Wala Tay Ebidensya na Arkeolohiya ed Kiwawala nen Jesus?

“NISULAT ed Bato so Ebidensya Nipaakar ed si Jesus.” Ontan so nipalapag ed apis na Biblical Archaeology Review (Nobyembre/Disyembre 2002). Satan ya apis so mangipaparungtal ed sakey a kahon na pukel, odino osuaryo, a gawa ed baton-dena ya aromog ed Israel. Saray osuaryo so malaknab ya inusar na saray Judio leleg na antikey a panaon ed baetan na inmunan siglo K.K.P. tan 70 K.P. Walay kakanaan a tuloy na saya lapu ed Aramaikon inskripsion ed diking na satan. Binidbir na saray iskolar so nabasa: “Si Santiago, ya anak nen Jose, ya agi nen Jesus.”

Unong ed Biblia, si Jesus a taga Nazaret et walay agi ton manngaran na Santiago ya impasen ya anak nen Jose, ya asawa nen Maria. Sanen nambangat si Jesu-Kristo diad mismon baley to, nantepet iray nikelawan a dumerengel: “Agta saya man so anak na karpentero? Agta say ina to et tatawagen a Maria, tan saray agi ton lalaki et sikara di Santiago tan Jose tan Simon tan Judas? Tan saray agi ton bibii, agta kaiba tayo iran amin?”​—Mateo 13:54-56, NW; Lucas 4:22; Juan 6:42.

On, say inskripsion ed osuaryo so mitukoyan ed deskripsion ed si Jesus a Nazareno. No say Santiago ya abitla ed inskripsion et agi ed ina nen Jesu-Kristo, sirin satan so “sankadaanan ya ebidensya na arkeolohiya a nilikud ed naromog ed Biblia nipaakar ed si Jesus,” so matalek ya imbaga nen André Lemaire, sakey ya autoridad nipaakar ed kadaanan iran inskripsion tan say nansulat ed asalambit ed gapo ya artikulo ed Biblical Archaeology Review. Inkuan na editor na magasin a si Hershel Shanks a say osuaryo “so bengatlan nademet tan nanengneng manlapud panaon ni na sakey a sankaimportantian a personan nambilay diad dalin.”

Balet, kaslakan la nen inmunan siglo so amin a taloran ngaran a mabitabitar a nisulat ed osuaryo. Kanian posibli a wala so pamilyan walaan met na membro a Santiago, Jose, tan Jesus likud ed pamilya nen Jesu-Kristo. Oniay padesir nen Lemaire: “Diad Jerusalem legan na duaran kailalakan sakbay na 70 K.P., posiblin . . . wala so manga 20 totoo a nayarin natawag a ‘Santiago/Jacob ya anak nen Jose ya agi nen Jesus.’” Anggaman ontan, moriaen to a 90-porsiento so posibilidad a say Santiago ya akasulat ed osuaryo et agi ed ina nen Jesu-Kristo.

Walay sananey nin katuaan no akin a panisiaan na arum a say Santiago diad inskripsion et agi ed ina nen Jesu-Kristo. Anggaman kaslakan a nasalambit so ama na inatey ed ontan iran inskripsion, mataltalag a nabitla so ngaran na agi. Sirin, panisiaan na arum ya iskolar  a sayan Jesus et nayarin importantin maong a too, kanian isipen da a sikato si Jesu-Kristo, say angiletneg na Inkakristiano.

Kasin Autentiko so Osuaryo?

Anto so osuaryo? Sakey itan a kahon, odino kaban, a pangikakargaan ed saray pukel na toon inatey sano abulok lay laman to diad angiponponan ya ungib. Dakel ya osuaryo so tatakewen diad saray ponponan ed Jerusalem. Say kahon a walay inskripsion a Santiago so aromog diad lakoan na saray antigo, aliwan diad opisyal a panagkotkotan. Ibabaga a say makankayarian ed sayan antigo et sinaliw toy pigan lasus a dolyar nen dekada ni na 1970. Kanian, misteryoso so nanlapuan na osuaryo. “No agmo nibaga no iner so nanlapuan na sayan antigo tan no ngalngali lan 2,000 a taon itan, agmo natonton so pikonektaan na satan a bengatla ed saray totoon nayarin sinalambit na satan,” kuan nen Propesor Bruce Chilton na Bard College, New York.

Pian nasapotan so kakulangan na ebidensya na arkeolohiya, impawit nen André Lemaire so kahon diad Geological Survey na Israel. Apekderan na saray managsukimat ditan a say osuaryo so gawa ed baton-dena nen inmuna odino komaduan siglo K.P. Inreport da ya “anggapoy pakapatnagan ya inusaran itan na modernon kagawaan odino instrumento.” Sakey ni, saray iskolar na Biblia ya ininterbio na The New York Times so angibalikas na opinyon da a “posiblin mabiskeg so sirkumstansyal ya ebidensya a mamapaneknek ed si Jesus, balet ta sirkumstansyal lambengat.”

Inkomento na magasin a Time a “ngalngalin anggapo so edukadon too ed sayan panaon a manduaruwan nambilay dia si Jesus.” Anggaman ontan, moriaen na dakel a nepeg a walay ebidensya ed kiwawala nen Jesus nilikud ed Biblia. Kasin say arkeolohiya so nepeg a pangibasian na sakey ed pananisia to ed si Jesu-Kristo? Anto so ebidensya tayo nipaakar ed inkamaawaran na “sakey a sankaimportantian a personan nambilay diad dalin”?

[Picture Credit Lines ed pahina 3]

Kawigi, Osuaryo nen Santiago: AFP PHOTO/J.P. Moczulski; kawanan, inskripsion: AFP PHOTO/HO