Propesiya nen Isaias​—Liwawa Parad Amin a Katooan II

Kapitulo Beinte Tres

‘Sakey a Balon Ngaran’

Isaias 62:1-12

1. Anton panamaseguro so nikurit ed Isaias kapitulo 62?

 PANAMASEGURO, ligliwa, ilalo a pakapawil​—satan so nakaukolan na saray naaandiay ilalon Judio diad Babilonia. Apalabas la so pigaran dekada manlapu la nen ageray so Jerusalem tan say templo to. Say Juda a manga 800 kilometro manlapud Babilonia, so siansia nin nankibalatar, tan singano nilingwanan la nen Jehova iray Judio. Anto so pakainawaan da? Saray sipan nen Jehova a sikaray pasempeten to ed ayaman da tan abuloyan to iran mangipawil ed tuan panagdayew. Diad ontan et saray deskripsion a singa say “apaulyan” tan “kibalatar” so nasalatan na kangaranan a mangipapabitar na panangabobon na Dios. (Isaias 62:4; Zacarias 2:12) Say kapitulo 62 na Isaias so napno na ontan iran sipan. Balet, singa met ed arum iran propesiya nipaakar ed panangipawil, sayan kapitulo so aglambengat manisingbat ed kibulos na saray Judio diad impakakautibo ra ed Babilonia. Diad babaleg a kasumpalan na satan, ipapaseguro ed sikatayo na Isaias kapitulo 62 a say kilalaban na espiritual a nasyon nen Jehova, say “Israel na Dios,” so segurado.​—Galacia 6:16.

Si Jehova so Agmansiasiansian Andi-esel

2. Diad anton dalan ya impanengneng lamet nen Jehova so panangabobon to ed Sion?

² Say Babilonia so atalo nen 539 K.K.P. Kayari na saman, ingganggan nen Arin Ciro na Persia ya onsempet la iray matakot ed Dios a Judio ed Jerusalem tan ipawil da so panagdayew ed si Jehova. (Esdras 1:2-4) Nen 537 K.K.P., akasabi iray inmunan pinmawil a Judio ed bansa ra. Impanengneng lamet nen Jehova so panangabobon to ed Jerusalem, unong a napatnagan ed inkaligsa na mapropetikon deklarasyon to: “Lapu ed kakanaan na Sion agko naani bembenan so deen ko, tan lapu ed kakanaan na Jerusalem agak manpainawa angga ed ompaway so inkatunong a singa sinag, tan say kilaban to a singa sakey a silew a mandarlang.”​—Isaias 62:1.

3. (a) Akin ya impulisay nen Jehova ed kaunoran so mangaraldalin a Sion, tan siopa so sinmalat ed satan? (b) Anto so agawan inkasipa tan kapigan itan agawa, tan diad anton peryodo so pambibilayan tayo natan?

³ Nen 537 K.K.P., tinoor nen Jehova so sipan to ya ipawil so Sion, odino Jerusalem. Naeksperiensya na saray manaayam ditan so panangilaban to, tan nisindag a maliwliwawa so inkatunong da. Balet, diad saginonor et kinmasipa ira lamet ed puron panagdayew. Diad kaunoran, impulisay da si Jesus bilang Mesias, kanian sikaray intalirak nen Jehova bilang pinili ton nasyon. (Mateo 21:43; 23:38; Juan 1:9-13) Pinalesa nen Jehova so sakey a balon nasyon, say “Israel na Dios.” Sayan balon nasyon so nagmaliw ya espisyal a totoo to, tan nen inmunan siglo, saray membro na satan so maseseg ya angipulong ed maong a balita diad interon mundo ed saman a panaon. (Galacia 6:16; Colosas 1:23) Balet, makapaermen ta kayari impatey na saray apostol, walaray kinmasipa ed tuan relihyon. Bilang resulta, atibukel so apostatan klase na Inkakristiano, unong a naimatonan natan ed Kakristianoan. (Mateo 13:24-30, 36-43; Gawa 20:29, 30) Diad pigaran siglo, naabuloyan so Kakristianoan a mangiter na kababaingan ed ngaran nen Jehova. Balet diad kaunoran, nen 1914, ginmapo so “taon na abig-linawa” nen Jehova, tekep na manunan kasumpalan na sayan parte na propesiya na Isaias.​—Isaias 61:2, NW.

