‘Nia! Sikato so Dios Tayo’

Say impormasyon a siningbat ed sarayan duaran artikulo so nibase ed libron Onapit ed si Jehova, ya impaway ed saray distriton kombension a ginawa ed interon mundo legan na 2002/03.​—Nengnengen so artikulon “Satan so Amenek ed Pankaukolan na Pusok,” ed pahina 20.

“Nia, saya sikato so Dios tayo, sikato so inalagar tayo, tan sikato ilaban to itayo. Saya sikato si Jehova.”​—ISAIAS 25:9.

1, 2. (a) Panon so impanawag nen Jehova ed si patriarkan Abraham, tan anto so nayarin panumamengan tayo ed satan? (b) Panon itayon papaseguroan na Biblia a posibli so pakawalaan na maapit a relasyon ed Dios?

 “KAAROK.” Ontan so impanawag nen Jehova, say Manamalsa ed tawen tan dalin, ed si patriarkan Abraham. (Isaias 41:8) Isipen pa​—sakey labat a too a nanggayaga ed impagmaliw ton kaaro na Soberanon Katawan ed uniberso! Nayarin panuumamengan yo, ‘Posibli kasi ed siak so pakawalaan met na ontan ya inkaapit ed Dios?’

² Ipapaseguro ed sikatayo na Biblia a posibli so pakawalaan na ontan a maapit a relasyon ed Dios. Si Abraham so awalaan na ontan a maapit a relasyon lapud “sinisia to so Dios.” (Santiago 2:23) Ontan met natan, ‘say pikakaaro [nen Jehova] wala ed saray maptek.’ (Uliran 3:32) Diad Santiago 4:8, oniay impaseseg ed sikatayo na Biblia: “Singger kayo ed Dios, et sikato so onsingger naani ed sikayo.” Mabitar a no manggawa itayo na saray kundang pian onapit ed si Jehova, sikato so onkiwas. On, sikato so onapit ed sikatayo. Balet kasin kabaliksan na sarayan apuyanan a salita a sikatayo bilang makasalanan tan ag-ayadyarin totoo so unonan manggawa na kundang? Andin balot. Posibli labat so iyapit ed si Jehova lapud say maaron Dios tayo so nanggawa la na duaran importantin kundang.​—Salmo 25:14.

3. Anton duaran kundang so ginawa la nen Jehova pian posibli ed sikatayo a panggayagaan so pakapikaaro ed sikato?

³ Unona, inyuksoy nen Jehova a si Jesus et “iter toy bilay to a panondon ed amayamay.” (Mateo 20:28) Lapud satan a dondon bagat, posibli ed sikatayo so onapit ed Dios. Oniay ibabaga na Biblia: “Aroen tayo ta sikato so angaro ed sikatayo ya inmuna.” (1 Juan 4:19) On, lapud say Dios et “angaro ed sikatayo ya inmuna,” inletneg to so pundasyon pian makapikaaro tayo ed sikato. Komadua,  imparungtal la ed sikatayo nen Jehova so nipaakar ed inkasikato. Diad antokaman a pikakaaro a napawala tayo, say relasyon so nibase ed peteg a pikabat ed arum a too, a pandinayewan tan papablien so nikadkaduma iran walna to. Konsideraen pa no anto so kabaliksan na saya. No si Jehova et Dios ya akaamot, tan agnayarin kabaten, agtayon balot nayarin onapit ed sikato. Ingen, imbes ya iyamot toy inkasikato, labay nen Jehova a sikatoy nakabat tayo. (Isaias 45:19) Panamegley na Salita to, say Biblia, imparungtal toy inkasikato diad saray terminon natalosan tayo​—prueba ya agto itayo lambengat inaro noagta labay ton sikatoy nakabat tan aroen tayo bilang mangatatawen ya Ama tayo.

