Propesiya nen Isaias​—Liwawa Parad Amin a Katooan II

Kapitulo Beinte-siete

Bebendisyonan nen Jehova so Puron Panagdayew

Isaias 66:1-14

1. Antoran tema so nipabitar ed unor a kapitulo na Isaias, tan antoran tepet so naebatan?

 DIAD unor a kapitulo na Isaias, arum ed saray manunan tema na sayan mapropetikon libro so amantok ed dramatikon paraan, tan naebatan so pigaran importantin tepet. Arum ed saray teman nipabitar et say inkatalonggaring nen Jehova, say panggula to ed pansimpisimpitan, say determinasyon ton manusa ed saray marelmeng, tan say aro tan panangiyansakit to ed saray matoor. Niarum ni, naebatan iray onggendan a tepet: Anto so napangibiigan ed tuan panagdayew manlapud palso? Panon tayon naseguro ya idapo nen Jehova so panangibales ed saray mansimpisimpitan, a mansantosantoan ira bangta lalamesen da so totoo na Dios? Tan panon a bendisyonan nen Jehova iramay mansiansian matoor ed sikato?

Say Tombok ed Puron Panagdayew

2. Anto so inyabawag nen Jehova nipaakar ed karlangan to, tan anto so agkabaliksan na sayan panangiyabawag?

² Bilang gapo, indanet na propesiya so karlangan nen Jehova: “Onia so kuan nen Jehova, Say tawen sikato so tronok, et say dalin sikato so gagatinan na saray salik: anto a nengneng na abung so ipaalagey yo naani a nipaakar ed siak? Tan anto naani a pasen so pampainawaan ko?” (Isaias 66:1) Panisiaan na arum a didismayaen na propeta iray Judio pian agda ipaalagey lamet so templo nen Jehova sano nipawil so nasyon ed binalegan dan dalin. Aliwan tua itan; si Jehova a mismo so angiganggan ya ipaalagey lamet so templo. (Esdras 1:1-6; Isaias 60:13; Aggeo 1:7, 8) Anto sirin so kabaliksan na sayan teksto?

3. Akin a matukoy a say dalin so nadeskribe bilang ‘gagatinan na saray sali’ nen Jehova?

³ Unona, nayarin ikonsidera tayo no akin ya adeskribe so dalin bilang ‘gagatinan na saray sali’ nen Jehova. Aliwa iyan panagmelmelag a termino. Diad binilyon a bengatlan walad uniberso, say dalin lambengat so nikadkaduman tinawag na ontan. Say planeta tayo so mansiansia ed ando lan ando bilang nikadkaduma, lapud dia so angibayaran na bogbogtong ya Anak nen Jehova ed dondon, tan dia so pangiyalangonan nen Jehova ed inkasoberano to panamegley na Mesianikon Panarian. Agaylan matukoy so panawag ed dalin bilang gagatinan na saray sali nen Jehova! Nayarin mangusar so sakey ya ari na gagatinan pian onsegep ed atagey a trono to tan diad saginonor et bilang toonan na saray sali to.

4. (a) Akin ya imposiblin magmaliw a painawaan nen Jehova a Dios so antokaman a paalagey diad dalin? (b) Anto so kabaliksan na balikas ya “amin iraya a bengatla,” tan anto so nibaga tayo nipaakar ed panagdayew ed si Jehova?

⁴ Siempre, agpanayaman na sakey ya ari so gagatinan na saray sali to, kanian agmet panayaman nen Jehova iyan dalin. On, sikato so agnakarga na anggan say maaw-awang a katawenan! Kanian agnayarin okupaan nen Jehova so antokaman a paalagey lambengat diad dalin ta pian onkanan pinagka-ayaman to. (1 Arari 8:27) Say trono tan panagpainawaan nen Jehova so walad ayaman na saray espiritu, a satan so kabaliksan na ‘saray katawenan’ a nausar ed Isaias 66:1. Say ontumbok a bersikulo so mangipalinew ed kabaliksan na satan: “Ta amin iraya a bengatla ginawa na limak, et ontan so inkiwala na saraya ya amin a bengatla, kuan nen Jehova.” (Isaias 66:2a) Ilitrato pa ed kanonotan a malaknab ya ituturo nen Jehova ‘irayan amin a  bengatla’​—amin a bengatla ed tawen tan dalin. (Isaias 40:26; Apocalipsis 10:6) Bilang say Baleg a Manamalsa na interon uniberso, aliwa lambengat a sakey a paalagey so makanepegan a parad sikato. Tan aliwa met lambengat ya akinpaway a nengneng na panagdayew so italaga ed sikato.

