Mankompiyansa Kayo ed si Jehova
Mankompiyansa Kayo ed si Jehova
“Sika so ilalok, O Katawan a Jehova: sika so nanmatalkan ko a nanlapu ed inkaugaw ko.”—SALMO 71:5.
1. Anton angat so inarap na ugaw nin managpastol a si David?
SAY kaatagey na sayan too et masulok a siameran piye. Agpankelawan sirin no akin ya amin a sundalo na Israel a walad bakalan et antakot a miarap ed sikato! Diad loob na nantutumbokan iran simba, kinabuasan tan nilabilabi a kinantiawan na Filisteon higante a si Goliat so armada na Israel, ya inangatan to ira a mangibaki na sakey a mibabakal da pian milaban ed sikato. Diad kaunoran, say angat so inawat na sakey lambengat a tobonbalo, ya aliwan sakey a sundalo. Say ugaw nin managpastol a si David so melmelag no ikompara ed kalaban to. Diad tua et ompan mas ambelat ni nen say sikato iray kabal tan ayura nen Goliat! Anggaman ontan, inarap na tobonbalo so higante tan sikatoy nagmaliw a bantog a simbolo na inkakpel.—1 Samuel 17:1-51.
2, 3. (a) Akin a makompiyansan apiarapan nen David si Goliat? (b) Anton duaran kundang so singbaten tayo pian makapankompiyansa itayo ed si Jehova?
2 Anto so amapakpel ed si David? Konsideraen so pigaran salita a mabitar ya insulat nen David diad saginonor iran taon to: “Sika so ilalok, O Katawan a Jehova: sika so nanmatalkan ko a nanlapu ed inkaugaw ko.” (Salmo 71:5) On, bilang tobonbalo et si David so nanmatalek lan maong ed si Jehova. Inarap to si Goliat, a kuanto: “Ondago ka ed siak ya akakampilan, tan pati gayang, tan pati kinlong balet ondago ak ed sika dia ed ngaran nen Jehova na saray ehersito, say Dios na saray inayuraan na Israel, a sikato so inayat mo.” (1 Samuel 17:45) No say nankompiyansaan nen Goliat et say pirmin biskeg to tan saray ayura to, say nankompiyansaan balet nen David et si Jehova. Lapud walad dapag to so Soberanon Katawan ed uniberso, akin a takotan nen David so sakey a too lambengat, anggan panon lay kabaleg to tan inka-armado to?
3 Legan yon babasaen so nipaakar ed si David, kasin pipirawaten yo met a lalon ombiskeg so mismon kompiyansa yo ed si Jehova? Maseguron pipirawaten itan na dakel ed sikatayo. Kanian usisaen tayo so duaran kundang a nagawaan tayo pian makapankompiyansa itayo ed si Jehova. Unona, nakaukolan a nadaeg tan napansiansia tayon nadaeg so kaslakan lan babeng ed pankompiyansa. Komadua, nakaukolan a naaralan tayo no anton talagay nalalanor ed panagmatalek ed si Jehova.
Panaeg ed Kaslakan a Babeng Diad Pankompiyansa ed si Jehova
4, 5. Akin a naiirapan so dakel a totoo a mankompiyansa ed Dios?
4 Anto so mangaamper ed totoo diad pakapankompiyansa ra ed Dios? Mabetbet et walaray nawewetwet no akin a nagagawa iray mauges a bengatla. Nibabangat ed dakel a totoo a say Dios so panlalapuan na irap. Sano walay nagawan trahedya, nayarin ibaga na saray klerigo ya “inala” na Dios iray biktima pian nakaiba to ira ed tawen. Niarum ni, ibabangat na dakel a relihyoson lider ya inggana la na Dios nensaman so amin a nagawa—laktip lay kada trahedya tan marelmeng a gawa—a nagagawa ed sayan mundo. Mairap so pankompiyansa ed ontan ya agmililiknan Dios. Si Satanas, a mamubulag ed kanonotan na saray agmananisia, so magunaet a mangiyalibansa ed amin na saratan a “bangat na saray demonyo.”—1 Timoteo 4:1; 2 Corinto 4:4.
