Sakey a Tuan Relihyon​—Peteg a Wala

INLETNEG nen Jesu-Kristo so saksakey a tuan iglesia, odino kongregasyon. Satan a kongregasyon et sakey a maespiritual a grupo, maespiritual a pamilya. Lapud saya et nibaga tayon sakey itan a muyongan na saray totoon pinili na masanton espiritu na Dios​—ya amin et bibidbiren na Dios bilang ‘ananak’ to.​—Roma 8:16, 17; Galacia 3:26.

Imbangat nen Jesus a saksakey so dalan a pangipapaarapan na Dios ed totoo ya ompugta ed katuaan tan bilay. Pian niyilustra itan ya importantin katuaan, inkompara nen Jesus so dalan a mamaarap ed andi-anggaan a bilay ed sakey a karsada. Inkuanto: “Onloob kayo ed mainget a pinto; ta maawang so pinto, tan malapar so dalan, a mamaarap ed kaderalan, et dakel so saray onloob diman. Ta mainget so pinto, tan makisir so dalan, a mamaarap ed bilay, et daiset so saray makaromog ed sikato.”​—Mateo 7:13, 14; Juan 14:6; Gawa 4:11, 12.

Sakey a Kongregasyon a Walaay Pankakasakey

Agtayo nepeg ya isipen a samay kongregasyon nen inmunan siglo et “sakey a sankamundoan, inkalapagan, tan organisadon sosyedad a singa ed iisipen tayo natan a kabaliksan na iglesia katolika sano pantotongtongan tayo itan,” so kuan na The New Dictionary of Theology. Akin? “Lapud simplin rason,” kuan na satan, “ya anggapo so ontan ya organisado tan inkalapagan a sosyedad.”

Anggapoy siopaman a makasuppiat ed katuaan a say inmunan kongregasyon na Kristiano so agbalot mipara ed inletneg iran sistema na iglesia a naiimano tayo natan. Balet saman so organisado. Ag-onkukurang ya independente so balang kongregasyon. Amin da so mamibidbir ed autoridad na mananguley ya ulop ed Jerusalem. Saman ya ulop​—a tugyopen na saray apostol tan mamasiken ed kongregasyon na Jerusalem​—so tinmulong pian napansiansiay pankakasakey na kongregasyon bilang “saksakey  a laman” nen Kristo.​—Efeso 4:4, 11-16; Gawa 15:22-31; 16:4, 5.

Antoy agawa ed saman a sakey a tuan kongregasyon? Kasin nagmaliw itan a mabiskeg ya Iglesia Katolika? Kasin nagmaliw itan a pigaran denominasyon tan naapag-apag a sistema na Protestantin iglesia a nanenengneng tayo natan? Odino wala ni kasi sananey ya agawa?

“Trigo” tan “Sisanyas”

Pian naamtaan iray ebat, maalwar tayon konsideraen so imbagan mismo nen Jesu-Kristo a nagawa. Nayarin nabigla kayo no naamtaan yon inilaloan nen Jesus a say kongregasyon to so agnapatnagan ed awaran tan abuloyan ton mantultuloy itan a maermen a kipapasen diad loob na saray siglo.

Insiglaot toy kongregasyon to ed “panarian na tawen,” ya inkuanto: “Say panarian na tawen niulibay ed sakey a too ya angitanem na maong a bukel ed uma to. Balet leleg na saray totoo a nauugip, say kabusol to linma tan angitanem na sisanyas ya insamok to’d saray trigo, insan tinmaynan. Et sanen akatubo la so intanem tan nambunga la, saman met la pinmatnag so saray sisanyas. Et saray aripen na makan-abung linmara tan inkuan da’d sikato, Katawan, agka ta angitanem na maong a bukel ed umam? Iner sirin so lapuan na saray sisanyas? Et sikato inkuan to’d sikara, Sakey a kabusol so nanggawa ed saya. Et saray aripen kuan da’d sikato, labay mo sirin ya onla kami ta tiponen mi ra? Sikato balet kuan to, Andi; ompan sano tiponen yo so saray sisanyas, napibabagot yo ray trigo. Paulyan iran ontubo a bansag ya anggad panani; et sano panaon na panagani ibagak naani ed saray manani, Tipon yo ya unona so saray sisanyas tan berber yo ra a pinungo pian poolan ira; balet tiponen yoray trigo ed kamalir.”​—Mateo 13:24-30.