5. Panon tayon nipatnag a sikatayo so ‘duka tan maralit ed espiritu’?

⁵ Anton nengneng na panagdayew so matukoy parad Sankatalbaan a Soberano? Oniay inkuanton mismo ed sikatayo: “Balet dia ed saya a too onnengneng ak naani, anggan say duka tan maralit ya espiritu, tan say onggiwgiw ed salitak.” (Isaias 66:2b) On, makanakana ed puron panagdayew so dugan awawey na puso ed biang na sakey a managdayew. (Apocalipsis 4:11) Say managdayew ed si Jehova so nepeg a magmaliw a ‘duka tan maralit ed espiritu.’ Kabaliksan kasi na saya ya aglabay nen Jehova a manliket itayo? Andi, sikato so “maliket a Dios,” tan labay ton saray mandadayew ed sikato et magmaliw met a maliket. (1 Timoteo 1:11; Filipos 4:4) Balet, amin tayo so mabetbet a mankasalanan, tan agtayo nepeg a leglemewen iray kasalanan tayo. Sikatayo so nepeg a magmaliw a “duka” lapud saratan, a maermen itayo lapud sinmaew itayo ed saray matunong ya estandarte nen Jehova. (Salmo 51:17) Nakaukolan tayon ipanengneng a sikatayoy ‘maralit ed espiritu’ panamegley na pagbabawi, a panresisti ed saray makasalanan a tendensia tayo, tan pampikasi parad panamerdona nen Jehova.​—Lucas 11:4; 1 Juan 1:8-10.

6. Diad anton pantalos a nepeg ya ‘onggiwgiw ed salita na Dios’ iray tuan managdayew?

⁶ Niarum ni, onnenengneng si Jehova ed saramay ‘onggiwgiw ed salita to.’ Kabaliksan kasi na saya a labay to itayon onggiwgiw ed takot kapagno nabasa tayo iray panangiyabawag to? Andi, say labay to et moriaen tayo so ibabaga to tekep na aralem a panangigalang. Masimoon tayon anapen so simbawa to, ya usaren itan bilang giya ed amin a kurang na bilay tayo. (Salmo 119:105) Nayarin “onggiwgiw,” itayo met, diad pantalos ya antakot tayon ontunganga ed Dios, laokan na saray tradisyon na too so katuaan to, odino leglemewen itan. Makana so ontan a mapaabeban awawey diad puron panagdayew​—balet makapaermen ta mataltalag itan ed sayan mundo.

Kagula nen Jehova so Mansimpisimpitan a Panagdayew

7, 8. Panon a momoriaen nen Jehova so pormalidad lambengat a panagdayew na saray relihyoson mansimpisimpitan?

⁷ Legan ya uumamengen nen Isaias so nipaakar ed saray kapanaonan to, sikato so mikabisadon tuloy a daiset labat so walaan na disposisyon ya aanapen nen Jehova ed saray mandadayew ed sikato. Lapud saya, makanepegan so apostatan Jerusalem ed asingger lan kaukom to. Imanoen pa no panon so panmoria nen Jehova ed panagdayew ya aagamilen to: “Say mamatey na sakey a baka sikato so singa amatey na sakey a too; say mangibagat na sakey a kordero, singa say mamuter na tenger na aso; say mangibagat na bagat, singa say mangibagat na dala na baboy, say manpasob na insenso, singa say mamendisyon na sakey a talintao. On, sikara pinili ra so saray dalan da lanlamang, et say kamarerwa ra manliket ed saray dinimla ra.”​—Isaias 66:3.

