Anto so Iilaloan nen Jehova ed Sikatayo?
Anto so Iilaloan nen Jehova ed Sikatayo?
“Anto ta so kaukolan nen Jehova ed sika, noag say manggawa lambengat na inkatunong, tan mangaro na kaabigay linawa, tan manakar a mauy-uyamo ed Dios mo?”—MIQUEAS 6:8.
1, 2. Akin a nadidismaya so arum a lingkor nen Jehova, balet ta anto so napaneknekan a makatulong?
SI Vera et sakey a matoor a Kristiano a man-75 años to la tan makapuy lay bunigas to. Oniay inkuanto: “No maminsan et ontangulaw ak ed bintana tan nanengneng ko iray Kristianon agagik a manpupulong ed kabkaabungan. Makalua ak lapud ta labay ko ran nakaiba balet ta lilimitaan na sakit so panaglingkor ko ed si Jehova.”
2 Alikna yo la kasi itan? Siempre, amin a mangaaro ed si Jehova so malabay a mankurang ed ngaran to tan makakapet ed saray kakaukolanen to. Ingen, panon to no onleletey lay bunigas tayo, ontatakken tayo la, odino walaan itayo na saray responsabilidad ed pamilya? Nayarin nadismaya itayo lapud nayarin naamper itayo na saratan a kipapasen a manggawa ed amin a pilalek na puso tayo diad panaglingkor ed Dios. No ontan so kipapasen tayo, say pangonsidera ed Miqueas kapitulo 6 tan 7 so makapabiskeg a tuloy ed sikatayo. Ipabitar na sarayan kapitulo a makatunongan iray kakaukolanen nen Jehova tan nakapet tayo iratan.
No Panon so Pantratrato na Dios ed Totoo To
3. Panon so impantrato nen Jehova ed saray rebelyoson Israelita?
3 Nengnengen tayo pan unona so Miqueas 6:3-5 tan imanoen tayo no panon so impantrato nen Jehova ed totoo to. Tandaan a diad panaon nen Miqueas et rebelyoso iray Israelita. Anggaman ontan, oniay maabagey ya impanawag nen Jehova ed sikara: “O baley ko.” Inkerew to: “O baley ko, nonoten mo [“ipangasim,” NW].” Imbes a sikaray sipapasang ya akusaen to, nanggunaetan ton sabien so kapusoan da diad impangitepet toy, ‘Anto so ginawak ed sikayo?’ Sikara so pinaseseg to ni ingen a ‘paletan da so sumpa’ ed sikato.
4. Anto so epekto ed sikatayo na alimbawa na panangabagey na Dios?
4 Agaylan abig ya alimbawa so impatnag na Dios ed sikatayon amin! Maabagey to ni ingen a tinawag so rebelyoson totoo na Israel tan Juda ed panaon nen Miqueas bilang say “baley ko” tan inkuan to ed sikaran ‘ipangasi yo.’ Nepeg tayo sirin ya ipatnag so panangabagey tan panangasi diad pidedeneng tayo ed saramay kabiangan na kongregasyon. Tua, arum so nayarin mairap a pidenengan, odino nayarin maletey ni ira ed espiritual. Balet no inaro ra si Jehova, labay tayo ira a tulongan tan ipatnag tayo ed sikara so panangabagey.
5. Anton manunan punto so nipabitar diad Miqueas 6:6, 7?
5 Ontumbok, ibukay tayo ed Miqueas 6:6, 7. Oniay nantutumbokan ya intepet nen Miqueas: “Anto so laen ko ed arap nen Jehova, tan pangidakmomok na inkasiak ed arap na atagey a Dios? Onla ak ta naani ed arap to a pati saray bagat a napoolan, tan saray kilaw a baka a mantaon na sakey? Napaliket ta si Jehova ed saray nilibo a karnero a kalakian, odino ed samplon libo ya il-ilog a larak? Iter ko ta naani so panguloan ya anak ko lapu ed impakasumlang ko, say bunga na laman ko lapu ed kasalanan na kamarerwak?” Andi, agnapaliket si Jehova ed “nilibo a karnero a kalakian, odino ed samplon libo ya il-ilog a larak.” Balet wala so bengatlan mamaliket ed sikato. Anto itan?
