No Anto so Naaralan Tayo ed Saray Kamanokan

“IMANO yo ’ray kamanokan ed tawen, ya ag-ira mantatanaman, ag-ira met manaani, tan ag-ira met mantipon ed kamkamalir; et say mangatatawen ya Ama yo tataganoen to ra. Agkayo ta mamabli nen sikara?” (Mateo 6:26) Saraya so imbalikas nen Jesu-Kristo diad bantog a sermon ed gilig na palandey ya asingger ed Dayat na Galilea. Saray dumerengel to et aliwa lambengat a saray patumbok to. Wadman met so baleg ya ulop na totoo a posiblin magmaliw a babangatan to a nanlalapud nanduruman lugar. Maslak ed sikara et mairap bilay ya inawit da iray mansasakit pian paabigen nen Jesus.​—Mateo 4:23–5:2; Lucas 6:17-20.

Kayari ton pinaabig iray mansasakit, inasikaso nen Jesus iray mas importantin espiritual a pankaukolan. Kabiangan ed saray leksion ya imbangat to et say asalambit ed tagey.

Abayag lan wala iray kamanokan ed tawen. Arum ed sikara so natatagano panamegley na saray insekto, arum et panamegley na prutas tan bukebukel. No say Dios so mangitatarya na oniaran daakan a naakan na kamanokan, segurado a sarag ton tulongan iray totoon lingkor to pian nawalaan ira na inagew-agew a pantagano. Nayarin gawaen to iya diad panulong ed sikaran makaromog na trabaho ta pian makalmo ra na kuartan isaliw na tagano. Odino nayarin gawaen to iran matalona ed panangimunat ed mismon tagano ra. Sano walay maganat a pankaukolan, nayarian na Dios a pakiwasen so kapusoan na saray mapangasin kakaabay odino kakaaro pian manginabang na antokaman a tagano ra ed saray mankaukolan.

Dakdakel ni so naaralan tayo diad pangimanon maong ed bilay na kamanokan. Pinalsa na Dios so kamanokan a walaan na makapakelkelaw iran nisipor a dunong a manggawa na saray ubong a pamabalegan da ed sibong da. Imanoen pa so duaran nandumaan a klase na saray ubong. Say nilitrato ed kawigi et ubong na African rock martin. Satan so kaslakan lan nipasen diad atapyas a baleg a bato odino diad dingding na abung. Say pinagkaatep na saratan ya ubong et say linmundaw a baleg a bato odino, singa nipanengneng diad litrato, say medya-agwa na abung. Say pinagkadatal na ubong et say ankekelanting a lirlir na pitek a nampipikitan a singa kurti na sakey a lusor. Say lalong tan nganak so makulikulin mantipon na saray lirlir na pitek tan nayarin masulok a sakey bulan so pakasumpal da ed ubong da. Insan apisan da na dika odino saray bago so dalem na satan. Saniba iran mamapakan ed saray sibong da. Say walad leksab et ubong na lalong a masked weaver. Sayan makulin manok diad Aprika so manggagawa na ubong to panamegley na dikarika odino saray gisgis na arum a tanaman. Sarag ton sumpalen so sakey ya ubong diad sanagew tan makapanggawa na masulok a 30 ya ubong diad loob na sakey a tiempo!

Anto so leksion? No say Dios et mangiiter ed saray kamanokan na ontan iran dunong tan daakan a nakaukolan pian makapanggawa na saray ubong, segurado a natulongan to iray totoon lingkor to pian nawalaan na nakaukolan ya abung. Balet, impanengneng nen Jesus so sananey nin nakaukolan no labay tayon tulongan itayo nen Jehova a Dios a nagamoran iray materyal a nakakaukolan tayo. “Ingen anapen yo nin unona so panarian, tan say inkatunong to; et amin iraya a bengatla niarum ira ed sikayo,” so insipan nen Jesus. (Mateo 6:33) Nayarin panumamengan yo, ‘Anto so lalanoren na pananap ya unona ed Panarian na Dios?’ Maliket iray Tasi nen Jehova, a mangibubunog ed sayan magasin, a mangebat ed satan a tepet.