Mankurang Itayo ed Ngaran nen Jehova Diad Ando lan Ando!
Mankurang Itayo ed Ngaran nen Jehova Diad Ando lan Ando!
“Manakar itayo . . . dia ed ngaran nen Jehova a Dios tayo ed ando lan ando, lawas.”—MIQUEAS 4:5.
1. Antoran mensahe so nidatak ed Miqueas kapitulo 3 anggad 5?
WALAY bengatlan labay ya ibaga nen Jehova ed totoo to, tan inusar toy Miqueas bilang propeta to. Gagala na Dios so onkiwas sumpad saray managgaway-mauges. Dusaen To so Israel lapud impan-apostata to. Balet, makapaliket ta bendisyonan nen Jehova iramay mankurang ed ngaran to. Mabitabitar irayan mensahe diad kapitulo 3 anggad 5 na propesiya nen Miqueas.
2, 3. (a) Anton kalidad so nepeg ya ipatnag na saray lider na Israel, balet anto so aktual a gagawaen da? (b) Panon yon isalaysay so piguratibon salita a nausar ed Miqueas 3:2, 3?
2 Oniay inyabawag na propeta na Dios: “Denglen yo, kerewen ko ed sikayo, sikayo uloen ira na Jacob, tan manag-uley ira ed abung nen Israel: agyo ta nepeg ya amtaen so inkatunong?” On, satan komon so agamilen da, balet anton talaga kasi so ginawa ra? Inkuan nen Miqueas: “Sikayo a kagula yo so maong, tan aroen yo so mauges; a samsamen yo so baog da a manlapu ed sikara, tan say laman da ed saray pukel da; kanen yo met so laman na baley ko, tan bingkasen yo so baog da ed sikara, tan puteren yoray pukel da, tan tegtegen yo ra, a singa nipaakar ed banga, tan singa laman ed dalem na kaldiro.”—Miqueas 3:1-3.
3 Agayla, lalamesen na saray lider iray mairap-bilay tan pakaskasin totoo! Say piguratibon salita ya inusar dia so mainomay a natalosan na saramay onderengel ed si Miqueas. Sakbay ya ilambong so pinartin karnero, satan so katatan nin unona insan tegtegtegen. No maminsan et puteren iray pukepukel pian ompaway so utek na satan. Ilambong so laman tan pukepukel diad baleg a kaldiro, a singa samay sinalambit nen Miqueas. (Ezequiel 24:3-5, 10) Agaylan matukoy a panangiyilustra ed maabuson panagtrato na saray mauges a lider ed saray totoo diad panaon nen Miqueas!
Iilaloan nen Jehova ya Agamilen Tayo so Inkahustisya
4. Anto so pandumaan nen Jehova tan saray lider na Israel?
4 Wala so baleg a pandumaan na maaron Pastol a si Jehova, tan saray lider na Israel. Agda sinumpal so ganggan ed sikara a salimbengan da so pulok lapud agda aagamilen so inkahustisya. Imbes, sikara so sinisiblet ya anganamot ed saray piguratibon karnero, ya inkibot da so inkahustisya tan indunget da ira ed “saray gawa na panagpaagus na dala,” unong ya impaimano na Miqueas 3:10 ed New World Translation. Anto so naaralan tayo ed sayan situasyon?
5. Anto so iilaloan nen Jehova ed saramay mangidadaulo ed limog na totoo to?
5 Iilaloan na Dios ya agamilen na saramay mangidadaulo so inkahustisya ed limog na totoo to. Ontan so naromogan tayon aagamilen na saray lingkor nen Jehova natan. Niarum ni, saya so mitunosan ed Isaias 32:1, ya oniay nabasa tayo: “Nia, sakey ya ari so manari naani ed kaptekan, tan saray prinsipe manuley ira naani ed inkatunong [“inkahustisya,” NW].” Balet antoy naromog tayo ed panaon nen Miqueas? ‘Saray managgula na maong, tan manangaro na mauges’ a nantultuloy ya amikewet ed inkahustisya.
Naeebatan Iray Pikakasi na Siopa?
6, 7. Anton importantin punto so nipabitar ed Miqueas 3:4?
6 Kasin nailaloan na saray marelmeng a kapanaonan nen Miqueas so pabor nen Jehova? Siempre andi! Oniay indalatdat na Miqueas 3:4: “Ontawag ira ed Jehova, balet agto ra naani ebatan; on, isanib to naani so lupa to ed sikara dia ed satan a panaon, unong ed impanggawa ra na mauges ed saray gawa ra.” Idadanet na saya so importantin tuloy a punto.
