Panlilingkor ed Nikaduman Grupo na Lenguahe Diad Korea

NANDARAGUP so sakey a grupo na maligligsa balet ta mareereen a totoo parad distriton kombension na saray Tasi nen Jehova nen tiagew na 1997. Saya so primeron kombension diad Korea parad saray telek. Wala so pantok ya inmatendi a 1,174. Say interon programa​—a kabiangan iray paliwawa, saray interbio, tan sakey a drama​—so imparungtal ed Sign Language na Korea tan inusaran na projector pian nanengneng iratan ed baleg ya screen diad interon Assembly Hall. Saya so kapantokan na dakel a taon na impasyan kimey na dakerakel a boluntaryo.

Onsabi panaon diad mangaraldalin a paraiso a “say layag na saray telek [et] nibuang naani.” (Isaias 35:5) Pian makapambilay ed satan a Paraiso, balang sakey, pati saray telek, so nepeg ya onloob nin unona ed espiritual a paraiso, say maaligwas a kipapasen ed espiritual na maliket a totoo na Dios. Nepeg a magmaliw iran dedikado tan bautismadon Tasi nen Jehova, a babangatan to.​—Miqueas 4:1-4.

Melag Iran Gapoan

Anggaman wala lay nagagawan panagpulong ed limog na saray telek diad dekada na 1960, nen dekaday 1970 labat so inggapo na pigara ed sikara ya inmatendi ed saray miting na saray Tasi nen Jehova diad Seoul, say kabiseran syudad na Korea. Sakey a Kristianon agin laki a masiglat a mansulat so angusar na pisara pian isulat iray manunan punto na saray paliwawa, pati saray inusar a teksto ed Biblia.

Nen 1971 diad syudad na Taejon, ginapoan na sakey a Tasi ya imbangat so mensahe na Panarian ed anak ton telek tan ed kakaaro na anak to a telek met. Diad sayan grupo so nanlapuan na pigaran maseseg ya indibidual a manunan onsusuporta natan diad lawak na sign-language.​—Zacarias 4:10.

Mabulos ya Iyaapay na Saray Kalangweran so Inkasikara

Pian nawalaan na pikakabat iray telek nipaakar ed si Jehova tan ed si Jesus tan makapankurang  ira ed dalan a parad bilay, kaukolan so pirmin pansagpot na arum niran boluntaryo. (Juan 17:3) Pian nadampot iyan kalat, pigara ed saray Tasi nen Jehova so manaaral na sign language tan natutumangan ira na makapaliket iran eksperiensya.

Ginawan kalat na sakey a 15 años, a si Park In-sun, so panaral na sign language. Pian nagawaan iya, sikatoy nan-aprentis ed sakey a pabrika a mantratrabaho ditan so sakey a grupo na 20 a telek a totoo. Sikatoy maapit ya akikimey ed sikara diad loob na waloran bulan pian naaralan to so lenguahe tan say panagnonot na telek. Kayari sakey taon, sikatoy nagmaliw a regular payunir, odino sigpot-panaon a manangiyabawag na Panarian, tan akikimey ed sakey a grupo na saray telek ya interesado ed katuaan ed Biblia. Mapmaples a binmaleg so grupo, tan ag-abayag et masulok a 35 so inmatendi ed saray miting ed Simba.​—Salmo 110:3.

Kayari na satan, saray Makristinon miting so biig ya inyareglo ed sign language diad Seoul parad unonan pankanawnawa. Nanlingkor si agin Park In-sun bilang espisyal payunir ed sayan onlalaknab a grupo. Sikatoy marundunong la natan ed sign language. Leleg na pigaran bulan, sikatoy angikondukta na 28 panagaral na Biblia ed saray telek. Dakel ed saraya so inmaligwas tan nagmaliw iran Tasi nen Jehova.

Bilang resulta na sayan maseseg a boluntaryon kimey, aporma so primeron kongregasyon na sign-language diad Seoul nen Oktubre 1976, a walaan na 40 a manangipalapag tan 2 regular payunir. Saya so amapeles na kimey ed arum niran syudad ed Korea. Dakel a telek so naeerasan ed maong a balita tan manaalagar a nadalaw.