⁸ Ipanonot na sarayan salita ed sikatayo iray balikas nen Jehova a nikurit ed unonan kapitulo na Isaias. Diman et imbaga nen Jehova ed agmananginunang a totoo to a say pormalidad a panagdayew da so aglambengat amaermen ed sikato noagta amaloor ni ingen ed matunong a sanok to lapud mansimpisimpitan iray mandadayew ed sikato. (Isaias 1:11-17) Ontan met, inyaliling nen Jehova iray apay da bilang mauge-uges a krimen. Say pangibabagat da na mablin baka so agmakapaliket ed si Jehova a singa say impamatey ed sakey a too! Say arum iran bagat so inyaliling ed panangiyapay na aso odino baboy, saray ayayep ya agmalinis diad silong na Mosaikon Ganggan tan agmanepeg parad bagat. (Levitico 11:7, 27) Kasin abuloyan nen Jehova ya agnadusa so ontan a relihyoson pansimpisimpitan?

9. Panon so inkiwas na maslak a Judio ed saray panonot nen Jehova panamegley nen Isaias, tan anto so agnapaliisan a resulta?

⁹ Oniay inkuan natan nen Jehova: “Siak met pilien ko naani so mamalingo ed sikara tan yakar ko naani ed sikara so takot da; lapu ed sanen tinmawag ak, anggapo so inmebat; sanen nansalita ak, ag-ira tinmalineng:  noag ingen ginawa ra so saman a mauges ed saray matak, tan pinili ra so agmakapaliket ed siak.” (Isaias 66:4) Maseguron nibalikas nen Isaias irayan salita tekep na masimoon a kombiksion. Diad loob na dakel a taon et sikato so inusar nen Jehova, a “tinmawag” tan “nansalita” ed totoo To. Amta met a maong na propeta a diad inkalapagan et anggapo so ontatalineng. Lapud nantultuloy iran nanggaway mauges, agda napaliisan so panangibales ed sikara. Peteg a desidien nen Jehova so panusa ed sikara tan itarok to iray makapataktakot ya ebento ed apostatan totoo to.

10. Anto so ipapabitar ed sikatayo na impideneng nen Jehova ed Juda nipaakar ed panmoria to ed Kakristianoan?

¹⁰ Say Kakristianoan natan so angagamil met na saray bengatlan agmakapaliket ed si Jehova. Sinmalindak so idolatriya diad saray simbaan to, niyalibansa iray agmakasulatan a pilosopiya tan tradisyon diad saray plataporma to, tan say panggegemtan to ed mapolitikan pakayari so lalon angigalet ed sikato ed espiritual a pikakalugoran to ed saray nasyon na mundo. (Marcos 7:13; Apocalipsis 18:4, 5, 9) A singa ed kipapasen na kadaanan a Jerusalem, say matunong a panangibales ed Kakristianoan​—sakey a ‘makapataktakot’ a bengatla​—so agnapokpokan ya onsabi ed sikato. Sakey ed saray rason na seguradon pakadusa to et say paraan na impantrato to ed totoo na Dios.

11. (a) Anto so angarum ed kasalanan na saray apostata diad panaon nen Isaias? (b) Diad anton pantalos a saray kapanaonan nen Isaias so angipuera ed saray matoor ‘lapud kakanaan na ngaran na Dios’?

¹¹ Oniay intuloy nen Isaias: “Denglen yo so salita nen Jehova, sikayo ya onggiwgiw ed salita to: Saray agagi yo a mamusol ed sikayo, ya ibantak da kayo lapu ed kakanaan na ngaran ko, inkuan da nensaman, Napagayaga [“Nigloria,” NW] komon si Jehova, pian nanengneng tayo komon so liket yo: balet sikara naani nabaingan.” (Isaias 66:5) “Saray agagi” nen Isaias, saray mismon kaluyagan to, so walaan na inter na Dios a responsabilidad a mangirepresenta ed si Jehova a Dios tan manpasakop ed inkasoberano to. Ambelat a tuloy so kasalanan da diad agda impanumpal ed satan. Balet say angarum ed kasalanan da et say impanggula ra ed totoon matoor tan mapaabeba, a singa si Isaias. Binusol tan impuera na sarayan apostata iray matoor lapud saraya so matuan angirepresenta ed si Jehova a Dios. Diad ontan a pantalos ya agawa so impangipuera ‘lapud kakanaan na ngaran na Dios.’ Ontan met, ibabaga na sarayan palson lingkor nen Jehova a sikatoy irerepresenta ra, a sikaray mansantosantoan ya angusar ed saray marelihyoso iran balikas a singa say ‘Nigloria komon si Jehova!’ *

12. Anto so arum ya alimbawa na impamasegsegang na saray relihyoson mansimpisimpitan ed saray matoor a lingkor nen Jehova?

