‘Inawat Yon Andi-bayar, Iter Yon Andi-bayar’

‘INAWAT yon andi-bayar, iter yon andi-bayar.’ (Mateo 10:8) Satan so imbilin nen Jesus ed saray apostol to sanen imbaki to ran mangipulong ed maong a balita. Kasin tinulok na saray apostol iyan ganggan? On, tan intultuloy dan ginawa itan anggan sanen andi la dia si Jesus ed dalin.

Singa bilang, sanen anengneng nen Simon a datin managsalamangka a walaan si apostol Pedro tan Juan na pakapanyarin manggawa na milagro, inyopresi ton bayaran ira pian inabang da itan a pakapanyari ed sikato. Balet binaat nen Pedro si Simon, a kuanto: “Nabalang so pilak mo, pati sika komon, ta inisip mo a say palangkap na Dios nagamoran ed pilak.”​—Gawa 8:18-20.

Impatnag nen apostol Pablo so parehon awawey a singa ed si Pedro. Si Pablo so nayarin magmaliw komon a pabelat ed pinansyal ed saray Kristianon agagi to diad Corinto. Balet, sikatoy nankimey ed saray dilin lima to pian suportaan so inkasikato. (Gawa 18:1-3) Kanian, matalek ton nikuan ya impulong to so maong a balita ed saray taga-Corinto ya “anggapo so bayar.”​—1 Corinto 4:12; 9:18.

Makapaermen ta dakel a mangibabagan papatumbok ira nen Kristo so agmangipapatnag na parehon inkamabulos a ‘mangiter ya andi-bayar.’ On, dakel a relihyoson lider ed Kakristianoan so ‘mangibangat labat lapu ed upa.’ (Miqueas 3:11) Yinmaman ni ingen so arum a relihyoson lider lapud kuartan akolekta ra manlapud saray pulok da. Nen 1989 et sakey ya ebanghelisador ed E.U. so senentensiaan a nipriso ed loob na 45 taon. Antoy rason? Sikatoy “nansaol ed saray mangiiter na minilyon a dolyar tan inusar to so arum a kuarta diad impansaliw na saray abung tan kotsi, diad impanbakasyon, tan analiw ni ingen na air-conditioned ya abung-abung na aso.”​—People’s Daily Graphic, Oktubre 7, 1989.

Diad Ghana, unong ed Ghanaian Times na Marso 31, 1990, sakey a pari na Romano Katoliko so angala ed kuartan akolekta legan na sakey a misa tan insabuyag to itan ed arap na iglesia. “Ginawa to’tan,” so kuan na peryodiko, “lapud, bilang adulto, sikaray iilaloan a man-abuloy na babaleg iran kantidad.” Agpankelawan ya isasagyat ni ingen na dakel ya iglesia so inkaagum ed saray membro ra, ya aktibon mangiyaalibansa ed saray panagsugal tan arum nin pakana ta pian makapawala ira na kuarta.

Diad pidumaan, panggugunaetan na saray Tasi nen Jehova ya aligen si Jesus tan saray inmunan babangatan to. Anggapoy susueldoan da a pari. Balang Tasi et ministro a walaan na responsabilidad ya ipulong ed arum so “ebanghelyo na panarian.” (Mateo 24:14) Kanian mibibiang so masulok ya anemiran milyon ed sankamundoan diad pangitatarok ed totoo na libren “danum na bilay.” (Apocalipsis 22:17) Diad onian paraan, anggan saramay “andian na pilak” so nagunggonaan ed mensahe na Biblia. (Isaias 55:1) Anggaman sasalipotpotan na boluntaryo iran donasyon so sankamundoan a kimey da, ag-iran balot mankokolekta na kuarta. Bilang tuan ministros na Dios, aliwa iran “managlako na salitay Dios,” noagta sikaray mansasalita “lapu ed inkasimoon, on, bilang  imbaki a nanlapu ed Dios.”​—2 Corinto 2:17, NW.

Balet, akin a mabulos iray Tasi nen Jehova ya ontulong ed arum, a gagawaen da itan diad dilin gastos da? Anto so mamapakiwas ed sikara? Kasin say pangiter ya andi-bayar et mankabaliksan a gagawaen da itan ya anggapon balot so tumang ed saray sagpot da?

