“Walay Duaran Bii a Tinmoktok ed Puerta Mi”

“DUAY taon lay linmabas sanen sikami so nanermen a maong ed inkaandi na inad-aro min anak a bii.” Ontan so gapo na sakey a sulat ed peryodiko a Le Progrès, a nipalapag ed Saint-Étienne, Pransya.

“Si Mélissa so taloy bulan ed saman tan nanliknay graben sakit a trisomy 18 (Edward’s syndrome). Say ontan a trahedyan ompatnag ya agmakatunongan so mairap a natalonaan. Anggaman sikami so pinabaleg a Katoliko, oniay naynay min sankanonot, ‘Dios ko, no talagan wala ka, akin ya inabuloyan mo irayan nagawa?’” Malinew a nagogonigon tan anggapo lay nagawaan na inan angipawit ed satan a sulat. Oniay katuloyan na sulat to:

“Kayarin tuloy na sarayan inkagawa, walay duaran bii a tinmoktok ed puerta mi. Abidbir kon tampol a Tasi nen Jehova iraya. Paalisen ko la ra komon, balet ta naimanok so brosyur ya iyoopresi ra a nipaakar ed no akin ya aabuloyan na Dios so paniirap. Kanian pinaloob ko ira ed abung diad getman suppiaten iray argumento ra. Ninonot ko a no nipaakar ed paniirap, sobsobra lay asagmak na pamilyak. Naksawan kami met lan makakarengel ed saray balikas a singa say ‘Si Mélissa so inter na Dios ed sikami, tan sikatoy inala la na Dios.’ Nambayag iray Tasi diad loob na masulok a sakey oras. Tinmalineng ira ed siak tekep na aralem a piaambegya, tan sanen manpatanir la ra et magmaong lay liknaan ko, kanian inmabuloy ak a pabisita lamet ed sikara. Agawa itan duay taon lay apalabas. Agak nagmaliw a Tasi nen Jehova, balet papaiyaralan ak na Biblia ed sikara, tan onaatendi ak ed saray miting da anggad nayarian ko.”