¹² Kaslakan la so panaggula na palson relihyon ed saray ontutumbok ed puron panagdayew. Satan so kaaruman a kasumpalan na propesiya na Genesis 3:15, ya angipasakbay ed abayag lan gulaan na bini nen Satanas tan say Bini na asawan bii na Dios. Inkuan nen Jesus ed saray alanaan a patumbok to nen inmunan siglo a manirap met ira ed lima na saray kaluyagan da​—a patakyasen da ira manlapud saray sinagoga tan pasegsegangen da ira anggad pateyen da ni ingen ira. (Juan 16:2) Tan komusta met ed moderno iran panaon? Diad inggapo na ‘kaunoran iran agew,’ atebek na totoo na Dios a manatalaran ed sikara so ontan met a panamasegsegang. (2 Timoteo 3:1) Nen 1914, oniay inkuan na The Watch Tower ya angaon ed Isaias 66:5: “Amin lawarin panamasegsegang ya asagmak na totoo na Dios so nanlapu ed saray mankuan a Kristiano.” Inkuan met na satan ya artikulo: “Agtayo amta no kasin lalon onloor ni ira ed panaon tayo​—ya ipungitpungit da itayo, a buyaken da so kongregasyon, ya ompan mamatey ni ira.” Talagan tinmua iratan a salita! Agnambayag kayari na inkipalapag na saratan a salita et pirmin tuloy so panamasegsegang ya insugsog na saray klero legan na Guerra Mundial I. Balet niiyan ed kababaingan so Kakristianoan, unong a nipasakbay. Panon?

 Maples tan Biglan Panangipawil

13. Diad inmunan kasumpalan, anto so “boses na kolkol [a] manlapu ed syudad”?

¹³ Oniay impropesiya nen Isaias: “Sakey a boses na kolkol [a] manlapu ed syudad, sakey a boses a manlapu ed templo, sakey a boses nen Jehova a mangiter na tumang ed saray kabusol to.” (Isaias 66:6) Diad orihinal a kasumpalan na sarayan salita, say “syudad” et say Jerusalem, a kawalaan na templo nen Jehova. Say “boses na kolkol” so mankabaliksan na ungol na bakal, a narerengel ed syudad sanen nilubak itan na onlulusob iran armada na Babilonia nen 607 K.K.P. Komusta balet so nipaakar ed modernon-agew a kasumpalan?

14. (a) Anto so impasakbay nen Malaquias nipaakar ed isabi nen Jehova ed templo To? (b) Unong ed propesiya nen Ezequiel, anto so nansumpalan sanen sinmabi si Jehova ed templo to? (c) Kapigan so impansuri nen Jehova tan si Jesus diad espiritual a templo, tan panon a naapektoan iramay mankuan a mangirerepresenta ed puron panagdayew?

¹⁴ Sarayan salita nen Isaias so mitunosan ed duara nin mapropetikon balikas, a singa samay nikurit ed Ezequiel 43:4, 6-9 tan Malaquias 3:1-5. Parehon impasakbay nen Ezequiel tan si Malaquias so nipaakar ed panaon na isabi nen Jehova a Dios diad templo to. Impabitar na propesiya nen Malaquias ya onsabi si Jehova a mansuri ed abung a pandadayewan ed sikato tan onakto bilang Managgogol, ya ipulisay to iramay lingon mangirerepresenta ed sikato. Inlitrato na pasingawey nen Ezequiel a si Jehova so onloob ed templo tan paekal to so amin a pakasuysoyan na imoralidad tan idolatriya. * Diad modernon-agew a kasumpalan na sarayan propesiya, wala so importantin ebento ya agawa ed agnanengneng a katawenan nen 1918 a misiglaotan ed panagdayew ed si Jehova. Mapatnag a sinuri nen Jehova tan si Jesus so amin a mankuan a mangirerepresenta ed puron panagdayew. Satan ya impansuri so angitonton ed sigpot lan impangitalirak ed mauges a Kakristianoan. Parad saray alanaan a patumbok nen Kristo, say impansuri so mankabaliksan na antikey a peryodo na panaggogol a tinumbokan na maples ya espiritual ya inkipawil nen 1919.​—1 Pedro 4:17.