Say Ebat ed Angat nen Satanas

Saray tuan Kristiano natan so manunan papakiwasen na pilalek dan paliketen si Jehova​—aliwan pian manpayaman. Kanian naeebatan da so angat a pinalesa nen Satanas a Diablo pigaran siglo lay apalabas. Nipaakar ed matunong a toon si Job, inangat nen Satanas si Jehova diad impangitepet toy: ‘Antakot ta si Job ed Dios ya andi-kabaliksan?’ Inyakusa nen Satanas a manlilingkor labat si Job ed Dios lapud ta Sikatoy lawas manproprotekta ed sikato. Insuppiat nen Satanas a no naandi ed si Job iray materyal a kayarian to, ayewen nen Job so Dios ya arap-arapan!​—Job 1:7-11.

Pian naebatan iyan angat, inabuloyan na Dios si Satanas a manubok ed si Job, a kuanto: “Amin a wala ed sikato wala ed pakayarim.” (Job 1:12) Antoy nansumpalan? Pinaneknekan nen Job a matila si Satanas. Antokaman iray irap a sinagmak to, nansiansian matoor si Job. Oniay inkuanto: “Angga ed ompatey ak agko ekalen so inkaskey ko a manlapu ed siak.”​—Job 27:5, 6.

Saray tuan managdayew natan so mangipapatnag na parehon awawey a singa ed si Job. Say mamapakiwas ed panlilingkor da ed Dios et aliwan saray materyal a gegemtan.

Say Agkanepegan a Kaabigan a Palangkap na Dios

Say sananey nin rason a mabulos iray tuan Kristiano a ‘mangiter ya andi-bayar’ et lapud sikaran mismo so ‘makakaawat ya andi-bayar’ manlapud Dios. Say katooan so naaripen ed kasalanan tan ipapatey lapu ed kasalanan na inmunan ateng tayon si Adan. (Roma 5:12) Lapud panangaro, inyuksoy nen Jehova so masakripisyon ipapatey na Anak to​—sakey a bengatla a nansakripisyoan Ton maong. Talagan agmakanepegan so katooan ed saya. Andi, sakey itan a langkap a nanlapud Dios.​—Roma 4:4; 5:8; 6:23.

Kanian onia so inkuan nen Pablo ed saray alanaan a Kristiano, unong a nikurit ed Roma 3:23, 24: “Amin nankasalanan, tan makulang ira ed gloria na Dios; et apatunongan ira met ed grasya to ya andi bayar [“palangkap,” NW] a lapud inkarondon a wala ed Kristo Jesus.” Saramay walaan na ilalon manbilay a maando diad dalin so makaawat met na “palangkap.” Sayan langkap so mangilaktip ed pribilehyon niyabawag a matunong bilang kakaaro nen Jehova.​—Santiago 2:23; Apocalipsis 7:14.

Lapud dondon bagat nen Kristo, amin a Kristiano so makapanlingkor bilang ministros na Dios. Insulat nen apostol Pablo: “[Say sagradon sekreto] so nipasenan kon ministro, unong ed langkap na saman a grasya na Dios.” (Efeso 3:4-7) Lapud inkatawag da ed sayan ministeryo panamegley na probisyon ya agda kanepegan odino agda nansagpotan, agnailaloan na saray tuan ministro na Dios a sikaray sueldoan diad panginanabang da na balita ed arum nipaakar ed sayan probisyon.

 Andi-anggaan a Bilay​—Kasin Mangisagyat na Kasibletan?

Sirin, kasin kabaliksan na saya ya iilaloan na Dios iray tuan Kristiano a manlingkor ed sikato ya anggapoy antokaman a naalagar dan tumang? Andi, lapud oniay inkuan nen apostol Pablo ed saray kapananisiaan to: “Say Dios aliwan agmatunong pian nalingwanan to so gawa yo tan say aro ya impanengneng yo ed ngaran to.” (Hebreos 6:10) Si Jehova et aliwan agmakatunongan. (Deuteronomio 32:4) Diad kasunian, si Jehova so “mananumang ed saray mananap ed sikato.” (Hebreos 11:6) Balet agta say sipan ya andi-anggaan a bilay ed Paraiso et mangisagyat na kasibletan?​—Lucas 23:43.

