No Panon Mon Napaelet so Panamaley Yo

ILITRATOM pa’d nonot mo so sakey ya abung a nadederal la. Nababakbak la so pinta, naaaknit la so atep, tan agmet la naaasikaso so sular. Mapatnag ya ontan lay nagmaliwan na abung lapud nadadalan itan na maksil iran bagyo diad ilalabas na saray taon, tan pinaulyanan la itan. Kasin kaukolan lan igeba itan? Andi. No malet so pundasyon tan manal-alagey ni, nayarin naapiger ni so abung.

Kasin mipara ed panamaley yo so kipapasen na satan ya abung? Diad ilalabas na saray taon, saray maksil a bagyo, a singa panangibaga, so manederal ed relasyon yon sanasawa. Nayarin say sakey ed sikayo odino sikayon dua so mangibabaliwala la ed panamaley yo. Nayarin walaan kayo na liknaan a singa ed si Sandy. Kayari na 15 taon ya impikasamento to, oniay inkuanto: “Anggapo la so bengatlan pampaknaan mi noag say impanasawa mi. Tan aliwan magenap itan.”

Anggano ontan lay kipapasen na panamaley yo, ag-ibabagan tampol a nakaukolan yo lay mansian. Maseguron naapiger ni so panamaley yo. Mandependin tuloy itan ed determinasyon yon sanasawa a nanpansiansia so panamaley yo. Makatulong so pakawalaan na ontan a determinasyon tan pilalek pian magmaliw a maligen so panamaley diad panaon na subok. Panon kayon natulongan na Biblia pian napaelet itan a determinasyon tan pilalek?

Say Sipanan so Mangilalanor na Obligasyon

Say sipanan (commitment) et manutukoy ed kipapasen na pagmaliw ya obligado odino papaskaren na liknaan. No maminsan et onaaplika itan ed sakey a bengatla ya aliwan personal, a singa say paknaan ed negosyo. Alimbawa, nayarin liknaen na managpaalagey a sikatoy obligadon manumpal ed saray kakaukolanen na pinirmaan ton kontrata a pangipaalagey na sakey ya abung. Nayarin agto kabat a personal so toon manpapagawa. Siansia ni, sikatoy obligadon manumpal ed insipan to.

Anggaman say panangasawa et aliwan transaksion ed negosyo, kabiangan ed ontan a sipanan so pakawalaan na obligasyon. Maseguron masimoon kayon sanasawa a nansipanan ed arapan na Dios tan too a maniba kayo lawas, antokaman so nagawa. Oniay inkuan nen Jesus: ‘Say amalsa ed [laki tan bii] nanlapu ed gapo ginawa  to ra a laki tan bii tan inkuan to, Lapud saya say laki taynan to naani so ama tan ina to, tan ontipon naani ed asawa to.’ Inyarum nen Jesus: “Say impantipon na Dios sirin, aleg a sianen na too.” (Mateo 19:4-6) Sirin, sano onlesa iray problema, nepeg a determinado kayon sanasawa a manumpal ed sipanan yo. * Oniay inkuan na sakey ya asawan bii: “Diad saman labat apaabig iray bengatla sanen agmi la ninonot so pansian.”

Balet, wala ni so nalalanor ed sipanan na sanasawa nilikud ed obligasyon. Anto itan?

Say Pankimey a Saniba so Mamaelet ed Sipanan na Sanasawa

Agto kabaliksan a no nansipanan la so sanasawa et lawas laran makapanpaknaan. Sano linmesay kolkolan, nepeg a panggunaetan a resolbien so pamaakaran aliwa labat a lapud sinambaan a sipan noagta lapud inkasaksakey na liknaan. Nipaakar ed asawan laki tan bii, oniay inkuan nen Jesus: “Aliwa la ran duara, noag saksakey a laman.”