4. Anto so liknaan tayo nipaakar ed si Jehova no lalon nakakabat tayo iray kalidades to?

⁴ Kasin akanengneng kayo lay melag ya ugaw ya ituturo to ed saray kakaaro to so ama to insan malikeliket tan ikikinon ton inkuan, “Tatay ko iman”? Saray managdayew ed Dios so walaan na amin a rason pian ontan met so panlikna ra nipaakar ed si Jehova. Ipapasakbay na Biblia so nipaakar ed panaon sano oniay ikelyaw na matoor a totoo: “Nia, saya sikato so Dios tayo.” (Isaias 25:8, 9) No lalon natebek tayo iray kalidades nen Jehova, lalon nalikna tayo a walaan itayo na sankaabigan ya Ama tan sankaapitan a Kaaro. On, say pakatalos ed saray kalidad nen Jehova so mangiter ed sikatayo na dakel iran rason pian lalon onapit ed sikato. Kanian usisaen tayo no panon ya ipaparungtal na Biblia so manuna iran atributos nen Jehova​—pakapanyari, inkahustisya, kakabatan, tan aro. Diad sayan artikulo, singbaten tayo so talora ed sarayan kalidad.

‘Nasnaskey ed Pakapanyari’

5. Akin a matukoy a si Jehova lambengat so natawag a “Makapanyarin-amin,” tan diad anton paraan ya uusaren to so makapakelaw a pakapanyari to?

⁵ Si Jehova so ‘nasnaskey ed pakapanyari.’ (Job 37:23) Ibabaga na Jeremias 10:6: “Anggapo so anggan siopa a singa sika, O Jehova; sika so baleg, tan say ngaran mo baleg dia ed pakapanyari.” Aliwan singa ed antokaman a pinalsa, si Jehova so walaan na andi-geter a pakapanyari. Lapud satan, sikato lambengat so natawag a “Makapanyarin-amin.” (Apocalipsis 15:3) Uusaren nen Jehova so makapakelaw a pakapanyari to pian mamalsa, maneral, manalimbeng, tan mangipawil. Konsideraen so duara lambengat ya alimbawa​—say pakapanyari ton mamalsa tan manalimbeng.

6, 7. Panon kapetang so agew, tan anton importantin katuaan so papaneknekan na satan?

⁶ Sano akatanyareg kayo ed pataktak ed mansasnit a tiagew, anto so nalikna yo ed baog yo? Say petang na agew. On, nalilikna yo so epekto na pakapanyari nen Jehova a mamalsa. Panon kapetang so agew? Diad pinagkasentro na satan, say temperatura et ngalngali 27 milyon degrees Fahrenheit. No nayarian yoy mangala na anggan singa kamelag na uloy aspili manlapud pinagkasentro na agew tan iyan yo itan diad dalin, agyo nayarian so ontanyareg ed distansyan 140 kilometro manlapud satan a melag a panlalapuan na petang! Kada segundo, say agew so mangibubuga na enerhiya a singa kakasil na isasabog na nilasus milyon iran bomba nuklear. Ingen, say dalin so ontetelek ed dugarugan distansia manlapud satan ya ekstraordinaryon thermonuclear a palbaan. No asingsingger, say dalin so napiktat;  no arawdawi, satan so onkigtel. Balangla ed saratan a dua et magmaliw ya andiay-bilay so planeta tayo.

⁷ Anggaman akadepende ed agew so mismon bilay na dakel a totoo, satan so ibabaliwala ra. Kanian, nasasaew da no anto so ibabangat ed sikatayo na agew. Oniay kuan na Salmo 74:16 nipaakar ed si Jehova: “Sika intadiam so silew tan say banwa.” On, say agew so mangiglogloria ed si Jehova, say “Nanggawa ed tawen, tan dalin.” (Salmo 146:6) Anggaman ontan, sakey labat itan ed dakerakel iran pinalsa a mangibabangat ed sikatayo nipaakar ed mabisbiskeg a pakapanyari nen Jehova. No lalon naaralan tayo so nipaakar ed pakapanyari nen Jehova a mamalsa, lalon onaralem so panangigalang tayo ed sikato.

