‘Say Dios et Aro’
‘Say Dios et Aro’
“Say agmangaro agto kabat so Dios; ta say Dios sikato so aro.”—1 JUAN 4:8.
1-3. (a) Anto so sinaglawi na Biblia nipaakar ed atributo nen Jehova ya aro, tan diad anton dalan a nikadkaduma iyan balikas? (b) Akin ya ibabaga na Biblia a ‘say Dios et aro’?
AMIN ya atributos nen Jehova et matalonggaring, naspot, tan makapasagyat. Balet say makapadinayew ed amin a kalidades nen Jehova et say aro. Anggapo lay arum a mamaapit a maong ed sikatayo ed si Jehova noag say aro to. Makapaliket ta say aro et manunaan met a kalidad to. Panon tayon naseguro itan?
2 Walay bengatlan sasaglawien na Biblia nipaakar ed aro ya agbalot nibaga ed arum iran manunan atributos nen Jehova. Ag-ibabaga na Kasulatan a say Dios et pakayari odino say Dios et inkahustisya odino say Dios et kakabatan. Saratan a kalidad so walad sikato tan sikato so alenleneg a lapuan na saratan. Balet, say aro et mas aralem unong ya inkuan na 1 Juan 4:8: ‘Say Dios et aro.’ On, say aro et manunaan a kabiangan na personalidad nen Jehova. Satan so mismon kabiangan na inkapersona to. Diad kaslakan a panangibaga, nayarin oniay isipen tayo nipaakar ed satan: Say pakayari nen Jehova so mamasarag ed sikaton onkiwas. Say inkahustisya tan say kakabatan to so mangiwanwan ed paraan na ikiwas to. Balet, say aro nen Jehova so mamakiwas ed sikato. Tan lawas napatnagan so aro to ed paraan na pangaagamil to ed arum niran atributos to.
3 Mabetbet a nibaga a si Jehova so mismon personipikasyon na aro. Kanian, no labay tayoy makaaral nipaakar ed aro, nepeg tayon aralen so nipaakar ed si Jehova. Usisaen tayo pa sirin so pigaran aspekto na agnaparaan ya aro nen Jehova.
Say Sankatalonggaringan a Panangaro
4, 5. (a) Anto so sankatalonggaringan a panangaro diad interon awaran? (b) Akin a nibaga tayon si Jehova tan say Anak to so nankasakey ed malmalet a bedber na aro ya abayuboan ed kapiganman?
4 Impatnag nen Jehova so aro ed dakel a paraan, balet wala so sakey ya analonggaring ed saratan ya amin. Anto itan? Satan imay impangibaki to ed Anak to pian manirap tan ompatey parad sikatayo. Susto so pangibaga tayo a diad interon awaran et saya so sankatalonggaringan a panangaro. Akin a nibaga tayo itan?
5 Ibabaga na Biblia a si Jesus et “panguloan ed amin a pinalsa.” (Colosas 1:15) Isipen pa—say Anak nen Jehova so apalsa la sakbay na pisikal ya uniberso. Panon kabayag sirin so impaniba da nen Ama to? Kinalkula na pigaran sientista a say uniberso et 13 bilyon lan taon. Ingen ta anggaman susto so kalkulasyon, aliwa ni itan a magenap a mangiparungtal ed karukey na impanbilay na panguloan ya Anak nen Jehova! Anto so ginawa to legan na saratan a panaon? Maliket a nanlingkor so Anak bilang say “uloen a komikimey” nen Ama to. (Uliran 8:30; Juan 1:3) Si Jehova tan say Anak to so saniban nankimey pian pawalaen so arum niran bengatla. Agaylan makapasagyat tan makapaliket iratan a panaon! Siopa ed sikatayo sirin so peteg a makarandan ed elet na relasyon da ya apawala ed loob na abayag a panat na panaon? Malinew, si Jehova a Dios tan say Anak to so nankasakey ed malmalet a bedber na aro ya abayuboan ed kapiganman.
