Peteg a Tulong Parad Saray Mairap-Bilay

SANEN say Anak na Dios, si Jesu-Kristo so wadiad dalin, impatnag toy peteg ya interes diad impanulong to ed saray mairap-bilay. Oniay inkuan na sakey ya akaimaton ed ministeryo nen Jesus: “Saray bulag awaten day pakanengneng da, tan saray piley manakar ira, saray akating alinisan ira, tan saray telek makadngel ira, tan saray inaatey inmoli ra ed bilay, tan nipulong ed saray duruka so maong a balita.” (Mateo 11:5) Komusta balet iray minilyon a mairap-bilay natan? Wala kasi so maong a balita parad sikara? On, wala so mensahe na ilalo!

Anggaman saray mairap-bilay so mabetbet ya ibabaliwala tan lilingwanan na mundo ed inkalapagan, oniay isisipan na Salitay Dios, say Biblia: “Say naukolan aglawas nalingwanan: nisay ilalo na saray duruka agnaandi lawas.” (Salmo 9:18) Sarayan makatambayon salita so nagawa sano say amin ya uley na too et salatan la na sakey a peteg a mangatatawen a gobierno, salanti, say Panarian na Dios. (Daniel 2:44) Bilang Ari na satan a mangatatawen a gobierno, si Jesus so ‘mangilagak ed makabos tan naukolan, tan ilaban to so kamarerwa na naukolan. Sikato dondonen to so kamarerwa ra a yarawi ed panamalingo tan panamasoot; et mabli naani dala ra ed mata to.’​—Salmo 72:13, 14.

Anto kasi iray kipapasen na panagbilay sano manuley lay Kristo ed dalin? Saramay manbilay ed silong na uley nen Kristo ed sankamundoan so manggayaga ed saray nansagpotan da. Oniay inkuan na Biblia ed Miqueas 4:3, 4: “Onyurong ira naani balang sakey ed silong na kiew to ya ubas tan ed silong na kiew to a higos; et anggapo naani manaktakot ed sikara: ta say sangi nen Jehova na saray ehersito sikato so sinalita to.” Solbaren ni ingen na Panarian na Dios iray problema nipaakar ed sakit tan ipapatey. (Isaias 25:8) Agaylan nikaduma itan a mundo! Napanisiaan tayo irayan sipan na Biblia lapud saraya so pinuyanan na Dios a mismo.

Nilikud ed mensahe na ilalo, say Biblia so ontutulong ed sikatayon mangarap ed saray angat ed inagew-agew, a singa say panalona ed kakulangay dilin-respeto, a nayarin epekto na kairapay-bilay. Lapud panaaral to na Biblia et amta na sakey a maniirap ed bilay a Kristiano a sikato so mabli ed imaton na Dios a singa met ed sakey a mayaman a Kristiano. Ibabaga na libro na Biblia a Job a say Dios et ‘agto imatleken so mayaman a lalo nen say duka, ta sikara ya amin so gawa na saray lima to.’ (Job 34:19) Sikara so parehon aaroen na Dios.​—Gawa 10:34, 35.