Nepeg Tayon Agamilen so Inkahustisya
6. Anton taloran kakaukolanen na Dios so nidatak ed Miqueas 6:8?
6 Diad Miqueas 6:8, naaralan tayo no anto so iilaloan nen Jehova ed sikatayo. Oniay intepet nen Miqueas: “Anto ta so kaukolan nen Jehova ed sika, noag say manggawa lambengat na inkatunong [“inkahustisya,” NW], tan mangaro na kaabigay linawa, tan manakar a mauy-uyamo ed Dios mo?” Sayan taloran kakaukolanen so mangilalanor ed no panon so panlikna, pannonot, tan ikiwas tayo. Sarayan kalidad so nepeg tayon panggunaetan ya ipatnag, isipen no panon so pangipatnag ed saratan, tan onkiwas pian nipatnag iratan. Sansakeyen tayon singbaten irayan taloran kakaukolanen.
7, 8. (a) Anto so kabaliksan na ‘panggawa na inkahustisya’? (b) Antoran ag-inkahustisya so kasmak ed panaon nen Miqueas?
7 ‘Say panggawa na inkahustisya’ et mankabaliksay panggawa na maptek. Say estandarte na inkahustisya et say paraan na Dios ed panggagawa ed saray bengatla. Balet ta inagamil na saray kapanaonan nen Miqueas so ag-inkahustisya, aliwan say hustisya. Diad antoran paraan? Imanoen so Miqueas 6:10. Diad sampot na satan a bersikulo, adeskribe iray managtagilako bilang manguusar na “makulang a sukatan,” salanti, samay melmelag a sukatan. Inyarum na bersikulo 11 a sikaray manguusar na “saray mauges a simbangan.” Tan unong ed bersikulo 12, “say dila ra [so] mamalingo.” Kanian, saray masaol a panagsukatan, masaol a simbangan, tan panagpalikdo so kasmak ed saray negosyo diad panaon nen Miqueas.
8 Aliwa labat a diad tindaan so pakaromogan ed saratan a mauges ya agamil. Kaslakan met iratan diad korte. Ipapabitar na Miqueas 7:3 a “say prinsipe mankerew, et say ukom nitadia lapu ed sakey a tumang.” Papasuksokan iray ukom ta pian mangipaakseb ira na agmakatunongan iran sentensia ed inosentin totoo. “Say baleg a too,” odino maimpluensian mibabaley, so minonong ed saray krimen. Diad tua, ibabaga nen Miqueas a say prinsipe, say ukom, tan say baleg a too so ‘mangabel,’ odino manguksoy, ed saray marelmeng a gawa ra.
9. Panon a naapektoan so Juda tan Israel ed saray ag-inkahustisya ya inagamil na saray marelmeng?
9 Say ag-inkahustisya ya inagamil na saray marelmeng a lider so angapekta ed interon Juda tan Israel. Impaimano na Miqueas 7:5 a say inkaandi na inkahustisya so nansumpal ed inkaandi la na panagmatalek ed saray kakaiba, napanpiyaan iran kakaaro, tan anggan ed saray kaasawaan. Ipapabitar na bersikulo 6 a nansumpal itan ed sakey a kipapasen a nambubusolan la ed sakey tan sakey iray maapit a sankakanayon a singa say sanaama tan saniina.
10. Diad kaplesan a nagagawan ag-inkahustisya, panon so panuugali na saray Kristiano?
10 Komusta ed panaon tayo? Agta nanenengneng tayo met iray ontan a kipapasen? Singa si Miqueas, aliber itayo na ag-inkahustisya, andiay panagmatalek, tan nadederal iran ulopan ed sosyedad tan bilay ed pamilya. Ingen, bilang lingkor na Dios a manbibilay ed sayan agmatunong a mundo, agtayo abuloyan so espiritu na sayan agmaptek a mundo a makaloob ed Kristianon kongregasyon. Imbes, pambanikelan tayon itandoro iray prinsipyo na inkamatua tan katooran, ya ipatnag iraya diad inagew-agew a pambilay tayo. On, sikatayo so “manugalin simamatua diad amin a bengatla.” (Hebreos 13:18, NW) Agkayo kasi miabobon a diad pangagamil na inkahustisya et panggayagaan tayo iray mayaman a bendisyon a resulta na impanaagi a mangipapatnag na tuan panagmatalek?