5 Kaliktan nen Satanas a naandi so kompiyansa na totoo ed si Jehova. Aglabay na satan a kabusol na Dios a naamtaan tayo iray peteg a pansesengegan na irap na too. Tan no naaralan tayo la iray Makasulatan a rason na paniirap, labay nen Satanas a nalingwanan tayo iratan. Kanian, maabig so panapanaon a panrepaso tayo ed taloran manunan rason no akin a walay irap diad mundo. Diad ontan et naseguro tayo ed kapusoan tayo ya aliwan si Jehova so panlalapuan na saray gonigon ya aarapen tayo ed bilay.—Filipos 1:9, 10.
6. Panon so impangipabitar na 1 Pedro 5:8 ed sakey a rason na kairapan na too?
6 Sakey lan rason no akin a maniirap so too et labay nen Satanas a buyaken so katooran na saray matoor a totoo nen Jehova. Sinali ton buyaken so integridad nen Job. Tan diad saman et agtinmalona si Satanas, ingen ta siansian agto ni tinmunda. Bilang manuley ed sayan mundo, panggugunaetan ton “buagen” iray matoor a lingkor nen Jehova. (1 Pedro 5:8) Kabiangan itayon amin ed satan! Labay nen Satanas ya ontunda itayon manlingkor ed si Jehova. Kanian sikato so mabetbet a mamapalesa na panamasegsegang. Anggaman makapaot-ot so ontan a kairapan, walaan itayo na maabig a rason pian mansungdo. Diad panggawa ed satan, napaneknekan tayo a matila si Satanas tan napaliket tayo si Jehova. (Job 2:4; Uliran 27:11) Legan itayon papabiskegen nen Jehova pian nasungdoan so panamasegsegang, ombulaslas so kompiyansa tayo ed sikato.—Salmo 9:9, 10.
7. Say Galacia 6:7 so ontulong ed sikatayon makabidbir ed anton rason na paniirap?
7 Say komaduan rason na paniirap et naromog ed sayan prinsipyo: “Antokaman ya itanem na too satan met so anien to.” (Galacia 6:7) No maminsan et mantatanem so totoo panamegley na makapuy iran panagdesisyon da tan aanien da so irap bilang nansumpalan. Nayarin mas labay day mapmaples a panagmaneho, a manresulta ed aksidente. Dakel so malabay a mansigarilyo, a mansusumpal ed sakit ed puso odino kanser ed bala. Saramay mankaliktan a mangagamil na imoral a kondukta ed sekso so mangiririsga a manirap lapud aderal a relasyon na pamilya, inkaandian lay respeto ed dili, saray sakit a makaalis ed sekso, tan agkaliktan a panaglukon. Nayarin tetelen na totoo so Dios lapud ontan a kairapan, balet diad tua et sikara so biktima na mismon makapuy iran desisyon da.—Uliran 19:3.
8. Unong ed Eclesiastes 9:11, akin a maniirap so totoo?
8 Say komatlon rason na paniirap et nidalatdat ed Eclesiastes 9:11: “Pinmawil ak, tan anengneng ko ed leksab na banwa, a say lumba andi ed saray masiglat, odino say bakal ed saray mabiskeg, anggan say tinapay met ed makabat, anggan saray kayamanan met ed totoo a makatalos, anggan say pamalangkap met ed totoo a matalabit; balet say panaon tan kapalaran nagawa [“ag-ilaloan a nagawa so onsabi,” NW] ed sikara ya amin.” No maminsan et nibabana iray totoo ed lugar tan oras a kagagawaan na makapuy a bengatla. Anggaman ed personal a kabiskegan odino kaleteyan tayo, say kairapan tan ipapatey so nayarin ag-ilaloan ya onsabi ed siopaman ed sikatayo ed anggan anton oras. Singa bilang, diad panaon nen Jesus et nagba so sakey a tori ed Jerusalem ya anigway na 18 a totoo. Impabitar nen Jesus ya ag-ira dinusa na Dios lapud apalabas iran kasalanan da. (Lucas 13:4) Andi, agnatetel si Jehova lapud satan a kairapan.
