Tepetepet Manlapud Saray Managbasa

Diad dakel a parte na mundo, akaugalian la so pangiter na saray regalo ed saray mankasal. Antoran Makasulatan a prinsipyo so kaukolan nin ikonsidera tayo sano mangiter odino mangawat itayo na ontan iran regalo?

Aabobonan na Biblia so pangiter na regalo sano gawaen itan tekep na dugan motibo tan diad dugan okasyon. Nipaakar ed panangiter, papasesegen na Biblia iray tuan Kristiano a mangalig ed mabunlok a Manangitarya ra, si Jehova. (Santiago 1:17) Pinaseseg nen apostol Pablo iray kaparan Kristiano: “Agyo lingwanan so panaggawa na maabig tan say pannanabang: ta say Dios napaliket a maong ed sarayan bagat.” Kanian, napapaseseg iray Kristiano a magmaliw a mabunlok.​—Hebreos 13:16; Lucas 6:38.

Komusta balet so panangusar na gift registry, a kaslakan a kustombre diad Estados Unidos? Diad Inglatera, satan so tatawagen a wedding list. Say kaslakan a gagawaen na saramay magano lan mankasal et manpalista ira diad sakey a department store pian mannengneng ira na sasaliwen tan ilista da iramay labay dan naawat a regalo. Diad imbitasyon a naawat na saray kakanayon tan kakaaro na mankasal et nisuheri diman ya onla ira ed matukoy a lakoan a panaliwan da ed regalo ya inlista ed registry na saray mankasal. Diad praktikal a punto de bista, say listaan ed gift-registry so mamainawa ed manregalo ya agla nabayagan a mannengneng na iregalo to, tan saray pangiregaloan so agla nairapan a mangipawil ed saray agda nakaukolan a regalo diad analiwan.

No bilang ta kaliktan na saray mankasal so mangusar na gift registry, satan so personal a desisyon. Balet, manalwar komon so sakey a Kristiano pian napaliisan so antokaman ya agagamil a nayarin manumlang ed saray prinsipyo na Biblia. Singa bilang, panon to no say nilista na saray mankasal et saramay mabmabli? Diad satan a kipapasen, nayarin agla makapanregalo iramay limitado so badyet da, odino liknaen dan magmaong la so agpangawat ed imbitasyon ya onatendi ed kasal ta pian agla ira nabaingan no mamura so iregalo da. Oniay insulat na sakey a Kristianon bii: “Makapabelat labat itan. Nanggunaetan koy magmaliw a mabunlok, balet diad kaunoran et naandi ya amin so liket ko ed panangiter.” Agaylan makapaermen no say kasal so pansengegan na pakadismaya!

On, kaukolan ya agnalikna na saray manregalo a pian magmaliw labat a makapaliket so regalo ra et nepeg a saliwen itan diad sakey a lakoan odino ompetek itan ed saray insuheri a presyo. Tutal, impabitar nen Jesu-Kristo a say sankablian ed imaton na Dios et say awawey na puso na manangiter, aliwan say materyal a kablian na regalo. (Lucas 21:1-4) Mipadpara, nipaakar ed panamayabol ed saray mankaukolan, oniay insulat nen apostol Pablo: “Balang sakey gawaen to komon so ginetma to ed puso to; aliwa a dia ed kaermenan odino dia ed pasootan; ta say Dios aroen to so sililiket a mangiter.”​—2 Corinto 9:7.

No ibase ed Biblia, aliwan makapuy so pangipabidbir a sika so angiregalo, a nayarin diad pangilaktip na nota ed regalo. Balet, diad arum a lugar, akaugalian la ya ipakabat ed amin ya inmatendi so nanregalo. Sayan kustombre so nayarin pansengegan na saray problema. Nayarin aglabay na saramay nanregalo ya ipakabat ira ta pian napaliisan so agmanepeg a pangirayew ed sikara. Saratan ya indibidual so onkikiwas unong ed prinsipyo a naromog ed Mateo 6:3, ya onia so inkuan nen Jesus: “Ingen bangno mamayabol ka, agkomon nakabatay limam a kawigi so gawaey limam a kawanan.” Momoriaen na arum a say panangiter na regalo et personal a pamaakaran a nepeg a mansiansian maamot ed baetan na manangiter tan say mangawat. Sakey ni, no ipakabat iray angiter, nayarin sikaray mankokomparaan ed saray regalo ra, a “pansengegan na panlalaslasan.” (Galacia 5:26, NW) Maseguron kaliktan na saray Kristiano ya agnapaermen odino nabaingan so siopaman diad mapublikon pangipakabat ed kangaranan na saray angiter.​—1 Pedro 3:8.

On, diad ikiwas unong ed saray prinsipyo a naromog ed Salitay Dios, say pangiter na regalo so lawas makapaliket.​—Gawa 20:35.