Panon a Narerengel na Totoo so ‘Mismon Boses nen Jehova’?
11. Panon a nasusumpal so Miqueas 7:12?
11 Impropesiya nen Miqueas ya anggaman ed agmaptek iran kipapasen, say inkahustisya so panggayagaan na amin a klase na totoo. Impasakbay na propeta a natipon iray totoo a “manlapu ed dayat angga ed dayat, tan manlapu ed palandey angga ed palandey” pian magmaliw a managdayew ed si Jehova. (Miqueas 7:12) Natan, diad unor a kasumpalan na sayan propesiya, aliwan sakey labat a nasyon, noagta saray indibidual a nanlalapud amin a nasyon so nagugunggonaan ed agmanangidumaduman inkahustisya na Dios. (Isaias 42:1) Panon iyan napaneknekan a tua?
12. Panon a narerengelan natan so “boses nen Jehova”?
12 Pian naebatan itan, konsideraen tayo so akadkauna iran salita nen Miqueas. Kuan na Miqueas 6:9: ‘Say mismon boses nen Jehova mantawag ed syudad, et say too a walaan na kakabatan nanengneng to [“ontakot,” NW] naani ed ngaran mo.’ Panon a narengelan na totoo ed amin a nasyones so “boses nen Jehova,” tan panon iyan misiglaotan ed pangaagamil tayo na inkahustisya? Siempre, say boses na Dios et aliwan literal a narengel na totoo natan. Balet diad panamegley na sankamundoan a panagpulong tayo, say boses nen Jehova so narerengelan na saray totoo na amin a rasa tan kipapasen na panagbilay. Bilang resulta, saraman so ondengel so ‘ontakot ed ngaran na Dios,’ a nawalaan ira na aralem a panangigalang ed satan. Maseguron onkikiwas itayo ed maptek tan maaron paraan diad panamegley na panlilingkor tayo bilang maseseg a manangiyabawag na Panarian. Diad pangipaamta ed ngaran na Dios ed amin a totoo ya anggapoy panaglabi, ‘gagawaen tayo so inkahustisya.’
Nepeg Tayon Aroen so Kaabigan
13. Anto so pandumaan na maaron-kaabigan tan say aro?
13 Ontumbok et singbaten tayo so komaduan kakaukolanen ya abitla ed Miqueas 6:8. Iilaloan nen Jehova ed sikatayo ya ‘aroen [tayo] so kaabigan.’ Say Hebreon salita a nipatalos a “kaabigan” so nipatalos met a “maaron-kaabigan,” odino “matoor ya aro.” Say maaron-kaabigan et aktibon panangimano ed arum, sakey a maabagey a panagpaga ed sikara. Say maaron-kaabigan so miduma ed kalidad ya aro. Panon ya ontan? Say aro et mas malaknab a termino, a nayarin managlawi ni ingen ed saray bengatla tan ideya. Singa bilang, sinaglawi na Biblia so sakey a too a ‘mangaaro na alak tan larak’ tan ed too a ‘mangaaro na kakabatan.’ (Uliran 21:17; 29:3) Diad biek a dapag, say maaron-kaabigan so lawas mangilalanor ed totoo, nagkalalo la ed saramay manlilingkor ed Dios. Kanian tinukoy na Miqueas 7:20 so ‘maaron-kaabigan ed si Abraham’—sakey a too a nanlingkor ed si Jehova a Dios.
14, 15. Panon a nipapatnag so maaron-kaabigan, tan anton ebidensya na satan so asalambit dia?