8, 9. (a) Anton matamoy ya ilustrasyon so mangipabitar ed sikatayo ed inkamabulos nen Jehova a manalimbeng tan mangasikaso ed saray mandadayew ed sikato? (b) Say managpastol ed panaon na Biblia so angitarya na anton panangasikaso ed saray karnero to, tan anto so ibabangat na saya ed sikatayo nipaakar ed Baleg a Managpastol tayo?

⁸ Uusaren met nen Jehova so mabisbiskeg a pakapanyari to pian salimbengan tan asikasoen iray lingkor to. Inusar na Biblia so pigaran malinew ingen ta makapatenyeg iran ilustrasyon pian deskribien iray sipan nen Jehova nipaakar ed mananalimbeng a panangasikaso to. Alimbawa, imanoen so Isaias 40:11. Inyaliling nen Jehova so inkasikato ed sakey a managpastol tan saray totoo to bilang karnero. Oniay nabasa tayo: “Pankabkaben to naani so ayep to a singa sakey a pastol, tiponen to naani so saray kordero ed taklay to, tan awiten to ra ed pagew to, tan guyoren to a makalna naani so saray walaan na kilaw.” Sarag yo kasin ilitrato ed nonot yo so adeskribe ed satan a bersikulo?

⁹ Walaray ayayep a nakaukolan ya asikasoen a singa say maamon karnero. Say managpastol ed panaon na Biblia so kinaukolan a makpel pian nasalimbengan to so karnero to manlapud saray lobo, oso, tan leon. (1 Samuel 17:34-36; Juan 10:10-13) Balet walaray pankanawnawa a sano say pananalimbeng tan panangasikaso ed karnero so mankaukolan na inkamatamoy. Alimbawa, sano mananak so sakey a karnero ya arawi ed kasimpukokan, panon a protektaan na managpastol so andiay-depensan kapangiyanak a kordero? Alsaen to itan, a nayarin diad loob na pigaran agew, dia “ed pagew to”​—diad akabuskag iran tupi na akinpaway a kawes to. Balet, panon a say melag a kordero so makakar ed pagew na managpastol? Nayarin onasingger so kordero ed managpastol tan sapsapigaren to ni ingen so bikking to. Balet, say managpastol so onyuko, tan alsaen to so kordero, tan maligen ton iyan diad pagew to. Agaylan abig a panangilitrato na inkamabulos na Baleg a Managpastol tayo a manalimbeng tan mangasikaso ed saray lingkor to!

10. Anton proteksion so itatarya nen Jehova natan, tan akin a nagkalalo lan importante so ontan a proteksion?

¹⁰ Si Jehova so aglambengat angisipan a mangitarya na proteksion. Diad panaon na Biblia, impatnag to la ed mamilagron paraan a nayarian ton ‘iliktar iray masantos manlapud tukso.’ (2 Pedro 2:9) Komusta met natan? Amta tayo ya agto uusaren so pakapanyari to pian salimbengan itayo manlapud amin a kalamidad natan. Balet, itatarya to so bengatlan mas importante​—say espiritual a proteksion. Salimbengan itayo na maaron Dios manlapud espiritual a pakasakitan diad panamegley na panginlong to ed sikatayo na bengatlan nakaukolan tayo pian nasungdoan tayo iray subok tan naalwaran tayo so relasyon tayo ed sikato. Alimbawa, oniay ibabaga na Lucas 11:13: “No sikayo sirin, anta mauges kayo, amta yo so mangiter na saray maong a panangaro ed saray anak yo agkasi nagkalalo a say Ama yo a mangatatawen mangiter na espiritu santo ed saray onkerew ed sikato”! Satan a mabiskeg a puersa so manginlong ed sikatayo pian natalonaan tayo so antokaman a subok odino problema a kidudungetan tayo. (2 Corinto 4:7) Diad ontan et pansiasiansiaen nen Jehova so bilay tayo, ya aliwa lambengat a diad loob na pigaran taon, noagta diad andi-anggaan. Sinononot ed satan ya ilalo, nayarin moriaen tayo so antokaman a paniirap ed sayan sistema bilang ‘maganggano tan anlemew.’ (2 Corinto 4:17) Agta napaapit itayo ed Dios a simamaaron manguusar ed pakapanyari to nisesengeg ed sikatayo?