15. Anton kianak so nipasakbay, tan panon iyan asumpal nen 537 K.K.P.?

¹⁵ Sayan inkipawil so matukoy a nilitrato ed onggendan iran bersikulo na Isaias: “Dia ed arapen na pampasakit to, sikato so nananak; dia ed arapen na isasabi na irap to, sikato so angiyanak na sakey ya anak a laki. Siopa so akadngel na ontan a bengatla? Siopa so akanengneng na saray ontan a bengatla? Nianak ta naani so sakey a dalin ed saksakey ya agew, nianak ta so sakey a nasyon ed maminpinsan? Ta say Sion tampol ed impanpasakit to, sikato inyanak to so saray anak to.” (Isaias 66:7, 8) Parad saray adestieron Judio ed Babilonia, sarayan salita so walaan na makapalikliket a primeron kasumpalan. Say Sion, odino Jerusalem, so nilitrato lamet bilang biin manaanak, balet agaylan nikadkaduman impananak! Satan so mapmaples, bigbigla ya agawa sakbay nin onggapo a manpasakit! Saya so matukoy a panangilitrato. Say inkianak lamet na totoo na Dios bilang nikaduman nasyon nen 537 K.K.P. so mapmaples tan bigbigla a singano mamilagro. Agayla, manlapu la’d samay impangibulos nen Ciro ed saray Judio diad impakakautibo ra anggad samay impakapawil na saray matoor a nakdaan diad binalegan dan dalin et agawa labat itan diad loob na pigaran bulan! Agaylan midumaan ed saray ebenton angitonton ed orihinal ya inkianak na nasyon na Israel! Nen 537 K.K.P., agla nakaukolan a kerewen ni so kawayangan manlapud sakey a sumpan mananguley, agla nakaukolan ya ombatik manlapud masebeg ya armada, tan agla nakaukolan so manteyengteyeng na 40 a taon diad kalawakan.

16. Diad modernon-agew a kasumpalan na Isaias 66:7, 8, anto so ililitrato na Sion, tan panon so inkianak lamet na saray ilalak to?

¹⁶ Diad modernon-agew a kasumpalan, say Sion so irerepresenta na mangatatawen ya asawan “bii” nen Jehova, say mangatatawen ya organisasyon na saray espiritun pinalsa. Nen 1919 et manliket iyan “bii” ed impakanengneng to ed inkianak na alanaan iran ilalak to diad dalin bilang organisadon totoo, “sakey a nasyon.” Satan  ya inkianak so mapmaples tan bigbigla. * Diad loob lambengat na pigaran bulan, saray alanaan bilang grupo a nidunget ed singa-inatey ya inka-inaktibo so binmiskeg tan aktibon binmilay diad “dalin” da, say inter na Dios a nasasakopan na espiritual a kimey da. (Apocalipsis 11:8-12) Kasabi na otonyo nen 1919, inyanunsio da ni ingen so inkipalapag na sakey a balon dyurnal a katekep na The Watch Tower. Lapud tinawag itan a The Golden Age (natan et Awake!), satan a balon publikasyon so paneknek a say totoo na Dios so apabiskeg lamet tan naorganisa lamet parad panaglingkor.

17. Panon a pinaseguroan nen Jehova so totoo to ya anggapo so makaamper ed panumpal to ed gagala to nipaakar ed espiritual ya Israel?

