Sigpot a Manmatalek ed si Jehova Diad Panaon na Gonigon
Sigpot a Manmatalek ed si Jehova Diad Panaon na Gonigon
“Say Dios sikato so salimbengan tayo tan biskeg tayo, sikato so sakey a maparparaan a tulong ed gonigon.”—SALMO 46:1.
1, 2. (a) Anton alimbawa so mangipatnag ya agmagenap so pangibagay manmamatalek itayo ed Dios? (b) Akin ya agmagenap so pangibagay manmamatalek itayo ed si Jehova?
MAINOMAY ya ibagan manmamatalek itayo ed Dios balet, mairap ya ipatnag itan. Alimbawa, say balikas ya “In God We Trust” so abayaglan akatatak ed papel de bangko tan saray sinsilyo na E.U. * Nen 1956 et pinaletan na Kongreso na E.U. so sakey a ganggan a mangiyaabawag a satan a balikas so magmaliw a diparan na bansan Estados Unidos. Misunian, dakel a totoo—ya aliwan diad satan labat a bansa noagta diad interon mundo—so mas manmamatalek ed kuarta tan materyal a kayamanan nen say diad Dios.—Lucas 12:16-21.
2 Bilang tuan Kristiano, wala ni so nalalanor nen say basta pangibaga labat a manmamatalek itayo ed si Jehova. No panon a say ‘pananisia ya andiay gawa et inatey,’ anggapo met so kakanaan na pangibaga tayon manmamatalek itayo ed Dios no agtayo itan ipapatnag. (Santiago 2:26) Diad inmunan artikulo, naaralan tayo a say panagmatalek ed si Jehova so nipatnag tayo sano ontupleg itayo ed sikato diad pikakasi, sano paigiya itayo ed Salita to, tan sano paiwanwan itayo ed organisasyon to. Konsideraen tayo natan no panon tayon anamoten iratan a taloran kundang diad panaon na gonigon.
Sano Naandian na Trabaho Odino Melmelag so Nasueldo
3. Antoran pakadesdesan ed panagbilay so kidudungetan na saray lingkor nen Jehova diad sarayan ‘maatap a panaon,’ tan panon tayon naseguro a say Dios et mabulos ya ontulong ed sikatayo?
3 Diad sarayan ‘maatap a panaon,’ sikatayoran Kristiano so nipapaarap ed pareparehon desdes ed panagbilay a singa met ed arum a totoo. (2 Timoteo 3:1) Kanian, nayarin bigbiglan naandian itayoy trabaho. Odino nayarin obligado itayon mantrabaho na dakel ya oras parad melmelag a sueldo. Diad ontan iran kipapasen, nayarin nairapan itayon ‘managano ed saramay kaamong tayon dili.’ (1 Timoteo 5:8) Kasin say Sankatageyan a Dios so mabulos ya ontulong ed sikatayo diad ontan iran panaon? Segsegurado! Siempre, ag-itayo sasalimbengan nen Jehova manlapud amin a kairapan na panagbilay diad sayan sistema na bengabengatla. Balet, no manmatalek tayo ed sikato, saray salita ed Salmo 46:1 so onaplika ed biang tayo: “Say Dios sikato so salimbengan tayo tan biskeg tayo, sikato so sakey a maparparaan a tulong ed gonigon.” Balet, panon tayon nipatnag a sigpot itayon manmamatalek ed si Jehova diad panaon na pakakagonigon ed pinansyal?
4. Sano nidunget itayo ed saray problema ed pinansyal, anto so ipikasi tayo, tan panon so iyebat nen Jehova ed saratan a pikakasi?
