Propesiya nen Isaias​—Liwawa Parad Amin a Katooan II

Kapitulo Beinte-sais

“Manliket Kayo ed Ando lan Ando ed Saman a Palsaen Ko”

Isaias 65:1-25

1. Antoran makapaseguron salita so insulat nen apostol Pedro, tan anton tepet so linmesa?

 NAIMATONAN tayo ni kasi so panganggaan na ag-inkahustisya tan paniirap? Masulok lan 1,900 a taon so apalabas, insulat nen apostol Pedro irayan makapaseguron salita: “Unong ed sipan [na Dios] alagden tayo so saray tawen a balo tan dalin a balo, a sikara so panayaman na katunongan.” (2 Pedro 3:13) Si Pedro, kaiba so arum niran matoor a lingkor na Dios diad loob na dakel a siglo, so nanilalo ed baleg ya agew a naandi la so kaugsan, panaglames, tan karawalan, tan ontalona la so inkatunong. Makapanseguro tayo kasi a nasumpal iyan sipan?

2. Siopan propeta so anaglawi ed ‘balon katawenan tan balon dalin,’ tan antoray kasumpalan na satan a kadaanan a propesiya?

² On, makapanseguro itayo! Sanen sinaglawi nen Pedro so ‘balon katawenan tan balon dalin,’ agto ipaparungtal so sakey a balon ideya. Ngalngali 800 a taon ed asasakbay, ontan met so imbaga nen Jehova panamegley nen propeta Isaias. Satan ya akadkaunan sipan so walaan na melag a kasumpalan nen 537 K.K.P. sanen nibulos iray Judio manlapud impakakautibo ra ed Babilonia, kanian sikaray akapawil ed binalegan dan dalin. Balet say propesiya nen Isaias so walaan na babaleg a kasumpalan natan, tan tatalaranan tayo so mas makapasagyat ni ingen a kasumpalan diad onsabin balon mundo na Dios. On, say makapaligsay-puson propesiya a niiter panamegley nen Isaias so pagpauna na saray bendisyon ya intarya na Dios ed saramay mangaaro ed sikato.

Mikakasi si Jehova ed “Masugnar a Baley”

3. Anton tepet so naebatan ed sikatayo diad Isaias kapitulo 65?

³ Tandaan a lugan na Isaias 63:15–64:12 so mapropetikon pikakasi nen Isaias parad saray Judion adestiero ed Babilonia. Unong ya impabitar na saray salita nen Isaias, aliwan interon-kamarerwa so panagdayew na dakel a Judio ed si Jehova, balet ta arum so nagbabawi tan pinmawil ed sikato. Kasin ipawil nen Jehova so nasyon nisesengeg ed satan a magbabawin nakdaan? Naromog tayo so ebat diad Isaias kapitulo 65. Balet sakbay ton imbalikas so sipan na kililiktar parad pigaran matoor, deneskribe ni nen Jehova so panangukom a manatalaran ed dakel ya andian na pananisia.

4. (a) Midumaan ed rebelyoson totoo to, siopa so mananap ed si Jehova? (b) Panon so impangiyaplika nen apostol Pablo ed Isaias 65:1, 2?

⁴ Inanosan nen Jehova so nantultuloy ya impanrebeldi na totoo to. Balet onsabi so panaon a paulyanan to ira ed saray kabusol da tan mapangasi ton abrasaen so arum diad pabor to. Oniay kuan nen Jehova panamegley nen Isaias: “Siak so binalita na saray agtinmepet a nipaakar ed siak; siak so aromog na saray agnananap ed siak: inkuan ko, Nengneng yo ak, nengneng yo ak ed sakey a nasyon ya ag-atawag ed panamegley na ngaran ko.” (Isaias 65:1) Makapaermen itan ya obserbasyon ed akisipanan a totoo nen Jehova a saramay walad nasyones so ondago ed si Jehova balet say interon benger a Juda so agmalabay a manggawa ed satan. Aliwan si Isaias labat so propetan mangipapasakbay a pilien a siansia na Dios so totoo ya agni kabat nensaman. (Oseas 1:10; 2:23) Inaon nen apostol Pablo so Isaias 65:1, 2 manlapud Septuagint pian paneknekan a saray totoo na nasyones so makagamor na “katunongan a lapu ed pananisia,” anggaman saray sipor lan Judio so agnanggawa ed satan.​—Roma 9:30; 10:20, 21.

5, 6. (a) Anton masimoon a pilalek so impatnag nen Jehova, balet panon so inkiwas na totoo to? (b) Anto so naaralan tayo manlapud saray pidedeneng nen Jehova ed Juda?

⁵ Impaliwawa nen Jehova no akin ya abuloyan to so mismon totoo to a managmak na kalamidad: “Inyunat ko so limak ed amin ya agew ed masugnar a baley, a manakar ed dalan ya aliwa a maong, unong ed saray kanonotan da lanlamang.” (Isaias 65:2) Say pangiyunat na sakey ed saray lima to so mankabaliksan na pangimbita odino pikasi. Inyunat nen Jehova iray lima to, ya aliwa labat ya aganggano, noagta sanagew. Say masimoon a pilalek to et ompawil ed sikato so Juda. Ingen, sayan benger a totoo so agkinmiwas.

