Akin a Nepeg Itayon Manpikasi ya Andi-tunda?

“Mikasi kayo ya andi-tunda; dia ed amin a bengatla misalamat kayo.”​—1 TESALONICA 5:17, 18.

1, 2. Panon ya impatnag nen Daniel a pinabli to so pribilehyo a pikakasi, tan anto so epekto na satan ed relasyon to ed Dios?

 NIYUGALI la nen propetan Daniel so manpikasi ed Dios a mamitlo ed sanagew. Sikato so ontalimukor ed petek na bintana na silir to a walad atep, ya akaarap ed syudad na Jerusalem, insan manpikasi. (1 Arari 8:46-49; Daniel 6:10) Si Daniel so agbalot sinmaew ya anggan aminsan anggaman ed ganggan na ari a mangisesebel ed pampikasi ed siopaman nilikud ed si Dario, ya ari na Medo. Balanglan ameligro itan ed bilay to odino andi, sayan mapikasin too so andi-tundan inmey-ey ed si Jehova.

² Panon so impanmoria nen Jehova ed si Daniel? Sanen sinmabi si anghel Gabriel pian ebatan so sakey ed saray pikakasi nen Daniel, deneskribe to so propeta bilang ‘say aaroen na baleg.’ (Daniel 9:20-23) Diad propesiya nen Ezequiel, tinukoy nen Jehova si Daniel bilang matunong a too. (Ezequiel 14:14, 20) Legan na impanbilay to, saray pikakasi nen Daniel so mapatnag a nanresulta ed maapit a relasyon to ed Dios, a binidbir ni ingen nen Dario.​—Daniel 6:16.

3. Unong ed eksperiensya na sakey a misionaryo, panon itayon natulongan na pikakasi pian napansiansia tayo so integridad tayo?

³ Say naynay a pampikasi so ontulong met ed sikatayon mangarap ed mairap iran subok. Alimbawa, konsideraen so kipapasen nen Harold King, sakey a misionaryo ed Tsina ya asentensiaan na limay taon ed bartolina. Nipaakar ed naeksperiensya to, oniay inkuan nen Brother King: “Nayarin nisian ak ed kaparak a totoo, balet anggapoy  makapangisian ed siak ed Dios. . . . Kanian, anggano sankanengneng ak na siopaman a nayarin ondalan ed seldak, mamitlo ak ya ontalimukor ed sanagew tan maksil a manpikasi, a nonodnonoten ko si Daniel, a sinaglawi na Biblia. . . . Ompatnag a diad saratan a kipapasen et impaarap na espiritu na Dios so nonot ko ed makagunggonan tuloy iran pamaakaran tan inikdan to ak na kalmadon liknaan. Talagan espiritual a biskeg tan ligliwa so impagamor ed siak na pikakasi!”

4. Antoran tepet nipaakar ed pikakasi so konsideraen tayo ed sayan artikulo?

⁴ Ibabaga na Biblia: “Mikasi kayo ya andi-tunda; dia ed amin a bengatla misalamat kayo.” (1 Tesalonica 5:17, 18) Unong ed sayan simbawa, konsideraen tayo so onggendan iran tepet: Akin a nepeg tayon imanoen a maong so kalidad na saray pikakasi tayo? Antoray rason pian maparanay itayon onasingger ed si Jehova? Tan anto so nepeg tayon gawaen no liknaen tayo ya ag-itayo makanepegan a manpikasi ed Dios lapud saray kakulangan tayo?

Paeleten so Pikakaaro Panamegley na Pikakasi

5. Anton nikadkaduman pikakaaro so panggayagaan tayo diad pikakasi?

⁵ Labay yo kasin ipasen kayo nen Jehova bilang kaaro to? Tinukoy to so patriarkan si Abraham bilang ontan. (Isaias 41:8; Santiago 2:23) Labay nen Jehova a bayuboan tayo so ontan a nengneng na relasyon ed sikato. Sikato so peteg a manatangguyor ed sikatayo ya onapit ed sikato. (Santiago 4:8) Agta nepeg ya ipamorekdek na satan ya imbitasyon ed sikatayo so nikadkaduman probisyon na pikakasi? Agaylan irap so pakapitongtong ed sakey ya importantin opisyal na gobierno, kanian mas mairap so pakapikaaro ed sikato! Ingen, papasesegen itayo na Manamalsa na uniberso a sikatoy mabulos ya asinggeran diad pikakasi, kapiganman a labay tayo odino nakaukolan tayon gawaen itan. (Salmo 37:5) Saray andi-tundan pikakasi tayo so ontulong ed sikatayo pian nawalaan na maapit a pikakaaro ed si Jehova.