4, 5. (a) Siopa natan so isisimbolo na Sion tan saray anak to? (b) Diad anton dalan ya inusar nen Jehova so Sion pian ‘say kilalaban to et singa sakey a silew a mandarlang’?

⁴ Natan say sipan nen Jehova ya ipawil so Sion et asumpal la ed mangatatawen ya organisasyon to, say “Jerusalem a wala ed tagey,” ya irerepresenta ed dalin na ananak na satan, saray alanaan na espiritu a Kristianos. (Galacia 4:26) Say mangatatawen ya organisasyon nen Jehova so matoor a katulongan​—maimano, maaro, tan makuli. Agaylan makapaliket ya okasyon sanen inyanak na satan so Mesianikon Panarian  nen 1914! (Apocalipsis 12:1-5) Nagkalautla manlapu la nen 1919, saray mangaraldalin ya ananak na satan so nampulong ed saray nasyon nipaakar ed inkatunong tan kilalaban na satan. Unong ya impasakbay nen Isaias, sarayan ananak so nanliwawa ed kabilungetan a singa banoot, ya isisindag da so liwawa ra.​—Mateo 5:15, 16; Filipos 2:15.

⁵ Si Jehova so interesado a maong ed saray mandadayew ed sikato tan sikatoy agmanpainawa, odino mandeen anggad nasumpal to so amin ya insipan to ed Sion tan ed saray ananak na satan. Saray nakdaan na alanaan tan saray kaulop da ya ‘arum a karnero’ so agmet mandeen. (Juan 10:16) Talagan aktibo ira legan ya iwawanwan da so totoo ed alenleneg a dalan na kilalaban.​—Roma 10:10.

‘Sakey a Balon Ngaran’ ya Inter nen Jehova

6. Anto so getma nen Jehova a para ed Sion?

⁶ Anto so getma nen Jehova a para ed Sion, say mangatatawen a “bii” a kien to, ya irerepresenta na kadaanan a Jerusalem? Oniay inkuan to: “Saray nasyon nanengneng da naani so inkatunong mo, tan saray amin ya arari so gayagam; et sika natawag ka ed balo a ngaran, ya inngaran na sangi nen Jehova naani.” (Isaias 62:2) Legan ya onkikiwas iray Israelita ed inkatunong, saray nasyon so napaskar ya onnengneng a maong. Anggan saray arari et napaskar a mamidbir ya uusaren nen Jehova so Jerusalem tan antokaman so klase na pananguley da, anggapoy kuenta na satan no ikompara ed Panarian nen Jehova.​—Isaias 49:23.

7. Anto so ipapatnag na balon ngaran na Sion?

⁷ Pepekderan natan nen Jehova so dinmuman kipapasen na Sion diad impangiter ed sikato na balon ngaran. Ipapatnag na satan a balon ngaran so abenditon kipapasen tan apagalangan a posisyon a panggagayagaan na mangaraldalin ya ananak na Sion manlapu la nen 537 K.K.P. * Ipapanengneng na satan a bibidbiren nen Jehova so Sion bilang kayarian to. Natan, say Israel na Dios so manliket lapud panggagayagaan ira nen Jehova ed onian paraan, tan mililiket ed sikara so arum a karnero.

