Apasegsegang Nisengeg ed Inkatunong

“Mapalar iray apasegsegang la nisengeg ed katunongan.”​—MATEO 5:10.

1. Akin a si Jesus et walad arapan nen Poncio Pilato, tan anto so imbaga nen Jesus?

 “NISESENGEG ed saya nianak ak tan nisengeg ed saya linma ak dia ed mundo, pian tasian ko so katuaan.” (Juan 18:37) Sanen imbaga nen Jesus iratan a salita, sikato so walad arapan nen Poncio Pilato, say Romanon Gobernador na Judea. Wadman si Jesus, aliwan lapud nilabay to odino lapud sikatoy inimbitaan nen Pilato. Imbes, sikato so wadman lapud sikatoy palson inakusaan na saray Judion relihyoson lider bilang managgaway-mauges a makanepegan na ipapatey.​—Juan 18:29-31.

2. Panon so inkiwas nen Jesus, ya angitonton ed anton nansumpalan?

² Amtan maong nen Jesus a si Pilato so walaay autoridad a mangibulos odino mamapatey ed sikato. (Juan 19:10) Balet ag-itan angamper ed makpel ya impansalita to ed si Pilato nipaakar ed Panarian. Anggaman napepeligro so bilay nen Jesus, inanamot to so pankanawnawa pian mantasi ed sankatageyan a pakauley ed gobierno diad saman a rehyon. Anggaman sikato so nantasi, si Jesus so kinondena tan pinatey, a makapaot-ot ya inatey diad panamairapan a kiew bilang martir.​—Mateo 27:24-26; Marcos 15:15; Lucas 23:24, 25; Juan 19:13-16.

Tasi Odino Martir?

3. Anto so kabaliksan na salitan “martir” ed panaon na Biblia, balet anto natan so kabaliksan na satan?

³ Parad dakel a totoo natan, say sakey a martir et singa met lanlamang panatiko. Saramay mabulos ya ompatey nisesengeg ed sisiaen da, nagkalalo la no relihyoson sisiaen, so mabetbet ya iinapen bilang terorista odino sakey a kapeligroan ed sosyedad. Balet, say salitan martir so nanlapud Griegon termino (marʹtys) a diad panaon na Biblia et mankabaliksan na “tasi,” a nayarin mantetestigo diad sakey a bista ed korte, nipaakar ed katuaan a papanisiaan to. Agano ni labat so impamawala ed kabaliksan a “say sakey a mangibuibuis na bilay to lapud tatasian to,” odino mantatasi ni ingen diad impangiter toy bilay to.

4. Manuna, anto so kabaliksan na impagmaliw nen Jesus a martir?

⁴ Si Jesus et sakey a martir unong ed akadkaunan kabaliksan na salita. Unong ya inkuanto la ed si Pilato, sikato so sinmabi pian ‘tasian so  katuaan.’ Say impantasi to so angisagyat na nanduruman tuloy a reaksion na totoo. Saray arum a totoo so atenyeg a maong ed nadngel tan anengneng da, tan anisia ira ed si Jesus. (Juan 2:23; 8:30) Saray ulop na totoo ed inkalapagan tan nagkalautla ed saray relihyoson lider so walaan met na negatibon reaksion. Oniay impabitar nen Jesus ed saray agmananisian kakanayon to: “Say mundo agto kayo nayarin gulaen, balet sikato gulaen to ak lapud panatasik ed sikato, a saray gawa to sikara so mauges.” (Juan 7:7) Lapud tatasian nen Jesus so katuaan, sinmanok iray lider na nasyon ed sikato, ya angitonton ed impatey to. On, sikato so “tasi (marʹtys) a matoor tan matua.”​—Apocalipsis 3:14.

