Idayew si Jehova ‘Diad Pegley na Kongregasyon’

SARAY pantitipon na Kristiano so uksoyan nen Jehova pian mansiansian mabiskeg ed espiritual so totoo to. Diad regular ya iyaatendi ed saray pantitipon, ipapanengneng tayo so apresasyon tayo ed saray uksoyan nen Jehova. Sakey ni et ‘naayat tayo [iray agagi tayo] ed aro tan dia ed saray maabig a gawa,’ a satan so importantin paraan pian nipatnag tayo so aro ed sakey tan sakey. (Hebreos 10:24; Juan 13:35) Balet, panon tayon naayat iray agagi tayo diad saray pantitipon?

Mankomento Diad Publiko

Insulat nen Arin David so nipaakar ed inkasikato: “Ipaamtak so ngaran mo ed saray agagik: dia ed pegley na muyong [“kongregasyon,” NW] idayew ta ka. Onkana ed sika so panangidayew ko ed pegley na baleg a muyong.” “Ikdan ta ka na pisasalamat ed loob na baleg a muyongan: idayew taka ed utel na saray dakel a totoo.” “Impulong ko so maligan balbalita na inkatunong ed pegley na balbaleg a muyongan; nia, agko pokpokan so saray bibil ko.”​—Salmo 22:22, 25; 35:18; 40:9.

Diad panaon nen apostol Pablo, sanen nandaragup iray Kristiano parad panagdayew, imbalikas da met so pananisia ra ed si Jehova tan nipaakar ed karlangan to. Diad onian  paraan et sikaray akapanpapasesegan tan akapan-aayatan ed aro tan ed saray maabig a gawa. Diad panaon tayo, a dakel lan siglo so linmabas kayari nen David tan Pablo, et peteg a ‘nanenengneng tayon manasingger lay agew [nen Jehova].’ (Hebreos 10:24, 25) Say sistema na bengabengatla nen Satanas so mamapaarap la ed kadederal, tan ompapalalo iray problema. Nagkalalo la natan, ‘nakaukolan tayo so man-anos.’ (Hebreos 10:36) Siopa ni so nayarin mamaseseg ed sikatayo a man-anos noag saray agagi tayo?

Natan, a singa ed inmuunan panaon, saray indibidual a mananisia so naiikdan na saray pankanawnawa pian nibalikas day pananisia ra ‘diad pegley na kongregasyon.’ Amin so walaan na pankanawnawa a mankomento diad pangebat ed saray itetepet ed dumerengel diad saray miting na kongregasyon. Agbalot ibabaliwala so kaabigan a nagawaan na saya. Alimbawa, saray komenton mangipapabitar ed no panon a natalonaan odino napaliisan iray problema so mamabiskeg ed determinasyon na agagi tayo a mangunor ed saray prinsipyo na Biblia. Saray komento a mangipapaliwawa ed nisita balet ta ag-inaon iran teksto ed Biblia odino mangilalaktip ed saray aromog a punto ed personal ya impansukimat so nayarin mamaseseg ed arum a mamaaligwas ed ugali ra ed panagaral.

Say pakaamta a nagunggonaan itayo tan saray arum no mankomento itayo diad saray miting so mamakiwas ed amin a Tasi nen Jehova a talonaan so inkamabaing odino inkamasuyat. Nagkalalo lan importante a saray mamatatken tan ministeryal a lingkor so mankomento diad saray miting, lapud sikaray iilaloan a mangidaulo ed pibibiang diad miting, ontan met ed iyaatendi. Balet, panon a nayarin onaligwas so indibidual no namoria ton sikatoy naiirapan ed sayan aspekto na Kristianon aktibidad?

Saray Suhestion Pian Onaligwas

Tandaan a nalalanor si Jehova. Insalaysay na sakey a Kristianon bii a taga-Alemanya no panon ton momoriaen iray komento to. “Saratan so personal ya ebat ko ed panasali nen Satanas a pugeran iray totoo na Dios a mangibalikas ed pananisia ra.” Onia so inkuan na sakey ya agin laki ya agano nin abautismoan a kabiangan ed satan lanlamang a kongregasyon: “No nipaakar ed panagkomento, siak so mabetbet a manpipikasi.”