6. Anto so ibabangat ed sikatayo na ehemplo nen Jesus nipaakar ed pankaukolan a ‘mantultuloy a manpikasi’?

⁶ Balet, agaylan inomay a nibaliwala tayo so pikakasi! Say pangarap labat ed saray desdes ed inagew-agew a panagbilay so mangala lay dakel ya imano tayo, diad ontan et agtayo la panggunaetan so mitongtong ed Dios. Pinaseseg nen Jesus iray babangatan to a ‘mantultuloy a manpikasi,’ tan ontan so ginawa ton mismo. (Mateo 26:41) Anggaman sikatoy naynay ya okupado manlapud kabuasan anggad labi, impanaon to so mitongtong ed mangatatawen ya Ama to. No maminsan, si Jesus so ombangon “diad kaimbuasan, ed palbangon,” ta pian manpikasi. (Marcos 1:35) Diad sananey niran inkagawa, sikato so nampainawa ed sakey a  mareen a pasen kayari na sanagew ta pian manpikasi ed si Jehova. (Mateo 14:23) Lawas impanaon nen Jesus so pampikasi, kanian ontan met so nepeg tayon gawaen.​—1 Pedro 2:21.

7. Diad antoran kipapasen a napakiwas itayon mitongtong ed mangatatawen ya Ama tayo diad inagew-agew?

⁷ Dakel so matukoy iran panaon parad pribadon panagpikasi diad kada agew sano nipapaarap itayo ed saray problema, nidudunget ed saray tukso, tan sano manggagawa itayo na saray desisyon. (Efeso 6:18) Sano lawas itayon paigiya ed Dios diad amin ya aspekto na bilay, seguradon ombulaslas so pikakaaro tayo ed sikato. No say duaran sankaaro so saniban mangarap ed saray problema, agta lalon onelet so impankaaro ra? (Uliran 17:17) Tua met itan sano mandependi itayo ed si Jehova tan naeksperiensya tayo so tulong to.​—2 Awaran 14:11.

8. Unong ed saray ehemplo nen Nehemias, Jesus, tan si Ana, anto so naaralan tayo ed karukey na saray personal a pikakasi tayo?

⁸ Agaylan liket tayo ta agpepegetan na Dios so karukey odino kabetbet na pakapitongtong tayo ed sikato diad pikakasi! Si Nehemias so tampol ya angibalikas na mareen a pikakasi sakbay a kinmerew na pabor ed ari na Persia. (Nehemias 2:4, 5) Si Jesus so nampikasi met na antikey sanen sikatoy kinmerew ed si Jehova na pakayari a mamaoli ed si Lazaro. (Juan 11:41, 42) Diad biek a dapag, si Ana so ‘nantultuloy ya akikasi ed arap nen Jehova’ sanen imbesngaw to ed si Jehova so walad puso to. (1 Samuel 1:12, 15, 16) Saray personal a pikakasi tayo so nayarin antikey odino andukey unong ed pankaukolan tan saray kipapasen.

9. Akin a nepeg tayon ilaktip ed saray pikakasi tayo so panangidayew tan pisasalamat ed amin a gagawaen nen Jehova ed sikatayo?

⁹ Dakel a pikakasi ed Biblia so angibalikas na masimoon ya apresasyon ed supremon posisyon nen Jehova tan ed makapakelaw iran gawa to. (Exodo 15:1-19; 1 Awaran 16:7-36; Salmo 145) Diad sakey a pasingawey, anengneng nen apostol Juan so 24 a mamatatken​—say kompleton bilang na saray alanaan a Kristiano diad mangatatawen a posisyon da​—a mangidadayew ed si Jehova, a kuanda: “Sika so manepeg, Katawan mi tan Dios mi, a mangawat na gloria tan dayew tan pakayari: ta sika pinalsam so lapag a bengatla, tan lapu ed linawam wala ra tan sikara so apalsa.” (Apocalipsis 4:10, 11) Walaan itayo met na rason pian maparanay tayon idayew so Manamalsa. Agaylay liket na atateng sano impapuson misalamat ed sikara so anak da lapud bengatlan ginawa ra ed sikato! Say maapresyan panmolimoli ed saray kaabigan nen Jehova tan pangibalikas ed masimoon a pisasalamat tayo ed saratan so maabig a paraan pian napaaligwas tayo so kalidad na saray pikakasi tayo.