14 Unong ed Miqueas 7:18, inkuan na propeta a ‘panliketan [na Dios] so maaron-kaabigan.’ Diad Miqueas 6:8, nibaga ed sikatayo ya aglambengat ipanengneng so maaron-kaabigan noagta pablien itan a kalidad. Anto so naaralan tayo ed sarayan teksto? Say maaron-kaabigan so ipanengneng a mabulbulos lapud labay tayon ipanengneng itan. Singa si Jehova, panliketan tayo so pangipatnag na maaron-kaabigan ed saraman so mankaukolan.
15 Natan, say ontan a maaron-kaabigan so pakabidbiran ed totoo na Dios. Konsideraen pa labat so sakey ya alimbawa. Nen Hunyo 2001, adelap so Texas, E.U.A. lapud maksil a bagyo, ya aneral ed nilibon kaabungan, pati say nilasus a kaabungan na saray Tasi nen Jehova. Pian natulongan iray mankaukolan a Kristianon agagi ra, ngalngali 10,000 a Tasi so mabulbulos ya angiyopresi ed panaon tan biskeg da. Diad loob na masulok a kapalduan taon, saray boluntaryo so agtinmundan nankimey, ya inusar da iray agew, labi, tan sampot-simba ra pian ipaalagey lamet so 8 Kingdom Hall tan masulok a 700 a kaabungan na saray Kristianon agagi ra. Saramay agmakapanboluntaryo’d ontan a paraan so angidonasyon na tagano, uusaren, tan kuarta. Akin a tinmulong irayan nilibon Tasi ed saray agagi ra? Lapud ‘inaro ra so kaabigan.’ Tan agaylan makapaligsay-puson naamtaan a saratan a gawa na maaron-kaabigan so ipapatnag na agagi tayo diad sankamundoan! On, say pangapet ed kakaukolanen ‘ya aroen so kaabigan’ et, aliwan makapabelat, noagta makapaliket!
Magmaliw a Mauyamo Diad Pankurang a Kaiba so Dios
16. Anton ilustrasyon so mangidadanet ed pankaukolan a magmaliw a mauyamo ed pankurang a kaiba so Dios?
16 Say komatlon kakaukolanen a naromog diad Miqueas 6:8 et say ‘panakar a mauy-uyamo a kaibay Dios mo.’ Kabaliksan na saya a bidbiren tayo iray limitasyon tayo tan mandependi itayo ed Dios. Bilang ilustrasyon: Ilitrato yo pa’d nonot yo ya akabemben a malet so melag ya ugaw a bii ed lima nen ama to legan a manaakar ira ed kaksilan na bagyo. Amta na ugaw a limitado so biskeg to, balet sikatoy walaan na kompiyansa ed ama to. Nepeg tayo met a bidbiren iray limitasyon tayo balet walaan itayo na kompiyansa ed mangatatawen ya Ama tayo. Panon tayon namantini iyan kompiyansa? Say sakey a paraan et diad lawas pannonot no akin a makabat so pansiansian maapit ed Dios. Ipapanonot ed sikatayo nen Miqueas so taloran rason: Si Jehova so Manangiliktar, Manangigiya, tan Mananalimbeng tayo.
17. Panon so impangiliktar, impangigiya, tan impanalimbeng nen Jehova ed totoo to nensaman?
17 Unong ed Miqueas 6:4, 5, oniay inkuan na Dios: “Inagwat taka ed dalin na Ehipto.” On, si Jehova so Manangiliktar na Israel. Inkuan ni nen Jehova: ‘Ingganggan ko ed unaan yo si Moises, Aaron, tan Miriam.’ Nausar si Moises tan Aaron a mangigiya ed nasyon, tan indaulo nen Miriam iray Israelitan bibii ed sayaw parad impanbiktorya. (Exodo 7:1, 2; 15:1, 19-21; Deuteronomio 34:10) Angitarya si Jehova na panangiwanwan diad panamegley na saray lingkor to. Diad bersikulo 5, impanonot nen Jehova ed nasyon na Israel ya inyagel to ra sumpad si Balak tan Balaam tan sinalimbengan to ra legan na unor ya impanbaroy da manlapu ed Setim ed Moab anggad Gilgal diad Insipan a Dalin.