Impaliwawa nen Jesus a sikato so ‘tomatanem.’ Ililitrato na “maong a bukel” iray tuan babangatan to. Say “kabusol” to et si Satanas a Diablo. “Saray sisanyas” et saray palson Kristiano ya akaloob ed inmunan Kristianon kongregasyon. Inkuanto ya abuloyan to so bansag ya itubo na saray “trigo” tan “sisanyas” anggad “panagani,” a nagawa diad “anggaan na mundo.” (Mateo 13:37-43) Antoy kabaliksan na sayan amin?

Naimpluensyaan so Kristianon Kongregasyon

Ag-abayag kayari impatey na saray apostol, saray apostatan managbangat so ginmapon angimpluensya ed loob na kongregasyon. Nansalita ‘iray pikewet a bengatla pian tangguyoren iray babangatan ya ontumbok ed sikara.’ (Gawa 20:29, 30) Bilang resulta, dakel a Kristiano so  ‘sinmian ed pananisia.’ Sikara so ‘dinmengel ed saray labilabir.’​—1 Timoteo 4:1-3; 2 Timoteo 4:3, 4.

Inkuan na The New Dictionary of Theology a nen komapat a siglo K.P. et “say Katolikon Inkakristiano so nagmaliw ya opisyal . . . a relihyon na Romanon Empiryo.” “Nankasakey so iglesia tan sibil a sosyedad,” salanti say Iglesia tan Estado, a satan so sigpot a sumlang ed sisisiaen na saray inmunan Kristiano. (Juan 17:16; Santiago 4:4) Inkuan na satan lanlamang a reperensya a sinmabi panaon et sigpot a nauman so interon inkasangal tan inkatibukel na iglesia, ontan met ed dakel a manunan sisisiaen na satan, “lapud impluensya na nikaduma tan makaderal ya impanlaok na D[aan] a S[ipan] tan neoplatoniko iran ideya.” Unong ya impasakbay la nen Jesu-Kristo, saray tuan babangatan to so mairap a nabidbir legan ya ondarakel iray palson Kristiano.

Amta na saray dumerengel nen Jesus ya alay irap a nibiig so puron trigo manlapud saray sisanyas, a singa say makasamal a malapagey, a kaparpara na saray trigo legan na itutubo ra. Kanian iyiilustra nen Jesus a diad gapo et mairap a nabidbir iray tuan Kristiano manlapud saray palso. Agkabaliksan na saya a sigpot lan naandi so Kristianon kongregasyon, lapud insipan nen Jesus ya itultuloy ton iwanwan iray espiritual ya agagi to ed “amin a panaon angga ed kasampotan na sistema na bengabengatla.” (Mateo 28:20, NW) Inkuan nen Jesus a mantultuloy ya ombaleg so trigo. Anggaman kuan, diad inlabas na saray panaon et maseguron nanggunaetan a maong na saray tuan Kristiano​—indibidual man odino grupo​—so panumbok ed saray bangat nen Kristo. Balet sikaray agla abidbir bilang nanengneng a grupo, odino organisasyon. Sikaray sigpot a midumaan ed say nanenengneng ya apostatan relihyoson sistema ya angitarok lambengat na kabandayan tan kababaingan ed ngaran nen Jesu-Kristo diad interon awaran.​—2 Pedro 2:1, 2.

