“Satan so Amenek ed Pankaukolan na Pusok”

“PISALSALAMATAN ta kayon maong ed alay abig a langkap ya Onapit ed si Jehova. Satan so amenek ed pankaukolan na pusok​—say pankaukolan a naliknak so panangaro tan panamabli nen Jehova. Lalon inmapit ak ed si Jehova tan ed pinabli ton Anak natan. Labay kon ibaga ed amin so nipaakar ed sayan libro tan mangiter na kopya ed amin ya inarok ed bilay.” Ontan so liknaan na sakey ed saray Tasi nen Jehova nipaakar ed balon 320-pahinan libro ya impaway ed “Saray Maseseg a Manangiyabawag na Panarian” a Distrito Iran Kombension a ginawa legan na 2002/03. Usisaen tayo so pigaran aspekto na sayan balon libro tan no akin ya impalapag itan.

Pigaran Aspekto na Balon Libro

Anto so karga na sayan balon libro? Amin ya impormasyon ya impresenta ed duaran aaralen ya artikulo ed sayan isyu​—tan dakel ni! Sayan libro so walaan na 31 a kapitulo, a kada sakey et walaan na karukey a singa say aaralen ya artikulo ed Panag-Bantayan. Kayari na introduksion tan say primeron taloran kapitulo, say libro so naapag ed apatiran seksion, sakey a seksion ed kada manuna iran atributos nen Jehova. Say gapo na kada seksion et sakey a sumaryo nipaakar ed kalidad. Say ontumbok a pigaran kapitulo so maningbat ed no panon ya impatnag nen Jehova itan a kalidad. Kada seksion so walaan na sakey a kapitulo nipaakar ed si Jesus. Akin? Bueno, inkuan nen Jesus a: “Say akanengneng ed siak anengneng to so Ama.” (Juan 14:9) Bilang naspot a manangipatnag ed si Jehova, intarya ed sikatayo nen Jesus so malinew iran alimbawa na saray napapatnagan a kalidad na Dios. Kada seksion so mansumpal ed sakey a kapitulon mangibabangat ed sikatayo no panon ya aligen si Jehova diad pangipatnag ed kalidad a kokonsideraen. Diad paningbat ed saray kalidad nen Jehova, tutukoyen na sayan balon libro so kada libro na Biblia.

Say libron Onapit ed si Jehova so mankarga met na pigaran nikaduman aspekto. Onggapo ed kapitulo 2, kada kapitulo so mankarga na sakey a kahon ya apauloan na “Saray Tepet a Dalepdepen.” Saray kasulatan tan tepet a nitarya so agginetman panrepaso ed kapitulo. Imbes, saratan so adesinyo ya ontulong ed sikayon mangusar ed Biblia pian dalepdepen a maong so tema. Nirerekomenda a maalwar yon basaen so kada teksto ed Kasulatan. Insan morekdeken so tepet tan panggunaetan ya iyaplika a mismo. Satan a panagdalepdep so manenyeg ed puso yo, ya ontulong ed sikayo a lalon onapit ed si Jehova.​—Salmo 19:14.

Saray artwork diad libron Onapit ed si Jehova so maalwar a sinukimat tan imparaan ta pian makaibangat tan makapakiwas. Lugan na labinpiton kapitulo iray balibalin interon-pahinan litrato na saray eksena ed Biblia.

Akin a Nipalapag?

Akin a nipalapag so libron Onapit ed si Jehova? Say manunan gagala na sayan balon publikasyon et say panulong ed sikatayo a lalon nakabat si Jehova ta pian nawalaan itayo na mas mabiskeg a personal a pisisiglaotan ed Dios tayo.

Wala kasi nanonotan yo a nayarin nagunggonaan ed libron Onapit ed si Jehova, a nayarin sakey ya iyaaralan na Biblia odino sakey ya inaktibon Kristianon agin laki odino bii? Komusta kayo​—kasin ginapoan yo lan basaen iyan balon libro? No andi ni, akin no iyeskedyul yo so oras pian nigapo lan tampol no posibli? Ipanaon so panmolimoli ed babasaen yo. Komon ta sayan balon publikasyon so ontulong ed sikayo a lalon onapit ed si Jehova a Dios, ta pian niyabawag yo so maong a balita na Panarian to tekep na pirmin gayaga tan seseg!