6. Sane abautismoan si Jesus, panon ya imbalikas nen Jehova so liknaan to nipaakar ed Anak to?
6 Anggaman kuan, imbaki nen Jehova so Anak to diad dalin pian nianak bilang too. Diad impangiyuksoy nen Jehova ed satan, mankabaliksan itan a diad loob na masulok a taloran dekada et kinaukolan ya isakripisyo to so maapit a pililimog ed inad-aro ton Anak diad tawen. Tekep na pirmin interes, inimatonan To ed tawen so imbaleg nen Jesus bilang ayadyarin too. Nen manga 30 a taon to la, si Jesus so abautismoan. Diad saman ya inkagawa et say Ama so personal a nansalita manlapud tawen: “Saya so Ana’ko ya inararok; napaliket ak a maong ed sikato.” (Mateo 3:17) Diad impakaimaton to ed si Jesus a matoor ya anumpal ed amin a nipropesiya tan ed amin ya ingganggan ed sikato, maseguron apaliket a maong so Ama to!—Juan 5:36; 17:4.
7, 8. (a) Anto so sinagmak nen Jesus nen Nisan 14, 33 K.P., tan panon a naapektaan so mangatatawen ya Ama to? (b) Akin ya inabuloyan nen Jehova a manirap tan ompatey so Anak to?
7 Balet, anto so alikna nen Jehova nen Nisan 14, 33 K.P., sanen nitapat si Jesus insan inerel na maingongot a pangkat? Sanen si Jesus so niludlurey, nilupdaan tan binubuntalan da? Sanen sikato so siniplatan da, a manbutabuta lay beneg to? Sanen akapasak so lima tan salisali to diad lusek tan sikatoy tinaynan ya akabitin legan a mumudmoraen na totoo? Antoy liknaan na Ama legan ya onkekelyaw ed sikato so pinabpabli Ton Anak lapud makapaot-ot a paniirap to? Anto so liknaan nen Jehova sanen nampanabos lay Jesus tan, diad primeron pankanawnawa manlapu la’d gapo na amin a pinalsa et naandi so pinabpabli ton Anak?—Mateo 26:14-16, 46, 47, 56, 59, 67; 27:26, 38-44, 46; Juan 19:1.
8 Lapud si Jehova et walaan na liknaan, agtayo nadeskribe so ot-ot ya alikna to diad impatey na Anak to. Say nibaga tayo labat et say motibo nen Jehova no akin ya inyabuloy to itan a nagawa. Akin ya inabuloyan na Ama so inkasikato a nasagmak itan ya ot-ot? Walay alay abig ya ipaparungtal nen Jehova ed sikatayo diad Juan 3:16—sakey a bersikulo na Biblia ya importantin tuloy kanian satan so atawag a melag ya Ebanghelyo. Oniay kuan na satan: “Ontan lay impangaro na Dios ed mundo, ya inter to so bogbogtong ya Anak to, pian siopaman a manisia ed sikato agnatawtaw, noag ingen wala so bilay ton andi-anggaan.” Kanian say motibo na Dios et saya: aro. Anggapo lay mas matalonggaring nin aro a nipatnag ed kapiganman.
No Panon Itayon Papaseguroan nen Jehova ed Aro To
9. Anto so labay nen Satanas a panisiaan tayo nipaakar ed panmoria nen Jehova ed sikatayo, balet anto so ipapaseguro ed sikatayo nen Jehova?
9 Balet, walay onlesan importantin tepet: Kasin personal itayon aaroen na Dios? Arum so nayarin onabobon a say Dios et mangaaro ed katooan diad inkalapagan, unong ya inkuan na Juan 3:16. Balet bilang epekto et nalilikna ra a, ‘Siak so agbalot aroen na Dios bilang indibidual.’ Say katuaan to et labalabay nen Satanas a Diablo a manisia itayo a si Jehova so agbalot mangaaro nisay mamapabli ed sikatayo. Diad biek a dapag, anggan panon lay panisip tayon ag-itayo kakaliktanen odino anggapoy kakanaan tayo, papaseguroan itayo nen Jehova a kada sakey ed saray matoor a lingkor to so mabmabli ed sikato.
10, 11. Panon ya ipapabitar na ilustrasyon nipaakar ed saray anuyaw a mabmabli itayo ed imaton nen Jehova?
