Tepetepet Manlapud Saray Managbasa

Anto so kabaliksan na wala so “bilay ed inkasikato”?

Sinaglawi na Biblia a si Jesu-Kristo so walaan na “bilay ed inkasikato” tan saray patumbok to so walaan na ‘bilay ed inkasikara.’ (Juan 5:26; 6:53) Balet mandumaan so kabaliksan na sayan duaran teksto.

“Unong a say Ama wala so bilay to ed inkasikato,” kuan nen Jesus, “ontan met so impangiter to ed Anak a wala so bilay ed inkasikato.” Antis ton sinalambit itan a makatantandan balikas, oniay inkuan nen Jesus: “Tua, tua, kuan ko ed sikayo, Say ondengel na salitak, tan manisia ed saman so angibaki ed siak, wala so bilay to a maando . . . Say oras so onsabi, tan natan la, sano narengel na saray inaatey so boses na Anak na Dios et saray ondengel nabilay ira.” Dia et tutukoyen nen Jesus so nikadkaduman pakayari ya inter ed sikato na Ama​—say abilidad a mangiter ed totoo na naabobonan a talindeg ed imaton na Dios. Sakey ni, sarag nen Jesus a paolien iramay inaatey tan ikdan ira na bilay. Say impakawalaan nen Jesus na “bilay ed inkasikato” et mankabaliksan a sikatoy naikdan na sarayan pakayari. Singa say Ama, say Anak et wala met ed “inkasikato so langkap na bilay,” unong a nayarin pangipatalos met ed saray salita. (Juan 5:24-26) Komusta iray patumbok to?

Manga sakey taon ed saginonor, impaliwawa nen Jesus ed saray dumerengel to, a kuanto: “Tua, tua, kuan ko ed sikayo, No agkayo mangan ed laman na Anak na too tan agkayo oninum ed dala to, andian kayo na bilay ed inkasikayo. Say mangan na laman ko tan oninum na dalak walaan na maandon bilay, tan sikato so paolien ko ed bilay ed kaunoran ya agew.” (Juan 6:53, 54) Dia et tutukoyen nen Jesus a mipara so pakawalaan na “bilay ed inkasikayo” ed pakagamor na “maandon bilay.” Saray balikas a miparay gramatikon inkisulat da a singa ed say pakawalaan na “bilay ed inkasikayo” so naromog ed arum a kabiangan na Griegon Kasulatan. Say duaran alimbawa et, “Wala komon so asin ed sikayo” tan “inako ra ed inkasikara a dili so gunggona.” (Marcos 9:50; Roma 1:27) Diad sarayan alimbawa, saray balikas so agmangisusuheri na pakayarin manginabang na asin ed arum odino mangiter na tumang ed siopaman. Imbes, say akindalem ya inkanaspot, odino inkasigpot so nipabitar. Kanian, say balikas a “bilay ed inkasikayo” ya inusar diad  Juan 6:53 et mankabaliksan lambengat na pakagamor ed mismon inkanaspot na bilay.

Sanen tinukoy nen Jesus iray patumbok to bilang walaan na bilay ed inkasikara, sinaglawi to met so laman tan dala to. Diad saginonor, sanen inletneg to so Pangdem na Katawan, sinalambit lamet nen Jesus so laman tan dala to tan ingganggan to iray patumbok ton magmaliw a kabiangan ed balon sipanan a mibiang ed saray emblema na tinapay ya andi-lebadura tan alak. Kasin kabaliksan na satan a saramay alanaan a Kristiano lambengat, a wala ed balon pisisipanan ed si Jehova a Dios, so makagamor ed satan ya inkanaspot na bilay? Andi. Sakey taon so baetan na sayan duaran okasyon. Saramay akadngel ed salita nen Jesus a nikurit diad Juan 6:53, 54 so andian na pikakabat ed tinaon a selebrasyon a walaray embleman mangirerepresenta ed laman tan dala nen Kristo.

Unong ed Juan kapitulo 6, unona et inkompara nen Jesus so laman to ed mana, a kuanto: “Saray atateng yo angan ira na mana ed kalawakan, et inatey ira. Saya sikato so tinapay a mabilay ya onlasor a manlapu ed tawen, pian say too a makapangan ed sikato, et ag-ompatey. Siak so tinapay a mabilay a linmasor a nanlapu ed tawen; no wala so mangan ed saya a tinapay, manbilay lawas.” Say laman nen Jesus, pati say dala to, so mas matalonggaring nen say literal a mana. Panon? Diad pantalos a say laman to so niiter a para “ed bilay na mundo,” a ginawa ton posibli so andi-anggaan a bilay. * Kanian, say balikas nipaakar ed pakawalaan na “bilay ed inkasikara” diad Juan 6:53 so onaplika ed amin na saramay makaawat na andi-anggaan a bilay​—diad tawen man odino diad dalin.​—Juan 6:48-51.

Kapigan naawat na saray patumbok nen Jesus so bilay ed inkasikara, odino makarapat ed inkanaspot na bilay? Parad saray alanaan a mananawir na Panarian, nagawa itan sano onoli ra ed mangatatawen a bilay bilang imortal ya espiritun pinalsa. (1 Corinto 15:52, 53; 1 Juan 3:2) Saray ‘arum a karnero’ nen Jesus so makarapat ed inkanaspot na bilay sano anampot la so Sanlibon Taon ya Uley to. Diad satan a panaon et sikara so asubok la, apaneknekan lan matoor, tan niyabawag lan matunong parad andi-anggaan a bilay diad Paraison dalin.​—Juan 10:16; Apocalipsis 20:5, 7-10.

[Paimano ed Leksab]

[Saray litrato ed pahina 31]

Amin a tuan Kristiano so nawalaan na ‘bilay ed inkasikara’