9. Anto so agnatalosan na dakel nipaakar ed kairapan?
9 Importantin natalosan so pigara ed saray pansesengegan na kairapan. Balet, wala so sakey ya aspekto na pamaakaran ya agnatalosan na dakel. Salanti: Akin ya iyaabuloy nen Jehova a Dios so paniirap?
Akin ya Iyaabuloy nen Jehova so Paniirap?
10, 11. (a) Unong ed Roma 8:19-22, anto so agawa ed ‘amin a pinalsa’? (b) Panon tayon naseguro no siopa so angipasakop ed pinalsa diad kaapaan?
10 Sakey a kabiangan diad sulat nen apostol Pablo ed saray taga-Roma so mangipalinew ed sayan importantin tema. Oniay insulat nen Pablo: “Say maseseg a pampilalek na pinalsa aalagden to so kipatnag na saray anak na Dios. Ta say pinalsa impauleyan ed kaapaan, aliwan lapud panlabay to, noag say makalanor so anguley ed sikato, ed ilalo. Pian say pinalsa a dili niliktar ed inkaaripen na kabulokan ya onloob ed kawayangan na gloria na saray anak na Dios. Ta amta tayo a lapag a pinalsa maningel ira ya amin tan maniirap ira a mananak ya anggad natan.”—Roma 8:19-22.
11 Pian natalosan tayo irayan bersikulo, nakaukolan a linewen tayo nin unona so pigaran manunan tepet. Singa bilang, Siopa so angipasakop ed pinalsa diad kaapaan? Arum so anukoy ed si Satanas; arum et si Adan. Balet aliwan sikara so nanggawa ed satan. Akin ya andi? Lapud ginawa itan na samay angipasakop ed pinalsa diad kaapaan ‘unong ed ilalo.’ On, iyoopresi to so ilalo a diad saginonor et saray matoor so “niliktar ed inkaaripen na kabulokan.” Agniiter nen Adan odino si Satanas so ontan ya ilalo. Si Jehova labat. Malinew sirin a sikato so angipasakop ed pinalsa diad kaapaan.
12. Anton pakawetwetan so linmesa nipaakar ed pakabidbiran ed “lapag a pinalsa,” tan panon a naebatan iyan tepet?
12 Balet, anto so “lapag a pinalsa” a tinukoy ed sayan teksto? Ibabaga na arum a say “lapag a pinalsa” so manutukoy ed interon mundo, pati say ayayep tan saray tanaman. Balet kasin maniilalo iray ayayep tan tanaman a makagamor ed “kawayangan na gloria na saray anak na Dios”? Andi. (2 Pedro 2:12) Say “lapag a pinalsa” sirin so manutukoy lambengat ed katooan. Saya so pinalsa a naaapektoan na kasalanan tan ipapatey makasengeg ed impanrebeldi ed Eden kanian sikara so mankakkaukolan na ilalo.—Roma 5:12.
13. Anto so epekto na rebelyon ed Eden dia ed katooan?
13 Anto so peteg ya epekto na satan a rebelyon dia ed katooan? Deneskribe nen Pablo iray resulta na satan diad sakey a salita: kaapaan. * Unong ed sakey a reperensya, sayan salita so manedeskribe ed “kaapaan na sakey a bengatla ya ag-onkukurang ed akadesinyoan na satan.” Saray totoo so adesinyon manbilay na andi-anggaan, a saniiban mankimey bilang ayadyari tan nankakasakey a pamilya a mangasikaso ed paraison dalin. Say nansumpalan balet et say bilay da so maganggano, makapaot-ot, tan lawas makapadismaya. Singa ed inkuan nen Job, ‘say too a nianak ed bii, daiset so saray agew to, tan napno na gonigon.’ (Job 14:1) Talagan kaapaan!