8. Diad antoran dalan a pinagalangan nen Jehova so Sion?

⁸ Diad impangingaran nen Jehova ed Sion na sakey a balon ngaran, oniay insipan to: “Sika met naani so sakey a balanget na kalimgasan ed lima nen Jehova, tan maari a diadema ed lima na Dios.” (Isaias 62:3) Intagey nen Jehova so simbolikon asawa ton bii, say mangatatawen a Sion, pian nengnengen tan pagalangan. (Salmo 48:2; 50:2) Say balanget na kalimgasan tan say “maari a diadema” so mangipapabitar a say Sion so akawesan na kagalangan tan pakayari. (Zacarias 9:16) Bilang mangirerepresenta ed mangatatawen a Sion, odino “Jerusalem a wala ed tagey,” say Israel na Dios so nikadkaduman resulta na kiwas na lima na Dios​—say pakapanyari to. (Galacia 4:26) Diad tulong nen Jehova, niletneg na satan ya espiritual a nasyon so makatantandan rekord na katooran tan debosyon. Saray alanaan tan arum a karnero, a minilyon so bilang da, so apaseseg a mangipatnag na nikabkabiig a pananisia tan panangaro. Legan na Milenyon Uley nen Kristo, saray alanaan, ya akaawat na maglorian mangatatawen a tumang, so usaren nen Jehova pian mangagwat ed mandadageyem a pinalsa diad ontan et makagamor ira na andi-anggaan a bilay.​—Roma 8:21, 22; Apocalipsis 22:2.

‘Manliket si Jehova ed Sika’

9. Deskribien so impakapasimbalo na Sion.

⁹ Say impangiter na balo a ngaran et kabiangan na makapalikliket ya impakapasimbalo na mangatatawen a Sion ya irerepresenta na mangaraldalin ya ananak to. Oniay nabasa tayo: “Anggan kapigan agka la naani ningaran a say apaulyan; et agmet la ningaran so dalin mo a kibalatar: noag ingen sika ningaran ka naani na Hephziba [“Manliket Ak ed Sikato,” NW] tan say dalin mo ningaran naani a Beulah [“Kinayarian Bilang Asawan Bii,” NW]; ta si Jehova manliket ed sika, tan say dalin mo naasawaan naani.” (Isaias 62:4) Say mangaraldalin a Sion so nankibalatar manlapu nen nagba itan nen 607 K.K.P. Balet, sikatoy apaseguroan ed saray balikas nen Jehova nipaakar ed kipawil tan pakapan-ayam lamet ed dalin to. Say datin nagba a Sion so aglan balot magmaliw a singa bii a begtebegtew, tan say bansa to so agla mankibalatar. Say inkipawil na Jerusalem nen 537 K.K.P. so mankabaliksan na apasimbalon kipapasen to, a miduma a tuloy ed datin kipapasen to. Inyabawag nen Jehova a say Sion so natawag a “Manliket Ak ed Sikato,” tan say dalin to so “Kinayarian Bilang Asawan Bii.”​—Isaias 54:1, 5, 6; 66:8; Jeremias 23:5-8; 30:17; Galacia 4:27-31.

10. (a) Panon ya apasimbalo so Israel na Dios? (b) Anto so “dalin” na Israel na Dios?

¹⁰ Ginmapo nen 1919, naeksperiensya na Israel na Dios so ontan met a pananguman. Legan na inmunan guerra mundial, saray alanaan a Kristiano  so pinmatnag ya intalirak na Dios. Balet nen 1919, nipawil so naabobonan a kipapasen da, tan adalisay so paraan na panagdayew da. Naapektaan na saya so bangabangat da, organisasyon da, tan kimey da. Say Israel na Dios so sinmabi ed “dalin” to, say espiritual a kipapasen, odino sakop na kimey to.​—Isaias 66:7, 8, 20-22.

11. Panon a saray Judio so angasawa ed ina ra?

¹¹ Diad pangidadanet a nagkalalo ed balo tan naabobonan a kipapasen na totoo to, oniay inyabawag nen Jehova: “Singa say tobonbalo a laki a mangasawa na sakey a birhen, ontan naani pangasawa ed sika na saray anak mo a lalaki; et singa say nobyo manliket ed nobya, ontan naani panliket na Dios ed sika.” (Isaias 62:5) Panon a naasawa na saray Judio, ya ‘anak a lalaki’ na Sion, so ina ra? Diad pantalos a saray akapawil ya ilalak na Sion ya adestiero ed Babilonia so angayarian ed dati ran kabisera a syudad tan nanayam ira lamet ditan. Sanen agawa itan, say Sion so aglan balot nankibalatar noagta sikatoy apano na anak a lalaki.​—Jeremias 3:14.