⁶ Agaylan makapaligsay-puson leksion so naaralan  tayo ed saray salita nen Jehova! Labay to ya onapit itayo ed sikato lapud sikato so Dios a mainomay ya asinggeran. (Santiago 4:8) Ipapabitar met na sarayan salita a si Jehova et mapaabeba. (Salmo 113:5, 6) Diad tua et intultuloy ton inyunat iray lima to ed piguratibon paraan, a mikakasi ed totoo to ya ompawil ira anggaman say inkabenger da so ‘amaermen’ ed sikato. (Salmo 78:40, 41) Kayari lambengat na dakel a siglo a sikatoy mikakasi ed sikara insan to la ira pinaulyanan ed saray kakabusol da. Anggaman ontan, agto impulisay iray mapaabeban indibidual ed limog da.

7, 8. Diad antoran paraan a si Jehova so pinasanok na benger a totoo to?

⁷ Saray benger a Judio so aminpigan amasanok ed si Jehova lapud makapabaing a kondukta ra. Deneskribe nen Jehova iray makapaopendin kiwas da: “Sakey a baley a naynay a manasagyat ed siak ed lupak, a manbagat ed loob na saray tanamanan, tan manpasob na insenso ed tapew na saray laryo; ya onyurong ira ed pegley na lubok, tan ondawes ira ed saray maamot a pasen; a kanen da so laman na baboy, tan say digo na saray makadimla a bengabengatla a wala ed saray kagawaan da; a kuan da, Deen ka, agka onabay ed siak, ta siak masanto ak nen sika. Saraya sikara so sakey ya asewek ed eleng ko, sakey ya apoy ya ondalang ed amin ya agew.” (Isaias 65:3-5) Sarayan mansantosantoan a totoo so mangoopendi ed si Jehova ‘diad [mismon] lupa to’​—sakey a balikas a nayarin mankabaliksan na pagmaliw a malangas tan andiay panangigalang. Agda nanggunaetan a sakbongan iray makapabanday ed sikara. Agta nagkalalo lan mauge-uges so panggawa na saray kasalanan ed mismon arapan na samay Sakey a nepeg a galangen tan unoren?

⁸ Singa oniay ibabaga na sarayan mantunongtunongan a managkasalanan ed arum iran Judio: ‘Agka onaabay ed siak, ta masanto ak nen say sika.’ Agaylan pansimpisimpitan! Sarayan “mansantosantoan” so mangiyaapay na saray bagat tan mamopool na insenso parad palson dirios, a kokondenaen na Ganggan na Dios. (Exodo 20:2-6) Manyudyurong ira ed saray panangiponponan, a manggagawa ed sikara a marumsis unong ed Ganggan. (Numeros 19:14-16) Kakanen da so karne na baboy ya agmalinis a tagano. * (Levitico 11:7) Ingen, moriaen dan sikaray mas masanto nen saray arum a Judio lapud relihyoso iran aktibidad da, tan labay dan paarawien so arum a totoo ta pian ag-iraya napasanto, a singa panangibaga, odino nalinisan, diad pilimog da lambengat. Anggaman kuan, aliwan ontan so panmoria na Dios a mankaukolan na “nikabkabiig a debosyon”!​—Deuteronomio 4:24, NW.

9. Panon so panmoria nen Jehova ed mantunongtunongan iran managkasalanan?

⁹ Imbes ya ipasen ton masanto irayan mantunongtunongan, oniay kuan nen Jehova: “Sikara so sakey ya asewek ed eleng ko.” Say Hebreon salita parad “eleng” odino “eengasan” so mabetbet a nauusar a piguratibo parad sanok. Say asewek met so misiglaotan ed mandarlang a sanok nen Jehova. (Deuteronomio 29:20) Say makapadimlan idolatriya ya inkaplagan na totoo to so anagyat ed mandarlang a sanok nen Jehova.

10. Panon so panumang nen Jehova ed saramay taga-Juda lapud saray kasalanan da?

¹⁰ Lapud inkahustisya to, ag-abuloyan nen Jehova ya agnadusa irayan sigagagalan managkasalanan. Oniay insulat nen Isaias: “Nia, nisulat ed arap ko: agak naani ag-onesel, noag ingen ontumang ak naani, on tumangan ko naani ed akwalan da, saray inkauges yo lanlamang, tan saray inkauges na saray atateng yo ya atiptipon, kuan nen Jehova, a nampasob ira na insenso ed tapew na saray palandey, et inayew da ak ed pantay na saray pukdol: kanian sukaten ko naani ya unona so gawa ra ed akwalan da.” (Isaias 65:6, 7) Diad pibibiang da ed palson panagdayew, sarayan Judio so amabanday ed si Jehova. Ginawa ra so panagdayew ed tuan Dios a mipadpara ed panagdayew na saray nasyon ya akapaliber ed sikara. ‘Lapud saray inkauges da,’ a mangilaktip ed idolatriya tan espiritismo, ombales ed sikara si Jehova dia “ed akwalan” da. Say balikas ya “akwalan” so mapatnag a manutukoy ed nitupin parte na akinpaway a kawes a nayarin pangikukuyaboan na saray managlako ed sinukat a karakel na bunga. (Lucas 6:38) Parad saray apostatan Judio, say kabaliksan et malinew​—sukaten nen Jehova so ‘tumang,’ odino dusa ra. Kaukolan a dusaen ira na Dios na inkahustisya. (Salmo 79:12; Jeremias 32:18) Lapud agmanguuman si Jehova, makapanmatalek itayo a diad nigeter a panaon to, ontan met so panukat to ed pananusa ed sayan marelmeng a sistema na bengabengatla.​—Malaquias 3:6.