14, 15. (a) Anton ebidensya na inkahustisya so naromog tayo diad impansentensia nen Jehova ed katooan? (b) Akin ya imbaga nen Pablo a say pinalsa et nipasakop ed kaapaan ya ‘aliwan lapud panlabay da’?
14 Natan et akasabi itayo ed manunan tepet: Akin a say “Ukom na amin a dalin” so angipasakop ed katooan ed onian makapaot-ot tan makapadismayan panagbilay? (Genesis 18:25) Kasin sikato so matunong diad impanggawa to ed satan? Bueno, nodnonoten pa so ginawa na inmunan atateng tayo. Diad impanrebeldi ra ed Dios, dinmapag ira ed si Satanas, ya amalesa na pirmin angat ed inkasoberano nen Jehova. Diad panamegley na saray kiwas da, sinuportaan da so isyu a magmaong so kipapasen na too no anggapo si Jehova, ya inuleyan day inkasikara diad panangigiya na sakey a rebeldin espiritun pinalsa. Diad impansentensia nen Jehova ed saray rebelde, singa inter to ed sikara so aanapen da. Inabuloyan to so too a manuley ed inkasikaton dili diad silong na impluensya nen Satanas. Diad sarayan sirkumstansya, wala ta ni desisyon a mas makatunongan nen say pangipasakop ed katooan dia ed kaapaan unong ed ilalo?
15 Siempre, saya so aliwan ‘panlabayan’ na pinalsa. Nianak itayo bilang ariripen na kasalanan tan inkabulok, ya anggapon balot so nagawaan tayo ed satan a pamaakaran. Balet lapud panangasi nen Jehova et inabuloyan to si Adan tan Eva a manbilay ed nakekeraan a taon da kanian akapanilalak ni ra. Anggaman sikatayoran kapolian da so nipasakop ed kaapaan na kasalanan tan ipapatey, walaan itayo na pankanawnawan manumpal ed ag-agawaan nen Adan tan Eva. Nayarian tayon talinengen si Jehova tan naaralan a say inkasoberano to et matunong tan naspot, bangta say uley na too ya anggapo si Jehova et mangitarok na ot-ot, inkadismaya, tan kaapaan. (Jeremias 10:23; Apocalipsis 4:11) Tan pinaloor ni itan na impluensya nen Satanas. Saratan a katuaan so pepekderan na awaran na too.—Eclesiastes 8:9.
16. (a) Akin a makapanseguro itayo ya aliwan si Jehova so pansesengegan na irap a naiimatonan tayo ed mundo natan? (b) Anton ilalo so maaron intarya nen Jehova parad saray matoor a totoo?
16 Malinew, si Jehova so walaan na makatunongan iran rason no akin ya impasakop to so katooan diad kaapaan. Balet, kasin kabaliksan na satan a si Jehova so panlalapuan na kaapaan tan kairapan a mangaapektan maong ed kada sakey ed sikatayo natan? Bueno, isipen pa so sakey a huis ya angiyanunsio ed makatunongan a sentensia to ed sakey a kriminal. Nayarin manirap a maong so apriso legan a susumpalen to so sentensia’d sikato, balet makatunongan kasi a tetelen to so huis bilang sengegan na paniirap to? Andin balot! Niarum ni, si Jehova so agbalot pansengegan na karelmengan. Oniay kuan na Santiago 1:13: “Say Dios agnayari a tuksoen na mauges tan agmet manukso na siopaman a too.” Nodnonoten tayo met ya inyabawag nen Jehova iyan sentensia ‘unong ed ilalo.’ Sikato so maaron nanggawa na saray uksoyan parad saray matoor a kapolian nen Adan tan Eva a makaimaton ed anggaan na kaapaan tan panliketan da so “kawayangan na gloria na saray anak na Dios.” Diad andi-anggaan, saray matoor a katooan so aglan balot manpaga ya amin a pinalsa et nidunget ni lamet ed makapaot-ot a kipapasen na kaapaan. Say maptek a panangasikaso nen Jehova ed saray bengatla so mangiletneg ed inkamakanepegan na inkasoberano to ed amin a panaon.—Isaias 25:8.