7 Ag-ebatan nen Jehova iray pikakasi tayo no mangaagamil itayo na kasalanan. Tua itan no nankadua so estandarte na kabibilay tayo, ya iyaamot tayo so gagawaen tayon mauges bangta mankuankuanan itayon matoor a manlilingkor ed Dios. Unong ed Salmo 26:4, oniay inkanta nen David: “Agak akiyurong ed saray matitila a totoo, nisay akiyurong ak ed saray mansimpisimpitan.” Agmet ebatan nen Jehova iray pikakasi na saramay sigagagalan manusumlang ed Salita to!
Pinabiskeg na Espiritu na Dios
8. Anto so nipasakbay ed saray palson propeta diad panaon nen Miqueas?
8 Agaylan makapasinagem ya ag-agamil so kaslakan a gagawaen na saray lider na Israel! Pinanteyengteyeng na saray palson propeta iray totoo na Dios diad espiritual a paraan. “Deen!” so ikekelyaw na saray maagum a lider balet ta bebendisyonan da so pibabakal sumpad siopaman ya agmangiiter ed sikara na nakan. “Kanian,” kuan nen Jehova, “sikato naani labi ed sikayo, ya andian kayo naani na pasingawey: et sikato naani ambilunget ed sikayo, pian agkayo manparles; et say banwa onselek naani ed saray propeta, et say agew andeket naani ed sikara. Et saray managnengneng nibabaing ira naani, tan saray pomaparles nagulo ra naani; on, sikara ya amin sakbongan da naani so bibil [“balbas,” NW] da.”—Miqueas 3:5-7a.
9, 10. Anto so kabaliksan na ‘pansakbong ed balbas,’ tan akin ya anggapoy rason nen Miqueas pian gawaen itan?
9 Akin a ‘sakbongan da so balbas da’? Wala so mabanbanday a gagawaen na saray marelmeng a kapanaonan nen Miqueas? Tan sarayan mauges a totoo so nepeg ya ombaing. “Anggapo so ebat na Dios” ed sarayan mauges a totoo. (Miqueas 3:7b) Agtalinengen nen Jehova iray pikakasi na siopaman a mapaatagey iran marelmeng.
10 Anggapoy rason a ‘sakbongan nen Miqueas so balbas to.’ Anggapo so baingan to lapud eebatan nen Jehova iray pikakasi to. Imanoen so Miqueas 3:8, ya oniay imbaga na matoor a propeta: “No nipaakar ed siak, napno ak na pakayari ed panamegley na espiritu nen Jehova, tan pangukom, tan biskeg.” Agaylay pisasalamat nen Miqueas ta diad abayag tan matoor ya impanministeryo to, sikato so lawas ‘napno na pakayari ed panamegley na espiritu nen Jehova’! Satan so angiter ed sikato na biskeg pian ‘ipaliwawa ed Jacob so impakasumlang to, tan ed Israel so kasalanan to.’
11. Panon a napapabiskeg so totoo a mangiyabawag ed saray mensahe na Dios?
11 Aliwa lambengat a biskeg na too so kinaukolan nen Miqueas ta pian niyabawag to so mensahe na Dios nipaakar ed ambelat a panangukom To. Makanakana so espiritu, odino mabiskeg ya aktibon puersa nen Jehova. Komusta itayo balet? Nagawaan tayo labat so niganggan ed sikatayon panagpulong no pabiskegen itayo nen Jehova panamegley na masanton espiritu to. Seguradon onsaew iray getma tayon manpulong no sigagagala tayon aagamilen so kasalanan. Diad ontan a kipapasen et ag-ebatan na Dios iray pikakasi tayo parad biskeg a manggawa ed sayan kimey. Maseguron agtayo niyabawag iray mensahe na panangukom na mangatatawen ya Ama tayo no anggapoy “espiritu nen Jehova” ed sikatayo. Diad panamegley na saray pikakasin dedengelen tan diad tulong na masanton espiritu, makpel tayon nisalita so salitay Dios a singa si Miqueas.