“Nipaakar ed Saray Aripen Ko”

11. Panon ya impabitar nen Jehova ya iliktar to so matoor a nakdaan?

¹¹ Kasin ipanengneng nen Jehova so panangasi ed saray matoor ed limog na totoo to? Oniay insalaysay nen Isaias: “Onia so kuan nen Jehova, Singa say balo ya alak naromog ed mognel na bunga na ubas, et say sakey kuanto, Sikato so agyo deralen, ta sakey a bendisyon so wala ed sikato: ontan so gawaen ko naani nipaakar ed saray aripen ko, pian agko ra deralen ya amin. Et yakar ko naani so sakey a kailalakan  ya ompaway ed kinen Jacob, tan ompaway ed Juda so sakey a manawir ed saray palandey ko; et say pinilik sikato so tawiren to naani, et saray aripen ko manayam ira’d man.” (Isaias 65:8, 9) Diad impangikompara to ed totoo ed sakey a mungkog na ubas, inusar nen Jehova so sakey ya ilustrasyon a mainomay dan natalosan. Daakan so ubas ed dalin da, tan say alak na ubas et bendisyon ed katooan. (Salmo 104:15) Say nilitrato dia so nayarin sakey a mungkog ya aliwan amin ya ubas na satan et maabig. Odino say ideya et nayarin maabig so sakey a mungkog, bangta begsang ni odino abulok la so arum a mungkog. Antokaman so kipapasen, say manangasikaso na ubas so agmaneral ed maabig iran ubas. Kanian papaseguroan sirin nen Jehova so totoo to ya agto sigpot a deralen so interon nasyon noagta iliktar to so matoor a nakdaan. Inkuan to a sayan naabobonan a nakdaan so mangayarian ed “saray palandey” to, salanti, say Jerusalem tan say dalin na Juda, say mapukdol a rehyon ya inkuan nen Jehova a kien to.

12. Antoran bendisyon so manatalaran ed matoor a nakdaan?

¹² Antoran bendisyon so manatalaran ed sayan matoor a nakdaan? Oniay impaliwawa nen Jehova: “Say Saron sikato naani sakey a panangipukokan na saray karnero, et say lawak na Akor sakey a pasen a nipaakar ed dukolan na saray baka, a nipaakar ed baley ko a nananap ed siak.” (Isaias 65:10) Saray pulok so walaan na importantin betang ed bilay na dakel a Judio, tan say maawang a panagpastolan so ontulong pian niwalay inkaaligwas diad mareen a panaon. Tinukoy nen Jehova so nantupag a sampot na dalin pian ilitrato so kareenan tan aligwas. Diad sagur a Patar na Saron, a kabkabat ed karakpan tan inkamabuna to, so onnatnat ed gilig na Baybay na Mediteraneo. Say Lawak na Akor so manugyop ed kabiangan na amianen-bukig a ketegan na dalin. (Josue 15:7) Diad pakadestiero ra, sarayan pasen so mankibalatar, pati say arum a kabiangan na dalin. Balet, insipan nen Jehova a kayari na pakadestiero ra et magmaliw iratan ya alay abig a panagpastolan na saray ompawil a nakdaan.​—Isaias 35:2; Oseas 2:15.

Manmamatalek ed ‘say Dios na Suwerti’

13, 14. Antoran agamil so mangipapatnag a say Dios et imbeneg na totoo to, tan anto so agawa ed sikara bilang resulta?

¹³ Inimano lamet natan na propesiya nen Isaias iramay angikaindan ed si Jehova tan nansiansia ed idolatriya. Inkuan na satan: “Sikayo ya angikaindan ed kinen Jehova, ya angilingwan ed masanto a palandey ko, ya angitadia na sakey a dulang a nipaakar ed Kapalaran [“dios na Suwerti,” NW] tan mamano ed alaokan ya alak na Signo.” (Isaias 65:11) Diad pangiparaan ed dulang a walay tagano tan iinumen diad arap na “dios na Suwerti” tan ‘[dios] na Signus,’ saraman a binmeneg a Judio so alanor ed saray panagtalintao na paganon nasyones. * Anto so pagmaliwan na siopaman a makulangkulang a manmatalek ed saratan a dirios?