10 Alimbawa, konsideraen iray salita nen Jesus a nikurit ed Mateo 10:29-31. Diad impangiyilustra ed kablian na saray babangatan to, oniay inkuan nen Jesus: “Agta nalako so duaran anuyaw ed sakey a kuarta? Et agnapelag naani sakey ed sikara ed dalin no agyabuloy nen Ama yo. Et anggan saray buek na ulo yo abilang ira ya amin. Agkayo antakot sirin; ta mamabli kayo nen saray amayamay ya anuyaw.” Konsideraen no antoy kabaliksan na saratan a salita ed saray onderengel ed si Jesus nen inmunan siglo.
11 Diad panaon nen Jesus, say anuyaw so sankamuraan a billit ya ilalako bilang tagano. Diad sakey a sinsilyon walaay melag a kantidad, say sakey so makasaliw lay duaran anuyaw. Balet unong ed Lucas 12:6, 7 et inyarum nen Jesus ed saginonor a no duaran sinsilyo so isaliw na sakey a too, sikato so makasaliw na, aliwa labat ya apatiran anuyaw, noagta limara. Say buntok a billit so inyarum a singano anggapo lay bili to. Nayarin anggapo lay kakanaan na saratan a billit ed imaton na totoo, balet panon so panmoria na Manamalsa ed saratan? Inkuan nen Jesus: “Anggan sakey ed sikara [anggan samay sakey ya imbuntok ni et] agnalingwanan dia ed arap na Dios.” Unong ed saya et natalosan tayo lay punto nen Jesus. Lapud ontan so panamabli nen Jehova ed sakey ya anuyaw, agta mas mabli so sakey a too! Unong ya inkuan nen Jesus, amta nen Jehova so kada detalye nipaakar ed sikatayo. Diad tua, saray mismon buek na ulo tayo et abilang la!
12. Akin a makapanseguro itayo a realistiko si Jesus sanen sinaglawi to a saray buek na ulo tayo et abilang la?
12 Nayarin ipasen na arum ya alablabas so imbaga nen Jesus. Balet, isipen pa so nipaakar ed kikioli. Ontanlay inkaapit na pakapikabat nen Jehova ed sikatayo a palsaen to itayo lamet! Papablien to itayon maong kanian nanonotan to so amin a detalye, pati say komplikadon genetic code tayo tan saray walad kanonotan tayo tan eksperiensya tayo ed loob na amin a taon tayo. Say pamilang ed buek tayo—a diad kaslakan ya ulo na too et ngalngali 100,000—so simplin kimey no ikompara. Agaylan abig iray salita nen Jesus diad impangipaseguro to ed sikatayo ya iyaansakit itayo nen Jehova bilang indibidual!
13. Panon ya ipapabitar na kipapasen nen Arin Josafat ya iimanoen nen Jehova so maong ed sikatayo anggaman ag-itayo ayadyari?
13 Wala ni so bengatlan ipaparungtal na Biblia a mangipapaseguro ed sikatayo ed aro nen Jehova. Iimanoen tan papablien to so kamaongan a walad sikatayo. Alimbawa, say maong ya Arin Josafat. Sanen makulangkulang so inkiwas na ari, oniay inkuan ed sikato na propeta nen Jehova: “Lapu ed saya a bengatla say sanok wala ed tapew mo a manlapu ed arap nen Jehova.” Agaylan seryoson bengatla! Balet ag-angangga ed satan so mensahe nen Jehova. Oniay katuloyan na satan: “Anggan ontan wala so maong a bengabengatla ya aromog ed sika.” (2 Awaran 19:1-3) Kanian say matunong a sanok nen Jehova so ag-angamper ed Sikato a makaimano ed “maong a bengabengatla” nipaakar ed si Josafat. Agta makapaseguron naamtaan a say Dios tayo so maniimano ed walan kamaongan tayo anggaman ag-itayo ayadyari?
Dios ya ‘Akaparaan a Mamerdona’
14. Sano mankasalanan itayo, anto iran makapabelat a liknaan so nalikna tayo, balet panon itayon nagunggonaan ed panamerdona nen Jehova?