17. Panon itayon naapektoan ed panrepaso ed saray rason na paniirap ed mundo natan?
17 No repasoen tayo irayan rason ed paniirap na too, wala tay antokaman a nitetel tayo a karelmengan ed si Jehova odino pakaandi lay kompiyansa tayo ed sikato? Misunian, say ontan a panangusisa so mangiter ed sikatayo na rason pian mipakna tayo ed sarayan salita nen Moises: “Say Dampay, ayadyari so gawa to; ta kaptekan so saray amin a dalan to: Sakey a Dios a napanmatalkan tan anggapo so kaugsan, sikato so matunong tan maptek.” (Deuteronomio 32:4) Diad pandalepdep ed sarayan pamaakaran, panapanaon a repasoen tayo iratan pian linewen iratan a tepet. Diad ontan et sano nipaarap itayo ed saray subok, naresistian tayo iray sagpot nen Satanas a mangipaslep na saray panduaruwa ed kanonotan tayo. Balet, komusta met so komaduan kundang a sinalambit ed gapo? Anto so nalalanor ed panmatalek ed si Jehova?
No Anto so Kabaliksan na Panmatalek ed si Jehova
18, 19. Diad antoran salita a papasesegen itayo na Biblia a manmatalek ed si Jehova, balet antoray lingon ideya na arum nipaakar ed satan?
18 Papasesegen itayo na Salitay Dios: “Manmatale’ka ed Jehova ed simoon a pusom, tan agka onsaral ed tapew na dili a pakatalos mo: Dia ed saray amin a dalan mo sikato so bidbiren mo, et sikato itonton to so saray basbas mo.” (Uliran 3:5, 6) Saratan so alay abig tan manamaseguron salita. Maseguron anggapo la ed interon uniberso so mas napanmatalkan ni nen say pinabpabli tayon mangatatawen ya Ama. Anggaman kuan, mas mainomay a basaen iratan a salita ed Uliran nen say iyaplika iratan.
19 Dakel so walaan na saray lingon ideya nipaakar ed kabaliksan na panagmatalek ed si Jehova. Iisipen na arum a satan a panagmatalek et nalilikna labat, sakey a maliket a liknaan ya onsesebang ed puso. Panisiaan met na arum a say panagmatalek ed Dios et mankabaliksan na panilalo ed pananalimbeng to ed sikatayo manlapud amin a kairapan, a solbaren to so amin a problema tayo, a resolbien to iray inagew-agew ya angat ed sikatayo unong ed iilaloan tayo—tan gawaen to itan a tampol! Balet anggapo so basiyan ed saratan ya ideya. Say panagmatalek et aliwa lambengat a liknaan, tan realistiko itan. Parad saray wala la’d edad, say panagmatalek et mangilalanor ed inggetma tan inisip a maong iran desisyon.
20, 21. Anto so nalalanor ed panmatalek ed si Jehova? Iyilustra.
20 Imanoen lamet so imbaga na Uliran 3:5. Impandumaan na satan so panagmatalek ed si Jehova tan say pandepende tayo ed mismon pakatalos tayo, a mangisusuheri ya agtayo nayarin gawaen itan a dua. Kabaliksan kasi na satan ya agtayo nayarin usaren so pakayari na pakatalos tayo? Andi met, lapud inikdan itayo nen Jehova na saratan a pakasarag, ya iilaloan to ya usaren tayo iratan diad panaglingkor ed sikato. (Roma 12:1) Balet anto so saralan, odino pandependian tayo? No agmitunosan so panag-isip tayo ed kanonotan nen Jehova, kasin bibidbiren tayo a mas atagey so kakabatan to nen say pikakabat tayo? (Isaias 55:8, 9) Say kabaliksan na panagmatalek ed si Jehova et paiwanwan itayo ed kanonotan to.