“Gulaen Da Kayo Naani”

5. Kasaksakbayan ni na ministeryo to, anto so imbaga nen Jesus nipaakar ed panamasegsegang?

⁵ Aliwa lambengat a si Jesus a mismo so anagmak na maruksan panamasegsegang noagta pinasakbayan to met iray patumbok to a nagawa met itan ed sikara. Kasaksakbayan ni na ministeryo to, oniay imbaga nen Jesus ed saray onderengel ed sikato diad Sermon to ed Palandey: “Mapalar iray apasegsegang la nisengeg ed katunongan; ta sikaray makankien na panaria’y tawen. Mapalar kayo sano balawen da kayoy totoo, tan pasegsegangen da kayo, tan salitaen day amin a nengneng na mauges a sumpa’d sikayo, nisengeg ed siak, a mantila ra. Manggayaga kayo tan manliket kayon mapalalo; ta balbaleg so tumang yo ed tawen.”​—Mateo 5:10-12.

6. Anto so impasakbay nen Jesus sanen imbaki to iray 12 apostoles to?

⁶ Diad saginonor, sanen imbaki nen Jesus so 12 apostol to, oniay kuan to ed sikara: “Manlikas kayo ed saray totoo; ta isaklang da kayo naani ed saray konsilyo, tan leweten da kayo naani ed saray sinagogas da. On, tan niakar kayo naani ed arap na saray makauley tan arari nisengeg ed siak, pian pamintuan ed sikara tan ed saray Gentiles.” Balet aliwa labat a saray relihyoson pakauley so mamasegsegang ed saray babangatan. Oniay inkuan met nen Jesus: “Say agi yawa’to naani agi to ed ipapatey, tan  say ama yawa’to so anak to. Tan saray anak onsumpa ra ed saray kaatengan da, tan sikara so papatey da naani. Tan gulaen da kayo naani na saray amin a katooan nisengeg ed ngaran ko: et bangsay mansungdo ya angga ed kasampotan, sikato lanlamang naani so nilaban.” (Mateo 10:17, 18, 21, 22) Say katuaan na saratan a salita so paneknekan na awaran na saray inmunan-siglon Kristiano.

Sakey ya Awaran na Matoor ya Impansungdo

7. Anto so angitonton ed impagmaliw nen Esteban a martir?

⁷ Kayarin tuloy na impatey nen Jesus, si Esteban so sankaunaan a Kristiano ya inatey lapud impantasi to ed katuaan. Sikato so “napno na grasya tan pakayari, nanggawa na angkakabaleg a makapakelaw tan tanda ed saray ombaley.” Saray relihyoson kakabusol to et “agda naraeg so kakabatan tan espiritu a pisasalita to.” (Gawa 6:8, 10) Lapud napno ira na imon, inggayugoy day Esteban ed arap na Sanhedrin, say atagey a korte na Judio, a diman to inarap iray palson mangaakusa ed sikato tan angiter na mabiskeg a pantasi. Balet, diad kaunoran et sayan matoor a tasin si Esteban so pinatey na saray kakabusol to.​—Gawa 7:59, 60.

8. Panon so inkiwas na saray babangatan diad Jerusalem ed panamasegsegang a sinmabi ed sikara kayari na impatey nen Esteban?

⁸ Kayari na impamatey ed si Esteban, “agawa so baleg a pamasegsegang ed iglesia a wala ed Jerusalem, et nibuyak ira ya amin ed saray dalin na Judea tan Samaria, likud so saray apostoles.” (Gawa 8:1) Kasin inamper na panamasegsegang so Makristianon panagtasi? Diad pisunian, ibabaga ed sikatayo na salaysay a ‘saramay abuybuyak, nanakar-akar ira ed amin a kadalinan ya angipulong na Salita.’ (Gawa 8:4) Talagan alikna ra met so alikna nen apostol Pedro sanen oniay akadkaunan imbaga to: “Nakaukolan ya unoren mi so Dios, nen saray totoo.” (Gawa 5:29) Anggaman ed panamasegsegang, saraman a matoor tan makpel a babangatan so nantultuloy ed kimey a panagtasi ed katuaan, anggaman amta ran mangitonton itan ed nagkalalon kairapan.​—Gawa 11:19-21.