Manparaan a maong. No agmo naaral a masakbay so materyal, nairapan kan mankomento tan agmagmaliw ya epektibo iray komentom. Saray suhestion parad panagkomento diad saray miting ed kongregasyon so nidatak diad libron Minabang ed Edukasyon na Teokratikon Eskuelaan Parad Ministeryo, pahina 70. *

Gawaen a kalat so pankomento na anggan maminsan diad kada miting. Kabaliksan na saya a sikay mangiparaan na pigaran ebat, lapud diad mabetbet mon pangitagey na limam, lalon maseguron sikay tawagen na agin mangikokondukta. Nayarian mo ni ingen ya ibaga  la’d sikato a masakbay no dinan iran tepet so imparaan mon ebatan. Saya so nagkalautlan makatulong no sika so balobalo ni. Lapud nayarin masuyat kan mangitagey na limam ‘diad pegley na baleg a muyong,’ say pakaamtan saya imay parapon imparaan mon ebatan tan tatalaranan na mangikokondukta ed miting ya itagey moy limam so mamaseseg ed sikan mankomento.

Mankomento lan tampol. Agnapainomay so mairap a kimey no satan so ipaleen. Makatulong so pankomento lan tampol diad miting. Naromogan mon main-inomay la so pankomento diad komadua odino komatlon pankanawnawa bektaman ya akapankomento ka la diad primero.

Onyurong ed matukoy a pasen. Mas mainomay parad arum so mankomento sano onyurong ira ed bandad arap na Kingdom Hall. Daiset iray pakadisturboan, tan magmainomay iran nanengneng na agin mangikokondukta. No salien mo iya, tandaan ya ikasil moy boses mo pian narengel na amin, nagkalalo la no agmanguusar so kongregasyon na saray ililiber a mikropono.

Ontalineng a maong. Ontulong iya pian napaliisan so pangulit ed inkomento la na arum. Ontan met, saray inkomento na arum so nayarin mangipanonot ed sika na sakey a teksto odino sakey a punto a nayarin manuporta ed kapkapangibagan punto. No maminsan et nayarin iyilustra so punton sisingbaten panamegley na antikey ya eksperiensya. Saray ontan a komento so pirmin makatulong.

Aralen so onebat ed dili iran salitam. Say pambasa ed komento manlapud aaralen a materyal so nayarin mangipatnag ya aromog mo so dugan ebat, tan nayarin maabig itan a paraan pian nigapo so pankomento. Balet say pangituloy mo ed ebat diad dili iran salitam so mangipatnag a natatalosan mo so punto. Agkaukolan ya aonen iray salita por salita ed saray publikasyon tayo. Saray Tasi nen Jehova so agbasta labat manguulit ed ibabaga na saray publikasyon da.

Ag-onaarawi ed tema. Aliwan matukoy iray komento ya agmisiglaotan ed tema odino onsusuawi ed manuna iran punto a sisingbaten. Kabaliksan na saya a saray komentom so nepeg ya ontukoy ed teman sisingbaten. Diad ontan et makatulong iratan pian magmaliw a makapabiskeg ed espiritual so paningbat ed teman aaralen.

Getmaen so pamaseseg. Lapud say manunan rason ed pankomento et pian pasesegen so arum, nepeg a paliisan so pangibaga na saray pakadismayaan da. Sakey ni, agsasakopen so interon parapo ta pian wala ni so nakeraan a komentoan na arum. Say andukey tan masoliwet iran ebat so mairap laingen a talosan. Saray antikey ya ebat, anggan pigpigara a salita, so nayarin mas epektibo, tan mamaseseg iratan ed saray balobalo ni pian onebat met na antikey.

Say Betang na Saramay Mangikokondukta ed Saray Miting

No nipaakar ed pagmaliw a makapaseseg, say mangikokondukta na miting so walaan na ambelat a responsabilidad. Ipatnag to so puron interes ed kada komento diad italineng a  maong tan diad mapagalang a pimataan to ed samay mankokomento imbes ya asikasoen to so arum nin bengatla. Agaylan agmatukoy no sikato so ag-ontalineng a maong tan, bilang resulta et naulit to lamet so inkomento la odino nitepet to lamet so naebatan lan tepet!