21 Bilang ilustrasyon: Isipen pa so sakey ya ugaw ya akayurong ed beneg na kotsi, a walad arapan iray atateng to. Say ama to so manmamaneho. Sano onlesa iray problema leleg na biahe—no iner so suston dalanan odino walay problema ed klima odino kipapasen na karsada—panon so ikiwas na sakey a matulok tan manmamatalek ya anak? Kasin ibando to no iner so arapen da legan ya akayurong ed beneg, ya ibaga to ed ama to no panon so panmaneho? Kasin suppiaten to iray desisyon na atateng to odino agto unoren so panonot da a sikatoy man-seatbelt? Andi, sikato so manmatalek ed saray atateng to a mangasikaso ed saray bengatla, anggaman ag-ira ayadyari. Si Jehova et ayadyarin Ama tayo. Agta manmatalek itayon maong ed sikato, nagkalalo la sano nipapaarap itayo ed mairap iran kipapasen?—Isaias 30:21.
22, 23. (a) Akin a nepeg itayon manmatalek ed si Jehova sano nidunget itayo ed saray problema, tan panon tayon nagawaan itan? (b) Anto so singbaten ed ontumbok ya artikulo?
22 Balet, ipapabitar na Uliran 3:6 a nepeg tayon ‘bidbiren si Jehova ed amin a dalan tayo,’ ya aliwa lambengat a no nidudunget itayo ed mairap iran kipapasen. Kanian say inagew-agew iran dedesisyonan tayo ed bilay so nepeg a mangipatnag na panagmatalek tayo ed si Jehova. Sano onlesa iray problema, agtayo nepeg a nadismaya, ontalaw, odino resistian so panangigiya nen Jehova nipaakar ed sankaabigan a paraan na pangasikaso ed saray pamaakaran. Nakaukolan a moriaen tayo iray subok bilang pankanawnawan suportaan so inkasoberano nen Jehova, a paneknekan a matila si Satanas, tan bayuboan so katutulok tan arum niran kalidad a makapaliket ed si Jehova.—Hebreos 5:7, 8.
23 Nipatnag tayo met so panagmatalek tayo ed si Jehova anggan antoran babeng so mansesga ed sikatayo. Gawaen tayo itan diad saray pikakasi tayo tan diad paraan na paniilalo tayo ed panangigiya na Salita nen Jehova tan say organisasyon to. Balet, diad espesipikon paraan, panon tayon nipatnag so panagmatalek tayo ed si Jehova sano nidunget itayo ed saray problema ya onlelesa ed mundo natan? Satan a tema so konsideraen ed ontumbok ya artikulo.
[Paimano ed Leksab]
^ par. 13 Say Griegon salita ya inusar nen Pablo parad “kaapaan” so mipara ed samay inusar ed Griegon Septuagint a mangipapatalos ed balikas ya aminpigan sinalambit nen Solomon diad libro na Eclesiastes, a singa say balikas ya ‘amin et kaapaan!’ —Eclesiastes 1:2, 14; 2:11, 17; 3:19; 12:8.
Panon Yon Ebatan?
• Panon ya impatnag nen David a nankompiyansaan to si Jehova?
• Anto so taloran sengegan na paniirapan na totoo natan, tan akin a maabig so panapanaon a panrepaso ed saratan?
• Anto so insentensia nen Jehova ed katooan, tan akin a makatunongan itan a sentensia?
• Anto so nalalanor ed panmatalek ed si Jehova?
[Tepetepet Parad Panagaral]
[Saray litrato ed pahina 8]
Si David so nankompiyansa ed si Jehova
[Litrato ed pahina 10]
Impabitar nen Jesus ya aliwan si Jehova so makasengeg ed inkagba na sakey a tori diad Jerusalem