9. Anton panamasegsegang so nantultuloy ya agawa ed saray patumbok nen Jesus?

⁹ On, tuloytuloy so kairapan. Unona, naaralan tayo a si Saul​—say toon siaabobon a nanimaton ed impantupak ed si Esteban​—so “maningas ni ed pangigagaem tan panagpatey ed saray binangatan na Katawan, linma ed manunaan na saray saserdotes. Et kinmerew ed sikato na sulat, ya onla ed Damasco, ed saray sinagoga, piano no wala so naromog ton arum a wala ed sayan Dalan, lalaki odino bibii, iyakar to ra a balor ed Jerusalem.” (Gawa 9:1, 2) Insan, sanen manga taon 44 K.P., “si ari Herodes inyuna’to ray lima to pian duksaen to ray pigaran kabiangan na Iglesia. Et pinatey to ed kampilan si Santiago ya agi nen Juan.”​—Gawa 12:1, 2.

10. Anton rekord na panamasegsegang so naromog tayo ed Gawa tan Apocalipsis?

¹⁰ Lugan na arum a kabiangan na libroy Gawa so permanentin rekord nipaakar ed saray subok, inkipangaw, tan panamasegsegang a sinungdoan na saray matoor a singa si Pablo, say datin manamasegsegang a nagmaliw ya apostol, a nayarin inatey bilang martir diad lima nen Romanon Emperador a si Nero nen ngalngali 65 K.P. (2 Corinto 11:23-27; 2 Timoteo 4:6-8) Diad kaunoran, diad libro na Apocalipsis, a nisulat nen mansamposampot so inmunan siglo, naromog tayo a nipriso so masiken lan apostol Juan diad panangipangawan ya isla na Patmos “lapu ed salita na Dios tan say impantasi nen Jesu-Kristo.” Lugan met na Apocalipsis so impanukoy ed si “Antipas a tasik, a matoor ko, ya inatey” ed Pergamo.​—Apocalipsis 1:9; 2:13.

11. Panon ya apaneknekan ed saray agawa ed akadkauna iran Kristiano a tua iray salita nen Jesus nipaakar ed panamasegsegang?

 ¹¹ Amin na saya so mamaneknek a tua iray salita nen Jesus ed babangatan to: “No pinasegsegang da ak, pasegsegangen da kayo met.” (Juan 15:20) Saray matoor a Kristiano nensaman so mabulos ya angarap ed pirmin subok, ipapatey​—diad panamairap, diad impangibuntok ed sikara ed saray atap ya ayep, odino ed antokaman nin paraan​—ta pian nasumpal da so ganggan manlapud Katawan a Jesu-Kristo: “Sikayo so tasik ed Jerusalem, tan ed amin a Judea tan Samaria, tan angga ed kasampotan na dalin.”​—Gawa 1:8.

12. Akin a say panamasegsegang ed saray Kristiano et aliwa lambengat ya agawa ed apalabas?

¹² No isipen na sakey a say ontan a maruksan impanmaltrato ed saray patumbok nen Jesus so agawa lambengat nensaman, sikato so nalilingo. Si Pablo, a naimano tayon nansungdo met ed pirmin kairapan, so nansulat: “Amin so saramay malabay a manbilay ed sinasanto ed Kristo Jesus, manako’ra naani pamasegsegang.” (2 Timoteo 3:12) Nipaakar ed panamasegsegang, oniay inkuan nen Pedro: “Ta saya so inkatawag yo: ta si Kristo nairapan met lapu ed sikayo, dia ed impangitilak to na panuliranan, pian tumboken yo so baka’to.” (1 Pedro 2:21) Angga ed sarayan “kaunoran ya agew” na sayan sistema na bengabengatla, saray totoo nen Jehova so nantultuloy a nagmaliw a puntirya na panggula tan panagbusol. (2 Timoteo 3:1) Diad interon dalin, diad silong na saray uley na diktador tan ed demokratiko iran daldalin, saray Tasi nen Jehova so anagmak na panamasegsegang, balanglan sinansakey tan bilang grupo.

Akin a Ginula tan Pinasegsegang Ira?