4 Sakey lan paraan pian nipatnag tayo so panagmatalek ed si Jehova et diad itupleg ed sikato diad pikakasi. Balet anto so ipikasi tayo? Bueno, no nidudunget itayo ed saray problema ed pinansyal, mas nakaukolan tayo natan so praktikal a kakabatan nen say kapiganman. Ipikasi tayo sirin itan! Oniay ipapaseguro ed sikatayo na Salita nen Jehova: “No siopaman ed sikayo so makulang na kakabatan, pakerewen ed Dios; a mangiter na mabunlok ed amin a too, tan agto balawen; tan niiter ed sikato.” (Santiago 1:5) On, kerewen tayo ed si Jehova so kakabatan—say abilidad a mangiyaplika ed pikakabat, pakatalos, tan pakatebek—ta pian makapanggawa itayo na makabat iran desisyon tan susto iran pipilien. Papaseguroan itayo na maaron Ama tayo ed tawen a dengelen to iratan a pikakasi. Sikato so lawas mabulos a mangibasbas ed saramay manmamatalek ed sikato diad interon puso ra.—Salmo 65:2; Uliran 3:5, 6.
5, 6. (a) Akin a mandependi itayo ed Salitay Dios parad tulong pian nasungdoan iray desdes na panagbilay? (b) Anto so nayarin gawaen tayo pian nabawasan so pakakaaburido sano naandian itayo na trabaho?
5 Say pandependi ed panangigiya na Salitay Dios so sananey nin dalan pian nipanengneng tayo so panagmatalek ed si Jehova. Saray makabat a panonot to a naromog ed Biblia so apaneknekan a “napanmatalekan a tuloy.” (Salmo 93:5, NW) Anggaman atugyop itan masulok a 1,900 taon lay apalabas, satan ya apuyanan a libro so walaan na napanmatalkan a bilin tan aralem a pakatalos ya ontulong ed sikatayon makatalona ed saray desdes ed panagbilay. Konsideraen so pigaran alimbawa na kakabatan ed Biblia.
6 Oniay naimano nensaman na makabat ya Arin Solomon: “Say ugip na mankikimey a too sikato so masamit, mangan na daiset odino dakel; balet say inkapno na mayaman agmangitepel ed sikato ya onugip.” (Eclesiastes 5:12) Nakaukolan so panaon tan kuarta pian apigeren, linisan, mintinaen, tan laniran iray materyal a kaykayarian tayo. Kanian no naandian itayo na trabaho, nayarin anamoten tayon usisaen lamet so estiloy kabibilay tayo, a panggunaetan ya ibiig iray bengatlan nakaukolan tayo tan agtayo nakaukolan. Ta pian nabawasan so pakakaaburido, makabat so panggawa na pigaran pananguman. Alimbawa, kasin posibli so pamasimpli ed bilay tayo, a nayarin onalis ed simplin ayaman odino bawasen iray agnakaukolan a materyal a kayarian?—Mateo 6:22.
7, 8. (a) Panon ya impatnag nen Jesus a kabisado to so tendensia na ag-ayadyarin totoo a mapagan maong ed materyal iran bengatla? (Nengnengen met so paimano’d-leksab.) (b) Anton makabat a bilin so inyopresi nen Jesus no panon so ipaliis ed agmanepeg a panagpaga?
7 Diad Sermon to ed Palandey, oniay insimbawa nen Jesus: “Agkayo mapaga’d panagbila’yo no anto so kanen yo, ono anto so inumen yo; agyo met kapagaay laman yo, no anto so ikawes yo. Agta kasi mamabli bilay nen say kanen, tan say laman nen say kawes?” * (Mateo 6:25) Amta nen Jesus a saray ag-ayadyarin totoo so sipor lan manonot no panoy pakawalaan na manuna iran nakaukolan. Balet, panon itayon ‘agmanpaga’ ed saratan a bengatla? “Anapen . . . nin unona so panarian,” so inkuan nen Jesus. Antokaman iray probleman naabet tayo, nepeg a mantultuloy tayon iyuna ed bilay tayo so panagdayew ed si Jehova. No gawaen tayo itan, ‘iyarum’ ed sikatayo na mangatatawen ya Ama tayo so amin ya inagew-agew a nakaukolan tayo. Anggan panon et itarya to so nakaukolan tayo.—Mateo 6:33.
