10.
17 Diad pangawat da ed responsabilidad, onaaligwas so arum a kalangweran anggad punton nasarag da lan sakbaten so mas ambelat iran asainmin lapud espiritual a kalidades da. Say pakawalaan da na bengatlan gawaen so ontulong met a mamuger ed makulangkulang a kondukta. (2 Timoteo 2:22) Saratan ya asainmin so onkana a ‘pakasalian nin unona’ na saray agagin lalaki a manadampot a manserbi bilang ministeryal a lingkor. (1 Timoteo 3:10) Say sipaparaan a pibibiang da ed saray miting tan ed seseg da ed ministeryo, ontan met ed panangiyansakit da ed amin a walad loob na kongregasyon, so ontulong ed saray mamatatken a manebek ed potensyal da sano ikonsidera da ira parad kaaruman iran asainmin.
Imanoen so Walan Kamaongan na Amin
18. Anton patit nipaakar ed panamemben na hudisyal a pamaakaran so paliisan, tan akin?
18 Oniay inkuan na Uliran 24:23: “Say panaglabi ed saray inkatoo ed panangukoman sikato so aliwa a maong.” Say mangatatawen a kakabatan so mamakiwas ed saray mamatatken ya ompaliis ed panangidumaduma sano bebembenan da iray hudisyal a pamaakaran diad kongregasyon. Oniay inkuan nen Santiago: “Say kakabatan a wala a manlapu ed tagey, unona, sikato so malinew, insan mareen, masimpit, tan mainomay a pikasian, napno na panangasi tan maong iran bunga, andi labien tan andi pankunkunwari.” (Santiago 3:17) Mapatnag, legan a nenengnengen da ed arum so kamaongan, nakaukolan a seguroen na mamatatken a say panhusga ra et agnaburagas na personal a siglaotan tan emosyon. “Say Dios mantanyareg ed duypo na Dios,” so kuan nen salmistan Asaf. “Sikato mangukom ed nanleleetan na saray dirios [odino diad arum et “singa-dirios,” paimano’d leksab na NW, a manutukoy ed saray ukom a totoo]. Kaunongan kabayag so pangukom yo ya aliwa a maalas a tuloy, tan pamagalang yo ed inkatoo na saray bagel?” (Salmo 82:1, 2) Unong ed satan, paliisan na saray Kristianon mamatatken so antokaman a tendensia na paboritismo a nipaakar ed saray pamaakaran a nalalanor so sakey a kaaro odino kanayon. Diad onian paraan et napansiansia ra so pankakasakey ed kongregasyon tan mangiyabuloy ed iyagus na espiritu nen Jehova.—1 Tesalonica 5:23.
19. Diad antoran paraan a naimano tayo so kamaongan ed arum?
19 Diad panimano ed walan kamaongan na saray agagi tayo, nipatnag tayo so awawey nen Pablo sanen sinulat to so kongregasyon na Tesalonica. Oniay kuanto: “Wala so ilalo mi ed Katawan a nipaakar ed sikayo, a gagawaen yo tan gawaen yo met naani so saray bengatla ya iganggan mi ed sikayo.” (2 Tesalonica 3:4) Mas kaliktan tayon ibaliwala iray kalilingoan na arum sano nengnengen tayo so walan kamaongan da. Anapen tayo iray aspekto a nakomendaan tayo ed saray agagi tayo, a maseguron napaliisan tayo so makritikon awawey. Oniay insulat nen Pablo: “Nakaukolan ed saray manangasikaso a sakey a toon naromog a matoor.” (1 Corinto 4:2) Say inkamatoor na saramay mangaasikaso ed kongregasyon tan ed amin na saray Kristianon agagi tayo so mamakiwas ed sikatayo a pablien ira. Diad ontan et onapit itayo ed sikara, a napaelet so bedber na pankakaaro bilang Kristiano. Aligen tayo so panmoria nen Pablo ed saray agagi diad panaon to. Sikara so “kaparan komikimey ed panarian na Dios” tan “sakey a tulong a makapabiskeg” ed sikatayo. (Colosas 4:11, NW) Diad ontan et nipatnag tayo so awawey nen Jehova.
20. Antoran bendisyon so onsabi ed saramay maniimano ed walan kamaongan ed amin?
20 Maseguro a nipatnag tayo so pikakasi nen Nehemias: “Nonoten mo ak, O Dios ko nipaakar ed maong.” (Nehemias 13:31) Agaylan liket tayo ta nenengnengen nen Jehova so walan kamaongan na totoo! (1 Arari 14:13) Ontan met komon so gawaen tayo diad pidedeneng tayo ed arum. Say panggawa ed satan so mangitarya na ilalo ed pakarondon tan ed bilay ya andi-anggaan diad balon mundo ya asingsingger la.—Salmo 130:3-8.
Panon Yon Ebatan?
• Anto so basiyan na ikikiwas nen Jehova tekep na kamaongan ed amin?
• Panon tayon imanoen so walan kamaongan ed arum
• diad ministeryo tayo?
• diad pamilya tayo?
• diad kongregasyon tayo?
• diad amin a relasyon tayo?
[Tepetepet Parad Panagaral]
[Litrato ed pahina 18]
Anggaman ed akadkaunan impambusol ed sikato na saray agagi to, ninengneng nen Jose so walan kamaongan da
Litrato ed pahina 19]
Ag-itayo naamper na isusumpa pian tulongan so amin
[Litrato ed pahina 20]
Anggaman ed agawa’d sikara diad apalabas, anggapo ed saray ilalak nen Jacob so nipuera ed saray panamendisyon to
[Litrato ed pahina 21]
Abrasaen so amin diad Makristiano iran miting