12. Akin a saray inmunan babangatan nen Jesus et ‘makpel dan sinalita so salita na Dios’?
12 Nayarin nanonotan yo so salaysay ed Gawa 4:23-31. Isipen pa a sakey kayo ed saray babangatan nen Jesus nen inmunan siglo. Panggugunaetan na saray panatikon managpasegsegang a patundaen iray patumbok nen Kristo. Balet sarayan matoor so nampikasi ed Soberanon Katawan da, a kinerew da: “Katawan, nengneng mo so saray gagaem da; tan yabuloy mo ed saray aripen mo a salitaen da a makmakpel so salitam.” Say resulta? Sanen nampikasi ira, say pasen a nantitiponan da so yinmegyeg, tan sikaran amin so napno na masanton espiritu tan makpel dan sinalita so salitay Dios. Komon ta sipipikasi itayon onkerew na tulong ed si Jehova tan manmatalek ed tulong na masanton espiritu legan tayon susumpalen so ministeryo tayo.
13. Anto so agawa ed Jerusalem tan Samaria, tan akin?
13 Nonoten pa lamet so panaon nen Miqueas. Unong ed Miqueas 3:9-12, saray manuley a nankasalanan ed dala so manguukom a walay pasuksok, manbabangat iray saserdote a walay bayar, tan manpaparles iray palson propeta lapud kuarta. Agla pankelawan no akin ya ingganggan na Dios a say kabisera na Juda, a Jerusalem, so ‘magmaliw a bunton na saray geray’! Lapud kinmayat met so palson panagdayew tan inkabulok ed moral, si Miqueas so apuyanan a mangipasakbay a say Samaria so gawaen na Dios a “sakey a lusbo ed uma.” (Miqueas 1:6) Diad tua, naimatonan ni na propeta so impasakbay a paneral na saray armada na Asirya ed Samaria nen 740 K.K.P. (2 Arari 17:5, 6; 25:1-21) Mapatnag a sarayan mapuersan mensahe a sumpad Jerusalem tan Samaria so nipasabi lambengat diad biskeg nen Jehova.
14. Panon ya asumpal so propesiyan nikurit ed Miqueas 3:12, tan panon itayon naapektoan ed satan?
14 Talagan agnapaliisan na Juda so ambelat a panangukom nen Jehova. Bilang kasumpalan na propesiyan nikurit ed Miqueas 3:12, say Sion so “nabaka naani a singa sakey ya uma.” Diad sayan koma-21 a siglo, amta tayo ya agawa irayan bengatla sanen pinankibalatar na saray taga-Babilonia so Juda tan Jerusalem nen 607 K.K.P. Agawa itan pigay taon ni kayari na impangipropesiya nen Miqueas, balet ta sikato so segurado ed isabi na satan. Maseguron manmamatalek itayo met a say peles a marelmeng a sistema na bengabengatla so manampot ed nipasakbay ya ‘agew nen Jehova.’—2 Pedro 3:11, 12.
Ipetek nen Jehova Iray Pamaakaran
15. Diad mismon panangibaga yo, panon yon deskribien so propesiyan nikurit ed Miqueas 4:1-4?
15 No nodnonoten tayo so apalabas, nanengneng tayo a say ontumbok ya impasabi nen Miqueas et sakey a makapaliket a mensahe na ilalo. Agaylan makapaseseg iran salita so naromog tayo ed Miqueas 4:1-4! Oniay kabiangan ed inkuan nen Miqueas: “Dia ed saray kaunoran ya agew nagawa naani, a say palandey na abung nen Jehova niletneg naani ed toktok na saray palandey, tan sikato naani nipaatagey ed tagey na saray pukdol; et saray baley onagus ira naani ed sikato. . . . Et sikato ukomen to naani so saray dakel a baley, tan igeter to naani so nipaakar ed saray mabiskeg a nasyon ed arawi: et pitpiten da naani so saray kampilan da a tarem na lukoy, tan saray gayang da a kalkalawit; say nasyon agto naani yayag so kampilan a sumpa ed sananey a nasyon, tan ag-ira met la naani manaral na bakal. Balet onyurong ira naani balang sakey ed silong na kiew to ya ubas tan ed silong na kiew to a higos; et anggapo naani manaktakot ed sikara: ta say sangi nen Jehova na saray ehersito sikato so sinalita to.”
16, 17. Panon a nasusumpal natan so Miqueas 4:1-4?
16 Siopa irayan ‘dakel a balbaley’ tan ‘mabiskeg a nasyones’ ya asalambit dia? Aliwan saray nasyones tan gobierno na sayan mundo. Imbes, say propesiya so onaaplika ed saray indibidual a nanlapud amin a nasyon ya akikasakey la ed sagradon panaglingkor diad palandey na tuan panagdayew ed si Jehova.