12. (a) Diad anton dalan ya impabitar nen Jehova a saray alanaan a Kristiano so kabiangan na organisasyon a kasado ed sikato? (b) Panon a say pidedeneng nen Jehova ed totoo to so mangiiter na matalonggaring a pangaligan ed panangasawa natan? (Nengnengen so kahon ed pahina 342 na libro.)

¹² Diad mipadparan paraan, manlapu la’d 1919, saray anak na mangatatawen a Sion so angayarian ed dalin da, say espiritual a kipapasen da, a walaan na mapropetikon ngaran a “Kinayarian Bilang Asawan Bii.” Say Makristianon kimey da ed satan a dalin so pakapatnagan a sarayan alanaan a Kristiano et “totoo a nipaakar ed ngaran [nen Jehova].” (Gawa 15:14) Say pamapawala ra na bunga na Panarian tan pangiyaabawag da ed ngaran nen Jehova so mangipapabitar a panliliketan nen Jehova irayan Kristiano. Impabitar to a sikaray kabiangan na organisasyon a nikasakey ed sikato ed agnabuyak a pankakasakey. Diad panamegley na inkalanaan ed masanton espiritu na sarayan Kristiano, inkibulos manlapud espiritual ya inkakautibo, tan inkausar da a mangipulong ed Panarian ya ilalo na amin a katooan, impatnag nen Jehova a panggagayagaan to ira a singa ed gayaga na nobyo ed nobya.​—Jeremias 32:41.

“Agkayo Manpainawa”

13, 14. (a) Diad kadaanan a panaon, panon a nagmaliw a salimbeng so syudad a Jerusalem? (b) Diad modernon panaon, panon a nagmaliw a “sakey a galang ed dalin” so Sion?

¹³ Say piguratibo a balon ngaran ya inter nen Jehova so angipalikna ed totoo to a sikaray maligen. Amta ran bibidbiren to ira tan kayarian to ira. Natan diad impangusar ed miduman ilustrasyon, tinukoy nen Jehova so totoo to a singa abakoran a syudad: “Siak angipasen ak na saray talayap [“managbantay,” NW] ed tapew na saray bakor mo O Jerusalem; sikara ag-ira naani mandeen anggan kapigan ed agew odino labi: sikayo a mangipanonot ed Jehova, agkayo manpainawa. Tan agyo iter so painawa ed sikato angga ed sikato so mangiletneg, tan angga ed nagawa to so Jerusalem a sakey a galang ed dalin.” (Isaias 62:6, 7) Diad nigetar a panaon nen Jehova kayari na impawil na matoor a nakdaan manlapud Babilonia, say Jerusalem so peteg a nagmaliw a “sakey a galang ed dalin” salanti, sakey ya abakoran a syudad a manasalimbeng ed saray manaayam ditan. Agew-labi a saray managbantay ed saraman a bakor so alerto pian naseguro ra so kaligenan ed syudad tan nipasabi da iray pasakbay a mensahe ed saray mibabaley to.​—Nehemias 6:15; 7:3; Isaias 52:8.

¹⁴ Diad modernon panaon, uusaren nen Jehova so alanaan a managbantay to pian iwanwan iray mauyamon totoo ed dalan a mamaarap ed kawayangan manlapud inkaaripen ed palson relihyon. Sarayan totoo so iimbitaan ya onloob ed organisasyon to, a ditan et nasalimbengan ira manlapud saray makarutak ed espiritual, agmaridios iran impluensya, tan agpanangabobon nen Jehova. (Jeremias 33:9; Sofonias 3:19) Makana ed satan a salimbeng so betang na managbantay a klase, say “matoor tan makabat ya aripen,” a mangitatarya na espiritual a ‘tagano ed manepeg a panaon.’ (Mateo 24:45-47) Say “baleg ya ulop” a mankikimey a kaiba na managbantay a klase so walaan met na makanan betang pian pagmaliwen so Sion a “sakey a galang ed dalin.”​—Apocalipsis 7:9.