8 Inter nen Jesus iyan kaaruman a bilin: “Agkayo sirin mapaga nipaakar ed agew ya onsabi; ta say agew ya onsabi manpaga nipaakar ed sikaton dili.” (Mateo 6:34) Aliwan makabat so pampagan maong ed no anto so nayarin itarok na ontumbok ya agew. Inkuan na sakey ya iskolar: “Say katatakot ed walan nagawa ed arapen so mataltalag a mipetekan ed talagan nagagawa.” Say mapaabeban panumbok ed bilin na Biblia ya iyapasakey tayo iray prayuridad tayo tan say pambilay a sinononot labat ed kada agew ya onlabas so makatulong ed sikatayon ompaliis ed agmanepeg a panagpaga.—1 Pedro 5:6, 7.
9. Sano nagogonigon ed pinansyal, anton tulong so naromog tayo ed saray publikasyon na “matoor tan makabat ya aripen”?
9 Sano nagogonigon ed pinansyal, nipanengneng tayo met so panagmatalek tayo ed si Jehova diad itupleg ed saray publikasyon ya intarya na “matoor tan makabat ya aripen.” (Mateo 24:45) Panapanaon, say magasin ya Awake! so mangipaparungtal na saray artikulon walaan na makatulong iran bilin tan suhestion ed no panon so pangarap ed saray angat ed panagbilay. Say artikulon “Out of a Job—What Are the Solutions?” ed Agosto 8, 1991 ya isyu so angidalatdat ed waloran praktikal a giya ya akatulong ed dakel ya akapansiansian maligen ed pinansyal tan emosyonal a paraan sanen nidunget ira ed panaon na impakaandi na trabaho. * Siempre, saratan a giya so nepeg a natekepan na manepeg a panmoria ed tuan kaimportantian na kuarta. Saya so siningbat ed artikulon “Something More Vital Than Money,” a pinmaway met ed satan ya isyu.—Eclesiastes 7:12.
Sano Nagogonigon ed Saray Problema ed Bunigas
10. Panon ya impatnag na alimbawa nen Arin David a realistiko so panmatalek ed si Jehova sano grabe lan mansasakit?
10 Kasin realistiko so panmatalek ed si Jehova sano nidudunget ed graben sakit? On! Si Jehova so walaan na empatya ed saray mansasakit ed limog na totoo to. Niarum ni, sikato so mabulos ya ontulong. Alimbawa, konsideraen pa si Arin David. Sikaton mismo so nayarin pirmin nansakit sanen insulat to so nipaakar ed pidedeneng na Dios ed sakey a maptek a walaay beblay. Inkuanto: “Sikato so antabayan a mismo nen Jehova diad dukolan na beblay; amin a dukolan to so salatan mo legan na pansasakit to.” (Salmo 41:1, 3, 7, 8, NW) Nansiansian mabiskeg so panagmatalek nen David ed Dios, tan diad saginonor et sikato so inmabig. Balet, panon tayon nipatnag so panagmatalek tayo ed Dios sano sikatayo so nagogonigon ed saray problema ed bunigas?
11. Sano nadapoan itayo na sakit, anto so nayarin kerewen tayo ed mangatatawen ya Ama tayo?
11 Sano nadapoan itayo na sakit, sakey lan paraan pian nipanengneng tayo so panagmatalek tayo ed si Jehova et diad ikerew ed sikato na tulong a makapansungdo diad panamegley na pikakasi. Nayarin onkerew itayo ed sikato na tulong ya agamilen so “aralem a kakabatan” ta pian naanamot tayo so sukat na bunigas a realistikon iyaabuloy na saray sirkumstansya tayo. (Uliran 3:21) Nayarin onkerew itayo met ed sikato na tulong a naagamil so anos tan panagsungdo ta pian natalonaan tayo so beblay. Manuna ed amin, labay tayon kerewen ed si Jehova ya antabayan to itayo, ya ikdan to itayo na biskeg pian mansiansian matoor ed sikato tan mansiansian asimbang, anggano anto so nagawa. (Filipos 4:13) Say pamasiansia tayo ed integridad tayo ed Dios so lalon importante nen say pamasiansia ed peles a bilay tayo. No pansiansiaen tayo so integridad tayo, say Baleg a Mananumang so mangiter ed sikatayo na magnayon ya ayadyarin bilay tan bunigas.—Hebreos 11:6.