Akin a ‘Manpikasin Andi-Tunda’?

10. Anto so betang na pikakasi diad ibiskeg na pananisia tayo?

¹⁰ Say maparanay a pikakasi so makana ed  pananisia tayo. Kayari ton inyilustra so pankaukolan a ‘lawas manpikasi, tan agkomon napunaw,’ oniay intepet nen Jesus: “Sano onla dia so Anak na too, makaromog kasi na pananisia ed dalin?” (Lucas 18:1-8) Say masimoon tan impapuson pikakasi so mamabiskeg na pananisia. Sanen masiken la so patriarkan si Abraham balet ta agto ni akapanilalak, intongtong to itan ed Dios. Bilang ebat, kinerew ed sikato nen Jehova ya ontangay ed katawenan tan bilangen to iray bibitewen, no sarag to. Insan oniay impaseguro lamet na Dios ed si Abraham: “Ontan so ilalak mo naani.” Say resulta? Si Abraham “so anisia ed Jehova; tan imbilang to ed sikato a katunongan.” (Genesis 15:5, 6) No lukasan tayo so kapusoan tayo ed si Jehova diad pikakasi, awaten iray panamaseguro to manlapud Biblia, tan sikatoy unoren tayo, pabiskegen to so pananisia tayo.

11. Panon itayon natulongan na pikakasi a mangarap ed saray problema?

¹¹ Say pikakasi so ontulong met ed sikatayo a mangarap ed saray problema. Kasin makapabelat la so panagbilay tayo ed inagew-agew tan mairap lan sungdoan iray kipapasen? Oniay ibabaga ed sikatayo na Biblia: “Paawit mo ed Jehova so awit mo, et sikato bembenan to ka: agton balot paulyan so matunong a natentenyeg.” (Salmo 55:22) Sano nipaarap itayo ed saray mairap a dedesisyonan, naalig tayo so ehemplo nen Jesus. Sikato so sanlabin nampikasi a bukor sakbay ton tinuro so 12 apostoles to. (Lucas 6:12-16) Tan diad samay labi sakbay na impatey to, si Jesus so pirmin nampikasi a “say linge’to singa angkakabaleg a tedter na dala a sinmaklayat angga ed dalin.” (Lucas 22:44) Anto so resulta? “Sikato so nadngel lapud masanton panaglikas to.” (Hebreos 5:7) Saray masimoon tan andi-tundan pikakasi tayo so ontulong pian natalonaan tayo iray makapagonigon a kipapasen tan mairap iran subok.

12. Panon ya iyilustra na pikakasi so personal ya interes nen Jehova ed sikatayo?

¹² Say sakey nin rason pian onapit itayo ed si Jehova diad pikakasi et lapud sikato so onapit met ed sikatayo. (Santiago 4:8) Sano lukasan tayo so kapusoan tayo ed si Jehova diad pikakasi, agta natetebek tayo a sikatoy interesado ed saray pankaukolan tayo tan sikato so mangiyaansakit ed sikatayo? Naeksperiensya tayon mismo so panangaro na Dios. Ag-impulin nen Jehova ed siopaman so responsabilidad ya ondengel ed kada pikakasi ed sikato na saray lingkor to bilang mangatatawen ya Ama ra. (Salmo 66:19, 20; Lucas 11:2) Tan iimbitaan to itayon ‘imatalek ya amin ed sikato so kapagaan tayo ta sikato asikasoen to tayo.’​—1 Pedro 5:6, 7.

13, 14. Antoray rason tayo no akin ya andi-tunda itayon manpikasi?

¹³ Say pikakasi so mamakiwas ed sikatayo a magmaliw a mas maseseg parad mapublikon ministeryo tan napabiskeg itayo sano singa labay tayo lay ontunda lapud agpananginunang odino isusumpa. (Gawa 4:23-31) Ontulong met ed sikatayo so pikakasi sumpad ‘saray kalot na Diablo.’ (Efeso 6:11, 17, 18) Sano mipupuligesgesan a manalona ed saray inagew-agew a subok, naynay itayon makapanpikasi ed Dios pian pabiskegen to itayo. Say modelon pikakasi nen Jesus so mangilaktip ed kerew ya “ilaban [itayo nen Jehova] ed mauges,” si Satanas a Diablo.​—Mateo 6:13.