15. Panon a mantutultuloy a manlilingkor ed si Jehova so managbantay a klase tan saray kaiba ra?

 ¹⁵ Say panaglingkor na managbantay a klase tan saray kaiba ra so mantutultuloy ni! Napatnagan so interon-kamarerwan walna ra diad maseseg a kimey na minilyon a matoor ya indibidual a susuportaan na saray manbiabiahen manangasikaso tan saray kaasawaan da; saray boluntaryo ed nanduruman ayaman a Bethel tan saray panag-imprintaan a pasilidad na saray Tasi nen Jehova; saray misionaryo; tan saray espisyal, regular tan auxiliary payunir. Niarum ni, sikaray mansasagpot a mangipaalagey na saray balon Kingdom Hall, ondadalaw ed saray mansasakit, ontutulong ed saray totoo a manasagmak na mairap iran kipapasen diad pampapatambal da, tan mangitatarya na nipanpanaon a tulong ed saray biktima na saray desyang odino aksidente. Dakel ed sarayan masakripisyon totoo so kaslakan lan literal a manlilingkor ed “agew tan labi”!​—Apocalipsis 7:14, 15.

16. Diad anton dalan a saray lingkor nen Jehova so ‘agmangiter ed sikato na painawa’?

¹⁶ Saray lingkor nen Jehova so napapaseseg a mantultuloy a manpikasi, a kerewen ed Dios a say ‘linawa to so nagawa, unong ed tawen, ontan met ed dalin.’ (Mateo 6:9, 10; 1 Tesalonica 5:17) Oniay isisimbawa ed sikara: “Agyo iter so painawa ed [si Jehova]” anggad saray pilpilalek tan iilaloan nipaakar ed kipawil na tuan panagdayew so nipagamor. Impurek nen Jesus so pankaukolan ed maparanay a pampikasi, a pinaseseg to iray patumbok to ya “ontawag ed [Dios] ed agew tan labi.”​—Lucas 18:1-8.

Natumangan so Panaglingkor ed Dios

17, 18. (a) Diad anton dalan a saray manaayam ed Sion so makapanilalo a napanggayagaan da iray bunga na sagpot da? (b) Panon a panggagayagaan na saray totoo nen Jehova natan iray bunga na sagpot da?

¹⁷ Say balon ngaran ya inter nen Jehova ed totoo to so mangipapaseguro ed sikara a makanakana iray sagpot da. “Si Jehova insamba to a lapu ed lima to a kawanan, tan lapu ed taklay na biskeg to, Tua ya agko la naani iter so trigom a kanen na saray kabusol mo; et saray sankaili anggan kapigan agla ra oninum ed balo ya alak mo, a sika kinimeyan mo nensaman: Noag ingen saray angikamalir ed sikato, sikato naani kanen da, tan igalang da naani si Jehova; et saray anipon ed sikato, sikato naani inumen da ed saray saban na santuariok.” (Isaias 62:8, 9) Say kawanan a lima tan say mabiskeg a taklay nen Jehova so simbolo na pakapanyari tan biskeg to. (Deuteronomio 32:40; Ezequiel 20:5) Say impangisamba to panamegley na saraya so mangipapanengneng a determinado ya umanen to so kipapasen na saray pakurang ed Sion. Nen 607 K.K.P., inabuloyan nen Jehova iray kakabusol na Sion a sikatoy samsaman tan takewan da. (Deuteronomio 28:33, 51) Balet natan, saraman lambengat so walaan na kanepegan ed saratan so makapangusar ed saray kayarian na Sion.​—Deuteronomio 14:22-27.

¹⁸ Diad modernon-agew a kasumpalan na sayan sipan, say nipawil a totoo nen Jehova so akaeksperiensya na pirmin espiritual ya inkadaakan. Sigpot dan panggagayagaan iray bunga na sagpot da​—say dinmakel a Kristianon babangatan tan say daakan ya espiritual a tagano. (Isaias 55:1, 2; 65:14) Lapud matoor iray totoo to, ag-aabuloyan nen Jehova a makasbel iray kakabusol da ed espiritual ya inkadaakan da odino manamsam ed saray resulta na interon-kamarerwan panaglingkor da. Makanakana so amin a kimey da bilang panaglingkor ed si Jehova.​—Malaquias 3:10-12; Hebreos 6:10.