Aliwa met a makapaseseg no say mangikokondukta et naynay a manguulit ed nikomento la diad arum iran salita, a singano ibabaga ton aliwa nin magenap so nikomento. Diad biek a dapag, agaylan makapaseseg sano saray komento so mamalaknab ed panisingbat ed sakey a makanan punto. Niraya so makanakanan itepet pian nisagyat so maabig iran komento: ‘Panon tayon niyaplika iya diad kongregasyon tayo?’ odino, ‘Dinan a teksto diad parapo so manuporta ed imbaga la?’

Siempre, kaukolan a saray balobalo ni odino saray mabaing so nagkalalo lan nakomendaan sano mankomento ira. Saya so nayarin gawaen a personal kayari na panagaral ta pian ag-ira nababaingan tan nawalaan na pankanawnawa so manangikondukta a mangiter na suhestion sano matukoy.

Diad ordinaryon pantotongtong et makapadismaya so toon manodomina ed tongtongan. Liknaen na saray katongtong to ya agda la kaukolan so mansalita. Tan no bilang ta ondengel ira, aliwa ran masimoon. Ontan met so nagawa sano dominaen na say mangikokondukta so singbatan diad mabetbet a pankomento. Balet, say mangikokondukta ed miting so nayarin panapanaon a mamaseseg ed saray inmatendi a mangibalikas ed nononoten da tan pannonoten to ira nipaakar ed tema panamegley na kaaruman iran tepet. Saratan so kaukolan labat ya itepet no nakaukolan.

Say mangikokondukta so agkapilitan a manawag ed inmunan angitagey na lima to. Saya so nayarin manismaya ed saramay kaukolan da ni so mannonot pian natibukel day ideya ra. Diad panalagar ton magano, naikdan to na pankanawnawa a makapankomento so siopaman ya agni akapankomento. Ipatnag to met so pakatebek diad agto panawag ed melag ya ugugaw ya onebat ed saray tepet a nipaakar ed saray teman mairap da a natalosan.

Panon to no aliwan susto so ebat? Kaukolan a paliisan na mangikokondukta so pamabaing ed too ya inmebat. Anggaman aliwan susto iray komento, mabetbet a walaray nasasaglawi ditan a katuaan. Say mangikokondukta so makapangipetek ed ebat ya anggapoy napabaingan diad mataktikan pamili to ed bengatla a nayarin duga, diad panretubar ed tepet, odino diad pangitepet na kaaruman a tepet.

Pian nisagyat so pankomento, maabig no paliisan na mangikokondukta ed miting iray agdirektan tepet, a singa say, ‘Siopa ni so walaan na komento?’ Nayarin maabig so gagala ed pangitepet na, ‘Siopa so agni akapankomento? Saya so unor lan pankanawnawa yo!’ balet ta ag-itan mamaseseg ed sakey ya ibalikas so walad kanonotan to. Nepeg ya ag-ipalikna ed saray agagi a sinmaew la ra, lapud ag-ira akapankomenton tampol diad panagaral. Imbes, nepeg a napaseseg ira a manginabang ed amta ra, lapud say pananginabang et panangipatnag na aro. Sakey ni, kayarin tinawag na mangikokondukta so sakey a mankomento, maabig no agto ibagan, “Kayari to et dengelen tayo so komento nen Brother Kien insan si Sister Onia.” Say mangikokondukta so nepeg ya ontalineng nin unona ed komento insan to determinaen no nakaukolan ni so kaaruman a komento.

Sakey a Pribilehyo so Pankomento

Say iyatendi ed saray Makristianon miting so kakkaukolan ed espiritual; say pankomento ditan et sakey a pribilehyo. No mibiang itayo a nagkalalo ed sayan nikaduman paraan na panangidayew ed si Jehova ‘diad pegley na kongregasyon,’ diad ontan et aaligen tayo so alimbawa nen David tan ipapapuso tayo so simbawa nen Pablo. Napaneknekan a pinabli tayoray agagi tayo tan kabiangan itayo na baleg a kongregasyon nen Jehova no mibibiang itayo diad saray miting. Iner ni so labay yon laen anta ‘nanenengneng yo a manasingger la so agew’?​—Hebreos 10:25.

Paimano ed Leksab]

[Saray litrato ed pahina 20]

Say italineng tan pankomento so makanakana diad saray Makristianon pantitipon

[Litrato ed pahina 21]

Say mangikokondukta so mangipatnag na puron interes ed kada komento