“Ompatnag so Too na Kasalanan”

Impasakbay nen apostol Pablo so sananey nin pakabidbiran na sayan palson relihyoson sistema. Oniay insulat to: “Agkayo komon patitilaan ed anggan siopaman; ta agni onsabi [so agew nen Jehova], noag say onsabi ya unona so kapelag ed kasalanan, tan ompatnag so too na kasalanan.” (2 Tesalonica 2:2-4) Sayan “too na kasalanan” et anggapoy arum noag say klerigon klase ya angitandoro ed inkasikato bilang mananguley ed “Kristianon” kongregasyon. *

Ginmapo so apostasya diad panaon nen apostol Pablo. Dinmakerakel itan sanen inatey iray apostol tan naandi so manamuger ya impluensya ra. Inkuan nen Pablo a malinew a nabidbiran itan panamegley na “gawa nen Satanas a pati amin a pakayari tan saray tanda tan saray pamapakelaw a tila.” (2 Tesalonica 2:6-12) Matukotukoy itan a manideskribe ed saray kimey na dakdakel a lider na relihyon diad interon awaran!

Bilang panuporta ed sisiaen dan say Romanon Katolisismo so sakey a tuan relihyon, ibabaga na saray Katolikon lider a saray obispo ra so “anawir ed inka-apostol da ed saray orihinal ya apostol nanlapu la’d gapo ya anggad natan.” Diad katuaan to et sayan ibabaga ra a tawir ya inka-apostol so andian na maawaran odino Makasulatan a basiyan. Anggapo so napanmatalkan ya ebidensya a say sistema na simbaan a linmesa kayari impatey na saray apostol nen Jesus et inwanwan na masanton espiritu na Dios.​—Roma 8:9; Galacia 5:19-21.

Komusta met so arum nin relihyon a linmesa kayari na say tatawagen a Repormasyon? Kasin tinumbok da so padron na inmunan Kristianon kongregasyon? Kasin impawil da lamet so inkadalisay na orihinal a Kristianon kongregasyon? Tua a kayari na Repormasyon, dakel a kabanyakan a totoo so awalaan na Biblia diad dilin lenguahe ra. Ingen, ipaparungtal na awaran ya intultuloy ya imbangat na sarayan relihyon iray palson doktrina. *​—Mateo 15:7-9.

Balet, imanoen pa iya. Si Jesu-Kristo so malinew  ya angipasakbay a nabidbiran lamet so saksakey a tuan kongregasyon to legan na say tinukoy ton kasampotan na sistema na bengabengatla. (Mateo 13:30, 39) Say pakasusumpal na saray propesiya na Biblia so mamaneknek a manbibilay itayo la natan ed satan a panaon. (Mateo 24:3-35) Kanian oniay kaukolan ya itepet na balang sakey ed sikatayo, ‘Iner so pakaromogan ed satan a sakey a tuan relihyon?’ Iilaloan ya onlinew lan onlinew so pakabidbiran na satan.

Nayarin moriaen mon aromog mo la itan ya iglesia, odino kongregasyon. Importante a seguroen itan. Akin? Lapud singa nen inmunan siglo et wala labat so saksakey a tuan relihyon. Sinegurom ta la no kasin say relihyon mo so miparan maong ed padron ya inletneg na Kristianon kongregasyon nen inmunan siglo tan satan so matoor a manutumbok ed saray bangat nen Jesu-Kristo? Akin ya ag-usisaen itan natan? Maliket iray Tasi nen Jehova ya ontulong ed sika a manggawa ed satan.​—Gawa 17:11.

[Saray paimano ed leksab]

[Saray litrato ed pahina 5]

Anto so ibabangat ed sikatayo na ilustrasyon nen Jesus ed saray trigo tan sisanyas nipaakar ed tuan kongregasyon?

[Saray litrato ed pahina 7]

Kasin ipapatnag na relihyon mo so padron ya inletneg na saray inmunan-siglon Kristiano diad panagpulong tan panagaral?