¹⁷ nggapo so puersa ed uniberso ya akaamper ed sayan espiritual ya inkianak lamet. Satan so malinew a sinaglawi na ontumbok a bersikulo: “Yakar ko ta naani so pananak, et agko naani papawayen? kuan nen Jehova. Siak a mamapaway kapotan ko ta naani so panag-anakan? kuan na Dios mo.” (Isaias 66:9) No panon ya agnaamper so proseso na pananak bektaman a ginmapo la itan, ontan met ed kianak lamet na espiritual ya Israel, agmet itan apatunda sanen ginmapo itan. Tua, walay isusumpa nensaman, tan maseguron wala ni so dakel ya isusumpa ed arapen. Balet si Jehova lambengat so makapangitunda ed walan inggapo to la, tan agton balot itunda itan! Balet, panon so pantratrato nen Jehova ed apabiskeg lamet a totoo to?

Say Matamoy a Panangasikaso nen Jehova

18, 19. (a) Anton makapatenyeg ya ilustrasyon so inusar nen Jehova, tan panon itan ya onaplika ed saray adestieron totoo to? (b) Panon ya agunggonaan so alanaan a nakdaan natan manlapud maaron panagtagano tan panangasikaso?

¹⁸ Ililitrato na ontumbok ya apatiran bersikulo so makapatenyeg a panangilitrato ed matamoy a panangasikaso nen Jehova. Unona, oniay imbaga nen Isaias: “Miliket kayo ed Jerusalem, tan manggayaga kayo nipaakar ed sikato, sikayo ya amin a mangaro ed sikato. Miliket kayo ed sikato a nisengeg ed liket, sikayo ya amin a managogol nipaakar ed sikato; pian nayarian yo komon a sopsopen tan napesel kayo ed saray suso na panligliwa to; pian nayarian yo komon a gatasan, tan manliket kayo ed inkadaakan na gayaga to.” (Isaias 66:10, 11) Inusar dia nen Jehova so ilustrasyon na sakey a biin manpapasuso na anak to. Sano narasan so sakey ya ugaw, ag-itan napatundan onakis. Balet sano pasusoen la na ina to, sikatoy manliket ed pakakontento tan pakapenek. Ontan met, say nakdaan na saray matoor a Judio ed Babilonia so maples a nitarok ed kipapasen na liket tan inkapnek manlapud kipapasen na ermen sanen sinmabi so panaon na inkibulos tan inkipawil da. Sikara so manggayaga. Apasimbalo so gloria na Jerusalem sanen nipaalagey itan tan napanayaman lamet. Bilang resulta, nilimbos na say gloria na syudad iray matoor a manaayam ed satan. Maminsan lamet, sikara so natagano ed espiritual panamegley na aktibon inkasaserdote.​—Ezequiel 44:15, 23.

¹⁹ Say espiritual ya Israel met so apalaboan na daakan a tagano kayari na inkipawil da nen 1919. Manlapu la’d saman et tuloytuloy lan niyuutob so daakan ya espiritual a tagano panamegley na “matoor tan makabat ya aripen.” (Mateo 24:45-47) Saya so peteg a panaon na tambayo tan liket parad saray alanaan a nakdaan. Balet wala niray bendisyon.

20. Panon ya abendisyonan so Jerusalem na “manleppua ya agus,” nensaman tan natan?

²⁰ Oniay intuloy na propesiya: “Onia so kuan nen Jehova, Nia, ilapag ko naani so deen ed sikato a singa say ilog, tan say gayaga [“gloria” NW] na saray nasyon a singa say manleppua ya agus: et sikayo onsopsop kayo naani ed sikato; naeba kayo ed tapew na balangbang, tan onanggo kayo naani ed tapew na saray pueg.” (Isaias 66:12) Dia et say impangilitrato ed pampapasuso so atekepan na eksenay daakan ya agus na bendisyon​—‘sakey ya ilog’ tan sakey a “manleppua ya agus.” Aliwa labat a daakan a deen so bendisyon nen Jehova ed Jerusalem noagta ontan met ed ‘gloria na saray nasyon,’ ya onagus tan mamendito ed totoo na Dios. Saya  so mankabaliksan a say totoo na saray nasyon so ondagsa ed totoo na Dios. (Aggeo 2:7) Diad inmunan kasumpalan, walaray totoo a nanlapud nanduruman nasyon a talagan insiglaot day inkasikara ed Israel, a nagmaliw iran Judion proselita. Balet, agawa ed mismon panaon tayo so mas malaknab a kasumpalan sanen say “baleg ya ulop . . . a nanlapu ed balang nasyon tan amin na saray kailalakan, tan binaleybaley, tan salita”​—a peteg a manleppuan agus na katooan​—so akiulop ed nakdaan na espiritual iran Judio.​—Apocalipsis 7:9; Zacarias 8:23.