17 Mitunosan ed propesiya nen Miqueas, say malinis a panagdayew ed si Jehova so magano lan agamilen ed sankagnapan a pantalos diad interon dalin. Natan, saray totoo a ‘tinandaan ed bilay ya andi-anggaan’ so nibabangat ed saray dalan nen Jehova. (Gawa 13:48) Ipaakseb nen Jehova so panangukom tan ipetek to iray bengatla diad espiritual a paraan parad saray mananisia ya ondapag ed Panarian. Makaliktar ira ed ‘baleg a kairapan’ bilang kabiangan na “baleg ya ulop.” (Apocalipsis 7:9, 14) Lapud pinitpit da laray kampilan da a pinagmaliw dan dingding na lukoy, anggan natan la et manbibilay ira ed kareenan kaiba so kapara ran Tasi nen Jehova tan arum nira. Agaylan makapaliket so pakapilimog ed sikara!
Determinadon Mankurang ed Ngaran nen Jehova
18. Anto so isisimbolo na ‘iyurong diad silong na ubasan tan kiew na higos’?
18 Diad panaon tayo, a say takot so manasakbong ed dalin a singa makapasesgan lurem, naliliketan itayo ta dakel so manaaral ed saray dalan nen Jehova. Pirawat tayo so panaon a maganggano lan onsabi sano amin a mangaaro ed Dios so agla manaral na pibabakal noagta onyurong ira ed silong na dilin ubasan tan kiew na higos da. Saray kiew na higos so mabetbet a nitatanem ed saray kaubasan. (Lucas 13:6) Say iyurong diad silong na ubasan tan kiew na higos so mangisisimbolo na mareen, maaligwas, tan maligen iran kipapasen. Anggan natan, say relasyon tayo ed si Jehova so mangiter ed sikatayo na deen na kanonotan tan espiritual a kaligenan. Sano niwala la iratan a kipapasen diad silong na uley na Panarian, anggapo lay takotan tayo tan maligeligen itayo la.
19. Anto so kabaliksan na pankurang ed ngaran nen Jehova?
19 Pian panggayagaan so pabor tan panamendisyon na Dios, nepeg itayon mankurang ed ngaran nen Jehova. Saya so mapuersan nibalikas ed Miqueas 4:5, ya oniay inyabawag na propeta: “Amin a baley manakar ira balang sakey ed ngaran na dios to; et manakar itayo naani dia ed ngaran nen Jehova a Dios tayo ed ando lan ando lawas.” Say pankurang ed ngaran nen Jehova so aglambengat mankabaliksay pangibaga tayo a sikato so Dios tayo. Aliwa labat a say pibiang tayo ed saray Makristianon miting tan panangipulong tayo ed Panarian so nakaukolan, anggaman importante iratan a kimey. Ta pian makapankurang itayo ed ngaran nen Jehova, sikatayo so dedikado ed sikato tan pambanikelan tayo so matoor a panlingkor ed sikato tekep na interon-kamarerwan panangaro. (Mateo 22:37) Tan bilang mandadayew ed sikato, maseguron determinado itayon mankurang ed ngaran nen Jehova a Dios tayo diad ando lan ando.
20. Anto so nipasakbay ed Miqueas 4:6-13?
20 Ipangasi natan a konsideraen iray mapropetikon salita ed Miqueas 4:6-13. Say “anak a bii na Sion” so kinaukolan a nadestiero “angga ni ed Babilonia.” Ontan so eksakton agawa ed saray manaayam ed Jerusalem diad komapiton siglo K.K.P. Anggaman kuan, ipapabitar na propesiya nen Miqueas a say nakdaan so ompawil ed Juda, tan diad kipawil na Sion et seguroen nen Jehova a namekmek iray kakabusol to.
21, 22. Panon ya asumpal so Miqueas 5:2?
21 Nipasakbay ed Miqueas kapitulo 5 so arum niran makapasagyat a nagawa. Singa bilang, imanoen so nibaga ed Miqueas 5:2-4. Impropesiya nen Miqueas a say tinuro na Dios a Manuley—a “nanlapu nen inmuna”—so nianak diad Betlehem. Sikato so manuley bilang sakey a managpastol “ed biskeg nen Jehova.” Niarum ni, sayan Manuley so matalonggaring, aliwan dia lambengat ed Israel, noagta diad “saray sampot na dalin.” Say pakabidbiran ed sikato so nayarin manwetwet ed mundo diad inkalapagan, balet aliwa itan a misteryo ed sikatayo.