18. Panon so ikikiwas na Dios bilang Manangiliktar, Manangigiya, tan Mananalimbeng tayo?
18 Legan itayon mankukurang a kaibay Dios, iliktar to itayo manlapud mundo nen Satanas, igiya to itayo panamegley na Salita tan organisasyon to, tan salimbengan to itayo bilang sakey a grupo sano aatakien itayo na saray sumusumpa. Walaan itayo sirin na magenap a rason pian ombemben a malet ed lima na mangatatawen ya Ama tayo legan itayon mankukurang a kaiba to diad mabagyo tan kaunoran lan pambabaroy tayo a mamaarap ed babaleg nen say kadaanan ya Insipan a Dalin, salanti, diad matunong a balon mundo na Dios.
19. Diad anton dalan a misiglaotan so kauyamoan ed saray limitasyon tayo?
19 Say pagmaliw a mauyamo diad pankurang a kaibay Dios so ontulong ed sikatayo pian nawalaan na realistikon panmoria ed saray kipapasen tayo. Peteg itan lapud say pangipatnag na kauyamoan et mangilaktip ed pamidbir ed saray limitasyon tayo. Nayarin limitaan na itatakken odino ikakapuy na bunigas so nagawaan tayo komon ed serbisyo ed si Jehova. Balet, imbes ya abuloyan tayo iyan manismaya ed sikatayo, nepeg tayon tandaan ya aabobonan na Dios iray pansasagpot tan pansasakripisyo tayo ‘unong na wala ed sikatayo, aliwan unong na anggapo ed sikatayo.’ (2 Corinto 8:12) On, iilaloan nen Jehova so interon-kamarerwan panaglingkor tayo ed sikato, a gawaen tayo so antokaman ya iyabuloy na sirkumstansya tayo. (Colosas 3:23) Sano masimoon tan maseseg tayon gawaen so anggaay nayarian tayo diad panlingkor ed sikato, sikatayo so mayamyaman a tumangan na Dios.—Uliran 10:22.
Say Awawey a Makapan-alagar so Pakagamoran na Saray Bendisyon
20. Say pikabat ed anto so makatulong ed sikatayo pian ipatnag so awawey a makapan-alagar a singa ed si Miqueas?
20 Say pakaeksperiensya ed panamendisyon na Dios so mamakiwas ed sikatayon mangalig ed awawey nen Miqueas. Oniay inyabawag to: “Alagden ko naani so Dios na kilalaban ko.” (Miqueas 7:7) Panon a misiglaotan irayan salita diad pankurang tayo a mauy-uyamo a kaibay Dios? Say pakawalaan na awawey a makapan-alagar, odino panag-anos, so ontulong ed sikatayo ya agmanlikna na inkadismaya lapud agni sinmabi so agew nen Jehova. (Uliran 13:12) Tua, pipirawaten tayon amin a mangangga la iyan marelmeng a mundo. Balet, kada simba et walay nilibon totoo ya onggagapo ni labat a mankurang a kaibay Dios. Say pikabat ed satan so mangiter ed sikatayo na rason pian ipatnag so awawey a makapan-alagar. Oniay inkuan na sakey ya abayag lan Tasi nipaakar ed satan: “No nonoten ko so apalabas a 55 taon a pampupulong ko, kombinsido ak ya anggapon balot so naandi ed siak diad panaalagar ko ed si Jehova. Diad kasunian, apaliisan ko so dakel iran ampait ya eksperiensya.” Walaan kayo met kasi na ontan ya eksperiensya?
21, 22. Panon a nasusumpal natan so Miqueas 7:14?