Pankikimey Diad Limog na Saray Telek

Nayarin pankelawan yo no panon a naroromog iray telek. Dakel ed sikara so naroromog panamegley na pangikakabat ed sikara na arum. Inasinggeran met iray akanggawa na lokal a lakoan na belas, tan inter da so kangaranan tan address na saray telek. Ontutulong so pigaran opisina na gobierno diad pangitatarya na saratan ya impormasyon. Maaligwas a tuloy so makulin pangokobre ed teritoryan panaayaman na saray telek lapud, asabi panaon, aporma so apatiran kongregayon na sign-language. Dakel a Kristianon kalangweran so apaseseg a manaral na sign language.

Saray espisyal payunir a ministro ya akaaral na sign language so imbaki na sangan opisina na saray Tasi nen Jehova a mikimey ed saray kongregasyon. Aganggano ni, saray nangraduar ed Ministerial Training School so niasain ed sarayan kongregasyon tan amabiskeg ed sikara diad espiritual a paraan.

Walaray kairapan a nepeg a talonaan. Say panlingkor ed sarayan teritorya et mankaukolay pansagpot pian natalosan so kultura na saray telek. Sikaray prangkan tuloy ed panagnonot tan kakikiwas. Pakabiglaan iya no maminsan na totoo tan nayarin sengegan na agpakapantatalosan. Niarum ni, sano mangiyaral na Biblia iray Tasi ed saray telek, kaukolan a tulongan da iran magmaliw a marunong ed mismon lenguahe ra tan pasesegen ira a palaknaben so mismon programa ra ed panagbasa tan panagaral.

Diad inagew-agew a kimey da, saray telek so nipapaarap ed saray kairapan a kaslakan ya agkabat na arum. Mabetbet a baleg iran problema parad sikara so pitalosan ed saray opisina na gobierno tan saray pasilidad a mangaasikaso ed bunigas, anggan saray simplin transaksion  ed negosyo. Lapud saray Tasi ed asingger iran kongregasyon so maaron ontutulong, naeekperiensya na saray telek so peteg ya impanaagi diad loob na Kristianon kongregasyon.​—Juan 13:34, 35.

Walaan na Saray Resulta so Impormal a Panagtasi

Diad Pusan, say mamaabalaten a syudad a manunan daungan ed Korea, nabet na sakey a Tasi so duaran telek a lalaki ya onia so insulat da ed sakey a piraso na papel: “Labay mi so Paraiso. Labay min amtaen iray teksto a manasaglawi ed bilay ya andi-anggaan.” Insulat na agi so address da tan inyuksoy toy ondalaw ed sikara. Sanen linma, asabian to so dakdakel a telek ed sakey a kuarto a manaalagar pian ondengel ed mensahe na Panarian. Sayan eksperiensya so amakiwas ed sikaton manaral na sign language. Ag-abayag et aporma so kongregasyon na sign-language diad Pusan.

Sakey ya agin laki ed satan a kongregasyon so akaimano ed duaran telek a lalaki a mansesenyasan tan inasinggeran to ra. Sanen naamtaan ton kapkapanlapu ra ed sakey a relihyoson pantitipon, inimbitaan to ira diad Kingdom Hall ed oras na alas-dos ed ngarem diad saman lanlamang ya agew. Sikaray linma, tan nigapo so panangiyaral na Biblia. Ag-abayag, say 2 so inmatendi diad distriton kombension a kaiba so 20 a kakaaro ran telek. Pigara ed satan a grupo so angidedika na bilay da ed si Jehova. Duara so nagmaliw a matatken ed kongregasyon tan sakey a ministeryal a lingkor diad saray kongregasyon na sign-language.

 Atumangan so Determinasyon

Lapud arawdawi so panaayaman na pigaran telek a totoo ed dinanman a kongregasyon na sign-language, mabetbet a kaukolan so baleg a sagpot tan determinasyon pian regular a nitarya ed sikara so espiritual a tagano a manlalapud Biblia. Alimbawa, walay sakey a 31 años a lakin say anapan to et panagsigay ed sakey ya isla. Arengelan to so mensahe na Biblia ed agi ton laki, a dinalaw na saray Tasi nen Jehova. Lapud gunaet ton napenek so espiritual a pankaukolan to, say telek a managsigay so nambiahe na 16 kilometro panamegley na baloto a mamaarap ed Tongyoung City, diad mamaabalaten a baybay na Korea. Ginawa to itan pian makapinengneng ed sakey ya espisyal payunir ed kongregasyon na sign-language diad Masan City. Kada Lunes et manbiabiahe iyan espisyal payunir na 65 kilometro pian mangiyaral labat na Biblia ed say telek a managsigay.