14 Sano mankasalanan itayo, say inkadismaya, kababaingan, tan pakakakonsiensia tayo so sengegan na panisip tayo ya agtayo lan balot makanepegan a manlingkor ed si Jehova. Balet, nodnonoten pa a si Jehova et ‘akaparaan a mamerdona.’ (Salmo 86:5) On, no pagbabawian tayo iray kasalanan tayo tan manbanikel itayo ya agtayo lan balot uliten iratan, nagunggonaan itayo ed panamerdona nen Jehova. Konsideraen so impaneskribe na Biblia ed sayan alay abig ya aspekto na aro nen Jehova.
15. Kaunongan kaarawi ed sikatayo so pangekal nen Jehova ed saray kasalanan tayo?
15 Inusar nen salmistan David so malinew a balikas a manedeskribe ed panamerdona nen Jehova: “Unong a singa kaarawi na bukig manlapud sagur, ontan met so kaarawi na impangekal To ed saray impakalukso tayo.” (Kien mi so italiko; Salmo 103:12, The Amplified Bible) Panon kaarawi so bukig manlapud sagur? Diad sakey a pantalos, say bukig so sankaarawian lawas a distansia manlapud sagur; agbalot makapanabet iyan duaran sampot. Ipapaimano na sakey ya iskolar a sayan balikas so mankabaliksan na “anggad posibli; anggad nayarian tayon isipen.” Ibabaga ed sikatayo na saray impuyan a salita nen David a sano mamerdona si Jehova, iyan to ed arawdawi iray kasalanan tayo manlapud sikatayo.
16. Sano perdonaen nen Jehova iray kasalanan tayo, akin a makapanseguro itayo a moriaen to itayon malinis kayari na satan?
16 Asali yo la kasi so angekal na mantsa ed amputin kawes? Nayarin anggaman pirmi so impansagpot yo et sankapatnag ni so mantsa. Imanoen so impaneskribe nen Jehova ed pakayari ton mamerdona: “Anggan saray kasalanan yo sikara so singa eskarlata, napaputi ra a singa say niebe; anggan sikara so ambalanga a singa karmesi, magmaliw ira a singa amputi a bago.” (Isaias 1:18) Say salitan “eskarlata” so mankabaliksan na magket a kolor ya ambalanga. * Say “karmesi” et sakey ed saray magket a kolor na kinoloran a materyal. Agtayon balot naekal so mantsa na kasalanan diad saray mismon sagpot tayo. Ingen, naekal nen Jehova iray kasalanan a singa eskarlata tan karmesi tan paputien to iratan a singa niebe odino ag-akoloran a lana. Kanian sano perdonaen nen Jehova iray kasalanan tayo, agtayo nakaukolan a liknaen a say mantsa na saratan a kasalanan so wala ni’d sikatayo legay bilay tayo.
17. Diad anton pantalos ya ibabantak nen Jehova iray kasalanan tayo ed benegan to?
17 Diad makapantenyeg a kanta na pisasalamat a tinibukel nen Hezekias kayari a sikatoy nilegyas manlapud makapatey a sakit, inkuan to ed si Jehova: “Imbantak mo so saray amin a kasalanan ko ed beneg mo.” (Isaias 38:17) Si Jehova so nilitrato dia bilang mangeekal ed saray kasalanan na sakey a magbabawin managgaway-mauges tan imbantak To iratan ed benegan To ya agto la nanengneng nisay naimano ni iratan. Unong ed sakey a reperensya, say ideyan nipapasabi et nayarin nibalikas ya: “Impagmaliw mo [iray kasalanan ko] a singano ag-iratan agawa.” Agta makapaligliwa itan?
18. Panon ya impabitar nen propeta Miqueas a sano mamerdona si Jehova et permanente To lan ekalen iray kasalanan tayo?
18 Diad sipan to a pangipawil lamet, imbalikas nen propeta Miqueas so kombiksion to a perdonaen nen Jehova so magbabawin totoo to: “Siopa so sakey a Dios a singa sika, . . . labsanan to so impakasumlang na kera na mananawir to? . . . Et sika ibantak mo naani so saray amin a kasalanan da ed saray kaaralman na dayat.” (Miqueas 7:18, 19) Isipen pa so kabaliksan na saratan a salita diad saray totoon nambilay ed panaon na Biblia. Kasin wala ni so pankanawnawa a naala lamet so sakey a bengatlan imbantak la ed “saray kaaralman na dayat”? Saray salita nen Miqueas so mangipatnag sirin a sano mamerdona si Jehova, permanente lan ekalen to iray kasalanan tayo.