‘Si Jehova et Manangaro na Inkahustisya’

11, 12. (a) Akin ya onaapit itayo ed si Jehova lapud inkahustisya to? (b) Anto so konklusyon nen David nipaakar ed inkahustisya nen Jehova, tan panon itayon naligliwa ed sarayan apuyanan a salita?

¹¹ Gagawaen nen Jehova so maptek tan makatunongan, tan lawas to itan a gagawaen, ya anggapoy  panaglabi. Say inkahustisya na Dios et, aliwan agmililikna tan maruksan kalidad a mangablog ed sikatayo, noagta satan so makapadinayew a kalidad a mamaapit ed sikatayo ed si Jehova. Malinew ya idedeskribe na Biblia so makapaligsay-puson nengneng na sayan atributo. Konsideraen tayo sirin so taloran paraan a pangaagamil nen Jehova ed inkahustisya to.

¹² Unona, say inkahustisya so mamapakiwas ed sikato a mangipatnag na katooran ed saray lingkor to. Personal a naeksperiensya nen salmistan David iyan aspekto na inkahustisya nen Jehova. Manlapud dilin eksperiensya to tan ed impanaral to ed saray dalan na Dios, anto so konklusyon nen David? Oniay inyabawag to: “Si Jehova aroen to so kaalasan [“manangaro na inkahustisya,” NW], tan agto ikaindan so sasantos to; niapiger ira lawas.” (Salmo 37:28) Agaylan makapaligliwan panamaseguro! Agbalot kaindanan na Dios tayo iramay matoor ed sikato. Makapanilalo tayo sirin ed maapit a pikakaaro to tan ed maaron panangiyansakit to. Gagarantiyaan itan na inkahustisya to!​—Uliran 2:7, 8.

13. Panon a say panangiyansakit nen Jehova ed saray pakaskasi so pinmatnag ed Ganggan ya inter to ed Israel?

¹³ Komadua, say inkahustisya na Dios so onkikiwas ed saray pankaukolan na saray maniirap. Say panangiyansakit nen Jehova ed saray pakaskasi so pinmatnag ed Ganggan ya inter to ed Israel. Alimbawa, say Ganggan so angiter na saray probisyon pian ipaseguro a saray ulila tan balo so naasikaso. (Deuteronomio 24:17-21) Lapud amta to no panon kairap so bilay na saratan a pamilya, si Jehova a mismo so nagmaliw a singa-aman Ukom tan Mananalimbeng da. (Deuteronomio 10:17, 18) Pinasakbayan to iray Israelita a no biktimaen da iray agmakadepensan bibii tan ugugaw, dengelen to so ey-ey na saratan. ‘Say sanok ko so ompetang naani,’ so kuanto, unong a nikurit ed Exodo 22:22-24. Anggaman say sanok et aliwan kabiangan na saray manunan kalidad na Dios, sikato so asagyat ya onsanok ed matunong a paraan makasengeg ed saray ginagalan ag-inkahustisya, nagkalalo la sano saray biktima et saray agmakadepensa.​—Salmo 103:6.

14. Anto so peteg a makatantandan ebidensya na agpanangidumaduma nen Jehova?

¹⁴ Komatlo, diad Deuteronomio 10:17, ipapaseguro ed sikatayo na Biblia a si Jehova et “anggapo so iduduma to a too, nisay mangawat na tumang.” Aliwan singa ed dakel a totoo a walaay pakapanyari odino impluensya, si Jehova so agnaimpluensyaan na materyal a kayamanan odino akinpaway ya itsura. Sikato so andian na panangidumaduma odino paboritismo. Say makatantandan ebidensya na agto pangidumaduma et saya: Say pankanawnawa a magmaliw a tuan managdayew ed sikato, a walaay ilalon andi-anggaan a bilay, so aliwa lambengat a nigeter ed pigaran matalonggaring a totoo. Imbes, oniay kuan na Gawa 10:34, 35: “Say Dios anggapo so pangiduma to ed saray totoo; noag ingen dia ed balang nasyon akoen to so antakot ed sikato tan manggawa na matunong.” Lukas iyan ilalo parad amin, antokaman so kipapasen da ed sosyedad, kolor na baog da, odino bansa a panaayaman da. Agta satan so tuan inkahustisya diad matalonggaring a tuloy a paraan? On, onapit itayo ed si Jehova lapud magmaong a pakatalos ed inkahustisya to!