Antoy kabaliksan na pagmaliw yon sanasawa a “saksakey a laman”? Insulat nen apostol Pablo a ‘nepeg ya aroen na saray asawan lalaki so kaasawaan da a singa laman dan dili.’ (Efeso 5:28, 29) Diad ontan, bilang “saksakey a laman” et mankabaliksan itan a manpaga ka ed pankaabigan na asawam a singa pampapagam ed dilin pankaabigan mo. Kaukolan lan umanen na saray sanasawa so panagnonot da, a say “siak” et magmaliw lan “sikata.” Oniay insulat na sakey a managkonseho: “Nepeg ya agla nonoten tan liknaen na sanasawa a singano mansusulo ni ra, noagta nonoten tan liknaen da a de-asawa lara.”

Kasin nononoten tan liliknaen yon sanasawa a de-asawa kayo la? Posibli so pakapan-iba diad loob na dakel a taon tan ingen et agmagmaliw a petepeteg a “saksakey a laman.” On, posibli itan, balet oniay ibabaga na libron Giving Time a Chance: “Say panamaley et mankabaliksay pambilay a sankaiba, tan no naynay a mankaiba so duaran too, lalon onaligwas so panamaley da.”

Walaray agmaliket a sanasawa a maniiba labat nisesengeg ed ananak da odino parad seguridad ed pinansyal. Arum so manaanos lapud walaan iray mabiskeg a prinsipyo ed moral ya agmansian odino tatakotan da no anto so isipen na arum no mansian ira. Bangta nakomendaan so pambabayag na oniaran panamaley, tandaan a say kalat yo et say pakawalaan na maaron siglaotan, aliwan say basta agpakapansian.

Napaelet so Sipanan na Sanasawa Panamegley na Agsinisiblet Iran Kiwas

Impasakbay na Biblia a diad “kaunoran iran agew,” saray totoo so magmaliw a “maaro ed  inkasikaran dili.” (2 Timoteo 3:1, 2, NW) Unong ed impasakbay na satan a propesiya, ompatnag a nipupurek natan so pirmin panangirayew ed dili. Diad karaklan a panamaley, say pangisakripisyo na inkasika ya anggapoy iilaloan a bales et sakey a tanda na kakapuyan. Balet, diad sakey a mabiskeg a panamaley, say sanasawa so parehon mangipapatnag na dilin-panagsakripisyon awawey. Panon mon nipatnag so ontan?

Imbes a naynay ya itepet so, ‘Anto so nagunggonak ed sayan relasyon?’ oniay itepet mo ed inkasika, ‘Antoy gagawaen ko a mismo pian napaelet so panamaley ko?’ Ibabaga na Biblia a saray Kristiano so nepeg ya ‘ag-onnengneng ed kayarian dan dili, noag balang sakey ed sikara nengnengen to met iray bengatlan kayarian na arum.’ (Filipos 2:4) Legan mon momotekteken iyan prinsipyo na Biblia, analisaen iray inkiwas mo ed apalabas a simba. Panon kabetbet so impanggawam na kaabigan ya akagunggonaan a mismo na asawam? Sanen kinaliktan na asawam so mansalita, kasin tinmalineng ka​—anggaman agmo labay komon so ondengel? Pigaran aktibidad so akibiangan mo a mas nanliketan na asawam nen say sika?

Legan mon aanalisaen iratan a tepet, agmo nononoten ya agnaimano odino agnatumangan iray maong a ginawam. “Diad maslak a relasyon,” kuan na sakey a reperensya, “say positibon awawey so balesan met na awawey a positibo, kanian gawam so anggaay nayarian mon sagyaten so kapareham a manugali na positibo diad panugalim na lalon positibo.” Saray dilin-panagsakripisyom so mamaelet na panamaley yo lapud ipapatnag na saratan a papablien tan kaliktan mon mansiansia so panamaley yo.

Makanan Moriaen a Permanente so Panamaley

Papablien nen Jehova a Dios so katooran. On, oniay ibabaga na Biblia: “Dia ed sakey a matoor et onkiwas ka [Jehova] ed katooran.” (2 Samuel 22:26, NW) Lalanoren na pansiasiansian matoor ed Dios so pansiansian matoor ed inletneg ton uksoyan ed panangasawa.​—Genesis 2:24.