¹⁴ No mantultuloy itayon onkerew na tulong panamegley na pikakasi pian nakontrol tayo iray makasalanan a tendensia tayo, naeksperiensya tayo so pananulong nen Jehova. Walaan itayo na onian panamaseguro: “Say Dios matoor, ta agto kayo paulyan a natukso na onlabas ed nayarian yo; noag ingen pati tukso, manggawa met na dalan a paliisan, ta pian nayarian yo ya itepel.” (1 Corinto 10:13) Naeksperiensyan mismo nen apostol Pablo so makapabiskeg a panangiyansakit nen Jehova ed nanduruman tuloy a kipapasen. Oniay inkuanto: “Nayarian ko a gawaen so ganagana ed saman so mamabiskeg ed siak.”​—Filipos 4:13; 2 Corinto 11:23-29.

Manpeleng ed Pikakasi Anggaman ed Saray Kakulangan

15. Anto so nayarin nagawa sano asumlang tayo iray estandarte na Dios?

¹⁵ Pian narengel iray pikakasi tayo, agtayo nepeg ya ipulisay so simbawa na Salitay Dios. “[Antokaman a] kerewen tayo nagamoran tayo ed sikato,” so insulat nen apostol Juan, “ta sumpalen tayo so saray ganggan to, tan gawaen tayo so bengatla a makapaliket ed imaton to.” (1 Juan 3:22) Balet, anto so nayarin nagawa sano asumlang tayo iray estandarte na Dios? Inmamot si Adan tan Eva kayari na impankasalanan da diad hardin na Eden. Nayarin liknaen tayo met a labay tayoy onamot “manlapud lupa nen Jehova” tan ontunda lan manpikasi. (Genesis 3:8, NW) “Mabetbet kon naiimano a say manunan akalingoan na saramay kinmasipa ed si Jehova tan ed organisasyon to et say intunda ran manpikasi,” so inkuan nen Klaus, sakey ya eksperiensyadon managbiahen manangasikaso. (Hebreos 2:1) Ontan so kipapasen nen José Ángel. Inkuanto: “Diad loob na ngalngali waloy taon, mataltalag ak lan manpikasi ed si Jehova. Liknaen kon agak manepeg a mitongtong ed sikato, anggaman sikatoy ipapasen ko nin siansia bilang say mangatatawen ya Amak.”

16, 17. Mangiter na saray alimbawa ed no panon a makatulong ed sikatayo so naynay a pampikasi pian natalonaan so kaleteyan ed espiritual.

¹⁶ Nayarin liknaen na arum ed sikatayo ya agtayo la manepeg a manpikasi lapud kaleteyan tayo ed espiritual odino lapud naplag itayo ed gawan-mauges. Balet saya so matukotukoy a panaon a nakaukolan tayon anamoten so probisyon na pikakasi. Imbatikan nen Jonas so asainmin to. Balet ‘sikato so tinmawag ed si Jehova lapu ed kairapan to, et sikatoy inebatan To, dia ed eges na Sheol, tinmawag si Jonas, et dinengel nen Jehova so boses to.’ (Jonas 2:2) Nampikasi si Jonas, inebatan nen Jehova so pikakasi to, tan si Jonas so inmabig ed espiritual.

¹⁷ Si José Ángel so masimoon met a nampikasi parad tulong. Oniay nanonotan to: “Imbesngaw koy walad pusok tan kinmerew ak na panamerdona na Dios. Tan talagan tinulongan to ak. Agak seguro makapawil ed katuaan no agmakasengeg ed tulong na pikakasi. Maparanay ak la natan a manpipikasi diad inagew-agew, tan pipirawaten ko iratan a pankanawnawa.” Nepeg a lawas itayon mabulos a mitongtong ed Dios nipaakar ed saray inkalingoan tayo tan mapaabeban onkerew na panamerdona to. Sanen impatua nen Arin  David iray impakaluksoan to, pinerdona nen Jehova iray kasalanan to. (Salmo 32:3-5) Kaliktan nen Jehova so ontulong ed sikatayo, aliwan mangondena ed sikatayo. (1 Juan 3:19, 20) Tan saray pikakasi na mamasiken ed kongregasyon so ontulong ed sikatayo diad espiritual a paraan, lapud saray pikakasi ra et ‘nagkalalon mapuersa.’​—Santiago 5:13-16, NW.