19, 20. (a) Panon ya alinisan so dalan pian makapawil iray Judio ed Jerusalem? (b) Panon ya alinisan so dalan diad modernon panaon pian makaloob iray mauyamon totoo ed organisasyon nen Jehova?

¹⁹ Say balon ngaran so manasagyat met ed saray matuan-impapuson totoo diad organisasyon nen Jehova. Dakerakel so ondaragup ed satan, tan say dalan so pansiasiansiaen a lukas parad sikara. Oniay inkuan na propesiya nen Isaias: “Onloob kayo, onloob kayo ed saray wangalan; itadia yo so dalan na baley; tabonan yo, tabonan yo so dalan; ekalen yo so saray batobato; mangipaalagey kayo na laylay [“sinyal,” NW] a nipaakar ed saray balbaley.” (Isaias 62:10) Diad inmunan inkagawa, sayan tawag so nayarin ontutukoy ed ipaway diad saray wangalan na saray syudad na Babilonia pian ompawil ed Jerusalem. Nepeg ya ekalen na saray ompapawil so batobato diad dalan pian mas mainomay so pambaroy tan mangipaalagey ira na sinyal pian nipanengneng so dalan.​—Isaias 11:12.

²⁰ Manlapu la nen 1919, saray alanaan a Kristiano so nibiig parad serbisyo ed Dios tan sikaray manbabaroy ed “Dalan na Inkasanto.” (Isaias 35:8) Sikara so sankaunaan a nanakar ed espiritual a karsada a pinmaway manlapud Babilonia a Baleg. (Isaias 40:3; 48:20) Inter na Dios ed sikara so pribilehyo a mangidaulo ed panangiyabawag ed makapanyari iran gawa to tan ed panangiwanwan ed arum diad  dalan a mamaarap ed karsada. Say pangekal ditan na batobato, salanti say pangekal ed saray pakatiroran, so nagkalautlan parad dilin pankaabigan da. (Isaias 57:14) Kaukolan a malinew dan natalosan iray gagala tan bangabangat na Dios. Saray palson bangat so makatiror a batobato ed dadalanan a mamaarap ed bilay, balet say Salita nen Jehova et singa “sakey a babatla a buyaken to so bato.” Diad panamegley na satan et binuyak na saray alanaan a Kristiano so makatiror a batobato a makapater ed saramay malabay a manlingkor ed si Jehova.​—Jeremias 23:29.

21, 22. Anton sinyal so inletneg nen Jehova parad saramay angitalirak ed palson relihyon, tan panon tayon amta?

²¹ Nen 537 K.K.P., say Jerusalem so nagmaliw a sinyal ya anagyat ed saray nakdaan a Judio ya ompawil tan mangipaalagey ed templo. (Isaias 49:22) Nen 1919 sanen nibulos iray alanaan a nakdaan manlapud inkaaripen ed palson relihyon, sikaray agnanteyengteyeng ya andi kabaliksan. Amta ra so laen da, lapud inletneg nen Jehova so sakey a sinyal parad sikara. Anton sinyal? Parehon sinyal a nipasakbay ed Isaias 11:10, ya oniay nabasa: “Nagawa dia ed satan ya agew, a [wala so] lamot nen Jesse, ya akaalagey a nipaakar a tanda [“sinyal,”NW] na saray baley.” Inyaplika nen apostol Pablo irayan salita ed si Jesus. (Roma 15:8, 12) On, say sinyal et si Kristo Jesus, a manuuley bilang Ari diad mangatatawen a Palandey Sion!​—Hebreos 12:22; Apocalipsis 14:1.