‘O say Kaaralman na Kakabatan na Dios!’

15. Anto so kakabatan, tan panon itan ya ipapatnag nen Jehova?

¹⁵ Apakiwas si apostol Pablo a mangikelyaw, unong a nikurit ed Roma 11:33: “O say kaaralman na . . . kakabatan tan pakaamta na Dios!” On, legan tayon momorekdeken so nanduruman aspekto na malaklaknab a kakabatan nen Jehova, say kapusoan tayo so napano na aralem a panangigalang. Balet, panon tayon ukeran iyan kalidad? Say kakabatan et say pangiyaplika ed pikakabat, pakatebek, tan pakatalos pian mamawala na sankaabigan a resulta. Unong ed malaklaknab a pikakabat to tan araldalem a pakatalos to, si Jehova so lawas manggagawa na sankaabigan iran desisyon, a susumpalen to iratan panamegley na sankaabigan a kurang.

16, 17. Panon a paneknekan na saray palsa nen Jehova so malaklaknab a kakabatan to? Mangiter na alimbawa.

¹⁶ Anto so pigara ed saray espesipikon ebidensya na malaklaknab a kakabatan nen Jehova? Oniay kuan na Salmo 104:24: “O Jehova, agayla so kinaraklan a saray gawam! Dia ed karunongan so nanggawaan mo ed saraya ya amin: say dalin napno na kaykayamanan mo.” On, no lalo tayon naaralan iray bengatlan ginawa nen Jehova, lalo itayon mandinayew ed kakabatan to. Konsideraen pa labat, dakerakel so naaralan na saray sientista lapud panaaral da ed saray pinalsa nen Jehova! Wala ni  ingen so lawak na engineering, a tatawagen a biomimetics, diad getman pangalig ed saray desinyo a naromog ed saray pinalsa.

¹⁷ Singa bilang, nayarin pankelawan yo so pakaimano ed karakpan na abung-abung na genggeng. Talagan makapakelkelaw so inkadesinyo na satan. Arum a singa-lupok a linat so mas malet ni nen say balatyang, a mas mabiskeg ni nen say materyales na bulletproof vest. Anto so labay ya ibaga na satan? Nonoten pa so linat a pinabaleg a singa la kabaleg na iket ya uusaren na sakey a baloton panag-alay sira. Satan a linat so mabisbiskeg a sarag ton salpoten so ontitikyab a pampasaheron eroplano! On, si Jehova so nanggawa ed satan ya amin a bengatla ‘diad kakabatan.’

18. Panon a napatnagan so kakabatan nen Jehova ed impangusar to ed totoo to a mangikurit ed Salita to, say Biblia?

¹⁸ Say sankabalegan ya ebidensya na kakabatan nen Jehova et naromog ed Salita to, say Biblia. Say makabat a simbawa a naromog ed saray pahina na satan so peteg a mangipanengneng ed sikatayo ed sankaabigan a dalan a panagbilay. (Isaias 48:17) Balet say agnaparaan a kakabatan nen Jehova so nanengneng met ed paraan na inkisulat na Biblia. Panon ya ontan? Diad kakabatan to et pinili nen Jehova ya usaren iray totoo a mangikurit ed Salita to. No inusar to iray angheles pian isulat so apuyanan a Salita to, kasin makapasagyat ed sikayo so Biblia? Tua, nayarian na saray anghel ya ilitrato si Jehova manlapud atagtagey a panmoria ra tan nibalikas da so dilin debosyon da ed sikato. Balet kasin sarag tayon natalosan so panmoria na saray ayadyarin espiritun pinalsa, a say pikakabat, eksperiensya, tan biskeg da et mas atagey nen say panmoria tayo?​—Hebreos 2:6, 7.