18. Anto so napankompiyansaan na saray lingkor na Dios anggan panon lay inkasipa ra?

¹⁸ Wala ta so ama a mangipulisay ed ilalak to a mapaabeban onkekerew ed sikato na tulong tan bilin kayari na impakalingoan to? Ipapabitar na parabolo na managdarak ya anak ya anggan panon lay inkasipa tayo, say mangatatawen ya Ama tayo so maliket sano ompawil itayo ed sikato. (Lucas 15:21, 22, 32) Papasesegen nen Jehova so amin a nankasalanan ya ontawag ira ed sikato, ‘ta sikato so mamerdona na daakan.’ (Isaias 55:6, 7) Anggaman akagawa si David na pigaran ambelat a kasalanan, sikatoy tinmawag ed si Jehova, a kuanto: “Talineng mo so pikakasik, O Dios; tan agmo yaamotan so pankerew ko.” Oniay inkuanto ni: “Dia ed labi tan kabuasan, tan dia ed pegley-agew mandalem ak, tan onakis ak na maksil; et denglen [nen Jehova] so boses ko.” (Salmo 55:1, 17) Agaylan panamaseguro!

19. Akin ya agtayo nepeg ya ibaga a saray pikakasi tayo so agnaeebatan lapud ag-iratan aabobonan na Dios?

¹⁹ Panon to no agnaebatan a tampol so pikakasi tayo? Nepeg tayo sirin a seguroen a mitunosan iray kerew tayo ed linawa nen Jehova tan nepeg ya ikerew itan diad ngaran nen Jesus. (Juan 16:23; 1 Juan 5:14) Tinukoy nen babangatan a Santiago so arum a Kristiano ya agnaeebatan iray pikakasi ra “lapu ed mauges so ikekerew” da. (Santiago 4:3) Diad biek a dapag, agtayo bengatbengat ya ibabaga ya agnanaebatan iray pikakasi tayo lapud ag-iratan aabobonan na Dios. No maminsan et iyaabuloy nen Jehova a mantultuloy nin ipikasi na saray matoor a mandadayew ed sikato so sakey a bengatla sakbay a napatnagan so ebat to. “Mankerew kayo, et naikdan kayo,” so inkuan nen Jesus. (Mateo 7:7) Kanian, nakaukolan tayo so “mansiansia a malet ed pikakasi.”​—Roma 12:12.

Naynay a Manpikasi

20, 21. (a) Akin a nakaukolan tayo so manpikasin andi-tunda diad sarayan “kaunoran ya agew”? (b) Anto so nagamoran tayo sano inagew-agew itayon onasingger ed trono na agkanepegan a panangasi nen Jehova?

²⁰ Saray pakadesdesan tan problema so ompapalalo ed sarayan “kaunoran ya agew,” a pakatandaan na ‘maatap iran panaon [a mairap a pidenengan].’ (2 Timoteo 3:1) Tan saray subok so mainomay a mangokupa ed kanonotan tayo. Balet, say andi-tundan pikakasi tayo so ontulong ed sikatayo pian niyapasakey iray espiritual a bengatla anggaman agnaandi iray problema, tukso, tan pakadismayaan. Saray inagew-agew a pikakasi tayo ed si Jehova so makapangitarya na importantin tulong a nakaukolan tayo.

²¹ Si Jehova, say ‘Dumerengel na pikakasi,’ so agbalot magmaliw ya okupado ya ontalineng ed sikatayo. (Salmo 65:2) Agtayon balot komon magmamaliw ya okupado a mitongtong ed sikato. Say pikakaaro tayo ed Dios so sankamablian a kayarian tayo. Agtayon balot komon leleglemewen itan. “Onsingger itayo sirin a mailalo ed trono na grasya pian makagamor itayo na panangasi, tan makalmo itayo na grasya, pian natulongan to itayo sano panaon a kinepeg to.”​—Hebreos 4:16.

 Panon Yon Ebatan?

• Anto so naaralan tayo ed si propetan Daniel nipaakar ed kaimportantian na pikakasi?

• Panon tayon napaelet so pikakaaro tayo ed si Jehova?

• Akin a nepeg itayon manpikasi ya andi-tunda?

• Akin a say liknaan na pagmaliw ya agmakanepegan so agnepeg a mangamper ed sikatayo diad pampikasi ed si Jehova?

[Tepetepet Parad Panagaral]

[Litrato ed pahina 16]

Si Nehemias so angibesngaw na antikey tan mareen a pikakasi sakbay ya akitongtong ed ari

[Litrato ed pahina 17]

Si Ana so ‘nantultuloy ya akikasi ed si Jehova’

[Saray litrato ed pahina 18]

Sanlabin nampikasi si Jesus sakbay ton tinuro so 12 apostol to

[Saray litrato ed pahina 20]

Dakel so pankanawnawa tayon manpikasi ed loob na sanagew