²² Diad kaliberliber nen Jesu-Kristo, saray alanaan a Kristiano tan say arum a karnero so atugyop pian mibiang ed manamakasakey a panagdayew ed Sankatageyan a Dios. Say pananguley to so onkanan mangiyalangon ed sankatalbaan ya inkasoberano nen Jehova tan mamendisyon ed matuan-impanpuson totoo a manlalapud amin a nasyon ed dalin. Agta saya so rason na balang sakey ed sikatayo pian mibiang ed pangitandoro ed sikato diad pangidayew?

“Say Kilalaban Mo Onsabi”!

23, 24. Panon a nipapagamor so kilalaban ed saramay walaan na pananisia ed Dios?

²³ Say balon ngaran ya inter nen Jehova ed singa-asawa ya organisasyon to so misiglaotan ed magnayon a kilalaban na ananak na satan. Oniay insulat nen Isaias: “Nia, si Jehova inbawag to ya angga ed sampot na dalin, Salitaen yo ed anak a bii na Sion, Nia, say kilalaban mo onsabi; nia say upam wala ed sikato, tan say nabang mo ed arap to.” (Isaias 62:11) Sinmabi so kilalaban na saray Judio sanen nagba so Babilonia tan pinmawil ira ed bansa ra. Balet ontutukoy irayan salita ed mas babaleg a bengatla. Ipapanonot na panangiyabawag nen Jehova so propesiya nen Zacarias nipaakar ed Jerusalem: “Manliket ka na balbaleg O bii ya anak na Sion; oneyag ka, O bii ya anak na Jerusalem; nia, say arim onsabi ed sika; sikato so maptek, tan walaan na panangilaban; mauyamo, tan onkabayo ed sakey ya asna a kabatyan, ed tapew na sakey lanlamang a kilaw ya anak na asna a kabatyan.”​—Zacarias 9:9.

²⁴ Taloy taon tan kapaldua kayarin abautismoan ed danum si Jesus tan alanaan na espiritu na Dios, sikatoy kinmabayo ya amaarap ed Jerusalem tan nilinisan to so templo. (Mateo 21:1-5; Juan 12:14-16) Natan, si Jesu-Kristo so mangitarok na kilalaban manlapud si Jehova ed amin na saramay walaan na pananisia ed Dios. Manlapu la’d inkitrono to nen 1914, si Jesus so tinuro met nen Jehova ya Ukom tan Mananusa. Nen 1918, taloy taon tan kapaldua kayari na inkitrono to, nilinisan to so espiritual a templo nen Jehova, ya irerepresenta ed dalin na kongregasyon na saray alanaan a Kristiano. (Malaquias 3:1-5) Say inyapireng to bilang sinyal so tanda na gapoan na malaknab a panagtipon ed totoo diad interon dalin, bilang suporta ed Mesianikon Panarian. Kayari na kadaanan a padron, say “kilalaban” so sinmabi ed Israel na Dios sanen sikaray nibulos manlapud Babilonia a Baleg nen 1919. Say ‘upa’ odino “nabang” ya akatarya parad saray masakripisyon manag-ani et balanglan imortal a bilay diad tawen odino magnayon a bilay diad dalin. Amin iramay mansiansian matoor so makapanmatalek a “say kimey [da et] aliwa ya anggapo so kabaliksan to ed Katawan.”​—1 Corinto 15:58.

25. Anto so nipaseguro ed saray totoo nen Jehova?

²⁵ Alay dakep ya ilalo parad mangatatawen ya organisasyon nen Jehova, parad saray alanaan a manangilaman na satan diad dalin, tan parad amin ya aktibon mililimog ed sikara! (Deuteronomio 26:19) Oniay impropesiya nen Isaias: “Tawagen da ra naani a say masanto a baley, say dinondon nen Jehova: et sika natawag ka naani ya Aromog, Sakey a Syudad ya Agnapaulyan.” (Isaias 62:12) Aminsan et alikna na “Jerusalem a wala ed tagey,” ya irerepresenta na Israel na Dios, a sikato so apaulyan. Agto lan balot nalikna itan. Saray totoo nen Jehova so magnayon a talimaen to, a panggayagaan da so mantultuloy ya imis na panangabobon to.

[Paimano ed Leksab]

[Tepetepet Parad Panagaral]