12. Antoran Makasulatan a prinsipyo so makatulong ed sikatayon manggawa na makabat iran desisyon nipaakar ed medikal a panagpatambal?
12 Say panmatalek tayo ed si Jehova so mamakiwas met ed sikatayon manilalo ed Salita to, say Biblia, parad praktikal a panangigiya. Saray prinsipyon naromog ed Kasulatan so ontulong ed sikatayon makapanggawa na makabat iran desisyon no nipaakar ed medikal a panagpatambal. Singa bilang, diad pakaamta a kokondenaen na Biblia so “panag-agamil na espiritismo,” napaliisan tayo so antokaman a paraan na panagsuri odino panagtambal a mangilalanor na espiritismo. (Galacia 5:19-21, NW; Deuteronomio 18:10-12) Nia so sananey ya alimbawa na napanmatalkan a kakabatan na Biblia: “Say karaklan manisia ed balang salita; balet say masimpit a too nengnengen to a maong so laen to.” (Uliran 14:15) Kanian, sano mannononot a manpatambal, makabat ya usisaen tayo ni so napanmatalkan ya impormasyon imbes a ‘panisiaan so balang salita.’ Say ontan ya “inkalimpio na kanonotan” so makatulong ed sikatayo pian maalwar a mangikonsidera ed saray napanpilian tan manggawa na desisyon a walaan na magenap ya impormasyon.—Tito 2:12, NW.
13, 14. (a) Anton makaibangat ya impormasyon nipaakar ed bunigas so nipalapag ed saray magasin a Panag-Bantayan tan Awake!? (Nengnengen met so kahon ed pahina 17.) (b) Anton bilin so niparungtal ed Awake! na Enero 22, 2001 nipaakar ed pidedeneng ed graben sakit?
13 Nipatnag tayo met so panagmatalek ed si Jehova panamegley na pansukimat diad saray publikasyon na matoor ya aripen. Sagpaminsan ya ipapalapag na saray magasin a Panag-Bantayan tan Awake! so makaibangat iran artikulo nipaakar ed nanduruma iran espesipikon problema tan sakit ed bunigas. * Panapanaon et ipaparungtal na sarayan dyurnal iray artikulo nipaakar ed saray indibidual ya akatalona ed nanduruma iran liliknaen, sakit, tan depekto ed laman. Niarum ni, walaray artikulon mangiyoopresi na Makasulatan iran suhestion ontan met ed praktikal a bilin no panon so pambilay anggaman manasagmak na seryoson problema ed bunigas.
14 Alimbawa, niparungtal ed unaan iran pahina na Enero 22, 2001, ya isyu na Awake!, so seryen “Comfort for the Sick.” Impresenta na saray artikulo so makatulong iran prinsipyo na Biblia ontan met ed saray mismon impormasyon ya agamoran panamegley na saray impanginterbio ed saray mikabat ya indibidual a walaan na makapaletey a sakit ed loob na dakel a taon. Say artikulon “Living Successfully With Your Ailment—How?” so angitarya ed onggendan a bilin: Aralen anggad posibli so nipaakar ed sakit yo. (Uliran 24:5) Mangiletneg na praktikal iran kalat, pati saray kalat a makatulong ed arum, balet nodnonoten a nayarin agyo nadampot iray kalat a nasarag na arum. (Gawa 20:35; Galacia 6:4) Paliisan so pambukbukor. (Uliran 18:1) Sano dalawen kayo na arum, gawaen itan a makapaligsa ed sikara. (Uliran 17:22) Importante ed amin, pansiansiaen so maapit a siglaotan ed si Jehova tan ed kongregasyon. (Nahum 1:7; Roma 1:11, 12) Agta misalsalamat itayo ed napanmatalkan a panangiwanwan nen Jehova panamegley na organisasyon to?