21 Say pankurang a kaiba si Jehova so maseguron pakagunggonaan tayo. Unong a nabasa tayo ed Miqueas 7:14, inkompara nen Miqueas iray totoo na Dios diad saray karnero a maligeligen a kaiba na managpastol da. Diad babaleg a kasumpalan natan na sayan propesiya, say nakdaan na espiritual ya Israel ontan met ed ‘arum a karnero’ so makakagamor na kaligenan ed napanmatalkan a Managpastol da, si Jehova. Manaayam ira a “manbukbukor ed takel ed pegley na Carmelo,” a biig ed espiritual a paraan manlapud sayan ompapalalon magulo tan mapeligron mundo.—Juan 10:16; Deuteronomio 33:28; Jeremias 49:31; Galacia 6:16.
22 Panggagayagaan na totoo nen Jehova so aligwas, unong ya impasakbay na Miqueas 7:14. Oniay inkuan nen Miqueas nipaakar ed karnero, odino totoo, na Dios: “Napaulyan ira komon a mangan ed Basan tan Galaad.” No panon a saray karnero ed Basan tan Galaad so atagano ed mabunan panagpastolan tan dinmakel iratan, panggagayagaan met na totoo na Dios natan so espiritual ya inkadaakan—a sananey nin bendisyon ed saramay mankukurang a mauyamo a kaibay Dios.—Numeros 32:1; Deuteronomio 32:14.
23. Anton leksion so naaralan tayo diad pangonsidera ed Miqueas 7:18, 19?
23 Diad Miqueas 7:18, 19, impabitar na propeta so pilalek nen Jehova a mamerdona ed saraman so magbabawi. Ibabaga na bersikulo 18 a si Jehova so “mamerdona” tan “labsanan to so impakasumlang.” Unong ed bersikulo 19, “ibantak [to] naani so saray amin a kasalanan da ed saray kaaralman na dayat.” Anto so leksion a naaralan tayo ed saya? Nayarin tepetan tayoy inkasikatayo no kasin aaligen tayoy Jehova ed sayan pamaakaran. Kasin peperdonaen tayo iray lingo a nagagawaan na arum ed sikatayo? Sano magbabawi tan mipulangan ira, seguradon labay tayon ipatnag met so inkamabulos nen Jehova a mamerdona diad sigpot tan nagnap a paraan.
24. Panon kayon agunggonaan ed propesiya nen Miqueas?
24 Panon itayon agunggonaan diad impangikonsidera ed propesiya nen Miqueas? Impanonot na satan ed sikatayo a mangitatarya si Jehova na peteg ya ilalo ed saramay onaapit ed sikato. (Miqueas 2:1-13) Napapaseseg itayon gawaen so amin a nayarian tayo a mangiyalibansa na tuan panagdayew ta pian mankurang itayo ed ngaran na Dios diad ando lan ando. (Miqueas 4:1-4) Tan nipaseguro ed sikatayo ya antokaman so kipapasen tayo, nakapet tayo iray kakaukolanen nen Jehova. On, say propesiya nen Miqueas so talagan mamabiskeg ed sikatayon mankurang ed ngaran nen Jehova.
Panon Yon Ebatan?
• Unong ed Miqueas 6:8, anto so kakaukolanen nen Jehova ed sikatayo?
• Anto so nakaukolan ta pian ‘nagawaan tayo so inkahustisya’?
• Panon tayon nipatnag ya ‘aaroen tayo so kaabigan’?
• Anto so nalalanor ed ‘pagmaliw a mauyamo ed panakar a kaiba so Dios’?
[Tepetepet Parad Panagaral]
[Saray litrato ed pahina 21]
Anggaman ed marelmeng iran kipapasen ed panaon to, tinmulok si Miqueas ed saray kakaukolanen nen Jehova. Nagawaan yo met itan
[Litrato ed pahina 23]
Agamilen so inkahustisya diad pampulong ed totoo a walaan na nanduruman kipapasen ed bilay
[Saray litrato ed pahina 23]
Ipatnag ya aaroen yo so kaabigan diad pangitatarya na saray pankaukolan na arum
[Litrato ed pahina 23]
Gawa yoy anggaay nayarian yo legan a mapaabeban bibidbiren iray limitasyon yo