¹⁴ Oniay prangkan impasakbay nen Jehova ed sikara: “Igeter ta kayo naani ed kampilan, et sikayo ondakmomo kayo naani ed managpatey; lapu ed sanen tinmawag ak, agkayo inmebat; sanen nansalita ak agyo tinalineng: noag ingen ginawa yo ray mauges ed saray matak, tan pinili yo ray agko panliketan.” (Isaias 65:12) Diad impangipasagilig ed ngaran na dios na Suwerti ed orihinal a Hebreon salita, imbaga nen Jehova a saramay mandadayew ed sayan palson dios so ‘nigeter naani ed kampilan,’ salanti, diad kadederal. Panamegley na saray propeta to et aminpigan pinaseseg nen Jehova irayan totoo pian magbabawi, balet sikato so imbaliwala ra tan mas pinili ra nin gawaen so amta ran mauges ed imaton to. Agayla so panagmudmora ra ed Dios! Bilang kasumpalan na pasakbay na Dios, sinagmak na nasyon so baleg a desyang nen 607 K.K.P. sanen inabuloyan nen Jehova iray taga-Babilonia a maneral ed Jerusalem tan ed say templo to. Diad satan a panaon et ag-asalimbengan na ‘say dios na Suwerti’ iray mandadayew ed sikato diad Juda tan Jerusalem.​—2 Awaran 36:17.

15. Diad anton dalan a saray tuan Kristiano natan so ontatalineng ed pasakbay a naromog ed Isaias 65:11, 12?

¹⁵ Natan et tatalinengen na saray tuan Kristiano so  pasakbay a naromog ed Isaias 65:11, 12. Agda papanisiaan so “Suwerti,” a singano satan so sakey a nengneng na makapakelaw a puersa a pakagamoran na saray pabor. Lapud agda labay a daraken so materyal iran kayarian da diad panalin paliketen so “dios na Suwerti,” papaliisan da so amin a nengneng na sugal. Kombinsido ira a saramay mangidedeboto na inkasikara ed sayan dios so makabalang met lanlamang ed amin a bengatla, lapud oniay kuan nen Jehova ed saratan: “Igeter ta kayo naani ed kampilan.”

“Nia, Saray Aripen Ko Manliket Ira Naani”

16. Diad antoran dalan a bendisyonan nen Jehova iray matoor a lingkor to, balet anto so nagawa ed saramay mangibeneg ed sikato?

¹⁶ Bilang panamaat ed saramay angibeneg ed si Jehova, deneskribe na propesiya so mandumaan iran pansumpalan a manatalaran ed saramay masimoon a mandadayew ed Dios tan saramay mansimpisimpitan: “Onia so kuan nen Katawan a Jehova, Nia, saray aripen ko mangan ira naani, balet sikayo naerasan kayo; nia, saray aripen ko oninum ira naani, balet sikayo napgaan kayo naani; nia, saray aripen ko manliket ira naani, balet sikayo nabaingan kayo naani; nia, saray aripen ko mankanta ra naani a nisengeg ed liket na puso, balet sikayo manakis kayo naani a nisengeg ed ermen na puso, tan managogol kayo naani a nisengeg ed irap na espiritu.” (Isaias 65:13, 14) Bendisyonan nen Jehova so matoor iran lingkor to. Sikara so onkelyaw ed liket lapud manleppua so gayaga ed kapusoan da. Say panangan, iyinum, tan panliliket so terminon mankabaliksan a peneken a maong nen Jehova iray pankaukolan na saray mandadayew ed sikato. Diad pidumaan, saramay mangibeneg ed si Jehova so naerasan tan napegaan ed espiritual a paraan. Agnapenek iray pankaukolan da. Onkelyaw tan ondageyem ira lapud egagel tan gonigon ya onsabi ed sikara.

17. Akin a saray totoo na Dios natan so walaan na maabig a rason pian onkelyaw ed liket?

¹⁷ Deneskribe na saray salita nen Jehova so espiritual a kipapasen na saramay mankuan labat a manlilingkor ed Dios. Balet, anggaman nagogonigon so minilyon ed Kakristianoan, saray mandadayew ed si Jehova so onkelyaw ed liket. Tan walaan ira na maabig a rason pian manliket. Amin da so natataganon maong ed espiritual a paraan. Itatarya nen Jehova ed sikara so daakan a suplay na espiritual a tagano panamegley na saray publikasyon a nibase’d Biblia tan saray pandaragup na Kristiano. On, saray makapabiskeg a katuaan tan say makaligliwan sipasipan na Salitay Dios so mangiter ed sikatayo ‘na liket ed puso’!

18. Anto so nagawa ed saramay angitalirak ed si Jehova, tan anto so nayarin isusuheri na pangusar ed ngaran da diad sakey a samba?