Sano Mansiasiansia ni so Kakapuyan na Laman
15. Panon ya atalonaan nen apostol Pablo so pipupuligesgesan to ed saray kakapuyan na makabos a laman, tan anto so walan panamaseguro ed sikatayo?
15 “Dia ed laman ko, anggapo so manayam a bengatlan maong,” so insulat nen apostol Pablo. (Roma 7:18) Naeksperiensyan mismo nen Pablo a mair-irap so pipuligesgesan ed saray pilalek tan kakapuyan na makabos a laman. Anggaman ontan, si Pablo so walaan met na kompiyansa a sikatoy makatalona. (1 Corinto 9:26, 27) Panon? Diad panagmatalek a maong ed si Jehova. Satan so rason no akin a nikuan nen Pablo: “Alay kasegsegang ko a too! Siopa so mangilaban ed siak ed laman na sayan patey? Misalamat ak ed Dios lapud Jesu-Kristo a Katawan tayo.” (Roma 7:24, 25) Komusta itayo balet? Walaan itayo met na pipupuligesgesan ed saray kakapuyan na laman. Legan itayon mipupuligesgesan ed saratan a kakapuyan, mainomay a naandi so kompiyansa tayo, ya isipen tayon agtayo lan balot ontalona. Balet ta tulongan itayo nen Jehova no sikatayo, singa si Pablo et peteg a manmatalek ed Sikato, ya aliwan ed dilin biskeg tayo.
16. Sano mansiasiansia ni so kakapuyan na laman, anto so nakaukolan tayon ipikasi, tan anto so nepeg tayon gawaen no agawaan tayo lamet itan?
16 Sano mansiasiansia ni so kakapuyan na laman, nipanengneng tayo so panagmatalek ed si Jehova diad iyey-ey ed sikato diad pikakasi. Nakaukolan ya onkerew itayo, a mikasi ni ingen, ed si Jehova parad tulong na masanton espiritu to. (Lucas 11:9-13) Nayarian tayo ya espesipikon ikerew so dangka, a kabiangan na bunga na espiritu na Dios. (Galacia 5:22, 23) Anto so nepeg a gawaen tayo no akagawa tayo lamet na kakapuyan ya atalonaan tayo la nensaman? Nepeg ya agtayon balot onsusuko. Agtayon balot ontutunda diad mapaabeban pampikasi ed mapangasin Dios tayo, ya onkerew ed sikato na panamerdona tan tulong to. Agbalot italirak nen Jehova so puso a “maralit tan mansisibkel” lapud belat lay pakakakonsiensia. (Salmo 51:17) No oney-ey itayo ed sikato tekep na masimoon, mansisibkel a puso, tulongan itayo nen Jehova a manresisti ed saray tukso.—Filipos 4:6, 7.
17. (a) Akin a makatulong so panmorekdek ed no panon so panmoria nen Jehova ed sakey a kakapuyan a nayarin pipupuligesgesan tayo? (b) Antoran teksto so nayarin ipatlep tayo sano mipupuligesgesan itayon mangontrol ed pagmaliw a misasanok? kontrolen so dila tayo? resistian so tendensian manpilalek ed agmanepeg a panligliwaan?
17 Nipanengneng tayo met so panagmatalek ed si Jehova diad panusisa ed Salita to parad tulong. Diad pangusar ed konkordansia na Biblia odino say Watch Tower Publications Index, makaanap itayo na ebat ed tepet ya, ‘Anto so panmoria nen Jehova nipaakar ed sakey a kakapuyan a pipupuligesgesan ko?’ Diad panmorekdek ed no panon so panmoria nen Jehova ed sayan pamaakaran, ombiskeg so pilalek tayon mamaliket ed sikato. Diad ontan et nalikna tayo la so panlikna to, a gulaen no anto so kagula to. (Salmo 97:10) Amoria na arum a makatulong so pangipatlep ed saray teksto ed Biblia ya onaplika ed sakey a kakapuyan a pipupuligesgesan tayo. Kasin mipupuligesgesan itayon mangontrol ed pagmaliw tayon misasanok? Nayarin ipatlep tayo sirin iray teksto ya Uliran 14:17 tan Efeso 4:31. Kasin mairap tayon simpitan so dila tayo? Ipatlep tayo met iray tekston singa say Uliran 12:18 tan Efeso 4:29. Kasin walaan itayo na tendensian manpilalek ed agmanepeg a panligliwaan? Nayarin tandaan tayo iray bersikulon singa say Efeso 5:3 tan Colosas 3:5.