No sikayon sanasawa so matoor ed sakey tan sakey, napanggayagaan yo so inkapermanenti na impankasakey yo. Sano nononoten yo so nipaakar ed arapen iran bulan, taon, tan dekada, nilitrato yo ed nonot yo a sankaiba kayo nin siansia. Agyon balot nanonotan a singa agkayo sanasawa, tan say onian panmoria so mamaligen ed relasyon yo. Oniay inkuan na sakey ya asawan bii: “Anggan sano makakapasnok ak lan maong [ed asawak] tan nadidismaya ak lan maong ed nagagawa ed sikami, agko nononoten a mansian kami la. Say nononoten ko et no panon a nipawil so datin relasyon mi. Nasesegurok a nipawil mi imay dati​—anggaman diad saman a bekta et agko ni amta no panon min gawaen itan.”

Say panmoria a permanente so panamaley so makanan kabiangan ed pisisipanan ed asawa, ingen makapaermen ta ag-itan nononoten na dakel a sanasawa. Legan a maneebatan, nayarin oniay ibelyaw na sakey, “Taynanan ta ka la!” odino “Mananap ak lay sananey a peteg a mamapabli ed siak!” Tua, mabetbet ya agtotooren  iratan a salita. Balet, ipapaimano na Biblia a say dila so nayarin “napno na ditan makapatey.” (Santiago 3:8) Saray panamagyaw tan ultimatum et singa la pangibabagan: ‘Agko momoriaen a permanenti so panamaley mi. Nayarian koy ontaynan anggan kapigan.’ Say pangipasagilig na ontan a bengatla so makaderal ed sakey a panamaley.

No momoriaen mon permanente so panamaley yo, ilaloan mon kaibam so asawam diad amin ya irap tan babeng. Saya so lalon makagunggona. Magmaliw a main-inomay yon naawat a sanasawa iray kakapuyan tan lingo na sakey tan sakey tan mantultuloy kayon makapantepelan tan mabulos a makapanperdonaan. (Colosas 3:13) “Diad sakey a maabig a panamaley,” kuan na sakey a libro, “walay posibilidad a nalingo kayon dua, anggaman ontan et wala met so posibilidad a mansiansia so panamaley.”

Diad agew na kasal mo, sikay akisipanan, aliwan diad letnegan na panangasawa, noagta diad toon mabilay​—say asawam. Nepeg a sayan katuaan so walaan na aralem ya epekto ed paraan na panagnonot tan kakikiwas mo natan bilang de-asawa la. Agka ta onabobon a nepeg moy mansiansia ed asawam aliwa labat a lapud mabiskeg mon papanisiaan so inkasagrado na panangasawa noagta lapud inarom so too ya inkasal mo?

[Paimano ed Leksab]

[Kahon/Litrato ed pahina 5]

What You Can Do Now

How does your marriage fare with regard to commitment? Perhaps you see room for improvement. To strengthen your commitment, try the following:

● Make a self-examination. Ask yourself: ‘Am I truly married at heart, or am I still thinking and acting as a single person?’ Find out how your mate feels about you in this area.

● Read this article with your spouse. Then, in a calm manner, discuss ways that you can strengthen your commitment to your marriage.

● With your mate, engage in activities that strengthen your commitment. For example: Look at photographs of your wedding and other memorable events. Do things that you enjoyed during courtship or in the early years of your marriage. Study together Bible-based articles from The Watchtower and Awake! that pertain to marriage.

[Kahon/Litrato ed pahina 6]

Diad Panamaley, Nalalanor ed Sipanan so . . .

● Obligasyon “Sumpalen mo so sipan mo. Magmaong ya agka mangisipan, nen say mangisipan ka tan agmo sumpalen.”​—Eclesiastes 5:4, 5.

● Pankimey a Saniba “Magmaong so duara nen say sakey . . . Ta no niparukol so sakey ed sikara, nayarian na sananey a bangonen so kaiba to.”​—Eclesiastes 4:9, 10, NW.

● Dilin-Panagsakripisyo “Lalo a mapalar so mangiter nen say mangawat.”​—Gawa 20:35.

● Panmoria a Permanente so Panamaley “Say aro . . . amin sungdoan to.”​—1 Corinto 13:4, 7.

[Saray litrato ed pahina 7]

Sano kaliktan na asawam so mansalita, kasin ontatalineng ka?