¹⁸ Oniay intuloy ya imbaga nen Jehova ed saramay angikaindan ed sikato: “Paulyan yo naani so ngaran yo a nipaakar a sakey ya ayew ed pinilik; et si Katawan a Jehova pateyen to ka naani; et ingaran to naani so saray aripen to ed sananey a ngaran: Dia ed ontan a say mamendisyon ed sikato lanlamang ed dalin bendisyonan to naani so laman to lanlamang ed Dios na tua; et say mansamba ed dalin mansamba naani ed Dios na tua; lapu ed saray inmuna a gonigon nalingwanan la tan lapu ed sikara onamot ira ed saray matak.” (Isaias 65:15, 16) Say natilak labat ed saramay angikaindan ed si Jehova et say ngaran da, a nausar lambengat ed sakey a samba odino ayew. Saya so mankabaliksan a saramay malabay a mangisiglaot ed inkasikara diad masimoon a paraan panamegley na sakey a samba so singa mangibabagan: ‘No agko sumpalen iyan sipan ko, naeksperiensyak so dusa ya agawa ed saray apostata.’ Satan so mankabaliksan ni ingen a nausar so ngaran da bilang ilustrasyon, a singa say Sodoma tan Gomorra, a mangisisimbolo ed panusa na Dios ed saray marelmeng.

19. Panon a natawag iray lingkor na Dios ed sananey a ngaran, tan akin a makapanmatalek ira ed Dios na katooran? (Nengnengen met so paimano’d-leksab.)

¹⁹ Agaylan miduma so pansumpalan na saray mismon lingkor na Dios! Sikara so tawagen ed sananey a ngaran. Satan so mankabaliksan na abenditon kipapasen tan kagalangan a panggayagaan da diad binalegan dan dalin. Ag-ira pabendisyonan ed antokaman a palson dios odino mansamba ira ed antokaman ya andiay-bilay a talintao. Imbes, sano papalaren da so inkasikara odino mansamba ira, gawaen da itan ed Dios na katooran. (Isaias 65:16, paimano’d-leksab, NW) Saray manaayam ed nasyon so walaan na rason pian sigpot a manmatalek ed Dios, lapud papaneknekan to so inkasikato a matoor ed saray sipan to. * Lapud maligen lara ed binalegan dan dalin, maganon nalingwanan na saray Judio iray datin akagonigonan da.

‘Mamalsa Ak na Balon Katawenan tan Balon Dalin’

20. Panon ya asumpal so sipan nen Jehova nen 537 K.K.P. nipaakar ed ‘balon katawenan tan balon dalin’?

²⁰ Pinalaknab ni nen Jehova so sipan to ya ipawil  iray magbabawin nakdaan kapawil da manlapud inkadestiero ed Babilonia. Oniay kuan nen Jehova panamegley nen Isaias: “Nia, mamalsa ak na saray balo a tawen tan balo a dalin; ta saray inmuna a bengatla ag-ira la nanonotan, ag-ira la onla ed nonot [“onsebang ed puso,” NW].” (Isaias 65:17) Maseguron nasumpal so sipan nen Jehova nipaakar ed kipawil, kanian sinalita to so arapen a kipawil a singano nagagawa la itan. Sayan propesiya so primeron asumpal nen 537 K.K.P. sanen nipawil ed Jerusalem iray Judion nakdaan. Anto so manibukel ed ‘balon katawenan’ diad saman a panaon? Say inka-gobernador nen Zerubabel a sinuportaan na Atagey a Saserdoten si Josue tan niletneg itan diad Jerusalem. Say nipawil a Judion nakdaan so tugyopen na ‘balon dalin,’ sakey ya alinisan a sosyedad a nampasakop ed satan a pananguley tan tinmulong a mangiletneg lamet ed puron panagdayew diad bansa ra. (Esdras 5:1, 2) Amin a datin impanirap da so palumbasan na liket ed satan a kipawil da; agda la anggan nanonotan iray datin akagonigonan da.​—Salmo 126:1, 2.

21. Anton balon katawenan so niletneg nen 1914?

²¹ Balet, tandaan ya inulit nen Pedro so propesiya nen Isaias tan impatnag to a satan so walaan na kasumpalan ed arapen. Oniay insulat na apostol: “Unong ed sipan to alagden tayo so saray tawen a balo tan dalin a balo, a sikara so panayaman na katunongan.” (2 Pedro 3:13) Nen 1914 et niletneg so abayaglan aalagaren a balon katawenan. Nianak ed satan a taon so Mesianikon Panarian a manuuley lan mismo ed katawenan, tan inter nen Jehova so autoridad ed satan diad interon dalin. (Salmo 2:6-8) Sayan gobierno a Panarian, ya uleyan nen Kristo tan say 144,000 a kakaiba to, so balon katawenan.​—Apocalipsis 14:1.

22. Siopa so manugyop ed balon dalin, tan panon so kipaparaan la natan na saray totoo pian magmaliw a pinagkapundasyon na satan ya uksoyan?

²² Komusta balet so balon dalin? Singa met ed padron na inmunan kasumpalan, say balon dalin so tugyopen na totoo a maliket a manpasakop ed pananguley na balon mangatatawen a gobierno. Anggan natan et minilyon ed saray nikiling ed kaptekan ya indibidual so manpapasakop la ed sayan gobierno tan panggugunaetan dan tumboken iray ganggan na satan a naromog ed Biblia. Sikara so nanlapud amin a nasyonalidad, lenguahe, tan rasa, tan nankakasakey ira a mankikimey pian panlingkoran so manuuley lan Arin Jesu-Kristo. (Miqueas 4:1-4) Sano naandi la iyan kaplesan a marelmeng a sistema na bengabengatla, sayan grupo so manugyop ed pinagkapundasyon na balon dalin a magmaliw ed saginonor ya englobon sosyedad na saray totoon matakot ed Dios, a manawir ed mangaraldalin a sakop na Panarian na Dios.​—Mateo 25:34.

