Kasin Wala Labat so Sakey a ‘Tuan Relihyon’?

“NO PANON a wala so saksakey a Kristo, wala met so saksakey a laman nen Kristo, say saksakey a Nobya nen Kristo: ‘say saksakey a Katoliko tan apostolikon Iglesia.’”​—Dominus Iesus.

Ontan so impangidatak nen Joseph Ratzinger, say kardinal na Katolika Romana, ed bangat to ed simbaan a wala labat lay sakey a tuan relihyon. Inkuan to a satan a relihyon et say “saksakey a Kongregasyon nen Kristo, salanti say Iglesia Katolika.”

“Aliwa Iran Iglesia ed Suston Pantalos”

Anggaman impilit nen Pope John Paul II ya “anggapo so panangipaatagey, odino agpanagrespeto, sumpad arum a relihyon” a lugan na dokumenton Dominus Iesus, saray lider na Protestanti so kinmontra ed satan. Alimbawa, diad Inkalapagan ya Asamblea na Presbyterian ed Belfast, Amianen ya Ireland, nen Hunyo 2001, inkuan na sakey a ministro a say dokumento so ginawa na “sakey a maimpluensyan grupo na Iglesia Katolika Romana . . . a pirmin ataktakot ed inka-maawat la na Vatican II.”

Inkuan na say manunan Obispo na Church of Ireland a si Robin Eames a sikatoy “nadismayan tuloy” no say dokumento so “mangipapawil ed abenegan lan panmoria sakbay na Vatican II.” Bilang komento nen Eames ed ibabaga na Vatican ya “aliwa iran tuan Iglesia ed suston pantalos” iramay mangipupulisay ed pigaran doktrina na Katoliko, oniay inkuan to: “Makapainsulto itan parad siak.”

Anto so makasengeg ed impamawala na Dominus Iesus? Ompatnag a say Roman Catholic Curia so naapektaan na tatawagen a panguman-uman na estandarte na relihyon. Unong ed The Irish Times, “say ilelesa na asamok a teolohiya​—a manunan mangibabaga a maong ya amin so relihyon . . . et lalon anigensigen ed si Kardinal Ratzinger.” Ompatnag a sayan panmoria so amakiwas ed sikaton mankomento nipaakar ed sakey a tuan relihyon.

Kasin Importante No Dinan a Relihyon so Kawalaan Mo?

Siempre, parad arum et mas lalon makatunongan tan makapasagyat so “panguman-uman na estandarte na relihyon” odino “asamok a teolohiya” nen say pangibagan wala labat so saksakey a tuan relihyon. Parad sikara, nepeg a say relihyon et sigpot a personal a pamaakaran. Inkuanda a, ‘Diad kaunoran et aliwan importante no dinan a relihyon so kawalaan mo.’

Ompatnag a dakel so onaabuloy ed ontan a panmoria​—anggaman say sakey ya epekto na satan et naaapag-apag so relihyon ed dakerakel tan mandudumaan a denominasyon. Ibabaga na dakel a ‘say ontan a pandurumaan na relihyon so  pakapatnagan lambengat a walay kawayangan na kada sakey.’ Balet, unong ed managsulat a si Steve Bruce, say ontan a “panangiyabuloy ed relihyon” so diad tua et “panangibaliwala ed relihyon.”​—A House Divided: Protestantism, Schism, and Secularization.

Anto sirin so dugan panmoria? Kasin wala labat so sakey a tuan relihyon? Satan kasi et say Iglesia Katolika Romana? Kasin saray arum a relihyon et aabobonan met na Dios? Lapud nalalanor ed sarayan tepet so relasyon tayo ed Manamalsa tayo, segurado ya importantin amtaen tayo so panmoria to ed sayan pamaakaran. Panon tayon nagawaan itan? Diad panusisa ed impuyan a Salita na Dios, say Biblia. (Gawa 17:11; 2 Timoteo 3:16, 17) Konsideraen tayo no antoy ibabaga na satan ed sayan tema a nipaakar ed sakey a tuan relihyon.

 [Picture Credit Line ed pahina 2]

APIS: Mark Gibson/Index Stock Photography