13. Anto so nepeg a nodnonoten na saray modernon-agew a lingkor nen Jehova no nipaakar ed panamasegsegang?

¹³ Anggaman panggagayagaan na maslak ed sikatayo natan so relatibon kawayangan pian makapanpulong tan makapantitipon itayon mareen, nepeg tayon talinengen so panonot na Biblia a “say ugali na sayan mundo nanaebas.” (1 Corinto 7:31) Maples a manguman iray bengatla kanian no ag-itayo akaparaan ed mental, emosyonal, tan espiritual a paraan, mainomay itayon nagapol. Anto sirin, so nagawaan tayo pian nasalimbengan tayo so inkasikatayo? Say mabiskeg a salimbeng ed dili et say pansiansian sinononot no akin a gugulaen tan papasegsegangen iray Kristiano a maaro ed deen tan matulok ed ley.

14. Anto so imbaga nen Pedro a rason no akin ya apasegsegang iray Kristiano?

¹⁴ Kinomentoan itan nen apostol Pedro diad primeron sulat to, ya insulat to nen ngalngali 62-64 K.P., sanen saray Kristiano ed interon Romanon Empiryo so anagmak na saray subok tan panamasegsegang. Inkuanto: “Inararok ira, agyo komon pankelawan so inmapoy a panali ed sikayo, ya onsabi ed sikayo pian pakasalian yo, singa bilang bengatla a pankelawan a nagawaan ed sikayo.” Pian nipaliwawa no anto so sasaglawien to, oniay intuloy nen Pedro: “Aleg komon ya anggan siopa ed sikayo manlikna na irap a singa sakey ya akapatey, o matakew, o managgaway mauges, o lapud pibiang to ed gawa na arum a too: Balet ta no wala so napairap a singa Kristiano, agto ibaing; noag ingen igalang to so Dios ed sayan ngaran.” Impabitar nen Pedro a sikaray manirap, aliwan lapud gawan-mauges, noagta lapud impagmaliw dan Kristiano. No sikara komon so nigagalet “ed alablabas a kamoanan” a singa ed saray totoon walad kaliberliber da, sikara so awaten tan labayen na saray totoo. Balet say tua et sikara so nanirap lapud nanggunaetan dan sumpalen so betang da bilang papatumbok nen Kristo. Mipadpara so kipapasen na saray tuan Kristiano natan.​—1 Pedro 4:4, 12, 15, 16.

15. Anto so naiimano a pansumlangan ed panagtrato ed saray Tasi nen Jehova natan?

¹⁵ Diad dakel a parte na mundo, saray Tasi nen Jehova so inrayew na totoo lapud pankakasakey tan pantutulongan ya impatnag da ed saray kombension tan ed saray panagpaalagey a proyekto ra, lapud inkamatua tan inkakuli ra, napanuliranan a kondukta ra ed moral tan ed bilay na pamilya, tan anggan ed saray maabig ya itsura tan awawey da. * Diad biek a dapag, say kimey  da so sesebelan odino pepegetan diad 28 a daldalin sanen nisulat iyan artikulo, tan dakel ed saray Tasi so anagmak na pisikal a panangabuso tan ipapatey nisesengeg ed pananisia ra. Akin ya ontan lay mapatnag a pansumlangan? Tan akin ya aabuloyan itan na Dios?

16. Anto so manunaan a rason no akin ya iyaabuloy na Dios so totoo to a managmak na panamasegsegang?

¹⁶ Manuna, nepeg a sinononot itayo ed saray salita na Uliran 27:11 “Ana’ko, onkabat ka, tan paliketen mo so pusok, pian naebatan ko so mamalaw ed siak.” On, lapud satan so abayaglan isyu nipaakar ed sankatalbaan ya inkasoberano. Anggaman ed dakerakel ya ebidensya ya intarya na amin na saramay amaneknek ed katooran da ed si Jehova diad loob na saray siglo, agni tinmunda si Satanas a mangantiaw ed si Jehova a singa ginawa to ed panaon na matunong a toon si Job. (Job 1:9-11; 2:4, 5) Anggapoy duaruwa, si Satanas so lalon mapayunget ed unor lan sagpot to pian paneknekan so ibabaga to, natan ta akaletneg lan malet so Panarian na Dios, a walaan na saray matoor ya uuleyan tan manangilaman diad interon dalin. Kasin mansiansia irayan matoor ed Dios antokaman ya irap so onsabi ed sikara? Saya so tepet a nepeg a personal ya ebatan na kada lingkor nen Jehova.​—Apocalipsis 12:12, 17.

