Kasin Papablien Yo Iray Maedad lan Kapananisiaan Yo?

SANEN akisipanan so totoo ed kadaanan ya Israel parad pisisiglaotan da ed Dios, oniay niganggan ed sikara: “Onalagey ka naani ed arapan na ubanan ya ulo, et pagalangan mo naani lupa na masiken, tan nepeg mo so ontakot ed Dios mo.” (Levitico 19:32) Kanian, sakey a sagradon obligasyon so panrespeto ed saray maedad la, a nisiglaot ed panagpasakop ed Dios. Anggaman anggapo la’d silong na Mosaikon Ganggan iray Kristiano natan, ipapanonot na satan ed sikatayo a momoriaen nen Jehova iray maedad lan manlilingkor ed sikato bilang makana tan mabmabli. (Uliran 16:31; Hebreos 7:18) Kasin mipara so panmoria tayo ed si Jehova? Kasin papablien tayo iray maedad lan Kristianon agagi tayo?

Pinabli To so Matatken lan Kaaro To

Naromog ed libro na Komaduan Arari so sakey a salaysay na Biblia a mangipapabitar ed panangipatnag na respeto ed saray maedad la. Lugan na satan so deskripsion ed no panon a si propetan Elias so sinalatan na malangwer nin propeta a si Eliseo. Konsideraen so agawa ed unor lan agew nen Elias bilang sakey a propeta diad samploran-tribu a panarian na Israel.

Diad saman, say masiken lan propeta so ingganggan nen Jehova a manbaroy manlapud Gilgal a mamaarap ed Betel, manlapud Betel a mamaarap ed Jerico, tan manlapud Jerico a mamaarap ed Ilog Jordan. (2 Arari 2:1, 2, 4, 6) Legan na satan ya impanbaroy na ngalngalin 50 kilometro, amitlon imbaga nen Elias ed si Eliseo ya agla ontutumbok ed sikato. Anggaman ontan, singa ed si malangwer nin Rut ya agto tinaynan si Noemi pigaran siglo ed asasakbay, agmet tinaynan nen Eliseo so masiken lan propeta. (Rut 1:16, 17) Oniay amitlon imbaga nen Eliseo: “Unong a si Jehova mabilay, tan unong a say kamarerwam mabilay, agta ka paulyan.” (2 Arari 2:2, 4, 6) Diad satan a kipapasen et manga anem taon lan ontutulong si Eliseo ed si Elias. Ingen, pinilalek to so manlingkor a kaiba nen Elias anggad posibli. Diad tua et oniay inkuan ni na salaysay: “Agawa, leleg a manaakar ira, tan mansasalita ra, a nia, . . . si Elias sinmegep.” (Bersikulo 11) Si Elias tan si Eliseo so mantotongtong angga ed sankaunoran lan bekta na ministeryo nen Elias ed Israel. Mapatnag a magunaet so malangwer nin propeta a makarengel na dakel a panamilin tan panamaseseg manlapud mas matatken tan mas eksperiensyadon propeta anggad posibli. Talagan pinabli to so masiken lan kaaro to.

‘Singa’ra Ama tan Ina’

Mainomay a natalosan no akin a pinabli nen Eliseo so masiken lan propeta bilang sakey a kaaro  tan espiritual ya ama ni ingen. (2 Arari 2:12) Sakbay a manampot so asainmin nen Elias ed Israel, inkuan to ed si Eliseo: “Kerewen mo no anto so gawaen ko nipaakar ed sika, arapen na kaekal ko manlapu ed sika.” (Bersikulo 9) Kanian anggad kaunoran lan bekta et nampagaan nen Elias so espiritual a pankaabigan na onsalat ed sikato tan say pakapantultuloy na kimey na Dios.

Natan et makapaligsay-puso a naimano so parehon panagpaga na saray maedad lan Kristianon agagin lalaki tan bibii, a singa’ra ama tan ina, diad mabulos a panginanabang da ed pikakabat tan karunongan da ed saray malalangwer ni. Singa bilang, saray abayag lan manlilingkor bilang boluntaryo diad saray sangan opisina na saray Tasi nen Jehova so mabulos ya ontutulong ed saray balo nin membro na pamilyay Bethel a makagamor na saray dunong a nakaukolan da pian nagawaan day serbisyo ra. Ontan met, saray managbiahen manangasikaso tan saray kaasawaan da a piga-pigay taon lan manbibisita ed saray kongregasyon so maliket a manginanabang ed daakan ya eksperiensya ra ed saramay ipapasal a manlingkor bilang managbiahen ministro. Niarum ni, diad saray kongregasyon na saray Tasi nen Jehova ed sankamundoan et wadtan iray maedad lan agagin lalaki tan bibii a matoor a manlilingkor ed si Jehova ed loob la na saray dekada tan maliket a manginanabang ed praktikal a karunongan tan eksperiensya ra ed saray balo nin membro na kongregasyon.​—Uliran 2:7; Filipos 3:17; Tito 2:3-5.

Lapud impapuson panangiyansakit ya impanengneng na sarayan pinablin maedad lan Kristiano, peteg a makapaliket so panrespeto ed sikara. Labay tayo sirin ya aligen so alimbawa nen Eliseo diad aralem a pamabli tayo ed saray maedad lan kapananisiaan. Unong ya ipapanonot ed sikatayo nen apostol Pablo, itultuloy tayon tratoen so “sakey a masiken . . . a singa ama” tan ‘saray akukulaw a singa’ra ina.’ (1 Timoteo 5:1, 2) No gawaen tayo itan, baleg so nitulong tayo ed manepeg a kikurang tan aligwas na Kristianon kongregasyon diad interon mundo.

[Litrato ed pahina 30]

Pinilalek nen Eliseo so manlingkor a kaiba nen Elias angga ed posibli

[Saray litrato ed pahina 31]

Nagugunggonaan a maong iray malangwer ni ed saray maedad lan Kristiano