‘Say Matamoy a Panangabagey na Dios Tayo’
19, 20. (a) Anto so kabaliksan na Hebreon verb a nipatalos ya “ipanengneng so panangasi” odino “kasian”? (b) Panon ya uusaren na Biblia so nalilikna na ina ed anak to pian ibangat ed sikatayo so nipaakar ed panangabagey nen Jehova?
19 Say panangabagey et sananey nin aspekto na aro nen Jehova. Anto so panangabagey? Diad Biblia, wala so maapit a siglaotan na panangabagey tan panangasi. Pigaran Hebreo tan Griegon salita so mangipapasabi na talos a panangabagey. Alimbawa, say Hebreon verb a ra·chamʹ et mabetbet ya ipatalos ya “ipanengneng so panangasi” odino “kasian.” Sayan Hebreon termino, ya iyaaplika nen Jehova ed inkasikato, so misiglaotan ed salita parad “panag-anakan” tan nadeskribe itan bilang “panangabagey na ina.”
20 Uusaren na Biblia so nalilikna na ina ed anak to pian ibangat ed sikatayo so nipaakar ed panangabagey nen Jehova. Oniay kuan na Isaias 49:15: “Nalingwanan ta na sakey a bii so mansuson anak to, ya agto naabagey [ra·chamʹ] so anak a nanlapud eges to? On, nayarin makalingwan ira, balet agta ka lingwanan.” (The Amplified Bible) Mairap ya isipen a say sakey ya ina et nalingwanan ton taganoen tan asikasoen so mansuson anak to. On, kaukolan na kapangiyanak so panangimano; agew tan labi et nakaukolan to so atension nen ina to. Makapaermen balet ta walaray asagapet ya ina, nagkalalo la ed sarayan ‘maatap a panaon.’ (2 Timoteo 3:1, 3) “Balet,” kuan nen Jehova, “agta ka lingwanan.” Say matamoy a panangabagey nen Jehova ed saray lingkor to so mas mabiskeg nen say sankamatamoyan a natural a liknaan a naisip tayo—say panangabagey a sipor lan nalilikna na ina ed kapangiyanak ya anak to.
21, 22. Anto so naeksperiensya na saray Israelita diad Ehipto nensaman, tan panon so inkiwas nen Jehova ed saray tagleey da?
21 Panon ya ipapanengneng nen Jehova, a singa maaron ateng, so panangabagey? Sayan kalidad so malinew a napatnagan ed paraan na impantrato to ed Israel nensaman. Diad pansamposampot na koma-16 a siglo K.K.P., minilyon ya Israelita so inaripen ed Ehipto, a diman ira pirmin apairap. (Exodo 1:11, 14) Diad gonigon da, inmey-ey iray Israelita ed si Jehova. Panon so inkiwas na Dios a maabagey?
22 Atenyeg so puso nen Jehova. Oniay kuanto: “Peteg ya anengneng ko so ermen na totook a wadman ed Ehipto, et dinengel ko so tagleey da . . . amtak so kaermenan da.” (Exodo 3:7) Imposible ya agmilikna si Jehova diad pakaimaton to ed paniirap na totoo to nisay pakadngel ed tagleey da. Si Jehova et Dios a walaan na empatya. Tan say empatya—say pakasarag a manlikna ed ot-ot na arum—so maapit a misiglaotan ed panangabagey. Balet, si Jehova so aglambengat akilikna ed totoo to; sikato so apakiwas nisesengeg ed sikara. Inkuan na Isaias 63:9: “Dia ed aro to tan dia ed panangasi to dinondon to ra.” Tekep na “makapanyari a lima,” inliktar toray Israelita manlapud Ehipto. (Deuteronomio 4:34) Diad saginonor, intarya to ed sikara so mamilagron tagano tan inyakar to ira diad mabunan dalin a kayarianen da.