23. Anton impormasyon so naromog tayo ed libro na Apocalipsis nipaakar ed ‘balon katawenan tan balon dalin,’ tan panon a nasumpal iyan propesiya?

²³ Deneskribe na libro na Apocalipsis so pasingawey ya anengneng nen apostol Juan nipaakar ed onsabin agew nen Jehova, sano naandi la iyan sistema na bengabengatla. Kasumpal na satan et nikalinsurong si Satanas. (Apocalipsis 19:11–20:3) Kayari na satan ya impaneskribe, inulit nen Juan iray mapropetikon salita nen Isaias, ya oniay insulat to: “Akanengneng ak na sakey a tawen a balo tan sakey a dalin a balo.” Sinaglawi na tinmumbok iran bersikulo na salaysay nipaakar ed sayan maglorian pasingawey so panaon a parakepen lan amin nen Jehova a Dios iray kipapasen diad sayan dalin. (Apocalipsis 21:1, 3-5) Malinew, say sipan nen Isaias nipaakar ed ‘balon katawenan tan balon dalin’ so makapakelaw a nasumpal diad balon mundo na Dios! Diad silong na balon gobierno ed katawenan, panggayagaan na balon mangaraldalin a sosyedad so espiritual tan pisikal a paraiso. Talagan makapaligliwa so sipan a ‘saray inmunan bengatla [sakisakit, ir-irap, tan dakel nin kairapan a sasagmaken na totoo] so agla nanonotan, agla iratan onsebang ed puso.’ Antokaman so nayarin nanonotan tayo ed satan a panaon et agla pansengegan na sakit na linawa, odino ot-ot, ed sikatayo, a pirmin pakakagonigonan na dakel natan.

24. Akin a panliketan nen Jehova so kipawil na Jerusalem, tan anto so agla narengelan ed saray karsada na satan a syudad?

²⁴ Oniay intuloy na propesiya nen Isaias: “Manggayaga tan manliket kayo ed ando lan ando ed saman a palsaen ko; ta nia, palsaen ko so Jerusalem a sakey a panliketan, tan say ombaley ed sikato a sakey a liket. Et manliket ak naani ed Jerusalem, tan gayaga naani ed baley ko; et agla narengelan anggan kapigan ed sikato so boses na nangis tan say boses na panakis.” (Isaias 65:18, 19) Aliwan saray Judio labat so manliket ed inkipawil da ed binalegan dan dalin noagta panliketan met itan a mismo na Dios, lapud parakepen ton maong so Jerusalem​—a magmaliw lamet a sentro na tuan panagdayew diad dalin. Aglan balot narengel so ungol na pannangis lapud desyang, a narerengel nensaman ed saray karsada na satan a syudad pigaran dekada lay apalabas.

25, 26. (a) Diad panaon tayo, panon a gawaen nen Jehova so Jerusalem a “panliketan”? (b) Panon ya usaren nen Jehova so Balon Jerusalem, tan akin a makapanliket itayo natan?

²⁵ Gagawaen met natan nen Jehova so Jerusalem a  “panliketan.” Panon? Unong ya anengneng tayo la, say balon katawenan a niletneg nen 1914 so manugyop ed 144,000 a kaiban manuley, a walaan na betang ed mangatatawen a gobierno. Sikara so mapropetikon adeskribe bilang “Balon Jerusalem.” (Apocalipsis 21:2) Oniay imbaga na Dios nipaakar ed Balon Jerusalem: “Nia, palsaen ko so Jerusalem a sakey a panliketan, tan say ombaley ed sikato a sakey a liket.” Say Balon Jerusalem so usaren na Dios a mangipalabo na daakan a bendisyon ed matulok a katooan. Agla narengelan so ungol na pannangis odino ugaog, lapud peneken la nen Jehova ‘iray pirawat na puso tayo.’​—Salmo 37:3, 4.

²⁶ On, wala so rason tayo natan pian manliket! Magano lan pasantosen nen Jehova so matalonggaring a ngaran to diad paneral to ed amin ya onsusumpa. (Salmo 83:17, 18) Insan say balon katawenan so sigpot lan manuley. Agaylan abig irayan rason pian panliketan tan panggayagaan ed ando lan ando so walan palsaen na Dios!

Say Sipan a Nipaakar ed Maligen ya Arapen

27. Diad anton dalan a deneskribe nen Isaias so kaligenan a panggayagaan na saray ompawil a Judio diad binalegan dan dalin?