18. Akin ya agtayo nepeg a nababaingan diad ikerew na tulong ed saray mamatatken pian nadaeg so kakapuyan tayo?
18 Say ikerew na tulong ed saray tinuro na espiritu a mamatatken ed kongregasyon et kaaruman a paraan pian nipatnag tayo so panagmatalek ed si Jehova. (Gawa 20:28) On, sarayan ‘langkap a totoo’ so probisyon nen Jehova panamegley nen Kristo a manalimbeng tan mangasikaso ed pulok to. (Efeso 4:7, 8, 11-14) Tua, aliwan mainomay so ikerew na tulong pian natalonaan so sakey a kakapuyan. Nayarin nababaingan itayo tan natatakot itayo ya ompano aliwan maabig so panmoria ed sikatayo na saray mamatatken. Balet sikatayo so maseguron respetoen na sarayan maespiritual a lalaki diad pakawalaan tayo na pakpel ya onkerew na tulong ed sikara. Niarum ni, panggugunaetan na mamatatken so pangipatnag ed saray mismon kalidad nen Jehova diad pidedeneng ed pulok. Say makaligliwa, praktikal a simbawa tan bilin da manlapud Salitay Dios so nakaukolan tayo pian ombiskeg so determinasyon tayon daegen so kakapuyan tayo.—Santiago 5:14-16.
19. (a) Diad anton dalan a panggugunaetan nen Satanas ya usaren so kaapaan na bilay diad sayan sistema? (b) Anto so lalanoren na panagmatalek, tan anto so nepeg a mapekder a determinasyon tayo?
19 Agbalot lilingwanan ya amta nen Satanas ya antiktikey lay panaon to. (Apocalipsis 12:12) Kaliktan ton usaren so kaapaan na bilay ed sayan mundo a manismaya tan mamasuko ed sikatayo. Komon ta sigpot tayon pankompiyansaan so nibalikas ed Roma 8:35-39: “Siopa so mangisian ed sikatayo ed aro nen Kristo? Say kairapan, o say kaermenan, o say panangusil, o say eras, o say inka-lakseblabus, o say kaatapan, o say kampilan? . . . Ta dia ed sarayan amin a bengatla sikatayo so lalo ni nen saray mananalo ed panamegley na saman so angaro ed sikatayo. Ta sisiaen ko a peteg, ya anggan say patey, anggan say bilay, anggan saray angheles, anggan saray arari, anggan saray wala ed kaplesan, anggan saray wala ed arapen, anggan saray pakayari, anggan say katagey, anggan say kaaralman, anggan siopa a pinalsa, agda itayo nisian ed aro na Dios, a wala ed Kristo Jesus a Katawan tayo.” Agaylan balikas na panagmatalek ed si Jehova! Balet, say ontan a panagmatalek et aliwa lambengat a liknaan. Imbes, satan so panagmatalek a mangilalanor ed inisip iran maong a desisyon a gagawaen tayo ed inagew-agew a bilay tayo. Pabiskegen tayo sirin so determinasyon tayo a sigpot a manmatalek ed si Jehova diad panaon na gonigon.
[Saray paimano ed leksab]
^ par. 1 Diad sakey a sulat ed U.S. Mint, ya apetsaan na Nobyembre 20, 1861, oniay insulat na Treasury Secretary a si Salmon P. Chase: “Anggapo so mabiskeg a nasyon nilikud no pabiskegen itan na Dios, odino maligen nilikud no salimbengan To itan. Say panmatalek na totoo ed Dios so nepeg a niyabawag diad panamegley na saray kuarta na nasyon tayo.” Bilang resulta, say diparan ya “In God We Trust” so inmunan pinmaway ed inusar a sinsilyo na E.U. nen 1864.