21. Diad makapasagyat a panangilitrato, anton nengneng na panagligliwa so nipasakbay?

²¹ Sasaglawien met na Isaias 66:12 iray balikas na panangaro na ina​—ya ak-akwalen to so ugaw tan ebaen to diad balangbang to. Diad ontumbok a bersikulo, nibalikas so mipadparan punto tekep na makapainteres ya impanguman na punto de bista. “Singa say sakey a [“too,” NW] ligliwaen na ina to, ontan naani so panligliwak ed sikayo; et naligliwa kayo naani dia ed Jerusalem.” (Isaias 66:13) Say ugaw et baleg la natan a “too,” sikatoy wala la’d edad. Balet agnaandi so pilalek na ina a ligliwaen so anak to diad panaon na gonigon.

22. Panon ya ipapatnag nen Jehova so inkamatamoy tan biskeg na panangaro to?

²² Diad makapasagyat a paraan, inyilustra nen Jehova so biskeg tan inkamatamoy na panangaro to ed totoo to. Anggan say sankaaraleman lan panangaro na ina et samet lambengat a pakapatnagan na aralem a panangaro nen Jehova ed saray matoor a totoo to. (Isaias 49:15) Importantin tuloy so pangipatnag na amin a Kristianos ed sayan kalidad na mangatatawen ya Ama ra! Ontan so ginawa nen apostol Pablo, kanian sikatoy angitilak na maabig ya ehemplo parad saray mamatatken diad Kristianon kongregasyon. (1 Tesalonica 2:7) Imbaga nen Jesus a say inaagin aro so manunan pakabidbiran na saray patumbok to.​—Juan 13:34, 35.

23. Deskribien so maliket a kipapasen na nipawil a totoo nen Jehova.

²³ Impatnag nen Jehova diad kiwas to so panangaro to. Kanian oniay intuloy to: “Sikato naani nanengneng yo, et say puso yo onliket naani, tan saray pukel ya ombusilak ira naani a singa say dika a malangwer; et say lima nen Jehova naamtaan naani a nipaakar ed saray aripen to; et sikato walaan naani na sanok a sumpa ed saray kabusol to.” (Isaias 66:14) Insuheri na sakey a gramatiko na Hebreon lenguahe a say balikas a “sikato naani nanengneng yo” so mankabaliksan ya inerman so bantagen na saray pinmawil ya adestiero diad nipawil a dalin da, “gayaga labat so naimatonan da.” Sikara so talagan manliket, a mansayaksak ira lapud nipawil ira ed pinabli ran dalin. Sikara so onkasil lamet, a singano binmiskeg lamet iray pukel da, a binmilay a singa dika ed panaon na primabera. Naamtaan na amin a sayan abenditon kipapasen so agawa, aliwan lapud antokaman a sagpot na too, noagta diad panamegley na “lima nen Jehova.”

24. (a) Anto so konklusyon yo diad impangikonsidera tayo ed saray ebenton mangaapekto ed totoo nen Jehova natan? (b) Anto so nepeg a determinasyon tayo?

²⁴ Kasin natetebek yo so ikukurang na lima nen Jehova diad limog na totoo to natan? Anggapo so toon makapangitarok ed kipawil na tuan panagdayew. Anggapo so too a makayarin managyat ed idagsa na minilyon a mablin totoo manlapud amin a nasyon a miulop ed matoor a nakdaan diad espiritual a dalin da. Si Jehova lambengat so makagawa ed saratan. Sarayan balikas na panangaro nen Jehova so mangiter ed sikatayo na rason pian manggayagan tuloy. Agtayon balot komon ibabaliwala so panangaro to. Mantultuloy itayon ‘onggiwgiw ed salita to.’ Determinado itayo komon a manbilay unong ed saray prinsipyo na Biblia tan manliket diad panaglingkor ed si Jehova.

[Saray paimano ed leksab]

[Tepetepet Parad Panagaral]