²⁷ Diad primeron kasumpalan, anto so magmaliw a kipapasen na bilay parad saray ompawil a Judio diad silong na balon katawenan? Oniay kuan nen Jehova: “Manlapu ed saman a panaon anggapo la so sakey ya ugaw na saray agew, anggan masiken a too ya agnapno ed saray agew to; ta say ugaw ompatey naani ed sanlasus a taon, et say managkasalanan anggan mantaon na sanlasus naayew naani.” (Isaias 65:20) Agaylan abig a panangilitrato ed kaligenan a panggayagaan na saray ompawil ya adestiero diad nipawil a dalin da! Agla tigwayen na patey so kapangiyanak, a pigay agew to ni labat. Agmet la tigwayen na ipapatey so masiken ya agni nambilay ed nagnap a karukey na bilay to. * Agaylan makapaseguro iray salita nen Isaias ed saray Judio ya ompawil ed Juda! Lapud maligen la ra ed dalin da, ag-ira nakaukolan a manpaga a saray kakabusol so manamsam ed ananak da odino mamatey ed saray lalaki ra.

28. Anto so naaralan tayo ed saray salita nen Jehova nipaakar ed bilay diad balon mundo a walad silong na Panarian to?

²⁸ Anto so ibabaga ed sikatayo na saray salita nen Jehova nipaakar ed bilay diad onsabin balon mundo? Diad silong na Panarian na Dios, kada ugaw et walaan na ilalon nawalaan na maligen ya arapen. Aglan balot tigwayen na patey so matakot ed Dios a too diad kaksilan to. No ag-ingen, say matulok a katooan so magmaliw a maligen tan makapanggayaga la ed bilay. Komusta met so siopaman a manrebeldi ed Dios? Nabalang na saratan so pribilehyon manbilay. Anggano say rebelyoson managkasalanan so “mantaon na sanlasus,” sikato so ompatey. Diad satan a kipapasen, sikato so magmaliw labat ya “ugaw” no ikompara ed nayari komon a pagmaliwan to​—sakey a toon walaan na andi-anggaan a bilay.

29. (a) Antoray panggayagaan na matulok a totoo na Dios diad nipawil a dalin na Juda? (b) Akin a saray kakiewan so matukoy ya ilustrasyon na andukey a pambilay? (Nengnengen so paimano’d-leksab.)

²⁹ Intuloy nen Jehova so panedeskribe to ed saray kipapasen ya ontalona ed nipawil a dalin na Juda: “Sikara ipaalagey da naani so saray abung, tan manayam ira naani; et mantanem ira naani na saray ubas, tan mangan ira naani ed saray bunga ra. Sikara ag-ira naani mangipaalagey, et sananey so manayam; ag-ira naani mantanem et sananey naani mangan; ta singa saray agew na sakey a kiew ontan ira naani so saray agew na baley ko, et saray pinilik manliket ira naani a maando ed saray gawa na saray lima ra.” (Isaias 65:21, 22) Kapawil da ed nankibalatar tan seguradon andiay kaabungan tan andiay ubasan a dalin na Juda, say matulok a totoo na Dios so manggayaga diad panayam ed mismon kaabungan da tan pangan da na bunga na mismon ubasan da. Bendisyonan na Dios so kimey da, tan nawalaan ira na andukey a bilay​—a singa saray agew na sakey a kiew​—a panggayagaan da iray bunga na saray sagpot da. *

30. Anton maliket a kipapasen so panggagayagaan na saray lingkor nen Jehova natan, tan anto so panggayagaan da ed balon mundo?

³⁰ Diad panaon tayo, wala so kasusumpalan na sayan propesiya. Saray totoo nen Jehova so pinmaway ed espiritual ya inkadestiero nen 1919 tan impawil da so “dalin,” da odino say nasasakopan na kimey tan panagdayew da. Angiletneg ira na kongregasyon tan binayuboan da so espiritual ya inkamabunga. Bilang resulta, panggagayagaan la natan na totoo nen Jehova so espiritual a paraiso tan say inter-Dios a kareenan. Makapanseguro itayo a mantultuloy itan a kareenan diad literal a Paraiso. Agtayo ni ingen naisip a maong no anto so sumpalen nen Jehova ed saray mabulbulos a kapusoan tan kalimaan na saray mandadayew  ed sikato dia ed balon mundo. Agaylan makapaliket la’d satan no ipaalagey yo la so dilin abung yo tan panaayaman yo la itan! Diad silong na uley na Panarian, dakel so makapnek a kimey. Agaylan makapatumang so lawas ‘pakanengneng ed maong’ lapud saray bunga na saray dilin sagpot yo! (Eclesiastes 3:13) Kasin magenap la ed satan so panaon tayo pian sigpot a napanggayagaan so dilin kimey tayo? On! Say agmanganggan bilay na saray matoor a totoo so magmaliw a “singa saray agew na sakey a kiew”​—nilibon taon, tan onsulok ni!

31, 32. (a) Antoran bendisyon so panggayagaan na saray ompawil ya adestiero? (b) Diad balon mundo, anto so ilaloan na saray matoor a totoo?