23. (a) Panon itayon papaseguroan na saray salita na salmista a si Jehova so pirmin mangiyaansakit ed sikatayo bilang indibidual? (b) Diad antoran paraan a tutulongan itayo nen Jehova?
23 Aglambengat ipapatnag nen Jehova so panangabagey ed totoo to bilang grupo. Say maaron Dios tayo so pirmin mangiyaansakit ed sikatayo bilang indibidual. Sikato so makaamta a maong ed antokaman ya irap a sasagmaken tayo. Inkuan na salmista: “Saray mata nen Jehova wala ra ed matunong a too, tan saray layag to akalukas ira ed saray akis da. Si Jehova asingger ed saray wala ed kipapasen na sakey a nabtagan na puso; tan ilaban to so totoo a wala ed sakey a kamarerwa a masakit ed panagbabawi.” (Salmo 34:15, 18) Panon itayon tutulongan nen Jehova bilang indibidual? Agto met bengatbengat ya ekalen so sengegan na paniirap tayo. Balet sikato so walaan na daakan a probisyon parad saramay oney-ey ed sikato parad tulong. Itatarya na Salita to so praktikal a simbawa a pirmin makatulong. Diad kongregasyon, itatarya to iray manangasikaso a kualipikado ed espiritual, a manggugunaet a mangipatnag ed panangabagey to diad itutulong da ed arum. (Santiago 5:14, 15) Bilang say ‘Dumerengel na pikakasi,’ si Jehova so mangiiter na ‘masanton espiritu ed saramay onkekerew ed sikato.’ (Salmo 65:2; Lucas 11:13) Amin na saratan a probisyon so balikas na “matamoy a panangabagey na Dios tayo.”—Lucas 1:78, NW.
24. Panon kayon onkiwas ed panangaro nen Jehova?
24 Agta makapaliket so panmorekdek ed panangaro na mangatatawen ya Ama tayo? Diad inmunan artikulo et apanonotan itayo ya aagamilen nen Jehova so pakapanyari, inkahustisya, tan kakabatan to diad maaron paraan pian nagunggonaan itayo. Tan diad sayan artikulo et anengneng tayo a si Jehova so direktan angipatnag na aro to ed katooan—tan ed sikatayo bilang indibidual—diad makatantanda iran paraan. Natan et nepeg tayon itepet ed balang sakey ed sikatayo, ‘Panon so ikiwas ko ed panangaro nen Jehova?’ Komon ta onkiwas kayo diad pangaro ed sikato diad interon puso, kanonotan, kamarerwa, tan biskeg. (Marcos 12:29, 30) Komon ta say paraan na panagbilay yo ed kada agew so mangipapatnag ed impapuson pilalek yo a lalon onapit ed si Jehova. Tan komon ta si Jehova, say Dios a sikato so aro, so lalon onapit ed sikayo—diad andi-anggaan!—Santiago 4:8.
[Paimano ed Leksab]
^ par. 16 Inkuan na sakey ya iskolar a say eskarlata “et permanente, odino ag-onkupas a kolor. Ag-itan naekal na anggan say linaew, uran, pangipesak, odino mabayag a pangusar.”
Kasin Natandaan Yo?
• Panon tayon naamtaan a say aro et manunan kalidad nen Jehova?
• Akin a nibaga a say impangibaki nen Jehova ed Anak to pian manirap tan ompatey parad sikatayo et sankatalonggaringan a panangaro a nipatnag ed kapiganman?
• Panon itayon papaseguroan nen Jehova a papablien to itayo bilang indibidual?
• Diad antoran mabitar a paraan ya idedeskribe na Biblia so panamerdona nen Jehova?
[Tepetepet Parad Panagaral]
[Litrato ed pahina 15]
‘Say Dios et inter toy bogbogtong ya Anak to’
[Litrato ed pahina 16, 17]
‘Sikayo so mas mabli nen say dakel ya anuyaw’
[Credit Line]
© J. Heidecker/VIREO
[Litrato ed pahina 18]
Say nalilikna na ina ed anak to so mangibangat ed sikatayo nipaakar ed panangabagey nen Jehova