22 Siopa so sankaimportantian a persona a nianak ed Betlehem? Tan siopa so ‘magmaliw a baleg angga ed saray sampot na dalin’? Anggapo lay arum noagta say Mesias, si Jesu-Kristo! Sanen tinepetan nen Herodes a Baleg so manuna iran saserdote tan saray eskriba no iner so kianakan na Mesias, oniay ebat da: ‘Dia ed Betlehem na Judea.’ Inaon da ni ingen iray salita ed Miqueas 5:2. (Mateo 2:3-6) Amta iya na arum ed saray kabanyakan a totoo, lapud oniay impangaon na Juan 7:42 ed ibabaga ra: “Agta inkuan na sulat, a say Kristo manlapu ed poli nen David tan manlapu ed Betlehem, say aldea a kawalaan nen David nensaman?”
Tuan Pakarepreskoan na Totoo
23. Anto so nagagawa natan bilang kasumpalan na Miqueas 5:7?
23 Tinukoy na Miqueas 5:5-15 so inlusob na Asirya a maganggano labat ya ontalona tan impabitar na satan ya ipaakseb na Dios so panangibales ed saray matungangan nasyon. Insipan na Miqueas 5:7 so kipawil na saray magbabawin Judion nakdaan diad binalegan dan dalin, balet sarayan salita so onaplika met ed panaon tayo. Oniay inyabawag nen Miqueas: ‘Say nakekeraan ed Jacob sikato naani so walad pegley na dakel a balbaley a singa linaew a manlapu ed si Jehova, singa saray mayamaya ed tapew na dika.’ Inusar iyan alay abig a simbolismo pian ipasakbay a say nakdaan na espiritual a Jacob, odino Israel, so magmaliw a bendisyon na Dios ed totoo. Say ‘arum a karnero’ nen Jesus, a walaan na mangaraldalin ya ilalo, so naliliketan a manlingkor a benebenek kaiba so modernon-agew a nakdaan na “Israel na Dios,” ya ontutulong pian narepreskoan so arum ed espiritual a paraan. (Juan 10:16; Galacia 6:16; Sofonias 3:9) Nipaakar ed saya, wala so importantin punto a morekdeken. Bilang manangiyabawag na Panarian, nepeg a pablien tayon amin so pribilehyo tayon mangitarok na tuan pakarepreskoan ed arum.
24. Antoran punto ed Miqueas kapitulo 3 anggad 5 so natandaan yo?
24 Anto so naaralan yo ed kapitulo 3 anggad 5 na propesiya nen Miqueas? Nayarin sarayan punto: (1) Iilaloan na Dios ya agamilen na saramay mangidadaulo ed limog na totoo to so inkahustisya. (2) Ag-ebatan nen Jehova iray pikakasi tayo no sigagagala itayon mangaagamil na kasalanan. (3) Say ganggan ed sikatayo a panagpulong so nasumpal labat no pabiskegen itayo na Dios panamegley na masanton espiritu to. (4) Pian napanggayagaan tayo so pabor na Dios, nepeg a mankurang itayo ed ngaran nen Jehova. (5) Bilang manangiyabawag na Panarian, nepeg a pablien tayo so pribilehyo a pangitarok na tuan pakarepreskoan ed totoo. Arum a punto so nayarin makatantanda ed sikayo. Anto ni so naaralan tayo ed sayan mapropetikon libro na Biblia? Ontulong ed sikatayo so ontumbok ya artikulo pian natebek tayo so praktikal iran leksion manlapud sampot a duaran kapitulo na makapabiskeg-pananisian propesiya nen Miqueas.
Panon Yon Ebatan?
• Anto so iilaloan na Dios ed saramay mangidadaulo ed limog na totoo to?
• Akin ya importante so pikakasi tan masanton espiritu diad panaglingkor tayo ed si Jehova?
• Panon so ‘panakar [na totoo] ed ngaran nen Jehova’?
[Tepetepet Parad Panagaral]
[Litrato ed pahina 15]
Sarag yo kasin ipaliwawa so ilustrasyon nen Miqueas nipaakar ed kaldiro?
[Saray litrato ed pahina 16]
Singa si Miqueas, makpel tayon gagawaen so ministeryo tayo