^ par. 7 Say kapagaan ya adeskribe dia et nikuan a “takot ya atekepan na panagpaga, a mangekal ed amin a gayaga ed bilay.” Inkuan na arum a patalos ya “agmanpapaga” odino “agmanaaburido.” Balet saratan a patalos so mankabaliksan ya agtayo nepeg ya onggapon manpaga odino manaburido. Oniay ibabaga na sakey a reperensya: “Say Griegon verb tense so walad kaplesan ya imperative, a mankabaliksan na sakey a ganggan ya ontundan manggawa ed bengatlan peles lan nagagawa.”
^ par. 9 Nia so waloran punto: (1) Agnatataranta; (2) manisip a positibo; (3) onadapta ed balo iran klase na trabaho; (4) manbilay unong ed walan pakasarag yo—ya agmiaalig ed arum; (5) manalwar ed otang; (6) pansiansiaen a nankakasakey so pamilya; (7) pansiansiaen yo so dilin-respeto yo; tan (8) manbadyet.
^ par. 13 Sarayan dyurnal a nibase ed Biblia so agmangirerekomenda odino mangiyaalibansa na antokaman a medikal a panagtambal, a bibidbiren na saratan a personal itan a desisyon. Imbes, saray artikulon manisingbat ed espisipiko iran sakit odino liliknaen so niganan mangiter na impormasyon ed saray managbasa nipaakar ed saray katuaan unong ed kaplesan a pakaamta ed saratan.
Kasin Natandaan Yo?
• Sano nidunget itayo ed saray problema ed panagbilay, diad antoran dalan a nipatnag tayo so panagmatalek ed si Jehova?
• Panon tayon nipatnag so panagmatalek ed Dios sano nagogonigon itayo ed saray problema ed bunigas?
• Sano mansiasiansia ni so kakapuyan na laman, panon tayon nipatnag a talagan manmamatalek itayo ed si Jehova?
[Tepetepet Parad Panagaral]
[Kahon ed Pahina 17]
Kasin Natandaan Yo Irayan Artikulo?
Sano nagogonigon itayo lapud saray angat ed bunigas tayo, makapaseseg a basaen so nipaakar ed arum ya indibidual ya akatalona ed saray liliknaen, sakisakit, odino depekto ed laman da. Walad leksab iray pigaran artikulo a nipalapag ed saray magasin a Panag-Bantayan tan Awake!
Say artikulon “Coping With My Weaknesses” so akasentro ed panalona ed negatibon panag-isip tan depresyon.—The Watchtower, Mayo 1, 1990.
“Not Even an Iron Lung Could Stop Her Preaching.”—Awake!, Enero 22, 1993.
Say artikulon “A Bullet Changed My Life” so angiyapasakey ed no panon so pansungdo ed inka-paralitiko.—Awake!, Oktubre 22, 1995.
Say artikulon “You Do Not Know What Your Life Will Be Tomorrow” so aningbat ed bipolar mood disorder.—The Watchtower, Disyembre 1, 2000.
Inyapasakey na artikulon “Loida’s Journey out of Silence” so nipaakar ed panalona ed cerebral palsy.—Awake!, Mayo 8, 2000.
“My Struggle With Endometriosis.”—Awake!, Hulyo 22, 2000.
“My Fight With Scleroderma.”—Awake!, Agosto 8, 2001.
“I Won My Battle With Postpartum Depression.”—Awake!, Hulyo 22, 2002.
[Litrato ed pahina 15]
No naandian itayo na trabaho, makabat so panusisa tayo lamet ed estilo na kabibilay tayo
[Litrato ed pahina 16]
Ipapabitar na istorya na bilay nen Loida a makatulong so panagmatalek ed si Jehova pian makapansungdo so sakey. (Nengnengen so kahon ed pahina 17)
[Litrato ed pahina 18]
Nakaukolan ya agtayo ombabaing ya onkerew na tulong pian natalonaan tayo iray kakapuyan tayo