³¹ Deneskribe nen Jehova so dakel nin bendisyon a nailaloan na saray ompawil ya adestiero: “Sikara ag-ira naani mankimey na maapa, ag-ira naani mananak a nipaakar ed kaderya: ta sikara so bini a benendisyonan nen Jehova, tan say simit da a pati sikara.” (Isaias 65:23) Saramay nipawil a Judio so bendisyonan nen Jehova, kanian agla ra mansagpot ed kaapaan. Saray atateng so agla mananak pian sagmaken labat na ananak da so masakbay ya ipapatey. Aliwa lambengat a saray datin adestiero so manggayaga ed saray bendisyon na kipawil; nakaiba da met iray ilalak da. Ontan lay inkasimoon na Dios a mamenek ed saray pankaukolan na totoo kanian oniay insipan to: “Nagawa naani a, dia ed arapen na itawag da, onebat ak naani, et leleg na pansalita ra, talinengen ko naani.”​—Isaias 65:24.

³² Panon so panumpal nen Jehova ed sarayan sipan diad onsabin balon mundo? Kaukolan ya alagaren tayo ni. Ag-intarya nen Jehova so amin a detalye, balet makapanseguro itayo a saray matoor a totoo so aglan balot “mankimey na maapa.” Say baleg ya ulop na saray makaliktar ed Armagedon tan saray nayarin ilalaken da ni so nawalaan na ilalon nawalaan na andukerukey tan makapnek a bilay​—andi-anggaan a bilay! Saramay onoli ed bilay tan pilien da so manbilay unong ed saray estandarte na Dios so makapanggayaga met diad balon mundo. Si Jehova so ondengel tan onkiwas ed saray pankaukolan da, ya iilaloan to ni ingen iratan. On, lukasan nen Jehova so lima to pian peneken to so manepeg ‘iran pilalek na amin a bengatlan mabilay.’​—Salmo 145:16.

33. Sano ompawil iray Judio ed binalegan dan dalin, diad anton pantalos a mareen iray ayayep?

³³ Panon kalaknab so insipan a kareenan tan kaligenan? Sinampotan nen Jehova iyan kabiangan na propesiya: “Say lobo tan say kordero mandungo ra naani a mankabkab, et say leon mangan naani na dayami a singa say baka; et say dabok sikato naani kanen na uleg. Ag-ira naani manduksa, ag-ira met naani manderal ed amin a masanto a palandey ko, kuan nen Jehova.” (Isaias 65:25) Sano ompawil iray matoor a Judion nakdaan diad binalegan dan dalin, sikara so asikasoen nen Jehova. Bilang resulta, say leon so mangan na dayami a singa baka, lapud say leon so agla mamasakit ed saray Judio odino ed saray kokomponien ya ayayep. Segurado iyan sipan, lapud anampot itan ed saray salitan, “kuan nen Jehova.” Tan lawas ya ontua so salita to!​—Isaias 55:10, 11.

34. Anto so makapaliket a kasumpalan na saray salita nen Jehova natan tan ed balon mundo?

³⁴ Saray salita nen Jehova so makapaliket a nasusumpal ed limog na saray tuan managdayew natan. Manlapu la’d 1919, benendisyonan na Dios so espiritual a dalin na totoo to, a pinasimbalo to itan pian magmaliw ya espiritual a paraiso. Saramay onkakamang ed sayan espiritual a paraiso so manggagawa na makatantandan pananguman ed bilay da. (Efeso 4:22-24) Diad tulong na espiritu na Dios, saray indibidual a datin walaay singa-ayep a personalidad​—a nayarin anganamot odino amiktima ed kapara ran too​—so onaligwas ed panaeg da ed saray agmanepeg iran ugali ra. Bilang resulta, panggayagaan da so kareenan tan pankakasakey ed panagdayew a kaiba iray kapananisiaan da. Saray bendisyon a panggagayagaan na saray totoo nen Jehova diad espiritual a paraiso so onnatnat angga ed literal a Paraiso, a say kareenan ya ontatalona ed limog na totoo so natekepan na kareenan ed saray ayayep. Makapanseguro itayo a diad nigeter a panaon na Dios, say orihinal a ganggan to ed katooan so nasumpal ed suston paraan: “Patuloken yo [so dalin]; tan niiter ed sikayo so pakauley ed saray sirasira na dayat, tan pakauley ed saray manok ya atap ed saray tawen, tan amin a bengatla a mabilay ya onggalaw dia ed dalin.”​—Genesis 1:28.

35. Akin a walaan itayo na amin a rason pian ‘manliket ed ando lan ando’?

³⁵ Agaylay pisalsalamat tayo ed sipan nen Jehova a mamalsa na ‘balon katawenan tan balon dalin’! Satan a sipan so awalaan na kasumpalan nen 537 K.K.P. tan walaan na kaaruman nin kasumpalan natan. Sayan duaran kasumpalan so manutukoy ed sakey a maglorian arapen na matulok a katooan. Panamegley na propesiya nen Isaias, si Jehova so mapangasin angiter ed sikatayo na pasimar ed no anto so intadia to ed saramay mangaaro ed sikato. On, walaan itayo na amin a rason pian talinengen iray salita nen Jehova: “Manliket kayo ed ando lan ando ed saman a palsaen ko”!​—Isaias 65:18.

[Saray paimano ed leksab]

[Tepetepet Parad Panagaral]