Pian naatendian to so miting ed Simba diad Masan City, say telek ya iyaaralan na Biblia so kaukolan a manbiahe na 16 kilometro panamegley na baloto insan manbiahe ni 65 kilometro panamegley na bus. Maabig so resulta na determinasyon to. Diad loob na pigaran bulan, sikatoy inmaligwas ed sign language, a dakel ni so naaralan ton alpabeto na Korea, tan say sankaimportantian et naaralan to so mogmon paraan a napabiskeg so relasyon to ed si Jehova. Lapud momoriaen ton importante iray miting tan say regular a panagpulong, sikatoy inmalis ed teritorya na kongregasyon na sign-language. Kasin mainomay itan? Andi. Kaukolan ton taynanan so trabaho to bilang managsigay a pakakalmoan to na anggad $3,800 dolyar a binulan, balet atumangan so determinasyon to. Diad inyaligwas to ed katuaan, sikatoy abautismoan tan natan et maliket a manlilingkor ed si Jehova kaiba so pamilya to.

Panagpatalos Parad Saray Telek

Mabetbet a nipapasabi so maong a balita na Panarian panamegley na pangitongtong. Balet, pian nipasabi ed mas suston paraan so mensahen manlalapud Salitay Dios, importante a niparungtal so bangat na Biblia ed mas permanentin nengneng. Kanian, nen inmunan siglo et saray atalitalin lalaki so angisulat ed saray libro tan sulsulat. (Gawa 15:22-31; Efeso 3:4; Colosas 1:2; 4:16) Diad panaon tayo et nitatarya so daakan ya espiritual a tagano panamegley na saray libro tan arum niran publikasyon na Kristiano. Saraya so nipapatalos ed nilasus a lenguahe, a kabiangan so nanduruman sign language. Pian nagawaan iya diad Sign Language na Korea, say sangan opisina so walaan na departamento na panagpatalos parad sign-language. Say video department so mamapawala na saray video a sign-language. Saya so manusustuni ed espiritual a pankaukolan na saray telek a manangiyabawag na maong a balita tan saray interesado diad saray kongregasyon ed interon Korea.

Anggaman dakel la so marunong ed sign language tan ontutulong ed panagpawala na saray video, kaslakan a saray sankamaongan a managpatalos et saray ateng na telek ya ugugaw. Manlapud inkaugaw et naaralan da la so sign language. Saraya so aglambengat mansesenyas a susto noagta sikaray mangiiter met na masimoon a kabaliksan tan panangipurek ed mensahe panamegley na saray andawes tan ipapatnag na lupa ra, kanian nasasabi ra so nonot tan puso.

Unong a naiimano, saray kombension tan asamblea ed sign language so regular la natan a nagagawa diad Korea. Baleg a kimey, gastos, tan sagpot so kakaukolanen pian nagawaan iya. Balet, saramay inmatendi so misalsalamat ed sayan uksoyan. Kasumpal na sarayan pantitipon, dakel so nansiansia ni ed assembly hall, a labay dan itultuloy so maabig a panlilimog tan repasoen so nitaryan espiritual a tagano. Tua a walaray angat diad panlingkor ed sayan nikaduman grupo, balet satan so panlalapuan na espiritual iran bendisyon.

[Litrato ed pahina 10]

Saray video a sign-language a pinawala diad Korea: “What Does God Require of Us?,” “Appreciating Our Spiritual Heritage,” “Warning Examples for Our Day,” tan “Respect Jehovah’s Authority”

[Saray litrato ed pahina 10]

Manpakawanan manlapud leksab: Panamawala na video a sign-language diad sangan Korea; pangipaparaan ed saray senyas parad saray teokratikon termino; grupo na managpatalos ed sign-language; pandidikta ed managsenyas legay pamapawala na video