19. Anton alimbawa so mangipanengneng a say impangusar ed saray managsulat a totoo so mangiiter ed Biblia na pirmin ligsa tan pakasagyatan?

¹⁹ Say impangusar ed saray managsulat a totoo so mangiiter ed Biblia na pirmin ligsa tan pakasagyatan. Saray managsulat ed satan et lalakin walaan met na liknaan a singa sikatayo. Lapud ag-ira ayadyari, nidunget la ra ed saray subok tan desdes a mipadpara ed sikatayo. Diad arum a kipapasen, sikaran mismo so angisulat ed liknaan tan pibabarangkaan da. (2 Corinto 12:7-10) Kanian insulat da iray salita ya agbalot nibalikas na anghel. Alimbawa, konsideraen iray salita nen David a nikurit ed Salmo 51. Unong ed superscription, insulat nen David iyan salmo kayari na impakagawa toy ambelat a kasalanan. Imbesngaw toy walad puso to, ya imbalikas to so pirmin paneermen to tan kinmerew na panamerdona na Dios. Inkuan na bersikulo 2 tan 3: “Urasan mo ak a maong ed kasulitan ko, tan  linisan mo ak ed kasalanan ko. Ta amtak so saray impakasumpak; tan say kasalanan ko wala a naynay ed arapan ko.” Imanoen so bersikulo 5: “Nia, nipaway ak ed kasulitan; tan dia ed kasalanan innginew ak nen inak.” Inyarum ni na bersikulo 17: “Saray bagbagat ed Dios saray maralit ya espiritu: say sakey a puso a maralit tan mansisibkel, agmo la balbalawen, O Dios.” Agyo kasi nalikna so pandadageyem na nansulat? Agta say ag-ayadyarin too lambengat so makapangibalikas ed saratan a kaermenan?

20, 21. (a) Akin nibaga ya anggaman ed inkausar na saray managsulat a totoo et lugan na Biblia so kakabatan nen Jehova? (b) Anto so singbaten ed ontumbok ya artikulo?

²⁰ Panamegley na impangusar to ed saratan ya ag-ayadyarin totoo, intarya nen Jehova so nakaukolan tayo​—say kuritan ya “impuyan na Dios” ingen ta nisulat itan unong ed panmoria na too a mainomay a natalosan. (2 Timoteo 3:16) On, saratan a managsulat so impuyan na masanton espiritu. Kanian inkurit da so kakabatan nen Jehova, aliwan say mismon kakabatan da. Satan a kakabatan so sigpot a napanmatalkan. Satan so mas atagtagey ni nen say mismon kakabatan tayo kanian sikatayo so maaron pinaseseg na Dios: “Manmatale’ka ed Jehova ed simoon a pusom, tan agka onsaral ed tapew na dili a pakatalos mo: Dia ed saray amin a dalan mo sikato so bidbiren mo, et sikato itonton to so saray basbas mo.” (Uliran 3:5, 6) Say italineng ed satan a makabat a simbawa so mamaapit ed sikatayo ed sankakabatan a Dios.

²¹ Say makapasagyat a tuloy tan alay abig ed amin a kalidades nen Jehova et say aro. Singbaten ed ontumbok ya artikulo no panon so impangipatnag nen Jehova ed aro.

Kasin Nanonotan Yo?

• Antoran kundang so ginawa la nen Jehova pian posibli so pakabayubo tayo ed pikakaaro ed sikato?

• Anto so pigara ed saray alimbawa na pakapanyari nen Jehova a mamalsa tan manalimbeng?

• Diad antoran paraan ya aagamilen nen Jehova so inkahustisya to?

• Panon a napatnagan so kakabatan nen Jehova diad saray pinalsa to ontan met ed Biblia?

[Tepetepet Parad Panagaral]

[Litrato ed pahina 10]

Singa say managpastol a mangaampopo ed kordero diad pagew to, si Jehova so matamoy a mangaasikaso ed saray karnero To

[Litrato ed pahina 13]

Say kakabatan nen Jehova so napatnagan ed paraan na inkisulat na Biblia