Andin balot. Sakey lan rason et nanlapud Dios a mismo so pilalek tayon manbilay a maando ed Paraiso diad dalin. Sikaton mismo so angitarya ed sayan ilalo parad inmunan paris na too. (Genesis 1:28; 2:15-17) Sanen abalang nen Adan tan Eva itan ya ilalo, ginawa To a posibli so kipawil na satan parad saray ilalak da. Kanian insipan na Dios panamegley na Salita to a “say pinalsa a dili niliktar ed inkaaripen na kabulokan ya onloob ed kawayangan na gloria na saray anak na Dios.” (Roma 8:21) Manepenepeg labat sirin a saray Kristiano natan, a singa si Moises nensaman, so mantalaran a “mapetepet ed pakagamor ed tumang.” (Hebreos 11:26, NW) Ag-iiter na Dios iyan tumang bilang pasuksok. Iiter to itan lapud tuan panangaro to ed saraman so manlilingkor ed sikato. (2 Tesalonica 2:16, 17) Bilang bales et “aroen tayo ta sikato so angaro ed sikatayo ya inmuna.”​—1 Juan 4:19.

Say Dugan Motibo ed Panlingkor ed Dios

Anggaman kuan, nepeg a naynay ya usisaen na saray Kristiano natan iray dilin motibo ra ed panlilingkor ed Dios. Diad Juan 6:10-13 et nabasa tayo a mamilagron pinakan nen Jesus so masulok a limanlibo a totoo. Kayari na saman, arum so tinmumbok ed si Jesus lapu labat ed sinisiblet iran rason. Inkuan nen Jesus ed sikara: “Anapen yo ak, . . . lapu ed angan kayo ed saray tinapay, tan napsel kayo.” (Juan 6:26) Apalabas so pigaran dekada, arum a dedikadon Kristiano so angisaklang met na sagradon serbisyo ed Dios, balet “aliwan matua [so motibo ra].” (Filipos 1:17) Saray arum ya ‘ag-inmabuloy ed [maabig] iran salita nen Jesu-Kristo’ et nananap ni ingen na saray paraan pian makapanganamot diad pililimog da ed saray Kristiano.​—1 Timoteo 6:3-5.

Natan, say Kristiano a manlilingkor labat lapud labay to so manbilay a maando ed Paraiso et nayarin walaan met na sinisiblet a motibo. Diad kaunoran et mansumpal iya ed espiritual a kaderal. Lapud ompatnag a singano manbayag ni so sistema na bengabengatla nen Satanas nen say iilaloan, sikatoy nayarin “onkesaw,” a liknaen ton agni onsabi so anggaan. (Galacia 6:9, NW) Nayarin pagbabawian to ni ingen iray insakripisyo to a materyal. Papanonotan itayo nen Jesus: “Aroen mo so Katawan a Dios mo ed masimoon a pusom, tan dia ed masimoon a kamarerwam, tan dia ed masimoon a nonot mo.” (Mateo 22:37) On, say too a manlilingkor ed Dios a manuna lapud aro et agto gegetaran so panaon na panlingkor to. Sikatoy determinadon manlingkor ed si Jehova ya andi-angga! (Miqueas 4:5) Agto pagbabawian iray antokaman ya insakripisyo to nisesengeg ed panlilingkor to ed Dios. (Hebreos 13:15, 16) Say aro ed Dios so mamakiwas ed sikato pian iyuna ed bilay to iray panlabayan na Dios.​—Mateo 6:33.

Natan et masulok ya anemiran milyon a tuan managdayew so ‘mangiyaapay ed inkasikara a mabulbulos’ diad panaglingkor ed si Jehova. (Salmo 110:3) Kasin sakey ka ed sikara? No andi ni, dalepdep mo sirin so iyoopresi na Dios: puron pikakabat ed katuaan; (Juan 17:3) kibulos manlapud palson bangabangat na relihyon; (Juan 8:32) say ilalon manbilay ya andi-angga. (Apocalipsis 21:3, 4) Makatulong iray Tasi nen Jehova ed sika a naaralan no panon mon nagamoran iyan amin a manlalapud Dios​—ya anggapoy bayar.

[Blurb ed pahina 22]

Saray tuan Kristiano natan so manunan papakiwasen na pilalek dan paliketen si Jehova​—aliwan pian manpayaman

[Litrato ed pahina 21]

Say palangkap na Dios a dondon so mamapakiwas ed saray Kristiano a manginabang ed maong a balita ya anggapoy bayar