17. Anto so labay ya ibaga nen Jesus ed saray salitan ‘saya so nagawa naani ed sikayo a panamatua’?

¹⁷ Diad pangibabaga to ed saray babangatan to nipaakar ed saray ebenton nagawa legan na ‘anggaan na mundo,’ impabitar nen Jesus so sananey nin rason no akin ya iyaabuloy nen Jehova so panamasegsegang ed saray lingkor to. Inkuanto ed sikara: “Yakar da kayo ed arap na saray arari tan saray makauley nisengeg ed ngaran ko. Et saya nagawa naani ed sikayo a pamatua.” (Mateo 24:3, 9; Lucas 21:12, 13) Si Jesus a mismo so nantasi ed arap nen Herodes tan Poncio Pilato. Si apostol Pablo met so ‘inyakar ed arap na saray arari tan makauley.’ Lapud inwanwan na Katawan a Jesu-Kristo, nanggunaet si Pablo a mangiter na pantasi ed maimpluensian tuloy a manuley ed saman a panaon sanen oniay inyabawag to: “Ompanon ak ed Cesar.” (Gawa 23:11; 25:8-12) Mipadpara met natan, say makapaangat iran kipapasen so mabetbet a manresulta ed maabig a pantasi a niiiter ed saray opisyal tan ed publiko. *

18, 19. (a) Panon itayon nagunggonaan no natalonaan tayo iray subok? (b) Antoran tepet so konsideraen tayo ed ontumbok ya artikulo?

¹⁸ Diad kaunoran, say panalona ed saray subok tan irap so makagunggona ed sikatayon mismo. Diad anton dalan? Pinanonotan nen babangatan a Santiago iray kapara ton Kristianos: “Agagik ira, ibilang yo ya amin a liket no napelag kayo ed nambabangil a katuksoan; amtaen yo a say panalsali ed pananisia yo gawaen to so anos.” On, say panamasegsegang so mamino ed pananisia tayo tan mamabiskeg ed panagsungdo tayo. Agtayo sirin natatakot, nisay mananap itayo na agmakasulatan iran paraan pian napaliisan odino patundaen itan. Imbes, talinengen tayo so simbawa nen Santiago: “Paulyan komon so anos a wala so ayadyarin gawa to, pian ayadyari kayo komon tan napnek kayo ya andi-kulang.”​—Santiago 1:2-4.

¹⁹ Anggaman makatulong ed sikatayo so Salitay Dios pian natalosan no akin a napapasegsegang iray matoor a lingkor na Dios tan no akin ya iyaabuloy itan nen Jehova, satan so agmet mamakepa ed panamasegsegang. Anto so mamabiskeg ed inkasikatayo pian nasungdoan itan? Anto so nagawaan tayo sano nipaarap itayo ed panamasegsegang? Konsideraen tayo irayan importantin pamaakaran ed ontumbok ya artikulo.

[Saray paimano ed leksab]

Kasin Nipaliwawa Yo?

• Manuna, anto so kabaliksan na impagmaliw nen Jesus a martir?

• Anto so epekto na panamasegsegang ed saray Kristiano nen inmunan siglo?

• Unong ya impaliwawa nen Pedro, akin ya apasegsegang iray inmunan Kristiano?

• Antoray rason no akin ya iyaabuloy nen Jehova a napasegsegang iray lingkor to?

[Tepetepet Parad Panagaral]

[Saray litrato ed pahina 10, 11]

Nanirap iray inmunan-siglon Kristiano, aliwan lapud antokaman a gawan-mauges, noagta lapud impagmaliw dan Kristiano

PABLO

JUAN

ANTIPAS

SANTIAGO

ESTEBAN